القفلة .........في الدويم

[قوت القلوب]

كل
مولد وانتم بخير

وصلى الله عليه وسلم
الهادي الامين

احتفل السودان بمولد النبي الشريف صلى الله عليه وسلم منذ ان عرف الصوفية
وكانت الاحتفلات تبدأ منذ اليوم الاول من ربيع
الى يوم مولده
ويسمى بيوم القفلة
فيا ليتكم حضرتم قفلة الدويم
تلك المدينة العادية التي حملت بداخلها الصرح التعليمي العظيم بخت الرضا
التي يتذكرها اي معلم واي تلميذ يقوم بتصفح الكتاب المدرسي من الصفحة الاولى
والقفلة للحناكيش
مش الزعلة
هي يوم الثاني عشر من ربيع يعني ليلة مولده(صلى الله عليه وسلم )

و احاول احكي ليكم شوية من تلك الايام النواضر
يبدأ عندنا من أول يوم من ربيع كما اسلفت بزفة تجوب الشوراع الريئسية وتنتهي الى مكان المولد وهو اكبر ساحة في الدويم وكانت قرب البحر قبل ان تمتد اليها ايادي الجور
وعلى مااذكر كانت توجد خيم للطرق الصوفية
وكانت تزين بواسطة (رايات)من قطع متعددة الالوان
وبعض_ الانوار (لان الكهرباء كانت بتقطع)
وبنشوف الرتاين والفوانيس
والشموع
وتميزت خيمة الحكومة بالجيهة
والخدمات
وكنا نتبع امي التي كانت بحكم انتماء العائلة والاب شيخ البلد(السابق) للطريقة الاحمدية البدوية
ونمشي مع الوالد عليه رحمة الله
للخدمات ووجود كبار الموظفين المحافظ مثلا
(وهاك ياعصير قازوزة
وحلاوة
وبعدها
نطالب بالطوطحانية
ماغلط
دي المرجيحة بلغت الحناكيش)

اما ننوم اونرجع للحجة لاكل السندوشات
وده اليوم الاول
تاني بتكون في جية برضو تتكرر فيها نفس المشاهد
ولكن يوم القفلة اللهو يوم عيدنا
العشاء مكرب واللبس ( غير ) واخر قشرة
طبعا فيها زحمة .........مبالغة الاعمى شايل مكسر
ودي حقيقة والعجاجة كاربة
والنوبات تكترضرباتها
بس البتذكرو
التقول الراجل البجبيوه مصاحب الكابلي داك ياهو بتاع النوبة
والفرح يغمرنا عندما تزداد ضمات امي وتزود في العطايا حتى لانفلت منها في الزحمة
وبين الحين والحين نسمع صراخ بعض الاطفال
وجزع كتير من الامهات لضياع اطفالهن وسط الزحمة

والغريب في الامر يمتد بنا السهر حتى الساعات الاولى من الصباح
وقبل المغادرة يكون كل واحدة مننا انا واختي الكبيرة اخدنا اكبر بنتين
وكا وينا بنات الخالات اذا كانو اصغرمن بناتنا
والاولاد ليهم الحصان الدبل او الحصان ومعاه حاجة تانية
وطبعا كم شكل من الحلاوة المشكلة
لكوم والسمسمية كانت تستهويني
ودي القفلة البتذكرها وانا طفلة
وبعد
اسمع منكم ذكرياتكم عن قفلاتكم
احكي ليكم ماعرفته عن اهتمام الاغلبية بالقفلة
وطعمها الخاص في تلك المدينة الطاعمة واهلها[