حق الفطور

[خالد الصائغ]

المشاركة الأصلية كتبت بواسطة شليل

أهلين يا خالد ..
بحترم تصوًرك ككل ، لكن رايي الشخصي إنو من الصعب تحديد تكلفة ثابتة في ظل تردي الأوضاع الإقتصادية وفوضى السوق ، فكلما ختينا هامش كلما كان أفضل عشان نقدر نواجه تقلبات السوق ونغطًي راتب/ نثرية الأسرة الحتعد الإفطار.. ده رايي الشخصي ومافي زول ملزم بيهو ، الراي البنتفق عليهو هو البيمشي.
بتفق معاك في تحديد المدرسة ، الحصول على موافقة الإدارة ، وبتحفًظ على نقطة حصر عدد الحالات المراد الوصول ليها ، لأنها نقطة حساسة ، فمن ناحية أنفه وكبرياء الواحد ممكن يحرد ، ومن ناحية تانيه بتلقى إنو ديل أطفال ما مسئولين عن تصرفاتهم فأحسن تعمل عليهم كونترول..
ممكن نسمع آراء الإخوة والأخوات في النقاط الأشار ليها خالد ؟

تحياتي.

المشاركة الأصلية كتبت بواسطة طارق صديق كانديك

صباح الخير خالد/شليل

بتفق مع ملاحظات شليل حول مداخلة خالد وأوكد على المعلم بالأزرق ده

لكم تحياتي

ناضر التحايا شليل و طارق

يبدو إنو حديثي عن مسألة (الحصر) قد فهم في إطار إنو أنا قاصد (الفرز) بمعني تمييز المستحقين فقط للوجبة من الطلبة.
و لا أخفي عليكم إنو في البداية كنت رامي لي كدة لكن بعد داك قلبي أكلني.
أتفق معاكم في إنو الشغلانة لازم تكون شاملة لكل الطلبة في المدرسة الواحدة غض النظر عن توفير الاسرة للإفطار من عدما.

و الحتة دي لفتت نظري لأمر آخر ممكن نصطحبو عن إختيار المدرسة موضوع المشروع.
إنو الشباب في السودان يوجهو جهدهم بقدر الإمكان لإختيار مدرسة يكون فيها نسبة الطلبة غير المستطيعين كبيرة عشان نضمن إنو المشروع يحقق أكبر قدر ممكن من أهدافو.
و أنا بقول الكلام ده و مدرك تماما صعوبة النقطة دي و حساسيتا لكن أتصور إنو ممكن إدارات المدارس و المعلمين فيها يساعدو في حسم الحتة دي من واقع التصاقم بأحوال مدارسم.

برضو يا شليل و طارق أنا بفكر معاكم بي صوت مسموع في مسألة صعوبة تقدير تكلفة ثابتة للوجبة في ظل تقلب أوضاع الأسعار و الأحوال في السودان.

و لكن كيف سيتسني لنا تحديد تصور للميزانية يكفل لنا الحركة في إتجاه صحيح لتوفير الدعم دون هذه الخطوة ؟؟

و عشان نتلافي المطب ده

هل ممكن يكون في إقتراح بتقدير قيمة نقدية ثابتة و متحركة تبعاً لحركة المشروع تكون بمثابة إحتياطي (ميزانية إدارة مخاطر) لسد أي فجوة محتملة في الميزانية.
يعني مثلا الإحتياطي ممكن يكون 5% أو 3% أو أي نسبة واقعية من مجمل الميزانية.

يخوانا أنا قومة النفس دي و الله في شان إنو ميزانية مشروعنا ده تبري و تستبري من متلازمة الترقيع حال ميزانية حكومة السودان

و أكيد يا أحباب نحن متفقين تماما إنو نقاشنا هنا بمثابة عصف ذهني بهدف الوصول مع بعض لي صيغة واقعية للمشروع أكتر من كونو مقترحات نهائية أو ملزمة.