المتواجدون الآن بالمنتدى ... ساهرووووون

[النور يوسف محمد]

بسم الله الرحمن الرحيم
نبراس ..
مساء النور .. عليك يا زهور
والله ود الزين ده الظاهر بياخد ليهو نومة
ويجى يزازى بينا
بكرة ما تنسونا من كباية الشاى

[رأفت ميلاد]

يالمساهرين فيصل سعد ده ما يغشكم ويساهر بيكم .. الزول ده حايم بالنهار ونايم مرتاااح .. الليل عنده ضوابط .. ختوا شروطكم ..
ياخد ثلاتة ورديات .. ولا يتخارج

العشا شنو؟

[مي هاشم]

مساكم فل..


الليلة ما معاكم..ولدي طالبني سهرة جامدة..وبكرة عندي ضيوف

عم رأفت..كل يوم بتسأل لكن ما بترجا العشا..الشمار شنو؟

[فيصل سعد]

المشاركة الأصلية كتبت بواسطة رأفت ميلاد

يالمساهرين فيصل سعد ده ما يغشكم ويساهر بيكم .. الزول ده حايم بالنهار ونايم مرتاااح .. الليل عنده ضوابط .. ختوا سروطكم ..
ياخد ثلاتة ورديات .. ولا يتخارج

في الصباح في الكلية و قراية الكبر
عارفها انت و فايتة اضانك ،
و العصر و المغرب بنراجع دروس الشباب
الواعد و بنحاحي في شافع و شافعة،
و الويكيند شغال 24 ساعة حارس لي
مجانيين زي حقنك ديك و كرمنالس و
اصحاب سوابق لكنهم ظراف و
بايعين الدنيا.. يا دوب مغطية على
الحركرك،بعد دا داير ترشني ثلاثة
ورديات يا باذخ
غايتو الا تشوفوا لي عنقريب
و بطانية و جك شربوت و
هاك يا شخري ..

[نبراس السيد الدمرداش]

استاذنا النور مساءك خير و سعاده,احلى كباية شاي معاها زلابيه كمان

عمو رأفت كيفنك , فيصل من ورديتو بزوغ عاوزو يمسكن تلاته دي بدعت فيها

ميو يا حبيبه السهره ناقصه بلاك, بعدين الضيوف ديل ما تتعبي نفسك و تضبحي لينا

فيصل يا حبوب الدلاله كيف؟قراية الكبر دي زي حب الكبر امانه ما بتبشتن

[النور يوسف محمد]

المشاركة الأصلية كتبت بواسطة مي هاشم

مساكم فل..


الليلة ما معاكم..ولدي طالبني سهرة جامدة..وبكرة عندي ضيوف

عم رأفت..كل يوم بتسأل لكن ما بترجا العشا..الشمار شنو؟

بسم الله الرحمن الرحيم
مى هاشم
مساك اخضر
يعجبنى الولد ( العزام وضياف
ده خصلة يا مى بتكبر مع الواحد
الزول لمّ يكبر بتكون صعبه عليهو .. شجعيهو
بعدين كباية الشاى بالنعناع حقتى ما تنسيها

[احمد زين]

المشاركة الأصلية كتبت بواسطة نبراس السيد الدمرداش

مساء الخير
وين الناس
جيت بدري ولا شنو

طبعا كالعاده ود الزين زايغ من الورديه

السهرنجية سلام
نبرة يا جميلة
يا دوب والله وصلت من المشوار الساعة واحدة ونص صباحاً
التعب حاصل

[احمد زين]

المشاركة الأصلية كتبت بواسطة فيصل سعد

كان بحاول يدقسكم،
زي عزومة اللحمة ديك
قال ماشي مشوار مدني، و بعض
مصادرنا شافو عربيته في كرتون كسلا

آآآآآآآآآآآآآآآآآآآخ انا من شمارك
المشوار جامد
من الساعة سبعة ونص صباحاً
وحتي الواحدة من صباح اليوم التالي
قلت لي كرتون كسلا
بتعرف انقولا يا باذخ

[نبراس السيد الدمرداش]

المشاركة الأصلية كتبت بواسطة أحمد محمد زين حسين

السهرنجية سلام
نبرة يا جميلة
يا دوب والله وصلت من المشوار الساعة واحدة ونص صباحاً
التعب حاصل

حمدا لله على السلامه
الشمار الما عارفو قالو مشيت لصفاح
ما معروف من صافح لمن

[hatim ALi]

ناس الليل

مساكم ورد

الايام دي الواحد بقا ما حمل السهر

الكبر و الصحة ما مساعدين

تحياتي للجميع

كونوا بالف خير

[نبراس السيد الدمرداش]

المشاركة الأصلية كتبت بواسطة hatim ALi

ناس الليل

مساكم ورد

الايام دي الواحد بقا ما حمل السهر

الكبر و الصحة ما مساعدين

تحياتي للجميع

كونوا بالف خير

والله فاقدنك يا حاتم

طيب انت مدام كبرت و صحتك على قدها مالك مع السامقين يا باذخ
تجيك جلطه ولا سكري ود.احمد ما مسؤل

[احمد زين]

المشاركة الأصلية كتبت بواسطة hatim ALi

ناس الليل

مساكم ورد

الايام دي الواحد بقا ما حمل السهر

الكبر و الصحة ما مساعدين

تحياتي للجميع

كونوا بالف خير

تعال هنا يا اخ بلا كونوا بخير معاك
وين يا شاب
الاخت بتاعة المشاكل ديك
شايلة عكاز ولابده ليك في راس الشارع
اعمل حسابك

[احمد زين]

المشاركة الأصلية كتبت بواسطة نبراس السيد الدمرداش

حمدا لله على السلامه
الشمار الما عارفو قالو مشيت لصفاح
ما معروف من صافح لمن

نبرة
صفاح شنو ياخ
نحن لا نصافح
هي كانت رحلة ممتعة ومتعبة في نفس الوقت

[مي هاشم]

أحمد زين


فتّــــوا سريع...

من قبييييييييييل راجياك

[نبراس السيد الدمرداش]

المشاركة الأصلية كتبت بواسطة أحمد محمد زين حسين

نبرة
صفاح شنو ياخ
نحن لا نصافح
هي كانت رحلة ممتعة ومتعبة في نفس الوقت

يا زول بركة الجيت

انتو بتلعبو كشاتين و تشربو شربوت

انا غايتو قلت ليهم مشى يعقد لابو اماني