يومي الكسبت اللوتري وبقيت مليونير
تتغير احوال البشر كما يتغير الجو
يوم فوق ويوم تحت، يوم جعان ويوم شبعان، يوم تحب ويوم تكره، أيام تكون زهجان (التحية لزهيجان) ولحظة تكون فرحان (قدر ما الواحد كان طموحو في وجبة فول كاربة عند الجان بقى بفكر بعشوة في الريتز والله ما الرتز ما دا كان المحل بتاع العشاء الأخير لدودي (الفايد) وديدي (أميرة ويلز))
أوقات تكون من الهم محموم ومن اللحظة حياتك تنقلب لا حزن ولا هموم.
ودا البقى عليا، شنو الحصل؟؟؟؟؟؟
وأنا في طريقي أخر تسويق قبل السفر للإمارات غشيت دكان كدا في لندن، سيدو هندي (طبعن دي ما فيها آي إثارة!! ما الدكاكين كلها حقت (هنود) ذي ما في السودان كان الدكاكين اسيادها (يمنيين) وفي فترة عقبتها كانو (راواوين) يعني من (ود رااوا).
غشيت الدكان والهندي راسم ليهو بسمة عريضة في وشو والراس بس بندال بتعا الساعة، طبعن من أساليب التنويم المغنطيسي، تلوح ليك حاجة متدليه وتخلي الزول (ما الزوول) يركز فيها ويظهر الهنود وهم شيوخ السحرة، يستعملون هذا الاسلوب لتسويق بضاعاتهم في السوبر ماركتات.
تم في ما يبدو تنويمي منغطسيا وأنا العارف لنفسه ومدي نحسه، أمات في نفسي آي كبير غرض في الشروع في مما يعود علي بالإحباط. إشتريت تذكرة بي عدد واحد جنية ولسان حالي العن وأسخط على هذا الساحر وتنويمه المغنطيسي لي.
على مضض شلت التذكرة ورجعت البيت بجنية أقل.
الفضول ولا منادي نادا، ما عارف؟ لكن في طريقي للمطار وأن مسافر، غشيت الدكان أوني النفس أن الهندي من ما يشوفني يصرخ، تذكرتك كسبت.
وحياتك الهندي إتلفت مني غادي وأنا الزبون الدائم كل يوم بتمم عندو التقول طابور صباح... سبحان الله عشان يجرد مني جنية قابلني ضاحك مبتسم واليوم يمكن يكون لقى ليه ضحية تانية ما عبرني.
أديتو التذكرة وعرضها لجهاز كشف الأرقام. (الشرطة تستعمل جهاز كشف الكذب ومعيار القياس فيهو مربوط بزيادة ضربات القلب، لأنو الانسان في أي حال غير طبيعي ينعكس على سرعة ضربات القلب)
وبما أني ما خاتيها في آخر بال وما هامني ما النحس بيعمل للزول حصانة من عوامل الحظ السعيد وبيركز على جانب الحظ النحس، ضربات قلبي كانت عادية وانا بارد وهاديء. أخد الهندي التذكرة وفجاءة عاين ليا وراسو العامل ذي البندال ركز كانو صنم، عيونو بقت قدر كورة الشوربة، أكبر عشر مرات من الفنجان، حنكه الأسفل وصل تفاحة آدم، شعرو السبيبي وقف ذي أبو القنفد.
أنا شعرت أنو في حاجة غلط؛ يا ربي الجهاز فيهو ماس؟ طقا الزول دا.
لا ما انا ثقة، يعني يكون إندهش التذكرة كسبت؟؟؟ لو كان معاي شخص تاني في الدكان كنت ختيت إحتمال في تذكرة كسبت.
الهندي يعاين ليا وذي ما بيقولو الانجليز أسياد اللوتري الربحتها، الهندي كان speechless وأنا جاتني فحة في قلبي، إتكلت على الكاونتر بتاع الدكان والتنميل بدء تسري في أطرافي، سقطة (أو بردة) كدا التقول فتحو فريزر، لفة في الرأس، طميمة، يا زول بقيت في حال بين الموت والحياة، الهندي صرخ:
u won z jack pot ما أخفي عليكم إتلفتا شمال يمين أشوف المقصود منو،،، لكن المحل ما فيهو إلا هو وأنا،،، يعني لو كان في مراية كنت ممكن أشوف إنعكاس صورة الهندي وأقول المقصود هو.
طبعن إتاخرت من السفر، ما بدل طيارة ركبت سيارة؟؟؟؟؟؟؟؟؟؟؟؟؟؟؟؟؟؟؟؟
لونها أبيض، فيها ناس لابسة أبيض، واحد خاتي ليهو سماعة في ضراعي وحاجة كدا في وشي وشعور بنغوشة بتاعت تخدير تسري فيني، ما دا كان آثر الأوكسجين الختوهو ليا في سيارة الإسعاف.
|
