ود مدني

[رأفت ميلاد]

المشاركة الأصلية كتبت بواسطة بابكر عباس

ما في مشكلة نفتح ليك قوس كبير و عندنا شنو! بجب راجع لموضوعي الاساسي..
المايك معاك يا رأفت
تفضل يا خفيف الظل

يا بابكر مدنى حفر حفر .. وممالك وحدود .. ما بعرف أوثقا .. بحكى ليك وقائع لى ولى غيرى .. حاجة أشبه بالذكريات أو الرواية الغير مرتبة .. عن حقبة أكتر من بلد .. والبلد زمان ما مكان ..

فاروق أمين كان عاتى ما عندو رقبة وأسود زى الليل وبعاين ليك نظرة حادة كده من تحت لى فوق وعنده مشية جمباوية كده شكلها مفترى .. لكن كان مسالم شديد وطيبة فايقة الحدود وضحكته مجلجلة .. (بالمناسبة كان الصديق اللدود لغازى عبدالرحمن طه) .. ما بتفارقوا والشحمة والنار وغازى غياز زيك كدة

المهم فاروق دخل السينما الخواجة شعب والفلم هندى ما فيه نفس (بالمناسبة بحكى هو) .. قال عامل فيها عب كبير شق الناس واثق كده .. إلقى ليك قدام فى الزحمة دى كنبة فاضية فيها زول واحد بس متحكر فى نصها لابس ردا. قال مشيت أتقدل وطلبت منو يزح شوية وقعدت .. السينما صنت كلها .. الزول الجمبو ضحك وقال للناس (جه براااااااهو) وصاااج لصق لى فاروق كف .. فاروق قال لب أتكومت فى الواطة .. وقمت أضانى صننننن ما سامع حاجة .. دغرى على الباب والناس لحدى العسكرى فجو ليه الطريق .. وبركات عديل .. قعد يومين ما بسمع ..
طلع صاحبك قعد جمب الصادق أبو العافية

[رأفت ميلاد]

المشاركة الأصلية كتبت بواسطة أسامة الكاشف

طلعت دفعة ودالفتلي يا رأفت
وأنا أقول مالو كلام لازق فيني سليسيون
ونارك مولعة شمة بنزين
فتحي شغال نظام المديدة حرقتني
خلينا في بت الشهاوي
وبابكر فاتح ليك قوس من حي البان لي عووضة
خش بي كراعك الشمال

تعرف يا أسامة كلامك ده هبشة كبيرة .. حى البان لينا فيه ذكريات جميلة وزميلنا رحمه الله (الجد) اللمين عمر اللمين الشقيق الأصغر لبابكر تبت .. وطبعاً منبعم بانت بيت ناس عمك أبشيبة والد ناس القلة أخوان ..
عووضة كان عندى فيها رفيق الدرب القرب يودرنى بالسمسمية مهدى أحمد حسن .. قبل فترة إتصلت بى بنت أخويا قالت أستاذا فى الجامعة قال بعرفنى .. لامن ما عرفتو قال ليها قولى ليه قريب مهدى أحمد حسن .. عدينا أجمل أيامنا هناك وإتعرفت على تومات وإتملحت ما عرفت أحب ياتا فيهن .. بالليل كنت لامن أرجع مدنى مشطوب عشان أمشى بركات لازم أشق خلا عووضة مدنى (قالوا هسة مافى) نتوغل شوية فى الضلمة ونقعد ننادى (كتا) وهو رباطى ده مكان عمله .. بطلع لينا هو ولا أى واحد من (الزملاء) ويقطعنى بأمان لحدى البوابة
ود الفتلى سمعت بقى أسطورة وبقى فكى وقالوا معرس ليه جنية وأختفى فى البحر وما طلع ..
جد فى زمنا ما كان معروف ليه أهل ..لما يزرو البوليس بنط البحر .. بفضلو حارسنه وبكون قطع حنتوب .. بعوم زى الكائن البحرى .. لما يقطع بنزين برقد فى شارع الظلط يعطل الحركة لا من يجيبوا ليه شمة
بت الشهاوى ولا بخارى جمب بنات الدويم فى الحلة الجديدة كانت هدندوية حارة .. موقفة مدنى على كراع

[رأفت ميلاد]

المشاركة الأصلية كتبت بواسطة طارق صديق كانديك

ازيك يا جميل

عوض سليمان ومحمد عبدالرحيم محمود وسامي أمين الجمل .. وأسماء أخرى ذكرها لي عوض سليمان محمد الماحي .. في فريق الجوهرة ده .. غايتو .. بقينا متابعنك للتوثيق وللمتعة .. متعك الله بالصحة والعافية .. !!

تحياتي

عوض سليمان عرفته .. شلته كانوا أصغر علينا ومسالمين .. ناس محمد عبدالرحيم محمود .. أبوه لاحقاً بقى محافظ الجزيرة ومعتصم عبد الرازق ومصدق حسن بابكر أخو محمود الكنزى الصحفى بتاع القوات المسلحة وناس أنور سنادة .. ديل لعبو معانا صغار وصفا عليهم الفريق .. ياخ سلم عليه وأدينى تلفونه فى الخاص .. وبجيك بسيرة (عصام) وده مساعد مسمى نفسه كده

[فتحي مسعد حنفي]

المشاركة الأصلية كتبت بواسطة رأفت ميلاد

عوض سليمان عرفته .. شلته كانوا أصغر علينا ومسالمين .. ناس محمد عبدالرحيم محمود .. أبوه لاحقاً بقى محافظ الجزيرة ومعتصم عبد الرازق ومصدق حسن بابكر أخو محمود الكنزى الصحفى بتاع القوات المسلحة وناس أنور سنادة .. ديل لعبو معانا صغار وصفا عليهم الفريق .. ياخ سلم عليه وأدينى تلفونه فى الخاص .. وبجيك بسيرة (عصام) وده مساعد مسمى نفسه كده

انت ما صدقت جابو ليك سيرة مدني طوالي قمت تبرطع..ألله يسامحك يابابك الفارسي..
كدي بالمرة يارأفت جيب لينا سيرة آل عباس

[أبوبكر عباس]

المشاركة الأصلية كتبت بواسطة رأفت ميلاد

تعرف يا أسامة كلامك ده هبشة كبيرة .. حى البان لينا فيه ذكريات جميلة وزميلنا رحمه الله (الجد) اللمين عمر اللمين الشقيق الأصغر لبابكر تبت .. وطبعاً منبعم بانت بيت ناس عمك أبشيبة والد ناس القلة أخوان ..

إن شاء الله با رأفت تكون بتعرف ميرغني درداقة

[أسامة الكاشف]

يا رأفت
حقو تشتغل دليل للأحزاب في الانتخابات الجاية

الجد الله يرحمه من رموز حي البان هو كل آل تبت لحدي ابراهيم
ومحمود الكنزي كان معانا في عمان ورجع السودان هسه
عمل ليه محل في سعد قشره
وسمير أخوه في الامارات
أخوهم الصغير مجتبى كان الدفعة القدامنا بي سنتين في أسيوط
قلنا نوريك أخبر fresh لأنو التاريخ ده الظاهر عليه الكار بتاعك

حاشية: العاجبني فيك سكت لينا فتحي
ما قادر يقول بغم
تقول مدني شافها في الخريطة بس

[رأفت ميلاد]

المشاركة الأصلية كتبت بواسطة بابكر عباس

إن شاء الله با رأفت تكون بتعرف ميرغني درداقة

يا بابكر أجلت الكلام فى سيرة ميرغني درداقة لحدى ما أجمع معلومات لكن لسة ما أتوفقت والإسم طشاش طشاش. ضربت لى محمد وفرينى فى أمريكا لكن ما لامى فيهم. نكيتك ده ماش يودرنا ياخ

المشاركة الأصلية كتبت بواسطة أسامة الكاشف

يا رأفت
حقو تشتغل دليل للأحزاب في الانتخابات الجاية

الجد الله يرحمه من رموز حي البان هو كل آل تبت لحدي ابراهيم
ومحمود الكنزي كان معانا في عمان ورجع السودان هسه
عمل ليه محل في سعد قشره
وسمير أخوه في الامارات
أخوهم الصغير مجتبى كان الدفعة القدامنا بي سنتين في أسيوط
قلنا نوريك أخبر fresh لأنو التاريخ ده الظاهر عليه الكار بتاعك

حاشية: العاجبني فيك سكت لينا فتحي
ما قادر يقول بغم
تقول مدني شافها في الخريطة بس

الجد الله يرحمه كان دفعتى فى مدنى الثانوية .. تتصور حى البان ده ساعدنا فى رحيلهم ليه .. سمعت بابكر بقى من الأعيان .. بابكر يوم من الأيام كان لاعب كرة مميز ولكن مشهوربضعف التسديد فى المرمى .. فكان مشهور (تبت شوته بزغة)

كان هبشت أولاد دفعتنا ما عندك أخبار بايضاب والجيلى يونس العركى وعوض(الشين) الزين .. واللستة تطول .. بجيك بى مهلة عن ناس السر بدوى .. سمعت أخوه مات ياخ

راجع ليكم بس ناوى أجيب معاى زول موسوعة .. ده ياهو الماشى يخش فى حوش ناس عمى الكاشف ويسوطه .. ما عارف يا فتحى يمكن يجيب ليك أتر ناس آل عباس زاتم

الكلام (النتشة) وبقى أمثال عم كل السودان تقريباً أغلبه طلع من مدنى زى

سنة يا الحيطة .. وسنة والحساب على أنا
وتقول لى عبد الحميد قال لى قال
وشك يا جميل
حلو دامبا
فى أمل ولا محتمل
يا تتى حمامكم بدى ولا بعضى

سمعت يا الكاشف بـ (غريش)

[Alomda]

المشاركة الأصلية كتبت بواسطة رأفت ميلاد

طلع صاحبك قعد جمب الصادق أبو العافية

ألاخ اسامة / رأفت

تحياتي

الشخصية دي موجوده حتى اللحظة ولا دي لقطة من وحي الخيال.

[عبدالرحيم ابراهيم العبيد]

العزيز /رأفت
أبن الجزيره البار
وبعدين التكله أبشر ولا رفاعه
قال فضل قال
بعد شويه تقول بالقرب من أزرق
ودمت بالف خير

[رأفت ميلاد]

المشاركة الأصلية كتبت بواسطة Alomda

ألاخ اسامة / رأفت

تحياتي

الشخصية دي موجوده حتى اللحظة ولا دي لقطة من وحي الخيال.

العزيز العمده مرحب بيك فى سودانيات وشرفتنا فى (ود) مدنى

بالمناسبة (ود) مدنى دى دقست فيها أول البوست وهبيت فى بابكر عباس .. كان أفتكرت ليها كويس كان عرفت إنه من أولاد مدنى ..

يا عمدة الصادق أبو العافية شخصية حقيقية .. فى آخر أيامنا فى مدنى كان خرج من السجن بعد مدة حبس طويلة غيرت كثير من سلوكياته .. يقال تم سجنه بعد عملية إنتقامية من قاضى ظلمه فى قضية أخرى .. ولا مجال فى الخوض فى (عملية إنتقامه) ..

رأيته وكان يلبس دائماً ردا كاكى قصير .. لم يكن مفتول مثل أبطال كمال الأجسام مثل حيدر حسين (قطامة) رحمه الله .. ولكن جسمه (خلقياً) مبنى مثل الصخرة .. وكان لا يهاب وغضبه قاتل ..

فى إحدى الأيام ونحن عائدين من الخرطوم بعربة جديدة (موسكوفيتش) تعطلت فى الشارع وساعدنا أحد سائقى القندرانات وكان فى الإتحاد السوفيتى فإهتم بالعربة .. فحضر يخبرنا بعيوب تصنيعها بمواصفات البلاد الباردة .. كان (الكويل) لاصق بالموتور لتظل دافئة فى بلاد الصقيع .. وفى السودان تعطله الحرارة .. تم تبريده بالماء ونصحنا فور وصولنا مدنى تحويل مكانه بعيداً عن الموتور (القصة دى خطرت ببالى حكيتا بمزاج لإعجابى بذلك السائق وجمال شكله ولبسه المميز وحديثه الواثق ومفتول عضلاته وكان يشبه لاعبى المفضل فى مدنى جعفر ود النوبة .. وأيضاً معرفته لروسيا التى كانت عظيمة فى حينها وكنا نشجعها ضد أمريكا )

وصلنا الى مدنى ودخلنا المنطقة الصناعية .. أدخلنا العربية وبدأ فوراً عمل (حدادة) لتغيير مكان الكويل .. أخدت لى (زوغة) من الوالد لزوم حاجة تعدل الراس ومن الخرطوم (متقريف) .. رجعت لم أجده فى الورشة .. تلفت أجده يجالس الصادق أبو العافية ويشرب الشاى ويضحك بأعلى صوته بصفقات على الأيادى والكتوف .. جلست بعيداً وسألته بعد أن أبتعدنا (من وين بتعرف الراجل ده) .. فقال لى ببساطة راجل ظريف جداً قابلته فقط الآن .. قلت له أنت عارف ده منو .. ده الصادق أبو العافية .. الوالد فرمل فى وسط الخلا وقال لى (عليك النبى أنا كنت قاعد مع الصادق أبو العافية؟؟)

[رأفت ميلاد]

المشاركة الأصلية كتبت بواسطة عبدالرحيم ابراهيم العبيد

العزيز /رأفت
أبن الجزيره البار
وبعدين التكله أبشر ولا رفاعه
قال فضل قال
بعد شويه تقول بالقرب من أزرق
ودمت بالف خير

كلها حمنا فيها يا عبد الرحيم حليل الأيام
يوم يا عبد الرحيم مشينا ود الشافعى معاى واحد صحبى من أولاد مدنى .. ركلسنا يومنا كله وبالمساء ما لقينا مواصلات .. شقينا كدارى لى بركات .. بعد ما ضلمت شفنا لينا نور من بعيد فى نص الخلا .. أنا فكرت فى ناس التركترات بسرقوا بالليل ويحرتوا الواطة أخير من حراية الصباح وزيادة شغل .. وطبعاً ممنوع .. قررت أخوف ليك صحبك قلت ليه جادى كده أمش ساكت ما تتلفت .. ده شيطان إسمه (أبو فانوس) بظهر بالليل عشان يتوه الناس .. قام النور قرب مننا وما سامع صوت التركتر .. دخلتنى خوفة .. قلت ليه يا زول كتا بهظر الكلام بقى جد .. وفكينا البيرق .. فرد جريه جبناها السوريبة .. وقفنا نناهد لقينا قدامنا لمة كلاب بتهوهو .. لامن وصلناهم لقيناهم محاوطين مرفعين .. ودقشنا تانى .. نطينا ليك صريف وسط نسوان نايمات .. غايتو شوية دربكة كدى جابوا لينا كورية لبن عاتية شربناها نناهد .. حرنا لامن فتشوا لينا بوكس ودانا بركات .. والفى راسنا كلها طارت

[أسامة الكاشف]

يا رأفت العمدة ده عبد الرحيم محمد عثمان العمدة
فردة عوض الزين وبيضاب
وهم الاتنين قاعدين في مسقط
عوض جاء من اجازة من السودان ليهو يومين


بابكر تبت عندو محل بتاع عقارات في مدني
قصاد صيدلية المزارعين زمان

غريش الله يرحمو
قتلوا وشتتوا فوقو الجنيهات
يخيل لي اسم المتهم كان بشبه اسمك:
لكن نسيتو

والله كان ما بطلت الحكاوي دي
بابكر بزعل
ويسحب بوستو ده
ويخلينا في السهلةp

[رأفت ميلاد]

المشاركة الأصلية كتبت بواسطة أسامة الكاشف

يا رأفت العمدة ده عبد الرحيم محمد عثمان العمدة
فردة عوض الزين وبيضاب
وهم الاتنين قاعدين في مسقط
عوض جاء من اجازة من السودان ليهو يومين
p

وطيب العمدة يسألنى من الصادق أبو العافية ياخى تحياتى ليه ولى بايضاب وعوض الزين .. أسأل بايضاب ساب تدريس البنات ليه وبعدين عوض الزين كان بنوم فى الحفلة وبعدين لامن يصحوه .. إتخيل بى شناتو دى وصاحى من النوم يقعد يحب
ياخ دردقم هنا .. والزول الناوى أجيبه محمد زكمش (محمد الفاتح عبدالرحمن) ..

المشاركة الأصلية كتبت بواسطة أسامة الكاشف

غريش الله يرحمو
قتلوا وشتتوا فوقو الجنيهات
يخيل لي اسم المتهم كان بشبه اسمك:
لكن نسيتو
p

ياخ غريش قضيته إتقفلت عشان التحريات لقت مدنى كلها ممكن تكتلوا .. زى ما بقولوا (توزع دمه على القبائل) تم قبض كمية من البشر منهم زميلنا ودفعتنا .. مافى داعى لذكر إسمه .. يمكن لخبطت فينى مش من الأسماء بس عشان حلبى .. سافر بعد إطلاق صراحه لأرض أجداده الحقيقيين ولم نراه ثانية ..
غريش كان فيه كل السوءات لحدى (الإتحاد الإشتراكى) .. وجدت جثته متعفنة داخل قطية فى محطة السكة حديد ومنثور فوقها الفلوس وباقى (قعدة) .. مما يدل قتله أشخاص رتبوا لذلك
إتذكرته لأن إسمه بقى دعابة لفترة .. فى شكل (تسديرة) .. يعنى واحد يقول ليك .. ما شفتو تقول ليه منو يقول ليك غريش

لكن أنت يا أسامة الدفعة البعد مجتبى بسنتين بتعرف غريش من وين ؟
غايتو فارق السن بيناتا زى فارق السن بينى وبين فتحى

المشاركة الأصلية كتبت بواسطة أسامة الكاشف

والله كان ما بطلت الحكاوي دي
بابكر بزعل
ويسحب بوستو ده
ويخلينا في السهلةp

والله أنا خايف يهملوا لينا هسة وشفتو بدا فى ثورات وهتافات .. أقوم أرجعو ليك الأنادى

[أبوبكر عباس]

المشاركة الأصلية كتبت بواسطة رأفت ميلاد

[B][size=5][color=#00008B]والله أنا خايف يهملوا لينا هسة وشفتو بدا فى ثورات وهتافات .. أقوم أرجعو ليك الأنادى

و حات سيدي الحسن يا رأفت و يا الكاشف
نوع كتاباتكم دي انا مستعد أدفع عليها..
انتو قايلني أنا خالد الحاج ماكل الناس ملح ساكت
والله أنا لو كنت زي بركة، خالد الصائغ و لا فتحي الضو ديل
حرم ما بكتب مجاني...

[أبوبكر عباس]

المشاركة الأصلية كتبت بواسطة أسامة الكاشف

حاشية: العاجبني فيك سكت لينا فتحي
ما قادر يقول بغم
تقول مدني شافها في الخريطة بس

دي براها يا كاشف بدفع فيها لرأفت بدل تسكيت...

و صاحبك حايم برة في بوستات الجكس و شغال رسائل داخلية مع ابوغاقلة لزوم الشروحات!! ياخي دا فرق بتاع اربعة اجيال ....
غايتو بارك الله في آلاء بتو مرات بدخلو السيستم تشرح ليهو المفردات