خطرفة نايم - صحيت نعسان ولقيتك صاحية

[منال]

المشاركة الأصلية كتبت بواسطة عبدالله وداعه الامين

[align=center]صحيت حفيان
نعسان ,, ومغمّد
وبين النوم والبيني وبينك
وقعت ساكت بينا الجمرة
وطيت الشوق بي ايد ونشلتك
رطن الجن جوايا وطنطن
ودفقك فيني فتايل خُمرة
وبين وسواسي وباقي نعاسي
دنيت جواك ودخلتك واقف
وسجمي شربتك قايلك خَمرة
وروحي الخََملة العرفت طعمك
دسّت ايد في جيبك ساهية
ومرقت بيك مفتونة وحمرا
حردتا النوم ,, البن ,,,السكر
طعم الكان بيناتنا بقريف
واتطّعمتك بتّا سمرة
ضد الجوعه الموت والشارع
ومن جواي فصلتك منك
فصّدتي الروح وطلعتي و قمرة
وانا نجمات الليل سارقني
سرقتا خطاي وبراي باريتك
يجيني حنينك طالع تمرة؟
وبلح العافية الفيني شربتو
تكلت هواي بي نخلك واقف
وبي الاشواق جواي حزّمتو
دخلت عليك با الفيني سكنتي
مرقتي علي بي الفيكي سكتي
وحسي الكان في يوم صومتو
جرى حفيان وعلي قام ينده
صوت الخوف جواي ناغمني
وانا كنت الفاكر اني فطمتو
وجاني هواك ودران ,, ودرني
حال الحال بغناك سكرني
وانا نومي معاك سهران حلّمتو
لقيتك صاحية.[/align]

عبدالله وداعه الامين
لندن - صباح الثلاثاء 29.09.2009

عبد الله ازيك وكل سنة و انت طيب و كل الامانى الحلوه ليك

معذور لو كانت نومتك تجيب مباركة العيد متأخر شويتين

يا صاحب الحروف اليك

بضيق .. لما تبعد .. و أغش العـــــيون
أعيشك مغمد .. محل ما تكــــــــــــــون
أنومك ..و أسهد .. منام السكـــــــــون

أزاي .. احتراسك تقول الـــــــــــــوداع
تشل حيل حواسك .. بلا اقتنـــــــــــــاع
متين قلبي داسك ... متين يا مطــــــاع
يطل بطش بأسك .. .فراق و انقطــــاع

فراق مافي رجعة .. برغم الطريــــــق
أنيــــــن.. مافي دمعة .. تهدي الحريـق
اغيب مرة اوعى .. أغيب ما أفـــــــيق
افيق وجعة وجعة .... أغيبيب و أفــيق
اطيق ياتو لوعة .. و بقيت لا رفيـــــق

اغنيه لمحمد النصرى