قهوة النشاط !

[أبو أماني]

[frame="7 80"]

المشاركة الأصلية كتبت بواسطة تحفة حوا

شوف يا أبوأماني
أنا متابعة المنتدى دا من شهرين تلاتة قبل ما اسجل فيهو ومتابعة ناسو
وعجبتني قهوتكم لما فيها من قفشات وضحكات وحروب
وعجبني المناضلات الهنا الصامدات أمام مكاواتكم
وسنواصل النضال

[/frame]
العاجبني فيك ياتحفة يدون مجاملة وبعيد عن التلج وكسارينه سعة عقلك وأفقك وخفة روحك ودمك ..وعالي ثقافتك... بعد ما الرأس يبقى X large ننزله شوية ونقول الكلام ده بينطبق على معظم سيدات وآنسات هذا المنتدى البديع.. خاصة من يحملن راية النضال بس حقيقة تمتازي على الجنسين بأنك ومنذ دخولك سودانيات كان لك بصمة واضحة ومؤثره بحيث شعرنا بأننا نعرفك من سنين.. فلك صادق مودتي .. ولكن!

هذا قطعا لن يعفيك أو بنات جنسك من التعرض لحملة أبو أماني وأركانحربه التأديبية لبعض بنات حواء والتي ترمي لأستحداث شخصية (سي السيد) بصورة مقننة تواكب عصر العولمه .. وعليك الله يا قيقراوي ويا شبارقة وأبو مجتبى ما مرات تشتاقوا لي أسلوب أماتكم زمان لما الأم تحتار تنادي زوجها وتتفادي تنطق أسمه وتقعد تتمتم بصوت أنثوي رقيق .. هوووي .. ها.. يا إت .. ولما تتزنق خلااااس يا أبو فلان .. والله يا خال ويا الحبيب بابكر مرات لما أم أماني تناديني بأسمي حاف كده..! أنا شعرة جلدي بتقوم .. وقبال أرد عليها يصوت عالي (نعم) وقلبي يسوي في البتبت! أقول في سري يا أخوانا المرأة قائلاني من عقاب بطانها ولا شنو ؟ .. أعملن ساتر ناس فيصل سعد على الخط ... باااااي
[align=center] [/align]

[أبو أماني]

المشاركة الأصلية كتبت بواسطة rubs

انت كان اضانك تقيله كمان عميت ارجع اقرا المداخلات واعرف الجنرال امال وين على العموم هى همومها اكبر من مناقشات الرجال البقت نقتهم اخير منها لواقه الشفع على العموم هى مشقوله وارجو انك ما تلح بى السؤال ... بالمناسبه انت مالك بتلح .؟؟

هي يابت أمي هييييي أمال دي أقنعي منها تب كان (عشمانه)! رشحي أي واحدة محلها زماااان كبت الجرسة وفكت البيرق بعد إستسلام غير مشروط آندر تيبل! و رمينا طوبتها خلاااااس! كدي أرجعي وراء وشوفي تراجع قائدتكم وتقهقرها المخيف أمام هجمات القائد الرجالي الحصيف أبو المجتبى يايمه يطول عمره والزمان ما يدمره.. خلاها ليك تنكت في الألبومات الأسرية (الأثرية) وتشيل وتعلق في الصور .. هي لاكين هن صور نصاح .. ما أمال الشيخ الخالق الناطق .. يابت أمي حكمة الله تقيفي قدامها وتعايني في الصورة.. ما ... فولة وإنقسمت نصين .. أمال .. أمال.. إزي الحال.. قلتي لي مارك إسبنسر بي وييييين؟؟ ...

[أبو أماني]

يشيد رئيس جمهورية أبناء آدم الديمقراطية الشعبيه الإشتراكية العظمي بنضال أبناء شعبه الأبرار وإحقاق الحق بإستعادة هيبة وسطوة معشر الرجال وردع كل المتمردات في تنظيم (شنكبة عنكبة النسائي) وإستسلامهن غير المعلن بإنسحابهن السافر ويصر علي وضع النقاط فوق الحروف وتوقيع رئيسة التنظيم (الهاربة) وفصائلها المختلفة علي معاهدة الإستسلام .. والعظمة لله في الأعالي .. والمجد لخلفائه في الأرض ولاعزاء لمن مارس الإنزواء والهروب ... (مارشات عسكرية .. و .. و قرآن).
*
*
عاد بعد ده .. كان ما في (زولة) قالت (بغم) .. تبقى عو وووو جة يا شبارقة
[align=center] [/align]

[rubs]

المشاركة الأصلية كتبت بواسطة أبو أماني

يشيد رئيس جمهورية أبناء آدم الديمقراطية الشعبيه الإشتراكية العظمي بنضال أبناء شعبه الأبرار وإحقاق الحق بإستعادة هيبة وسطوة معشر الرجال وردع كل المتمردات في تنظيم (شنكبة عنكبة النسائي) وإستسلامهن غير المعلن بإنسحابهن السافر ويصر علي وضع النقاط فوق الحروف وتوقيع رئيسة التنظيم (الهاربة) وفصائلها المختلفة علي معاهدة الإستسلام .. والعظمة لله في الأعالي .. والمجد لخلفائه في الأرض ولاعزاء لمن مارس الإنزواء والهروب ... (مارشات عسكرية .. و .. و قرآن).
*
*
عاد بعد ده .. كان ما في (زولة) قالت (بغم) .. تبقى عو وووو جة يا شبارقة
[align=center] [/align]

ازيك يا ابو امانى ...
انت مالك بقيت مسكين وتشحد فى ناس شبارقه الراى شبارقه دا خليهو احنا محتاجين ليه فى استشارات هندسيه وكده وما بنقدر نهاجمو الايام دى (مصالح وكدا ) وهو براه قال فاتحها تكيه ..
وكان جيت للناس الشردو مالك غبيان على عسوم وابو المجتبى والباقين فلاحتك بس فى امال .. واخير هى غيابها مبرر بس الدور على الهرشوهم أكان هنا أكان هناك .. بس انا دايره اعرف مالك مانادبت بتك راااااااااااااااااجينها ومسلحين بالكلم العسل عشان نلف الراس وكد ..

[أبو أماني]

المشاركة الأصلية كتبت بواسطة rubs

ازيك يا ابو امانى ...
انت مالك بقيت مسكين وتشحد فى ناس شبارقه الراى شبارقه دا خليهو احنا محتاجين ليه فى استشارات هندسيه وكده وما بنقدر نهاجمو الايام دى (مصالح وكدا ) وهو براه قال فاتحها تكيه ..
وكان جيت للناس الشردو مالك غبيان على عسوم وابو المجتبى والباقين فلاحتك بس فى امال .. واخير هى غيابها مبرر بس الدور على الهرشوهم أكان هنا أكان هناك .. بس انا دايره اعرف مالك مانادبت بتك راااااااااااااااااجينها ومسلحين بالكلم العسل عشان نلف الراس وكد ..

والله يا أعز الناس ما بقيت مسكبن ولا حاجة المسكني منكم قريب شهر يدي اليمين انكسرت وفي الجبص.. واحده من (المعجبات)! عاينت لي بصورة أدهشتني وقلبي أكلني من معاينتها لي والظاهر عليها ماباركت ولا صلت على النبي ..وعينك ماتشوف عيلا النور دقيقة مافي ماشي على سيارتي إتزلقت ووقعت وصدقيني لو كانت أماني ولا أمها معاي كان لحقوها وزعطن لهن صوفة من راسها ..والله ياروب س لو تصدقي بالله السماحة الوهبني ليها الله دي عامله لي جنس مشاكل!.. وطبعا قالوا كل ذو نعمة محسود لكين برضو جات سليمة بكرة بفكوا لي الجبص وتعرفن حاجة..براكن!

أعملن ساتر وخليكن إستاند باي ..باكر أبو أماني جاي .. وقولن لقيادتكم الهربانة أرجن الراجيكن .. تحياتي ..
[align=center] [/align]

[تحفة حوا]

المشاركة الأصلية كتبت بواسطة أبو أماني

وينك إنت يا روعة منتدانا .. ومالك خففت الحملة على فلول المتمردات ؟ شايف روبس بتحاول إستقطابك وضمك لزمرة عادل عسوم وحتى شبارقة ظاااطو شايفه جاري واطي وكان لأبو المجتبى الظاهر عليها أمال قدرت عليه ومسحت لو شنبه مسحة كاااربة زولك بقي متاوقة ساكت مابتاووق .. هو قرى إيه يا قدعااان؟؟ بالله ماتغيب من القهوة بقيت الله ورقبتي مع الفتوات ديل .. وعندما يواصل فادي الإرسال سنواصل تحياتي..

احنا صاحيين ليك يا أبو أماني ودا اعتراف خطير منكم بالهزيمة
بس بتعترفوا بي هناك مالكم اعترفوا بي جاي
افرحن وزغردن يا بنات انتصرنا انتصار منقطع النظير

[تحفة حوا]

المشاركة الأصلية كتبت بواسطة أبو أماني

والله يا أعز الناس ما بقيت مسكبن ولا حاجة المسكني منكم قريب شهر يدي اليمين انكسرت وفي الجبص.. واحده من (المعجبات)! عاينت لي بصورة أدهشتني وقلبي أكلني من معاينتها لي والظاهر عليها ماباركت ولا صلت على النبي ..وعينك ماتشوف عيلا النور دقيقة مافي ماشي على سيارتي إتزلقت ووقعت وصدقيني لو كانت أماني ولا أمها معاي كان لحقوها وزعطن لهن صوفة من راسها ..والله ياروب س لو تصدقي بالله السماحة الوهبني ليها الله دي عامله لي جنس مشاكل!.. وطبعا قالوا كل ذو نعمة محسود لكين برضو جات سليمة بكرة بفكوا لي الجبص وتعرفن حاجة..براكن!
أعملن ساتر وخليكن إستاند باي ..باكر أبو أماني جاي .. وقولن لقيادتكم الهربانة أرجن الراجيكن .. تحياتي ..
[align=center] [/align]

غايتو يا أبو أماني تكضب الكضبة وتصدقا
حسي البنية دي أكان هي القاعدة تعاين ليك كانت هي الكسرت يدها ورقبتا كمان
إلا يا أبوي انت الكسرت يدك عشان رقبتك كانت ملووحة مع البنية السمحة
ودي شهادة منك بي سماحة بنات بلدي الأحلى من اللبنانيات ترضو تابو

[أبو أماني]

المشاركة الأصلية كتبت بواسطة تحفة حوا

احنا صاحيين ليك يا أبو أماني ودا اعتراف خطير منكم بالهزيمة
بس بتعترفوا بي هناك مالكم اعترفوا بي جاي
افرحن وزغردن يا بنات انتصرنا انتصار منقطع النظير

طبعا يا تحفة أبو أماني خطير..شليل غالطني وقال أنتي الساعد الأيمن لأمال بنت لاندن وأنا كان رأيي إنك رئيسة جهاز الأمن لتنظيم شنكبة عتكبة المدحور وعملنا فيلم عشان نجرجرك ونكشف الحقيقة .. وإتي ياحبيبة قساي إندبيتي زي الرطل وكشفتي نومتك بكل بساطة .. في ضمتك دي لو مامخابرات الوداك تتاوقي بهناك شنو وإتي غائبة أكثر من إسبوع من القهوة ؟؟ شليل قول واااااااحـــد .. يلا اللي بعده

[rubs]

[QUOTE=أبو أماني;142808]والله يا أعز الناس ما بقيت مسكبن ولا حاجة المسكني منكم قريب شهر يدي اليمين انكسرت وفي الجبص.. واحده من (المعجبات)! عاينت لي بصورة أدهشتني وقلبي أكلني من معاينتها لي والظاهر عليها ماباركت ولا صلت على النبي ..وعينك ماتشوف عيلا النور دقيقة مافي ماشي على سيارتي إتزلقت ووقعت وصدقيني لو كانت أماني ولا أمها معاي كان لحقوها وزعطن لهن صوفة من راسها ..والله ياروب س لو تصدقي بالله السماحة الوهبني ليها الله دي عامله لي جنس مشاكل!.. وطبعا قالوا كل ذو نعمة محسود لكين برضو جات سليمة بكرة بفكوا لي الجبص وتعرفن حاجة..براكن!

أعملن ساتر وخليكن إستاند باي ..باكر أبو أماني جاي .. وقولن لقيادتكم الهربانة أرجن الراجيكن .. تحياتي ..
[align=center] [/align]
سجمى اوعه تكون تعبته ( شوفته الحنيه بتاعتنا دى )عاد سلامتك وناس عسوم وابو المجتبى كرامتك ..وشبارقه اسوى الكرامه .. واكان على الضبح هين انحنا ضبحنا الكدايس بغلبنا خروف .. المهم انشالله تقوم بى السلامه وتانى ما تتشابا لى بنات الناس وترمى فى عيويناتك يمين وشمال .. انت ما بتوب .. بعدين الوداك تتلفت زى مروحت الطربيزه كدا شنو الظاهر عينك طاااايره اصبر بس بنكلم ام امانى تشوف ليها حل معاك ولا تحول تربطك عشان تبطل الشلاقه .. وارجع رااااااااااااااااجينك

[نزار حسن علي]

ابو اماني
صباحك عسل اعمل حسابك من كتابه الفقراء الحريم ديل بتاعين كتابه شغالين طوالي الرجال يطلعوا للشغل وهن يمشوا للفقراء
مودتي بلا حدود

[rubs]

المشاركة الأصلية كتبت بواسطة نزار حسن علي

ابو اماني
صباحك عسل اعمل حسابك من كتابه الفقراء الحريم ديل بتاعين كتابه شغالين طوالي الرجال يطلعوا للشغل وهن يمشوا للفقراء
مودتي بلا حدود

سلام يا نزار .... انت بدل تكون محضر خير تولعها زياده هى ناقصه !!! .. والضمنى شنو انهم مابقشو الفقراء قبال الشقل ؟؟؟

[نزار حسن علي]

الاخت
ربى
نهارك عسل
عارفة مابمشوا للفقرا لانه ما عندهم وقت لانو شغالين ما قاعدين لضل الضحي يتونسوا وقطيعة وكده وتاني بخافوا من القيل والقال يقولوا ليك راجل هنايه قالوا امس شافوهو طالع من بيت الشيخ كده او الفقير كدة وبعد شوية يطلعوا فيهو كلام ده اصلوا دروش من مبارات الفقراء
احكي ليك واحده عارفة حصلت لقريبنا
زوجته فقرية عديل كده نقه ونبيح وكشف حال هل تصدقي يلبس الاولاد ويجهز السندوتشات للبنات ايه رايك وهي نايمة هو راجل مسكين جدا قلت ليهو والله انا لو في محلك بمشي اسكر عديل كدة واجي البيت اشلته ليك لما تلم فيني ناس الحلة ايه رايك عمل الحكاية بعد اربعة سنوات والان مسيطر علي البيت تماما وشاهدت بعيني سيطرته علي البيت واسلوب زوجته اتغير 180درجة انا لو زول حكي لي الكلام ما كان صدقتة لكن شفت بعيني اية رايك ساعده وهي نايمة ما نفع وسيطر في النهاية علي الموقف
مودتي بلا حدود

[تحفة حوا]

المشاركة الأصلية كتبت بواسطة نزار حسن علي

ابو اماني
صباحك عسل اعمل حسابك من كتابه الفقراء الحريم ديل بتاعين كتابه شغالين طوالي الرجال يطلعوا للشغل وهن يمشوا للفقراء
مودتي بلا حدود

أيوا كدا عرفنا حاجة أتاريهم بيخافوا من الكتابة والفقرا
أها يا بنات عندي ليكن فكي كارب وعملو ما يخرش المية
وطلباتو سهلة بالنسبة للنت والبوست هنا :
كل من دخل هذا البوست مدافعا عن أبو أماني ولو في مداخلة واحدة نكتب اسمو وإيميلو والبلد الساكن فيها وأي معلومات عنو (عنوانو ، تاريخ تسجيلو في المنتدى اسمو الثلاثي إن أمكن (نزار حسن علي ) .............)
وفي أشياء تانية لن أصرح بها الآن عشان ما يعملو حسابهم
وقال دي خدمة بيقدما للنساء فقط لأنهم زباينو
عاد يا نزار شوف ليك بلد

[أبو أماني]

المشاركة الأصلية كتبت بواسطة نزار حسن علي

ابو اماني
صباحك عسل اعمل حسابك من كتابه الفقراء الحريم ديل بتاعين كتابه شغالين طوالي الرجال يطلعوا للشغل وهن يمشوا للفقراء
مودتي بلا حدود

والله كلامك صح .. أصلهن ما بقدرن علينا عيلا بالفقراء .. ما شايف صاحبك عادل .. كلامه كله والله انحن ما بنبقى بلاكن .. وإنتن الخير والبركه .. والمابخاف من مرتو ماراجل .. خلاهن ليك اتفرعنن علينا وسلن ضنبهن وسمعت قالوا لي ريستهن المختفية ماخلت ليها في ضواحي لندن فكي ماوقعت عليه وقالوا لي والقول على ذمة الراوي الفكي الدفعت ليو 500 جنيه إسترليني قبل ده وخلى ليك عادل عسوم نصير المرأة رقم (1) وبقى شايف شغل بيته تمام وخلاه ليك ياحبة عيني ما بكسر لهن كلمة وحاشاه يابنات أمي ما بصبح عدة العشاء للصباح ..وهاك ياشكر من الجنس اللطيف .. هي يا يمة عدولة أريته راجل بتي والثانية تعاين لمدامه بغيرة وحسد وتقول لبها عليك الله راجلك التحفة ده لقيتيه وين؟ وزولك في (الصيلون البغادي) راخي أضانو يسمع في شكره والجضوم زي اللقيمات منفوخات زهوا .. الغريبة لما حاولوا يكتبوا أبو أماني .. عند الفكي البريطاني من أصل نيجيري .. صاح الفكي :-
Oh my God ... Satan of this man I can not control
عدولة .. عدولة .. التحالف النسائي .. كيييييييييف؟؟؟

[rubs]

المشاركة الأصلية كتبت بواسطة نزار حسن علي

الاخت
ربى
نهارك عسل
عارفة مابمشوا للفقرا لانه ما عندهم وقت لانو شغالين ما قاعدين لضل الضحي يتونسوا وقطيعة وكده وتاني بخافوا من القيل والقال يقولوا ليك راجل هنايه قالوا امس شافوهو طالع من بيت الشيخ كده او الفقير كدة وبعد شوية يطلعوا فيهو كلام ده اصلوا دروش من مبارات الفقراء
احكي ليك واحده عارفة حصلت لقريبنا
زوجته فقرية عديل كده نقه ونبيح وكشف حال هل تصدقي يلبس الاولاد ويجهز السندوتشات للبنات ايه رايك وهي نايمة هو راجل مسكين جدا قلت ليهو والله انا لو في محلك بمشي اسكر عديل كدة واجي البيت اشلته ليك لما تلم فيني ناس الحلة ايه رايك عمل الحكاية بعد اربعة سنوات والان مسيطر علي البيت تماما وشاهدت بعيني سيطرته علي البيت واسلوب زوجته اتغير 180درجة انا لو زول حكي لي الكلام ما كان صدقتة لكن شفت بعيني اية رايك ساعده وهي نايمة ما نفع وسيطر في النهاية علي الموقف
مودتي بلا حدود

الاخ نزار تحيه طيبه .. والله عاااافيت منو ويارتو كان كسر رقبته ومرمطه عشان مرات فى نسوان مش برفعو الضغط بجيبو هارت اتاك عديييل عارف انا كرهتى فى الدنيا المراه الكسلانه الخمجانه الماعندها سرعه بديه اوالبتتغابه وبتحب تدلع نفسها احىىىىىىىىىىىى انا من النسوان الزى ديل والله الزى دى حرام اعرسوها زاتو عشان حرام تطلع اطفال بنفس المفاهيم دى الله اكون فى عون راجلها .. بس فكره السكره ما حلوه عشان ما اديها فرصه عشان تقول ما كان واعى .ولا ما كان قصدو .. وزى دى ادبها جنس ادب الدقه ما كفايه اريتنى كنت راجلها عشان تشوف المغصه ..بس منو القال ليك مافى رجال بمشو الفقير والله انا شوفته رجال عندهم قروش الفقير دا ذى واحد من واجبات البيت الاساسيه اكان افتش ليهم شقل اكان اشوف ليهم جكس ولا حتى اعالجهم .. بعدين حقيقه كدى هسى الرجال زى رجال زمان الواحد تلقاه مالى جلابيتو والعمه زى الصبه فى الراس لابتنهز لابتنرز واكن نهر الاولاد مافى زول بقول بغم بس الزمن اتغير والتيشرتات ملت الدواليب والقمصان المخصره وكل كوم وفرد الشعر دا كوم تانى .ولو جاك عريس ماتعرفو داير البنت ولا الولد ..