مع إنو (المريخ) دا حقنا و (حب الإســـتطلاع) برضو

[imported_خالد الأيوبي]

.
.

.
.

[imported_خالد الأيوبي]

.
لفت إنتباهي أن الكثير من المواقع العربية أشارت إلي وجود علماء عرب ضمن فريق الكيوريوستي - كل ناس نكتوا ليهم واحد بلدياتهم
ففكرت لو قمنا فتشنا في الفرق و الأتيام الكثيرة العاملة في المشروع دا في مراحله المختلفة و جوانبه المختلفة بنلقي لينا سوداني لابت ليه في حتة و شغال (أصلنا نحن ما بنحب الظهور)

بالمناسبة أوباما قال للفريق الفني (لو لقيتو مريخاب هناك كلموني)

"If, in fact, you do make contact with Martians, please let me know right away,"......." Even if they're just microbes, it will be pretty exciting."


وكيوريوستي (Curiosity ) كلنا عارفين معناها (الرغبة في المعرفة) - زمان درسونا ليها بمعني (حب الإستطلاع) و رغم تشابه المعنيين إلا أن المعني الأول
صارت له دلالة إيجابية بينما الثاني صارت له دلالة ســلبية أقرب لمعني الفضول و التطفل (و اللوم في ظني يقع علي المثل الشهير - درسونا ليه برضو زمان ):

Curiosity Kill The Cat
.

[معتصم الطاهر]

نحن وصلنا المريخ !!

عارف واحد من عضوية سودانيات كان شغال شغلة للتوصيلات الكهربائية الدقيقة فى ( ناسا) ..( شركته مقاول باطن) قبل أن يبتعد .. عن سودانيات و المشروع ..

و لم يرجع حتى مع الشفوت .. الذين لم يرجعوا

[علاء ابو حريرة]

والله ان من يوم نزلت البوست ده بتزاوغ منوا ومسوي لي طمام بي اسمه ان قايلوا مريخ ناس الوالي

[imported_خالد الأيوبي]

المشاركة الأصلية كتبت بواسطة معتصم الطاهر

نحن وصلنا المريخ !!

عارف واحد من عضوية سودانيات كان شغال شغلة للتوصيلات الكهربائية الدقيقة فى ( ناسا) ..( شركته مقاول باطن) قبل أن يبتعد .. عن سودانيات و المشروع ..

و لم يرجع حتى مع الشفوت .. الذين لم يرجعوا

يا باشمهندس ..... تقبل الله الصيام

السودانيون متواجدون في كل المحافل العلمية في العالم و(ناسا) بالتحديد فيها مجموعة سودانيين ... ولكن الله تعالي حبا علماءنا بنعمة التواضع وبحساسية زائدة من الأضواء الباهرة.
وإعلامنا بعكس الإعلام العربي و خاصة المصري لا يجيد ملاحقة المواهب و الإنجازات الوطنية ودعمها بـ(التلميع) و(التضخيم) ..
.

[imported_خالد الأيوبي]

المشاركة الأصلية كتبت بواسطة علاء ابو حريرة

والله ان من يوم نزلت البوست ده بتزاوغ منوا ومسوي لي طمام بي اسمه ان قايلوا مريخ ناس الوالي

المصيبة ياعلاء إنو الأمريكان ديل يقعدوا يبحتوا كدا لمن يلقوا ليهم ســـكان في كوكب المريخ. .............. و طبعاً حيكونوا كلهم مريخاب

.

[imported_طارق صديق كانديك]

المشاركة الأصلية كتبت بواسطة علاء ابو حريرة

والله ان من يوم نزلت البوست ده بتزاوغ منوا ومسوي لي طمام بي اسمه ان قايلوا مريخ ناس الوالي

أخوك برضو أخدلوا منو لجة لجتين وبيني وبينك (قٌتّ في سري) :

بالله الأيوبي طلع حمام ميت ... البركة العذبوه في الرقم الوطني ..

ثم لعنتُ ابليس وقلت خش أقرا يعوضك الله يا كانديك فاستبان الحديث، غير أنى لا زلت عند ذات المربع حين قرأت له:

مع إنو (المريخ) دا حقنا

النون دي غايتو لو ما كانت ( طيباينة) تكون عصرت علينا عصرة شديدة يا الأيوبي

[imported_خالد الأيوبي]

يا طارق كانديك ما تخليها مستورة (هلاريخ) عشان نحافظ علي العلاقة مع الطرفين .. خصوصا أني ما متعصب خالص
بس إن شاء الله مافي زول يفكر لكلمة (المصيبة) في ردي السابق علي علاء

المصيبة ياعلاء إنو الأمريكان ديل يقعدوا يبحتوا كدا لمن يلقوا ليهم ســـكان في كوكب المريخ. .............. و طبعاً حيكونوا كلهم مريخاب

.
ملحوظة يعود مصطلح (قول : هلاريخ) للمرحوم الكاتب الصحفي محمد الخليفة طه الريفي
.

[imported_عمر عبدالكريم]

على ماأعتقد في عدد من العلماء السودانيين إشتغلوا في ناسا بس الاعلام ماسلط عليهم الضوء