الضيق بالاخر وعدم احترامه نبيل نموذجا...

[bayan]

كتبتب الابنة لنا بوست بدأت فيه بهذا

الاحبة
للمرة الثانية خلال يومين والآن فقط تم تهكير موقع سودانيس اونلاين
وهذا نص الرسالة التي تركها الهكر
وأنا لله
lana
makaveli

site Hacked by
makaveli
تم اغلاق منتدى معارضى الضل البارد
والشقق الاجنبية والعمارات السوامق
المتكلمين باسم المهمشين وهم بشاليهات الدول الاجنبية
غير دارين بمعاناة الشهب المسكين
والمتاجرين بقضايا دارفور وهم بعيدين كل البعد عن دارفورر واهلنا في دارفور
سؤال :
حصل واحد منكم شاف مايرنو او امبدا ؟
حصل واحد منكم طلع الساعة 6 صباحا عشان يلحق المواصلات قبل الزحمة ؟


[email protected]

انا تداخلت فيه اي اذ انه بوست مفتوح للعامة من الاعضاء...كتبت وجهة نظري التي تخصني

سلامات
والله الزول حزن جدا لما حدث
من يحاول تسيس الموضوع بضل الطريق
الزول دا بس زول زعلان من البحصل بهناك...وكاتب كلامو
الحكومة ذيها وذي الاحزاب ما بتاخد السايبر بصورة جادة عشان تحاول توقف منبر
بفضح المعارضة واكاذيبها اكثر يلمعها..وليكم بقصة قتيل الفاشر
نموذجا اسع دي بالله معارضة يحاربوها في السايبر؟
وقبل كدا لنفس الاسباب دي جات مجموعة هكرت المنبر
المؤسف ان الهكر اقصائي مثله ومثل من يكتب في المنابر
يعني عقلية ما منفصلة ...
مثل مافي بعض الناس بيشتكو الناس ويطالبو بفصلهم في ناس حايمة برة
وعندها قدرة بتوقف بورد كامل...وهكذا دواليك والعقلية السودانية..
علما ان بورد سودان نت ايضا هكر وتم ارجاعه..
وهكر لان هناك من سب الدين فيه...
يعني الحكومة البتسب الدين يوميا لما تتاجر بيه
ما اظن تفرغ ليها ناس عشان يشيلو العدة عشان زول سب الدين
دا زول فرد او شلة لا غير..مغيوظ من كمية الحاجات البتحصل
وعايزة اضيف انه المنابر دي مكان لتبادل الرأي في مكان محدود جدا
ولا اثر لها في واقع حياة الناس ولا الحكومة
الا الكتاب والقراء الذين لا يمثلون عدد كبير..ولاعدد مؤثر

وسلامات يا لنا

[bayan]

لم ابرر لتهكير المنبر وانا ضد تكميم الافواه بنشر الاكاذيب واشانة السمعة
وصامدة في المدى لاني بؤمن بالحرية لنا ولسوانا..
كررنا وقلنا التهكير مرفوض وما حاجة صحيحة..
لكن الناس عايزةتعملو سياسةوما سياسة.. والحكومة
انا عندي وجهة نظري انه الحكومة ما بتكون هكرت الموقع
موش دفاعا عنها لكن دي الحقيقة..الانا بشوفها
علما انه لا توجد حكومة كيزان الا في ذهن مناضلين الكيبورد
المجلين نيفاشا ومتجاهلين كل الاحزاب الدخلت البرلمان والحركة الشعبية المشاركة..
وحكومة التراضي الوطني المنتظرة الانتخابات
اسع البقولو الحكومة ديل بقصدو الحكومة اللسع دي المشتركة فيها الحركة الشعبية
ولا حكومة شنو..
ونكرر السايبر اثرو ضعيف جدا في الداخل..
يا رافت اصلح معاي وما تقولي بتبرري للحكومة عشان تضرب المنبر
لاني ما حصل يوم حاصرت زول ولا منعتو يتكلم باشانة سمعته
ولا الكذب عليه...
ياخي نحنا ناس فنانين نؤمن بحرية حدها السماء ونحلم بها حرية مسؤولة مؤسسة محترمة الاخر فيها قاعد دائما معززا مكرما..

__________________

كتبت ما كتبت اتفق معي ناس اختلفو كل زول حاول يبين وجهة نظرو...في قصة الهاكر دي..

[bayan]

أها الناس في الحكومة ما الحكومة لما نبيل جا الفانا وكتب ما يلي من ردي على الاخ رافت ميلاد..

ديل اكثر من يشرف الكيزان,,,لانهم اظهروا انضباط عالي جدا في النقاشات
لم يثبت على اي من جمعة ولا محمد فرح استخدام كلام بذئ ولم يهبشوا عرض اي زول
وصبروا على اذي الاقصائيين واكاذيبهم الدائمة
مثل كذبة سرقة جثمان المرحوم الخاتم عدلان...
ومثل تهديد محمد فرح للمجمر وخدر...
الى الان الكيزان والجمهورين هم اكثر الناس قدرة على النقاش الجاد المثمر والتهذيب العالي والاعتذار عند الخطأ.. تربية جزبية عالية جدا...
من فضح المعارضة هم المهرجلين وتابيعنهم بغير احسان.. كذب وبذاءة واقصاء آخر
واشانة سمعة وهبش اعراض من يخالفهم وتصنيف الناس بالمزاج ونشر الكذب الضار
عشان كدا لعب البورد دور كبير في فضح المعارضة وازالة القناع الرومانسي الحالم عنها..
يعني يا رافت الاتفتضحت المعارضة وظهرت ذي الكيزان الناس عرفت احمد وحاج احمد..
دا الدور الاساسي العملو البورد في وجهة نظري..
من وين كنا حنقرأ افادة مقاتل مريود ومن وين كنا حنعرف الحصل شنو في الحدود الشرقية
من قبل الفصيل المسلح في المعارضة...
ومن وين الاجيال الجديدة كانت عرفت تأريخ الاحزاب الاغتسلت في النهر
وجات عاملة بتاعة ديمقراطية وملصت ماضيها في القهر والتقتيل والظلم...
لا شك البورد عنده دور تنويري لكنه محدود جدا ومفصور على الفئة التي تملك القدرة على دفع فاتورة النت..
انا لا اقصي المعارضة في حياتي لم اقدم شكوى ضد اي كاتب ليفصل
وهذا يحدث دائما لي الواحد يجي يتكلم فاضي لما تناقشوا يشتكيك لبكري
ذي ما عمل هشام المجمر واخته في فصلي الاخير رغم تحرش اخته بي
ولم ادخل معها في نقاش..
اها ناس التطيحة والمتردية والعاضيها الكلب والسكران ديل الخلونا
نصفهم بمناضلين كيبورد لانهم بالجد مناضلين كيبورد.. في وجهة نظري..
كذابين افاكين داخلين في وهمةانهم خطيرين وما هم الا ناموسة في اضان فيل..
الى ان تلتزم المعارضة بالخط الوطني وترفض الاتجار بالقضايا العادلة
حأكون انا مناضلة مضادة..
واكرر ادانتي للتهكير والتخريب التي حدقت لسودان نت وسوداينزاولاين
ولك التحية

الاخ العزيز رافت
عندما اتهم محمد حامد بسرقةجثمان المرحوم عدلان
لم اكن اعرفه .. فقط كغيري من الذين انزعجو من سرقة جثمان حيث كتب سرقة جثمناه واخذ زوجته الى جهة غير معروفة. اتصلتبالسودان لان تربطنا بهم علاقة نسب..
وعرفت ان هذا لم يحدث...كما انه في ذات الوقت كنا تسقط الاخبار عبر الماسنجر وكان معي شخص يعرف جمعة .. وكان معه وقال له انه في المكتب مكلف بتغطية مؤتمر صحفي للطيب صالح
ولم يذهب الى المطار ثم اتت صباح وذكرت انها راته قرب مكان العمل..
دا كلو الى الان الناس مصرة انه سرق الجثمان..
بعدها بفترة طويلة رايته في الخرطوم وشوفتا شاب صغير جدا
لا يمكن ان يكون عميد في الطلائع خليها في الامن وتأكد لي الاكاذيب..
زول بيركب المواصلات..عادي..
المهم بعداك مقابلة تمبس مع اخ الفقيد التي اخرجت تمبس من مساطب المستنيرين الى
الظلامين..دا كلو ولسع الناس مصرة تشتم جمعة وتقول انه امنجي وسرق الجثمان..
فا،ا عرفت محمد جمعة بعد الاتهامات...يعني ما دافعت عنه للمعرفة الشخصيةبل احقاقا لحق..
ونفس الفلم دا مدور طوالي اي كوز يجي يطلعوه في الامن بعداك يطردوه مثل ما حدث لمجاهد
مامون ولغيره من ضحايا العقلية العصابية العصبجية بتاعة القطيع..
الزول دا وهمي والزو ل دا هناي... كذب في كذب..
اما بخصوص الكيزان انا اتحدث عن المنابر الى الان اثبتوا انم ناس حوار
على حسب ما شايفة ..ما شوفتا يوم جمعة ولا ود الباوقة ولا اي زول بيكذب يهبش اعراض الناس
منهم.. ودا الشاطرين فيه مناضلين الكيبورد,,الكذب والتدليس وتشويه السمعة والاقصاء..
ولك التحية..

__________________

اما بخصوص الكيزان انا اتحدث عن المنابر الى الان اثبتوا انم ناس حوار
على حسب ما شايفة ..ما شوفتا يوم جمعة ولا ود الباوقة ولا اي زول بيكذب يهبش اعراض الناس
منهم.. ودا الشاطرين فيه مناضلين الكيبورد,,الكذب والتدليس وتشويه السمعة والاقصاء

..
د بيان
طبعا ده كلام غريب جدا لأن الكيزان أخر ناس فى العالم بتوع حوار والجميع يعرف مشاكل الأركان فى الجامعات والمداراس التى أغلبها تنتهى بمشاكل من الكيزان .
لماذا تخفين هويتك السياسية والجميع يعرف إنك تملين للكيزان
هل تخجلين من إشهار إنتمائك للكيزان ؟؟؟؟؟؟؟
لك المودة

[bayan]

تاني نبيل رجع يحك في قصة كيزان المنابر دي وبكل قوة عين وجه لي اسئلة والشغلة بقت تفتيش ضمائر وكدا

اقتباس:
اما بخصوص الكيزان انا اتحدث عن المنابر الى الان اثبتوا انم ناس حوار
على حسب ما شايفة ..ما شوفتا يوم جمعة ولا ود الباوقة ولا اي زول بيكذب يهبش اعراض الناس
منهم.. ودا الشاطرين فيه مناضلين الكيبورد,,الكذب والتدليس وتشويه السمعة والاقصاء

..
د بيان
طبعا ده كلام غريب جدا لأن الكيزان أخر ناس فى العالم بتوع حوار والجميع يعرف مشاكل الأركان فى الجامعات والمداراس التى أغلبها تنتهى بمشاكل من الكيزان .
لماذا تخفين هويتك السياسية والجميع يعرف إنك تملين للكيزان
هل تخجلين من إشهار إنتمائك للكيزان ؟؟؟؟؟؟؟
لك المودة

[bayan]

استمر النقاش الحكومة ولا ما ناس الحكومة بدات تظهر بعض المعلومات حيث هكر المنبر للمرة الثالثة
جا نبيل كتب الكلام دا...

يحاول كيزان البورد بكافة الطرق درئ التهمة عن النظام
أين حمرة الخجل

[bayan]

يلا جيت كتبت رد على نبيل هنا

لماذا تخفين هويتك السياسية والجميع يعرف إنك تملين للكيزان
هل تخجلين من إشهار إنتمائك للكيزان ؟؟؟؟؟؟؟

اولا يا نبيل دور مفتشين الصحة دا ما لايق بيك يا رجل يا سياسي
بعدين دور اني بخفي هويتي السياسية برضو لا يليق بي لاني ما بخاف من زول
بعدين الانتماء دا مرض جنسي لا قدر الله عشان الزول يخجل منو؟
الانتماء دا بتختارو براك بكامل القناعات عشان كدا بتكون فخور بيه
اسع انت شيوعي وفخور بكدا رغم التركة السوداء والدماء والانقلابات والمظالم
والجرائم التاريخية والاخلاقية.. بعد دا كلو واقف وسط البورد وتكتب..
البخليني انا اخجل شنو
انا مع حزب الحقيقة حيث تميل نميل
يعني عشان قلنا الحكومة ما هكرت البورد بقيت كوزة وعندي ميول كوزية كمان داساها؟
يا زول انتو مدرسة الكادر فكت ولا شنو؟
ولا الكومون سينس ما بدرسوه ذي ما بقولو..
لازم يا نبيل يكون عندنا كومونسينس..ونفكر قبل نكتب ثمح؟
سوري سكينة..

[bayan]

ألشبارقة رد على جزئية التصنيف دي ورد ليه نبيل وبدا خلاص يفقد المنطق,,

خي نبيل ... نحن في هذا المنبر لسنا مطالبين بالإنتماء إلى حزب سياسي معين ومحدد ... ولسنا مطالبين في عضوية هذا المنتدى لإبراز بطاقاتنا وهويتنا السياسية ...بل محتاجين إلى نضج سياسي وإلى عقول واعية وأذهان متفتحة وأقلام من مختلف التيارات السياسية نأخذ منها الصالح ونترك الطالح ... ومن سياق الأقلام تستطيع أن نستشف الهوية السياسية للكاتب... وكل منا له مبادئه وإنتمآته السياسية التي لا يخجل منها ولا يخفيها طالما هو مقتنع بها ... ويجب علينا إحترام الميول السياسية و الحزبية لكل مشارك معنا في جو تسوده الإلفة والمحبة والمودة ... وإختلاف الرأي فعلا ً لا يفسد للود القائم في( سودانيات) أي قضية (ميثاق سودانيات - قانون الموقع)... مع تقديري .

المحترمة سبارقة
أولا أتفق معك
وأنا أحترم الرأى الأخر وكل شخص حر فى إنتمائه الحزبى ولكن يجى شخص مثل بيان تتخفى تحت إسم أنها لا تنتمى لأى حزب مع أنه يستشف من كتاباتها إنها كوزة وتحت هذا الستار فى كل مناسبة تشتم الحزب الشيوعى وهذا ما أعتبره خداع أو أنها خجلانه أن تعلن بعد ماكتب ضدها فى سودانيز أولاين .


مع أنها دائما تصرخ وتقول إنها ضحية مع إنها من يبدأ بلإساءة .
أما مسألة كرها للحزب الشيوعى عدوها اللدود فلن يزيد ولا ينقص هذا من قدر الحزب.

لاحظ الكلام هنا عن الهاكر وما الحزب الشيوعي
الدخل الحزب الشيوعي هنا شنوووووووو؟
بعدين ماذا كتب عني في سوديانيزاولاين يوجب الخجل من انتمائي.. دي عايزة توضيح
من نبيل....

شكرا يا الشبارقة وانت تحاول تعلم الناس درس في الاختلاف..

[bayan]

الناس لسع بتبحث في في كل الاتجاهات وتتبادل الاراء اخونا نبيل بالجد فقد اعصابو وكتب..

شوفى يابيان
أنت أيضا دور المراوغة هذا فعلا يليق بسياسية تنتمى لحزب دموى بتخذ من الدين ستارة لأفعالة .
حزب فتح بيوت الأشباح لمعارضية.
أرتكب أفظع الجرائم فى حق أهل دارفور وكجبار .
حزب على إستعداد أن يفرط فى التراب السودانى كما فرط فى حلايب ,والجنوب, والشمالية قربان للمحافظة على كرسى الحكم .

ولن نسكت حتى يقدم كل من قام بهذة الجرائم للمحاكمة
ولن يفلت كل من هرب فلوس الشعب السودانى للخارج وبلأخص ماليزيا
ولن يهرب كل من منح درجات علمية مزورة لكوادرة النشطة وهو لا يستحقها .
أما إنتمائى للحزب اشيوعى فهذا شرف لى لا أخجل منه كما تخجلين أنت من حزب يده ملوثة بالدماء .
أما الجرائم الأخلاقية والتاريخية هى من قام بها حزبك
وتمثلية إنك دائما ضحية بقت بايخة وأسطوانة مشروخة لأنك من يبدأ بلأساءة وهذا هو سبب هروبك من سودانيز يعنى ليس من المعقول الناس دى هبشتك ساكت بدون سبب .
أما دفاعك عن الحكومة وهجومك على المعارضة فهو شئ متوقع منك
واضح جدا أن رغم أن غلمان الحكومة داخل هذا المنبر يحاولون درئ التهمة عن الحكومة المؤتمر الوطني رغم أنها هي المعنية يوقف sudaneseonline.com
وهم بذلك يرسلون بذلك رسالة إنذار وتهديد لباقى الأسافير

محاوله إبعاد الشبهة عن الحكومة أمر غريب خصوصا أنها كاللص أو الخفاش لاتنشط إلا في الظلام لذا يتضح بلا ريب أنها من عمل ويعمل على إسكات الأصوات المعا رضه الفاضحة لقبحها وتعريه رموزها في المواقع الاسفيريه التي يستحيل الرقابة التقليدية عليها سوى عبر التهكير



أما حكاية عربى هو من قام بالهكر فهى مضحكة فبقول خلى عندك أنت كومونسينس
أين حمرة الخجل

[bayan]

سيرة وانفتحت تاني جايب الحزب الشيوعي المتلون للخربشة والشليخ..
اها تعال النقوليك ونرجع مع بعض لسنة 1969 لما حصل انقلاب مايو
نشوف الحزب الدموي دا ياتو حزب,,,
التأميم.. الصالح العام... جهاز الامن يصبح منفصلا...التمكين..
القتل الجماعي للانصار في الجزيرة ابا و ود نوباي قالو جيبخانة تقيلة جدا وشق عدا طول عرض كانت.
بعداك تصفية الامام الهادي جسديا ومعنويا.. احداث الجامعة واضرب اضرب يا ابو القاسم وقصر الضيافة.. دا كلو شايلو انت في بقجة
وليك عين تجي تتكلم مع بيان بعد اتهامها بانها كوزة انه خجلانة من حزبها..
حزبها المزعوم دا قعد 20 سنة ما خلا فرضا ناقص في الظلم والانتهاكات
وانت حزبك قعد سنة ونص ما خلا فرضا ناقص في الجرائم ضد البشرية والانتهاكات,,, اسع لو استمرو 20 سنة
كان حصل ايه.. عاد الاحزاب الرجعية كانت عدمت نفاخ النار....كان حيشقوها عرض وطول ناس سيف الفدا المسلول..ناس مايو الخلاص ا الجدار المن الرصاص...

اقتباس:
ولن نسكت حتى يقدم كل من قام بهذة الجرائم للمحاكمة
ولن يفلت كل من هرب فلوس الشعب السودانى للخارج وبلأخص ماليزيا
ولن يهرب كل من منح درجات علمية مزورة لكوادرة النشطة وهو لا يستحقها

جدا يازول اي جريمة تثبتها ضدي ضد الشعب انا مستعدة احتمل نتيجتها
بس جيب جرائمك ما عاد تبقى نوع حقت الامام الهادي تقبضوني وتيجبو قزاز عرقي ورزم قروش
ولا اتهامات نوعية الحكومة هكرت المنبر عشان تسكتكم... تكون محكمة عادلة بلجان تحقيق
محايدة...
نجي لهرب لماليزيا دي سجمي انتو ماسكين من سنة 1993 ونحنا جينا هنا هاربين منكم وما كلمتونا؟
موش قلت ليك خليك عندك كومونسينس اتكلم عن الحيهربو لماليزيا بعد القوات الاجنبية تصل موش من زمن حفرو البحر..كومونسينس كان تيك يو فار ماي بوي
نجي للشهادات المزورة ...اوعى تكون قاصدني؟
مزورة دي ما بتلقاها عندنا لا قلة عقل ولا قلة مال..علما اني تميت قرايتي في عهد نميري
واتخرجت بجيد جدا من شعبة النقد كاسرة ريكورد كاول طالبة تتخرج من تلك الشعبة بجيد جدا
ومن القلائل كمان.. دا تأريخ مثبت ممكن اسع اللصق ليك شهاداتي من سادسة هنا..
الدكتوراه حقتي كانت بنقاش مفتوح اعلن عنه في كل مكان وجات صحفية غطتها..(ممكن نجيب ليك الجريدة)
وكمية من النقاد والمهتمين بمحمد عبدالحي والدراسات السودانية ناس خمسة نجوم منهم مجذوب العيدروس
يبقى كشيح الكلام والاتهامات الجزاف بتعملك مجرم ومذنب اذ سن..ذيك وذي ناس الانقاذ الهكرو المنبر عشان كلامكم الخطر الذي سطير منامهم
اسع يا نبيل زول يجي يقرأ كلامك لي واتهامي بالاجرام والهروب لماليزيا مع شهاداتي المزورة.
لو بعرفني ولا ما بعرفني حيصدق تاني اي كلام تقولو؟
المصداقية دي حاجة ذي عود الكبريت مرة واحدة بس تنشخط تاني مافي شخطة
اسع كدا بقيت مناضل كيبوردي عشرين نجمة مكن تكذب وتختلق قصص عن الشخص المابعجبك كلامو
دا اول درس ليك في احترام الاخر وانت سقطت باقتدار..
اوعى البوست التاني تمشي بالخطة التانية بتاعة الشرف والعرض ذي القبلك الهلكو وصاروا خيال مآتي سيابيري على سهوبي

اقتباس:
وتمثلية إنك دائما ضحية بقت بايخة وأسطوانة مشروخة لأنك من يبدأ بلأساءة وهذا هو سبب هروبك من سودانيز يعنى ليس من المعقول الناس دى هبشتك ساكت بدون سبب

نوووووووووو ما حصل قلت اني ضحية ولا دور الضحية لائق على بعدين انت لازم تعمل هومورك
عمري ما هربت من سوداينزاولاين اسع دا انا متربسة برة للمرة 10 بسبب شكوى من مدام دي المجمر عشان خافت لما قلتا ليها حاجي ارد عليك بكرة بكرة لقبت نفسي برة..
نجي لبداية الاساءة يبدو انك متعود على اركان النقاش الكلامها بشيلو الهوا
هنا كتابة يا بابا وريني ابدا اني بديت بالاساءة على زول جيب كوت
او زول قول اني خطيت عليه واسع انت جيت اتهمتني بالاجرام ضد الشعب والشهادات المزورة
هل انا اتهمتك ولا اسئت اليك قبل ذلك ولا بس مارست حقي في ابداء الراي؟
الناس بتهبشني لاني بريد فني ذي ندى القلعة بس بيان مافي زول قاعد يرشها بالدولارات
ويديها عربية الكزس,,,
الناس ما بعجبها كلامي عشان ما بصب في مصلحتهم اسع لو جيت قلت ايوا ارادت الحكومة ان تسكت البورد لانه فاضحها وعمت مع التيار كنت اسع بقيت الرائعة والغالية والشفيفة..وكان لقيت لي كم نوط بتاع احسن من تكتب وناقدة عظيمة ولديها اسهام عظيم في الثقافة السودانية..
بس سوري سكينة بيان لا تعوم مع التيار بلا فهم..

اقتباس:
أما دفاعك عن الحكومة وهجومك على المعارضة فهو متوقع منك
أما حكاية عربى هو من قام بالهكر فبقول خلى عندك أنت كومونسينس
أين حمرة الخجل

يلا اثبت دفاعي عن الحكومة جيب كوت واحد 9 سنة كتابة فيه دفاع عن الحكومة’’’’
ما تثبت الكلام دا بالكوت تبقى كذاب..ذيك وذي المبرطعين هنا من ناس حزبك الجريتو الارض بكذبكم واشاعاتكم عمن يختلف عنكم ..
كونو الزول عربي دي ما عايزة كومون سينس دي عايزة ادلة
وقد تم ابراز الادلة في بوست ابراهيم عدلان بالرجوع بصورة تقنية الى بورد به شخص اسمه الجوكر
فاين حمرة خجلك انت الما عارف كومونسنس معنها شنو,,,
وتقولي لي حكومة الانقاذ شالت البورد عشان بيفضحها؟

سوري سكينة..البورد ما هكرتو الحكومة ا البمثل ليها ناموسة في اضان فيل..
يا ناس الحكومة قومتو نفسنا في الدفاع عنكم
بلا بس شنطة دولارات ذي البتدوها لناس الحركات المسلحة..
__________________

[bayan]

يلا نجي نشوف قصة نبيل دي شنو وهل لنبيل اي حق فيما قاله هل تعرض لاي استفزاز من جانبي
ولا اي تحرش ..عشان يجي يطلعني مجرمة هاربة الى ماليزيا يجب محاكمتها ومزورة شهاداتي...
طبعا الكلام دا ما مكتوب للاعضاء لانه اصلا انا لا اكتب لهم انا اكتب للقراء من خارج المنبر..
مراقبين وشايفين وضميرهم حي...

ليه نبيل دا زعل كدا؟
جاب ىخرو في قصة بتاعة راي او اراء اخرى..
لان نبيل ينتمي لحزب الراي الاخر بيودي سبيريا...
بس خلاص قالو الحكومة هكرت المنبر يبى اي زول يقول الحكومة هكرت المنبر...
ولانه نبيل بسمع الاشاعات والاكاذيب ويصدقها.. اكيد اسع كلام تزوير دا
قالو ليه زول بعرفو وطوالي هو صدق واكيد برضو قالو ليه اني هربت الى ماليزيا
بعد وصول المارينز لتخليص الشعب السوداني من الكيزان
وصدق وجا هنا خلاص كتب ما كتب..
هذه النوعية من مناضلين الكيبورد تفتكرو ممكن الحكومة تهتم لما يقولون عشان تهكر منبر؟
الله يستر الهاكر ما يقرا كلامو الني دا ويجي يهكر سودانيات لانه الكلام الني وهو سبب التهكير لاي بورد..
بالج مخك كان غداك ما بعشيك..
وسوري سكينة..لان الشعب الطيب دي ياها معرضتو..

[bayan]

ليه مناضلين الكيبورد عايزين يقولو انه الحكومة هي التي هكرت الموقع..
ليه متشبثين بالفكرة الطفولية دي... رغم ظهور الادلة..
لان هذه الفكرة تعيد لهم توازنهم المختل بالغربة والاحساس بعدم الجدوى..
ولان البعض يريد ان يحلل النضال ويظهر انه بالجد مناضل كبير..
لماذا يخافون من جهرة شمس الحق؟؟؟!!!
ليه دائما عايزين الحاجات ما تظهر...؟؟؟
المناضل يجب ان يكون صادق وامين مع نفسه قبل الاخرين
فهل حقا يصدق هؤلاء اكذوبة ان الحكومة تخشاهم؟
ام انها قشرة فقط...
ربنا يكون في عون الوطن من جنس ديل..
الذين يعيشون الوهم ويصدقونه ويتصرفون على اساسه..
خلاص اسع طلعت انا هاربة الى ماليزيا ومجرمة حرب وشهاداتي مزورة بس عشان قلت الهاكر ما من الحاكومة وتفست بالونة الكذبة دي

والله سوري سكينة....

[bayan]

كتبت بتنا لنا الاتي

يادكتورة ياجميله سلام
شكرا لردك واهتمامك
لكن يادكتورة أنا وللدقه لم آتي مطلقا على ذكر تجارب لناس تم القاء القبض عليهم!!!!
القاء القبض عليهم هذه اتيتي بها انت وانا غير مسئولة عنها بالمرة لاني لم اوردها
والاستجواب لايعني بالضرورة القاء قبض ياستي انا وانت تعين ذلك بحمد الله
انا قلت بالحرف يقتضي التعريف التعرض لمماحكات كثير من الزملاء لمماحكات الامن ....
ويمكنك الرجوع لكلامي ....اضافة لذلك انا عندي اسانيد ودلائل حية تتمثل في بعض الزملاء الاعزاء الذين تعرضو لهذه الممارسات واتكلم من موقع ثقة وعلاقة مباشرة بالحدث يادكتور
واحترم فترة علاقتك بالمنابر جدا لكن لايحيط بخلقه الا الله يادكتور
كا ن غرضي من ايراد هذه الجزئية التدليل على ضيق السلطات ببعض الذين يكتبون وكلامك صحيح ينبغي ان نؤسس لمعارضة جادة بتأريخ وأرشفة تجارب من تعرضو لمضايقات
واحيي افكارك جدا وجديتك
واختلافك معي لتقدير دور البورد هو في النهاية اختلاف لن يذيبه الا الحوار المسئول
فهيا تذكري معي انه لدينا مقترح بنقاش دور البورد وانا على يقين اننا سنأتي النقاش بأذرع مفتوحة وعقول مفتوحة
اشكر جدا احترامك لوجهة نظري
وانا بدوري احترمك واحترم تجربتك وكل آرائك
ولك مني تام السلاك والتقدير
وشكرا ع الطلة

ردا لما قلته هنا هنا

اتمنى لو اتعرضنا لتجارب من القى القبض عليهم بسبب الكتابة في المنابر..
لناسس لمعارضة يستحقها الشعب السوداني العظيم
علينا ان ندلل على اي كتابة مثل هذه بدقة واحضار شواهد ..انا اكتب في المنابر من سنة 1999
ولدي علاقات واسعة جدا مع مختلف الاتجاهات الفكرية..
لم اسمع ابدا بشخص تم القاء القبض عليه بسبب ما يكتبه..في المنابر اللالكتورنية
التي اثرها محدود جدا في الداخل..

وكتبت لنا ذلك رد على

سياسي بامتياز ويجب النظر اليه هكذا لدواعي ابسطها ان سودانيس اونلاين في توجهها العام جريدة اليكترونية أو منبريتبنى خط مغاير للسياسات المتبعة في الخرطوم ويقتضى هذا التعريف التعرض لتجارب كثير من الزملاء لمماحكات الامن عند رجوعهم السودان مثلا ونوع الاسئلة التي تطرح وطريقة ادارة الاستجواب وما الى ذلك

نجي لسؤالك اني قولتك ما لم تقوليه,,
اختلفنا انت قلت مضايقات وممحكات واستجواي من جهاز الامن لما كتبوه في المنابر وقلتي عندك ادلة..
انا قلت نشوف اي زول اعتقل يبقى انت قلتي تعرضو للمماحكات ومضايقات من جهاز الامن لم تصل الى الاعتقال..وتم استجوابهم
انا متابعة يومية لهذه البوردات مافي زول جا قال ناس الامن ماحكوه ولا ضايقوه عشان البكتبو هنا غير بقال
واذا حدث ذلك لقامت مآتم وحرقت لساتك هم غايبين ليهم 20 سنة يدعوا في القصص ويالفوا فيها..
عشان كدا يا لنا سوري انا ما مصدقة قصة ناس الامن ما نقول قبضو نقول ماحكو زول عشان الكتبوا..
لانه اصلا لو بس بماحكو ويضايقو ويخلو الزول بدون بيوت اشباح يبقى كل قصص المعارضة البتتكتب هنا عن امن النظام راحت شمار في مرقة..
خاصة الرجعو من برة ديل..
يرجع مناضلين الكيبورد ويجدعو في النجايل مع بورداب الخرطوم..انا شخصيا لاقيت منهم عدد
وهاك يا صور واحتفالات..جهارا عيانا,,,لم نسمع باي مماحكات ولا منقصات منهم
العفيف الكضب في محمد جمعة جهارا عيانا قاعد في مركز الخاتم عدلان
عينك عينك يعملو في الاحتفالات.. اصلو لو جمعة امنجي يجيب العفيف دا
يدقو زين على كذبو فوقو واتهامو بسرقة جثمان الخاتم. ولا يقبض ابو ساندرا يعذبو جراء
الاساءة البالغة في تعليقو على تلك الصورة الجمعتنا انا و بقال وجمعة..
لا خلو قندهار لا خلو رحلة في الشلال بعد دا كلو ناس الامن ماحكوهم وضايقوهم..!!!!
انا لا اقول انت تكذبين فقط اي قصة يحكيها ليك زول محصيها كويس جدا
لان ديدن هؤلاء المناضلين الكذب والاحساس بالعظمة...
وقصة انه اجهزة الامن ماحكتهم وضايقتهم بتديهم احساس بالوجود والاهمية
يحكوها لزولة صديقة ذيك تجي تقولها في معرض حديث ذي اسع..
..
عايزة اعرف طريقةالاسئلة والاستجواب حصلت وين في جهاز الامن؟
يعني ادوهم استدعاء ولا بس سلمو عليهم شديد وقالو ليه عايزنك دقيقة ساقوه جهاز الامن...
لازم نعرف الموضوع دا لانه انتي ختيتي من حيثيات تأكدك انه الحاكومة هي الهاكر..

سوري لو قولتك انه حصل اعتقال وانت قلتي مضايقات ومماحكات
ولك الاحترام كله

[bayan]

يا يا لنا جا دوري في طرح الاسئلة عليك واتمنى تتحريفيه الحق
انت فتحتي بوست فيه قضية وصل النقرات لي 2500 نفر
في زول تعدى على زول من ضيوفك
اتهم الزول دابانه بعد الكيزان يمشو حيتعرض للمحاكمة
واتهمو بتزوير شهادة..
صمتك ومطالبتك بالحديث مع الشخص دا بالاميل
بيعني انك بفتكري الكلام دا صاح؟
اني مجرمة حرب ومزورة شهادتي....(لم تحدد ياتو شهادة مزورةعندي 3 شهادات فوق الجامعة)
تفويت الكلام الفارغ دا للناس هو الخلا الحكومة ما تهتم بالبوردات لانه الناس عارفة
انها كضب في كضب
ودا برضو اتجاه الهاكر ....
شوفتي كيف؟
الحق حق واحد فقط لا غيره..
العدل اول المبادي الانسانية..

[bayan]

شهوة ان تكون الخصومة فى عزها
واضحة ..
غير مخدوشه بالعناق الجبان
فقبلات من لا اود حراشف سردينة
وابتسامته شعرة فى الحساء

ودي لكل من مر باتهامات نبيل وصمت من الكتاب..

[welyab]

التحية للجميع
وبدون دخول في معترك التصنيف الحزبي والسياسي..
أود أن أشير بان هنالك معتقد سائد في أواسطتنا (إن لم تكن معي فأنت ضدي ) ولكي لا تصنف مع هذا أو ذاك عليك أن تمارس ( مع الكل ) سياسة ( موافقة الكُل في الكُل ) ..... وهذا بالطبع من المستحيلات !! فكيف لفرد أن يتوافق مع اليمين واليسار على حد سواء وفي كل شيْ بجزئياته وكلياته حتى لا يتهم بأنه ( كوز..أو شيوعي ) .
أما موضوع ( التهكير ) وإتهام جهات دون سواها... فهي آتية من واقع ملموس، وشواهد أشار اليها من قاموا بذاك الفعل وما أوردوه من عبارات و تعليقات .
وربما يختلف تفسير الفرد منا ، أو أي جهة عن تفسير فرد آخر أو جهة أخرى ، في تفسير المضمون والاتجاهات .. ولكن الكل متفق بان هنالك جهة مستفيدة ..
واللذين قاموا بالفعلة المشينة ( على الأقل في نظرنا نحن ) فهم لا يرون أن فعلتهم مشينة.!! و أعلنوا بعض من تبريراتهم . - و إن رفضناها نحن فهي مقبولة لسوانا - فالمنطق والعقل يقول أن من قاموا بتلك الفعلة ..هم أعوان ...أو أدوات.. أو مجندين لجهة مستفيدة .. سواء أن قاموا بتكليف من الجهة المستفيدة أو بتبرع من تلقاء أنفسهم ...
والى جانب ذلك هم مطمئنون بان الجهات (السلطة ) ستكون راضية عنهم حتى لو افترضنا أن القائمين بهذا العمل هي جهة لا تنتمي إلى السلطات بل حتى وان كانت تنتمي إلى جهات معادية للسلطة .. فالأقرب أن تكون أصابع الاتهام تشير إلى السلطة وأعوان السلطة وكما انه ليس هنالك عقاب متوقع أن يقع من السلطات على اللذين قاموا بالفعلة سواء أن كانت مشينة أو مرضية باختلاف التوجهات كما اشرنا من قبل
فقد رفضه ( الكل هنا ) واقصد بالكل ..أعضاء المنبر والمشاركين.. فطالما هنالك اتفاق (بين أعضاء المنبر) في جزئية الرفض..فهو أمر مقبول . ولا يمكن أن يكون هنالك اتفاق (في الكل مع الكل ) ولا يود أن يكون ذلك ...أو كذلك ..