مـــراسم فرح - قــطع الـــرحط

[imported_سمراء]

[imported_طارق الحسن محمد]

اقتباس:
المشاركة الأصلية كتبت بواسطة سمراء

جرتق شنو ياسمراء
والرحط لسة ما قطعناه
انا لسة عندى فيهو كلام والله

[imported_hamza]

المشاركة الأصلية كتبت بواسطة طارق الحسن محمد

اقتباس:
المشاركة الأصلية كتبت بواسطة سمراء

جرتق شنو ياسمراء
والرحط لسة ما قطعناه
انا لسة عندى فيهو كلام والله

انا عاوز حلاوة لكوم

[imported_محمد السني دفع الله]

تـرتـرة

تشظت الألوان من ثياب العروس وتناثرت على البرش الفرِحِ برقصتها واهتزت أطرافه طرباً من ترترتها على المساحة المزخرفة بزغاريد النسوة المغنيات ..
هيلا هيلا
دي الرايقا

تمشي الأقدام في حركة بطيئة ( رايقا ) رحلتها في منتصف البرش .. والعروس في زيها الأحمر البراق " معنكشة " بالذهب .. الخواتم .. الجنيه الإنجليزي .. و...والبوبار .. و...و واللازوردي والفرج الله .. وكرسي جابر والسوميته وخرزة العين الزرقاء والرشمة ممتدة من الأنف إلى خلف الأذن مستكينة " للفِــدَو " . نصف القمر عاملات هلال .. تماذج بين لوني الحياة ،الأحمر والذهبي ،.. الأحمر لون أساسي ملئ بالحيوية وكذلك الذهبي لون شعاع ضياء الشمس وبريق الذهب مصدر الثراء .. للألوان قوتها في ساقية شوفنا اليومي ، فلا مجال للصدفة ، فمن اختار هذا الزي يعرف معنى اللون وصدقه وقوته وونسته مع العيون ..

ويا الدهب ويا الدهب
ميزان الصعب
يا عينيا
يا حرير يا حرير
ميزان التقيل
يا عينيا


العريس يتقدم هاشاً باشاً لعروسته التي لا يرى منها سوى فستانها الأحمر ، لأن فركة القرمصيص تغطي المنطقة الأعلى لجسدها ، يداري ما يختلج في نفسه بحركات تفتقد السيطرة على إيقاعها ، فمرة يقفز ومرة يمشي ومرة يهز يديه للأصحاب ،، أبشِر بالخير ،،، عقبالك ،، مبروك يا عريس ،،، يعدِّل من وضع الهلال الذهبي على رأسه ويمسح بصورة عفوية على ثوبه الأبيض وجدلته الحريرية الحمراء ترقص مع الريح ...

هيلا هيلا
دي الرايقا
جات تعوم بي صديرا
دي الرايقا

الوزيرة تطلق زغرودة طويلة المدى تعبر الحي وتتلاشى تردداتها في المساحات البعيدة .. تعقبها زغاريد البنات والصبيات الصغيرات الحالمات حادة ومتنافرة .. ( يجي يجي يجي يجي ........ ) ( يجي يجي يجي يجي ........ ) ، كل من يسمع نداءها يحمل عصاه ويتوجه بسرعة نحو بيت اللعبة ...

وليد نادو ليَّ
كان نايم صحّــو ليّ
كان مافي شوفو ليّ

العريس يلف في دائرة كبيرة حول عروسته ،،،
أصل الرقص أن يدور الراقص حول ذاته ، وفي رقص العرس يدور العريس حول العروس في دائرة كاملة البهاء ،،، يدور ويدور ليتحول الخط الدائري اإلى هالة تحيط بالعروسين ليتحولا إلى جسد واحد يثير الحلقة ،، والزغاريد تلهب الحماس في أكف المغنيات ،، والإثارة تصل إلى قمتها ...

يا حبيب يلاك
عليك الله
نشوفا العروس
عليك الله

العروس تقف في ثبات خارجي ، معتدلة ، ودواخلها كمهرة السباق يمنعها السياج من الإنطلاق ،، حمامة ، يقيدها قفص الجماعة المبتهجة من التحليق إلى قمة نشوى الرقص واللحاق بالزغاريد عند السحاب ،،، تهز قدميها في حركة لا تلاحظ بالعين المجردة ،، حركة تحسها الحناء السوداء في أخمص قدميها وهي تتناغم مع ألوان البرش الغامقة .. البرش الذي يتمنى انزلاق قدميها عليه لتزيد من لمعانه جرّاء امتصاصه للزيت الذي يجعل من الحناء أكثر توهجاً . الوزيرة تهمس للعروس وهي تشير للعريس بيده ليتقدم ليمسك بطرف ( فِرْكة القرمصيص ) ، يبتسم العريس ويختلج وجهه بتعبيرات مختلفة ، يرفع القرمصيص ببطء وبتناغم مدهش تغني البنات :

العريس قمرا
يا الرايقا
فتّحي وشوفي
يا الرايقا

..عند إزاحة فركة القرمصيص ، وبعد أربعين صباحاً رآها .. الحِفلة الذهبية على رأس العروس ، تاج العفة ، زخرفة الحناء السوداء المدهشة تضفي على يديها بهاءاً ورونقاً ، أزهار الوينكا وصفق الورد الإنجليزي وخطوط ورموز الجداريات الكوشية مختصرة كلها في شفرة على حوافها عطور المحلب والسرتية والصندلية .. مع رعشة أنامل العروسة يلمع ويتلاصف الذهب ، بما يجعل الخواتم في حيرة من أمرها :

العريس قمرا
عليك الله
فتّحي وشوفي
عليك الله

وبرقة يمسك بيديها وينزلهما بلطف عن وجهها إلى جانبي جسدها ، الوجه يضيء براءة ، تهتز الرشمة هزة خفيفة ومعها الزمام ، الجسد يريد أن يحلق بجناحين من النغم والإيقاع .

من قال إن الأرواح ترقص على أطراف الرياح وتخترق اللهب ؟ من ؟

آه من الألم
من الألم
جف القلم

نواصل ترترة ...

تـرتـرة

[imported_محمد السني دفع الله]

ترترة
إيقاع الدلوكه يعلو في خط متصاعد ( كروشيندوو) نبراتها ترزم وتئن أنينا خفيفا ،
والأيدي تصفق وفق الإيقاع ، ينتظم النغم وأخذ يعدو مرنا شجيا ، مما جعل العريس تهدا انفاسه، ويستجمع شجاعته ليمسك حجبات العروس ، تخيلوا الشاجاعة بتودي وين؟؟ مسك حجباتا!!
(( حجابان من الجلد المصقول ، يقال أحدهما به سورة يسين، والثاني به آية الكرسي))..
عفتوا ليه زمان بقول لينا خلي عندك شجاعة أدبية .. لي جنس اليوم ده..شجاعة تحتاج اليها عندما ترى كل تلك العيون تنظر اليك ، وتحسب كل خطوة تخطوها،ويعدون انفاسك ويحصون حركاتك ،
العفوية ، والخجلة،وانت في دنيا وردية،بعد مانزلت الأيادي وبان الوجه الصبوح ،نظر اليها ،بعد اربعين صباح ،
ماذا يرى العريس في تلك اللحظة ، يرى وجهها؟؟؟لالالا!!يرى عقلها.. نعم يرى عقلها وده المعنى الفني والمقصود...يحدد وجهته عريسنا وينظر في الوجه الجميل ومن العيون يدخل عقلها
ويشوف أيامو الجاية وهي بتربي الشفع ..سبحان المصور..
قول : ماشاءالله ،تعيده الوزيرة بصوتها القوى الى السباته ن يسمع صوت المغنيات، كأنه ملك سمعا جديدا ،،
ماشاءالله
ماشاءالله
ماشاءالله
يتشجع اكثر يمسك العروس من الحجاب ، ليقودها اليه ،طائعة تاتي اليه ، مع الإيقاع عيونها الوساع الحدده بالكحل السود تخترق فؤاده لحظة وأغمضت شموسها من جديد،، ولكن ماحدث قد حدث ..
انفصل عن الكون ،واللوحة من حوله عبارة عن صورة متحركة، دون صوت ، صمت الرجال خلف الجميع يشاهدون من بعيد ، والعمات والخالات يتابعن بمحبة ولهفه ، ويتذكرن !! دائما في مثل هذه الملمات يتذكرن كل الأموات فترى الفرح في العيون ، وعلى الخدود الدموع....
اه من الألم
اه من الألم
يرى العريس حركة الأيدي التقليدية وهي تحاور الشفاه، ولكنه لايسمع الزغاريد،عروسه تتجه نحوه تهبه وجدانها المفتوح على قلبه ،يرقصان رقصة الوجد والعشق الأبدي ..الحركة تزداد سرعة ،تهمس الوزيرةاليه ،،تنزل يده تحت الرحط، يقطع سبعة خصل جلدية،،يرمي بها في البعيد،، تحمل معها الشرور السبعة ،الحسد،العقم،الكبسة، الفقر ،المشاكل،والجار النقار،والبيت الضيق،
والخصل طائرة في الهواءيلحقهاالهياج والصراخ والغناء والزغاريد
وابشر ياعريس
نواصل ترترة

[imported_جيجي]

ومعكم نترتر
وسلام للجمال حين ترترة
واااصل
عليك الله

[imported_أمير الأمين]

هذه لوحة زينة.. و جمال
ليست لتعليقها على رف حائط
او جدار سقف ..
انها لوحة تذوق .. و إنبهار
تفوح عبق جرتق.. و ضريرة
وشذى فرحها يعانق النفوس..


دُم بخير ايها "السنى"

[imported_زهير ابو سوار]

مبرووك عليك يا سمراء ..
وأبشر بالخير يا عريس ..

[الرشيد اسماعيل محمود]

سلام يا سمراء..
ودّ السنِّي ياخي كيّفتني..
دايماً أنا بقول إنو المسرحيين شوّافين..
الترترة:
تحميل لحظة تمرّ بالناس مروراً سريعاً.. ولكنك فيها تتأني لتري ما خفي عن العيون..
تزاوج بين لحظات الفرح وساعات الموت.. بين الماضي والحاضر وشوف المستقبل البعيد..
جدلية ورمزية اللون الأحمر والذهبي.. و ونسة اللون للعيون وصدقها.. البرش الذي يتمني انزلاق الأقدام عليه ليكون أكثر لمعاناً..
والإلتفاتة لسلطة الوزيرة.. و.و.. ياخي زاوية شوف تشهّي العرس..
مع التنويه بأنّ الشجاعة الأدبية متوافرة لدينا بشكل جيّد..
جميلة هذه الترترة..
في انتظار المواصلة..
لكن آه من الألم..
آآآه.

[imported_سمراء]

غايتو يا استاذ السنى لو لى حدوت باكر دى ماجاتنى شى من الصدمة ..قطع شك بكون اتوفيت
الله بسعلنى دخلته البوست ...ومرقته تانى قريت فى خشم الباب اسم سيدو !

اتاريو حقى الزمانك داك ومافى زول هببو لى ...هو انا زاتى ماهببتو لى روحى !

________
اها مابعد الهجمة :

اولاً لا اجد عبارة يا استاذ السنى كيما توفيك او تضيف لك شى من عندى ! فانت
حقيقى وبدون مجاملة (فنان مركز ) واذكر اننى ذكرتها لك من قبل فى مكان اخر .. اى انت (الخامة الاساسية للفن ) (وبعداك بزيدوك موية ويقسمو منك ..).
-عليك دينك رايك شنو فى التشبيه ده !! مامجنون ؟!)

حقيقى عجبنى كلام قالو المشوطن التانى الاسمو عماد عبد الله فى سودانيز اولاين فى بوست اخونا عبد الكريم (كيكى ) ، لمن اتعرض ليك فى مسرح الرجل الواحد حكاية (الطاهر السقا ) وحقيقى كانت من اروع ماشاهدت ليك والقامت رسخت جواى فكرة (الفنان المركز) اى الخام الاصلى ....
مسرحية كنت فيها مجموعة شخوص فى جسد واحد ، بكل انفعالاتها واحاسيسها !!

ذكر عماد عبد الله وقال :

ا

لسني مجنون يا كيكي ..
عندو بسم الله ..
يا حافظ يا حفيظ ..

السني يندهش إذا مثلا الباب عمل صوت و هو بيقفل .. مش حاجة عادية ؟؟
لأ .. السني بيشوف فيها : ( الباب بيتكلم و يعبر ) .. أها ده كلام ده ؟؟
مافي شي عندو جامد .. و مافي شي في الوجود ده عندو ما بيقول و يعبر , كل شي عند السني عندو لغتو و مداخلو و مخارجو .
في عربيتو في عرايس .. عرايس لعب .. دُمى .. و بلاوي غريبة , ورق و ملفات و بواقي شخبطات و حديد شكلو غريب كده و أربعة نضارات و زي عشرمية قلم , و ما عندو ساعة !!!
ما فارقه معاهو لو نطت في راسو فكرة ملهمة ينسى أي حاجة و يدور شغل مسرح مكرب جوه عربيتو .
و عندو كتابات عجيبة غريبة .. و كمان خطه سمح ( غريبة .. مش ؟؟ ) .. أي شي في الوجود و مكون لحركة الحياة السني بيمسرحو .. أي شي .
الزول ده ما بيشوف الحاجات زينا كده .. عندو ليها فهم تاني .. و الدنيا دي عندو بمجمل حاجاتا شي واحد و متماسك .. ناس و جماد و ظواهر و بلاوي , كله حاجة واحدة , زي نغمة كبيرة كده و متصلة من يوم مرقت من يد الله ليوم الليلة ده , نغمة ما عندها أول ولا آخر , و مستعد يغرق فيها و يغرف منها قدر ما الله سيدو ده أداهو .
الزول ما نصيح يا كيكي ..
السني ممكن يكون بيتكلم معاك و يعاين لشعرك .. وللا يدك وللا اللمعة الفي نخرتك وللا لفة لياقة القميص عندك , ما وشك و بس .. كل شي بيلقطو من زاوية يعرفها براهو و يوزنا براهو , لأنه ممكن يكون في شي عاملو شعرك مع الضو الوراك .. وللا صوتك دخل مع صوت عادم لوري بعيد وللا حتى تعبيرك لما قلت ليهو : قطع شك ,تفاصيل عادية عندنا و مملة و مكررة , عندو هو لأ .. ما مكررة ولا مملة .. فيها استمرارية جديدة و خاطرة أجدّ و زاوية لنج لمصيبة لافه في راسو البقى صغير بعد حلقو ده , فجأة ممكن يقول ليك كلام ينقلك لعالم خرافي مبني بس على زاوية الشوف ديك و وللا ربط الشوف الشافو ده يربطو ليك بذاكرتو ( و عندو ذاكرة بديعة ما شا الله ) ذاكرة فوتوغرافية مدهشة .. يجيب حاجة مرت عليهو من سنة حفرو البحر يلصقا ليك مع شي قبال ثانية حصل و يطلع منها شغل ما أنزل الله به من ... و بعد ده زول رقيق رقة الشفع ديك , و حساسيتو على الهبشة , و بيتحرج بسرعة عجيبة و يدخل في أضافرينو .. و أي حاجة جميلة تخلي في أم هلا هلا .. أي شي جميل يتعبو و يجهجهو .. كلمة سمحة .. بت سمحة .. صورة سمحة .. لقطة سمحة .. أكلة سمحة .. نكتة سمحة , و بعدين النكت بتاعتنا دي ما بيضحك فيها .. نكت الله و الرسول دي ما بتخليهو إلا يبتسم مجاملة كده غايتو .. يضحك لما يدمع في حاجات نحنا نشوفا عاااادية , هو بيشوفا شوف تاني , يضحكو بس الموقف الدرامي نفسو بتاع النكتة , وللا يقوم يسرح جوه النكتة وللا الموقف الكوميدي و يحولو في دماغو المقلوز داك لمسرح و يبني براهو منو و ليهو نكتتو , جن وللا هبشة وللا شنو ما تعرف ..

يا زول زولك ده مشوطن و مسكون .. نسأل الله السلامة .

[imported_أشتر]

قتا ليو بجيك بعدين .. وبعدين دي كانت قبل تلاتة يوم يا سمرا ...
وعادةً ملاقاتنا بتكون بعد الدنيا تاخد صنّتا ... وناخد إحنا جرعة من أنسولين الناس لمعادلة مستوى الحلا الجواني ولد دا
قبل امشي ليو كانو معاهو ضيوف كما اعتقدت ..
قمت ضربت ليو تليفون وطوالي باغتّو بسؤال : معاكم منو ؟؟؟
وخش بمسافة أرمش وقطر ردو مع واوي ...
على اليمين ردو لي زمن ما صادفني ... رد أحلى وأجمل وأوقع وووو متخلي واو ..
قال لي ألبس قميصك وتعال هعهعهعهعهعهعهعهعه
وردو دا غير زول يكون ناقشك شديد ما بطلع منو ..
وقمنا فقعناها ضحكة مدوية اهتزت لها جنبات الروح وكنب الوجدان .. وقطع شك تركت استفهام في وشوش الناس القاعدة معاهو ...
مبالغة ياخ ...

أها عشان ما أفتل ليك بوستيك دا بشؤون خاصة وكدا ..
رايك شنو نجي نعمل جرتق وهمي واعتبري أخوك مانيكان معتوه ... سميوليتر يعني ؟؟
المطلوب مني شنو أجيبو ليك غير العنقريب

[imported_سمراء]

اقتباس:
المشاركة الأصلية كتبت بواسطة جيجي
ومعكم نترتر
وسلام للجمال حين ترترة
واااصل
عليك الله

جيجوش حبيب البى كيفك ياعسل ؟
عليك الله شفتى الترترة دى كيف !
شهتك العرس موش

[imported_سمراء]

اقتباس:
المشاركة الأصلية كتبت بواسطة أمير الأمين
هذه لوحة زينة.. و جمال

هى كما ذكرت يا امير
لـــــــــوحة حيــــّة

تسلم ويسلم السنى

[imported_سمراء]

اقتباس:
المشاركة الأصلية كتبت بواسطة زهير ابو سوار
مبرووك عليك يا سمراء ..
وأبشر بالخير يا عريس ..

خلاص عقدتو

تسلم يازهير ياخ وعقبال ليك كدة

[imported_محمد السني دفع الله]

ترترة
تترترالعروس ، وتزيدفي الترترة .مع الإيقاع المترتر من الدلوكة ، وياخذها الحماس لتنوع في الحركات الإستعراضية الصعبة وتتلوىوتسوح وتموح محاكية الغصن اللدن الذي يطرب لوشوشةا الريح وهي تتجول في مرورها العادي بين الأشجار .
فتنتشي الأغصان وتسكر من الطرب وتسلم نفسها للنسيم ليميلها كما يشاء ..
ياعروس موحي
ياعروس سووحي
وزيدي في الدوران
وتدور العروس في حركة رشيقة ، وترترمبتعدة عن العريس الذي ضرب لخمة من الحركة السريعة وخاطفةوقبل ان يتحرك لعروسه ،تتقدم اليه مع الإيقاع الذي اختلف بهدوء خادع كأنها تريد انهاء الرقصة وقبل ان تختم المغنية أغنية السوحان تنـزل العروس للأرض
محاولة تسجيل هدف علىالعريس ولكنه كان اسرع ،،أمسك بها وأوقفها وسط الدائرة..وتعالى الصراخ من الشباب ،والشابات أطلقن زغاريد الفرح والنساء الناضجات والحبوبات الجميلات زي بنات بناتن يضحكن على العريس الذي مازال واقفا وهو يحتضن حمامته لا
يريد ان يعيدها للتحليق مع الأنغام .. ( عريس شي فت ))
العريس نارو حيه
ووب وبين عليا
العريس نارو حيه
بعد ان قطع العريس الرحط ، يظهر دور المعلمة (( العلامة البتعلم العروس الرقيص )) فتقدم العروس فاصلا منغردا من الرقص الساحر
وتظهر فيه مجموعة من الحركات البديعة والتي أتقنتها من خلال التمارين المتواصلة اليوميةوالتي يتحول فيها منزل العروس الى موقع خاص بالنســـاء ، عالم سري جميل .. المهم أخر الأمر ان تقدم العروس رقصة مبهرة، تبهر بها الجميع لنسمع جمهور النساء المحتشدات في فناء الدار ،، يرددن مع كل حركةانيقة،،
زيـــنـــــــة
ســـــمــحـــة
ســـــــــــى
وحينما تتقن الخطوة وتبدع فيها والعيون المنتابعة تتشحط عليها تصيح المعلمة بأعلى صوتها
وحـــــــــدو
لااله الا الله
والعروس راضية بما وصلت اليه من خلال التدريبات وتمنح المعلمة ابتسامة شكر وتقدير
لتصيح المعلمة مرة ثانية ،قولوا ماشـــاء الله
وتعلو الدلوكة في فرح جنوني
ما
ماشـــاء الله
ماشـــاء الله