ياشاعرات وشعراء المنتدى الداير يوثق اعمالو يدخل هنا

[مجدي مسعد حنفي]

شكرا يافتحي على التنبيه
بس تعرف انا كنت عارف انك
حتعلق على القصيده وغايتو زي
مايكون ربنا قرر الوقت دا ياخد ليك حقك

[مجدي مسعد حنفي]

امارات الجمـــــــال
000000000000

قد يظن البعض أنّي
ابتغي جاهاً ومال
غير اني حين اكتب
في امارات الجمال
اسكب الاحساس عطراً
فوق حبّات الرمال
واصوغ العشق شعراً
فالهوى يثري الخيال
فإذا مامت يوماً
او رحلت في عجال
يكتب التاريخ عني
هاهنا كان يعيش
شاعر سمح الخصال
******
من بلاد النيل جئت
ذات يوم في المساء
جئت في عمر البراءة
والسذاجة والنقــــاء
كان يسألني حنيني
كيف نحتمل البقاء
بين قوم لسنا منهم
نحن فيهم غرباء
******
فإذا بالعمر يجري
في سلام ورخاء
كل من حولي صديق
يلتمس مني البقاء
بين اهلي صرت احيا
في هناء ووفاء
فالامارات ستبقى
في شراييني الدماء
وستبقى في فؤادي
كلما عزّ اللقاء

مجدي مسعد حنفي

[مجدي مسعد حنفي]

خداعه عيونك
00000000
خداعه عيونك جذابه
تتعب وتعذّب احبابا
توعدنا تجينا وتنسانا
وترجع توعدنا الكذابه
******
تضحك عينيكي تغازلنا
تغمز برموشا العاجبانا
تشقينا الحيره تعذبنا
نحتار بتريدنا وحابانا ؟
ونخاف عينيكي تلوعنا
تلعب بقلوبنا الحبابه
******
ياريتا عينيكي المغروره
تدّينا محنه وتهوانا
تصدق وتجينا في ميعادا
ترحم عينينا الولهانه
نتلاقى ثواني تكفّينا
ترتاح اشواقنا في اهدابا
******
في ليلا بنسهر نتمنّى
نلقاها سعيده وطاريانا
نبحر في بحورا ونتشاقى
نركب امواجا الآسرانا
والموجه العاليه تودينا
لشواطي اللهفه الغلاّبه

مجدي مسعد حنفي

[مجدي مسعد حنفي]

كتــــــــاب الشـــــوق
0000000000000

يمنعني عنك طول مسافات السفر
احسب بنبضي وهمّي ساعات الفراق
يتعبني ليلي وشوقي يتعدّى الصبر
نيران حنيني اليكي تكويني اشتياق
**********
الذكريات نبض الفؤاد
لو اتنست ضاع العمر
زي الشمس تمحى السواد
وترسل شعاع ضي الفجر
وانا في محطات السهاد
واقف على حر الجمر
احسب مسافات البعاد
الساعه ياعمري دهر
********
خايف عليكي من الاهل
يلهوكي عن سيرة هواي
وقلبك يمل مني الغزل
وتنسيها احلامك معاي
خليني احيا على امل
القاكي مشتاقه للقاي
راسماني في جفونك كحل
حارس عيونك يامناي
********
احكيلي عن آخر جواب
رسلتو ليكي مع الحمام
كتبت فيهو الشوق كتاب
لا ليهو اول لا ختام
حلفت ليك رغم الغياب
باقي على عهد الغرام
حبّك خلاص في عروقي داب
وبقيتي لي عيوني المنام

مجدي مسعد حنفي

[مجدي مسعد حنفي]

ياجماعه والله العظيم البوست
دا مابتاعي براي يعني اي زول عندو
اشعار بتاعتو يجينا سيد بيت ماضيف .

[مجدي مسعد حنفي]

زي الســـــــــكّر
0000000000
زي السكّر والله واكتر
انتي حلاوتك مابتتقدر
لو بالصدفه عيونا اتلاقوا
من عينيكي النظره تودّر
؛؛؛؛؛؛؛؛؛؛؛؛؛؛؛؛
زايد حسنك عسلو زياده
قلبك صافي وابيض ساده
قلبي بريدك وراجي إفاده
منديل وردي حرير ومعطر
؛؛؛؛؛؛؛؛؛؛؛؛؛؛؛
هدّي خطاكي بشيشك عدّي
زيدي علينا سلامنا وردّي
ميلي وقولي يادنيا اتهدي
خلّي قلوبنا بعطرك تسكر
؛؛؛؛؛؛؛؛؛؛؛؛؛؛؛
زي السكّر حلوه حلاوه
خفت دمك فيها شقاوه
يشهد ربّك زايده غلاوه
جوّه عيونّا عليكي بنسهر

مجدي مسعد حنفي

[فتحي مسعد حنفي]

يامجدي واصل تنزيل أشعارك حتي لو مافي زول شارك واعتبر دا نوع من الأرشفة ليك حتحتاجا لما تجي تطبع ديوان وممكن بعدين تفلتر النزل وتنزلو في سي دي وأخوك خالد ممكن يساعدك عشان أنا عارف معلوماتك في الكمبيوتر زي أخوك فتحي حدها كتابة كي بورد وكوبي وبيست وحاجات تانية من ألف باء الكمبيوتر.

[مجدي مسعد حنفي]

كلمـــــــــــــه
00000000

كلمه منك ياحبيبي
تطفي نيراني ولهيبي
وليّا تاني الدنيا تضحك
لو تقول انك نصيبي
ياحبيبي
******
كلمه منك تروي شوقي
ويجري دمي يبل عروقي
والمحبه فروعا تكبر
والمسافه البينا تقصر
والاماسي الديمه كاحله
ليّا تصفى وتبقى احلى
وتبقى من احزاني طوقي
******
كلمه منك تضوي داري
وتروي ازهاري وخضاري
والفؤاد الغيمو جفّ
بعد ماسافر ولفّا
لسه كايس ليهو مرفا
يلقى بعد الغربه الفه
ويلقى نهر الريده جاري

مجدي مسعد حنفي

[أبو أماني]

المشاركة الأصلية كتبت بواسطة فتحي مسعد حنفي

يامجدي واصل تنزيل أشعارك حتي لو مافي زول شارك واعتبر دا نوع من الأرشفة ليك حتحتاجا لما تجي تطبع ديوان وممكن بعدين تفلتر النزل وتنزلو في سي دي وأخوك خالد ممكن يساعدك عشان أنا عارف معلوماتك في الكمبيوتر زي أخوك فتحي حدها كتابة كي بورد وكوبي وبيست وحاجات تانية من ألف باء الكمبيوتر.

المشكلة يا فتحي أخوك بخت أشعار لها وزن ومقام ومعنى وبعضها تم تلحينه كمان .. فما في زول بيغامر ويقدم حاجة أقل من كده .. ولا شنو رائيك ؟ عموما أنا بقدم محاولاتي الشعرية المتواضعة أيام ما كان عندى شعر غزير في الحتة العاجباك فوق دقنوسي دي وكل مرة قاديني بيها .. والله وما ليك على حلفان لما كت شاب زييك كدي كت يا توحة يا أخوي بأخذ خصلة شعر أجرها لحدي قريب الفم .. ومرات الحنك كمان .. وكت لما العب باسكيت بول مع فريق فوكس في ملعب كمبوني .. كان معاي لاعب ختري وزميلي في الدراسة إسمو ماريو مقار سيدهم .. صاحب طابونة مقار سيدهم ببحري .. كمان قول لي إفتتحتها أنا .. وكنا الإثنين مشهورين بالشعر الطويل (الناعم!) عليك الله تفوت لي دي .. هس !! تعرف يا ناصر يوسف كت احاور وادنقس الكورة جاي وجاي ولما أجي أهدف في الباسكت برفع راسي بجدعة لوراء عشان الشعر يرجع لقواعده الأولي وبعد داك ارمي الكورة في الباسكت والجيكس ده يصفق .. قام ماريو غار مني وبقي يقلد الحركة حقتي بحذافيرها .. فتحي دي كان فوتها لي .. أنا زاتي ما عافي ليك!.

الحبيب مجدي .. يا أخي والله إنت مذهل عديييييل كدي والبوست ده من الليلة شغلي الشاغل .. بس بقدم البدايات أيام زمان يعني يا أخواني بيت مكسور .. حيطتو مائله ما تسعلوني .. ولا ما حا أنشر غسيلي عليكم .. خسوسا الخواجة أب لسانا متبري منو ده .. ولنا عودة قريبة .. أها تشاووو توقيع كلتشي ..

[فتحي مسعد حنفي]

المشاركة الأصلية كتبت بواسطة أبو أماني

المشكلة يا فتحي أخوك بخت أشعار لها وزن ومقام ومعنى وبعضها تم تلحينه كمان .. فما في زول بيغامر ويقدم حاجة أقل من كده .. ولا شنو رائيك ؟ عموما أنا بقدم محاولاتي الشعرية المتواضعة أيام ما كان عندى شعر غزير في الحتة العاجباك فوق دقنوسي دي وكل مرة قاديني بيها .. والله وما ليك على حلفان لما كت شاب زييك كدي كت يا توحة يا أخوي بأخذ خصلة شعر أجرها لحدي قريب الفم .. ومرات الحنك كمان .. وكت لما العب باسكيت بول مع فريق فوكس في ملعب كمبوني .. كان معاي لاعب ختري وزميلي في الدراسة إسمو ماريو مقار سيدهم .. صاحب طابونة مقار سيدهم ببحري .. كمان قول لي إفتتحتها أنا .. وكنا الإثنين مشهورين بالشعر الطويل (الناعم!) عليك الله تفوت لي دي .. هس !! تعرف يا ناصر يوسف كت احاور وادنقس الكورة جاي وجاي ولما أجي أهدف في الباسكت برفع راسي بجدعة لوراء عشان الشعر يرجع لقواعده الأولي وبعد داك ارمي الكورة في الباسكت والجيكس ده يصفق .. قام ماريو غار مني وبقي يقلد الحركة حقتي بحذافيرها .. فتحي دي كان فوتها لي .. أنا زاتي ما عافي ليك!.

الحبيب مجدي .. يا أخي والله إنت مذهل عديييييل كدي والبوست ده من الليلة شغلي الشاغل .. بس بقدم البدايات أيام زمان يعني يا أخواني بيت مكسور .. حيطتو مائله ما تسعلوني .. ولا ما حا أنشر غسيلي عليكم .. خسوسا الخواجة أب لسانا متبري منو ده .. ولنا عودة قريبة .. أها تشاووو توقيع كلتشي ..

تعرف يابو أماني انت راجل متواضع زيادة عن اللزوم وأنا كنت سايبك براحتك مع اني عارفك بتكتب شعر وأماني سمعتنا منو لكن مادام قلتها براك يبقي يابطل لازم تعوم بعد ما اتبلبلت براك..
بعدين عشان خاطر مجدي أنا حأفوت ليك كل الكضب بتاعك لكن حأذكرك منو الكان بيعمل بي شعرو زي ما قلت وكان بيرمح زي الفرس الأصيل..
طبعا أنا قاصد زميلنا في كمبوني ولاعب الكاثوليك الحنفصي أندريا فورستي..
تفتكرو دا ياحسين

[أبو أماني]

المشاركة الأصلية كتبت بواسطة فتحي مسعد حنفي

تعرف يابو أماني انت راجل متواضع زيادة عن اللزوم وأنا كنت سايبك براحتك مع اني عارفك بتكتب شعر وأماني سمعتنا منو لكن مادام قلتها براك يبقي يابطل لازم تعوم بعد ما اتبلبلت براك..
بعدين عشان خاطر مجدي أنا حأفوت ليك كل الكضب بتاعك لكن حأذكرك منو الكان بيعمل بي شعرو زي ما قلت وكان بيرمح زي الفرس الأصيل..
طبعا أنا قاصد زميلنا في كمبوني ولاعب الكاثوليك الحنفصي أندريا فورستي..
تفتكرو دا ياحسين

حقيقة سمعت بيو لما كت في ثالثة كمبوني .. وأظنو هاجر مع العائلة ولا شنو ما عارف .. فتحي إنت والله موسوعة حقوا تأرخ الحاجات دي .. لك معزتي وعشان طلتك البهية دي في بوست أخوك الظريف ده بحاول .. أمسح وشي بمرقة واقابلكم .. بس كان أشعاري طلعت أي كلام زي كلامي ده.. عليك الخلقك ومقلبنا.. ما تشيل حالي.. يشيلك النمل يا فتحي قول أمين.

[فتحي مسعد حنفي]

المشاركة الأصلية كتبت بواسطة أبو أماني

حقيقة سمعت بيو لما كت في ثالثة كمبوني .. وأظنو هاجر مع العائلة ولا شنو ما عارف .. فتحي إنت والله موسوعة حقوا تأرخ الحاجات دي .. لك معزتي وعشان طلتك البهية دي في بوست أخوك الظريف ده بحاول .. أمسح وشي بمرقة واقابلكم .. بس كان أشعاري طلعت أي كلام زي كلامي ده.. عليك الخلقك ومقلبنا.. ما تشيل حالي.. يشيلك النمل يا فتحي قول أمين.

بالفعل هاجر هو وأختو ماريا فورستي أجمل بت في الخرطوم وكانت بتشتغل بياعة في سوق نمرة اتنين في بوتيك حفني أبو زيد..وللأسف سمعت انو أندريا اتوفي في ايطاليا وبرضو أمبرتو السباح اتوفي..

[مجدي مسعد حنفي]

دي شنو دا ياابواماني ويافتحي
انتو دخلتوا هنا بالغلط ولا شنو الحاصل
انتو قايلين دا بوست جدي التاريخ ماخليتو الحي ولا الميت
غايتو مابغفر ليكم إلاّ ترجعوا البوست لمسارو الصحيح
يعني كل واحد فيكم يشعر شوية شعر من راسو عشان نشوف
منو فيكم اشعر من التاني

[فتحي مسعد حنفي]

المشاركة الأصلية كتبت بواسطة مجدي مسعد حنفي

دي شنو دا ياابواماني ويافتحي
انتو دخلتوا هنا بالغلط ولا شنو الحاصل
انتو قايلين دا بوست جدي التاريخ ماخليتو الحي ولا الميت
غايتو مابغفر ليكم إلاّ ترجعوا البوست لمسارو الصحيح
يعني كل واحد فيكم يشعر شوية شعر من راسو عشان نشوف
منو فيكم اشعر من التاني

ياخ احنا ما دخلنا بالغلط وكل ما في الموضوع انو دي استراحة عشان ترتب أمورك وننقل الناس لي حاجة تانية زيادة علي كدا دي طريقة مبتكرة عشان نرفع ليك البوست ودخول أبو أماني وقتحي بتجيب الناس يتاوقو عشان كايسن ليهم جنازة يلطمو فيها..
موضوع نشعر انت عارف انو أشعاري ما بتنفع تتخت مع الكلام الجميل الهنا ..فمافي طريقة الا أقوم أكتب ليك شعر مخصوص يمكن يجيبني داقي الدلجة..
أما أبو أماني فهو شاعر كويس وأنا قاعد بدردق فيهو لدرجة انا أجلت مداخلة مهمة في بوست عادل عسوم عن تشابه الانسان بالحيوان..وطبعا دا عشان أنا كل ما أفكر في أبو أماني بقوم أتذكر الشمبانزي وكل ما أشوف شمبانزي بتذكر أبو أماني وخايف أنزل الكلام دا يقوم يحرد وما يرضي ينزل أشعارو عندك بحجة اني أخوك

[إيهاب الأمين]

منو البقدر يشيل صمتي
ويعبّر عنو بالأحرف
ويدونو في شعاع الشمس
بالكلمات
منو البقدر يكون أحلام
وياخد من دموع عيني
ويغسل أسايا بالبسمات
متين يا ليل...
صباح الريد يطل
في دنيا أيامي
تبارح لهفة الأحزان
تبلل شوق قلب ظامي
متين يا قمري إنت تهل
وتطوي ستائر الإظلام
وتبعد سطوة الأوهام
ويسيل المد...
يهد سد الحواجز هد
تعال يا ضو
تعال يا أملي في الماضي
تعال يا رمز حلم الغد
تعال يا رقة الأنفاس
وخت البشرى في الإحساس
وزح السد
عشان ما تزغرد الآهات
عشان ما تكتر البسمات
وتمتد في المدى وتمتد
تجينا البهجة تتشابك
تهاجر في المقل أفراح
وتنزاح الهموم تنهد
ونرجع تاني للأحباب
نهدّي النبض والأعصاب
ونزرع تاني جنب الباب
شجيرات الوئام والود