ود مدني

[أبوبكر عباس]

فول أبو ظريفة و السوق الجديد:
مطعم أبو ظريفة بالسوق الجديد من أشهر مطاعم الفول بالسودان في فترة السبعينات..
أسرة أبو ظريفة اسرة من أصول مصرية...
كان العم إبراهيم أبو ظريفة يدير المطعم في السبعينات و كانت تربطنا به علاقة قوية بحكم الجوار في السوق الجديد و السكن ببانت...
دكان البقالة المقابل لمطعم أبوظريفة كان لعميد أسرتنا الحاج سعيد مجذوب..
بين المطعم و البقالة و قهوة محمد نور كانت في علاقة عمل قوية جدا.. و علاقة ود فريدة بين اصحابها الثلاث..
المطعم كان مكان الفطور المفضل لعمال المؤسسة الفرعية للحفريات و إدارة الكهربة و الموية..
بعد ما يشتروا الفول من أبوظريفة بجوا يشيلو الجبنة و زيت السمسم من بقالة عمنا سعيد مجذوب..
أتذكر جيدا تلك الزحمة بالبقالة و نحن أطفال بنساعد في البقالة أيام العطلات..
بعد الفطور بتحولوا لقهوة محمد نور لشرب القهوة و الشاي اللحمر السادة بالنعناع و الشاي الفرنساوي..

[أبوبكر عباس]

السوق الجديد لمن لا يعرف ود مدني (زي فتحي) يقع شرق الاستاد و كان مبني على طراز حديث في شكل بلوكات بينها ميادين منجلة و محاطة بالاشجار و مسورة بالسلك.. و الشوارع بين الدكاكين مسفلته...

كنا نلعب الكرة في هذه الميادين و المغرب بدونا من البقالة قرش لشراء الطعمية الفرش من ابو ظريفة و بنرجع للبيت مرورا ببار زوزو و كنا نتسكع جنب البار عشان نلقط الفيش بتاع قزاز الوسكي و لو لقينا لينا قزازة مجدوعة برا برضو بنشيلها و في نفس الوقت نتشمشر نشوف الناس القاعدين يشلحوا يمكن نلقى زول بنعرفو..
من بار زوزو نمسك قضيب السكة حديد لحدي بانت و لو شعرنا في قطر جاي في السكة بنستناهو و نكوم ليهو الفبش قي السكة عشان نشوفو كيف بسحقو

[فتحي مسعد حنفي]

المشاركة الأصلية كتبت بواسطة بابكر عباس

السوق الجديد لمن لا يعرف ود مدني (زي فتحي) يقع شرق الاستاد و كان مبني على طراز حديث في شكل بلوكات بينها ميادين منجلة و محاطة بالاشجار و مسورة بالسلك.. و الشوارع بين الدكاكين مسفلته...

كنا نلعب الكرة في هذه الميادين و المغرب بدونا من البقالة قرش لشراء الطعمية الفرش من ابو ظريفة و بنرجع للبيت مرورا ببار زوزو و كنا نتسكع جنب البار عشان نلقط الفيش بتاع قزاز الوسكي و لو لقينا لينا قزازة مجدوعة برا برضو بنشيلها و في نفس الوقت نتشمشر نشوف الناس القاعدين يشلحوا يمكن نلقى زول بنعرفو..
من بار زوزو نمسك قضيب السكة حديد لحدي بانت و لو شعرنا في قطر جاي في السكة بنستناهو و نكوم ليهو الفبش قي السكة عشان نشوفو كيف بسحقو

انت يازول القال ليك منو ما بعرف مدني
مدني كنت بقضي فيها اجازاتي كلها في بيت خالي مدير سينما الخواجة وساكن في لبيت الجنب السينما القديمة الفيهو شجرة الزوني الكبيرة والضهر نادي الاتحاد وفاتح علي المحكمة والمكتبة وكنت بمشي اتمرن باسكت في نادي الاتحاد أيام ما كان ابراهيم بدوي القون لسة في مدني وكان يوسف دبوس لسة بيلعب..لكن تعرف الزمن طال بس خرطة مدني لسة في راسي وعندي في مدني صحبان كتار بس أكيد ما من سنك.. زي عثمان الخضري وسري وبكري محمد علي وأحمد وصلاح أولاد شيخ آدم وعبادي الأبوهو كان مدير البورد وعلي سليمان الوكيل وبكري سر الختم الخليفة ودكتور علي عبد المجيد.. وغيرم كتار وكنت بشرب ليمون في كشك عوض حلاوة وبشتري الشري من بار الخواجة الجنب محطة البص السريع.. أها برضو ما بعرف مدني..

[رأفت ميلاد]

المشاركة الأصلية كتبت بواسطة بابكر عباس

فول أبو ظريفة و السوق الجديد:
مطعم أبو ظريفة بالسوق الجديد من أشهر مطاعم الفول بالسودان في فترة السبعينات..
أسرة أبو ظريفة اسرة من أصول مصرية...
كان العم إبراهيم أبو ظريفة يدير المطعم في السبعينات و كانت تربطنا به علاقة قوية بحكم الجوار في السوق الجديد و السكن ببانت...
دكان البقالة المقابل لمطعم أبوظريفة كان لعميد أسرتنا الحاج سعيد مجذوب..
بين المطعم و البقالة و قهوة محمد نور كانت في علاقة عمل قوية جدا.. و علاقة ود فريدة بين اصحابها الثلاث..
المطعم كان مكان الفطور المفضل لعمال المؤسسة الفرعية للحفريات و إدارة الكهربة و الموية..
بعد ما يشتروا الفول من أبوظريفة بجوا يشيلو الجبنة و زيت السمسم من بقالة عمنا سعيد مجذوب..
أتذكر جيدا تلك الزحمة بالبقالة و نحن أطفال بنساعد في البقالة أيام العطلات..
بعد الفطور بتحولوا لقهوة محمد نور لشرب القهوة و الشاي اللحمر السادة بالنعناع و الشاي الفرنساوي..

يا بابكر كنا بنتسلف العجلات من أولاد مدنى ونمشى أبو ظريفة .. وغالباً مع دك الحصة التانية .. لان التالتة صعبة والتسلل تحت أعين عمك الصول صعبة .. وأبو ظريفة ليس فقط لروعة فوله بل أيضآ للتوفير .. لآنه كان يبيع الفول فقط .. أما الخبز والسلطات فهى مجانية .. نجيب موية الجبنة والجبنة من عمك مجذوب وطلع قريبك .. ونشترى إتنين فول عليهم كل السلطات وزيت (محروق) وهو زيت تحمير الباذنجات للسلطات ولا تجده إلا عند أبو ظريفة .. نضيف الجبنة ومويتا ونفت عليها خمسة عيشات فطور لخمسة أشخاص وتكون وفرت حق البرنجى
من الطرائف عندما لحق فول أبو ظريفة قليل من الغلاء .. كانت قامت أمامه بنايتين (نسيت أسماء ملاكههم) قال عباس بايا .. (عمك إبراهيم بقى لما يملا الكمشة يرفع راسه يشوف عمارة(...) يديها هزة .. بعد ما يطلعا يتلفت يشوف عمارة (...) التانية يديها دقة فى خشم القدرة)

بمناسبة .. قهوة فرنساوى .. أخبار ود الفرنساوى شنو .. وباسطتة الجمب السينما .. بالمناسبة إسمة ورد فى قصة الكاشف

[رأفت ميلاد]

المشاركة الأصلية كتبت بواسطة فتحي مسعد حنفي

انت يازول القال ليك منو ما بعرف مدني
زي عثمان الخضري وسري وبكري محمد علي وأحمد وصلاح أولاد شيخ آدم وعبادي الأبوهو كان مدير البورد وعلي سليمان الوكيل وبكري سر الختم الخليفة ودكتور علي عبد المجيد.. وغيرم كتار وكنت بشرب ليمون في كشك عوض حلاوة وبشتري الشري من بار الخواجة الجنب محطة البص السريع.. أها برضو ما بعرف مدني..

عثمان الحضرى ولا الخضرى يا فتحى .. وعبادى ديل ناس عباس عبادى ؟
وطلعت من زمن عوض حلاوة

الخواجة ده أبو شمس .. بابكر عباس ناس أبو شمس ولمنيوس ما بعرفم .. الخواجة كان بعد موسم القطن بجوهوه العمال قابضين البونس .. بديهم التلاتة بيرة الأوائل مجاناً ترحيب .. آخر الليل بدفعوا حساب البار كله

[أبوبكر عباس]

اقتباس:

المشاركة الأصلية كتبت بواسطة بابكر عباس
لا حبذا انت يا أم درمان من بلد
أمطرتني نكدا لا زارك المطر
محمد الواثق


مدني بعيون زائر إيطالي في حدود سنة (1830):

ريتشارد هيل مؤرخ أوربي نشر كتاب بعنوان "على تخوم العالم الاسلامي"، الجزء الأول منه عبارة عن مذكرات شخصية لمواطن ايطالي زار السودان في حدود 1830م و وصف مدني بأنها:
تقع في منخفض شبة جزيرة سنار على الضفة الغربية للنيل الأزرق.

معظم بيوت الأهالي من الطين و القش.

تظل مياه الأمطار متجمعة في برك آسنة لمدة طويلة بعد موسم الأمطار (لسؤ التصريف الطبيعي) مما يؤدي لتكاثر البعوض و انتشار الأمراض المعدية.

يقوم معظم الأهالي بقضاء حاجتهم على ضفاف النيل...
عشان كدة القعاد على الشاطئ بيكون صعب خلاص و خاصة باليل

المدينة بصفة عامة قذرة الي حد البشاعة.

يعني المدينة التي أسسها الشيخ محمد ود مدني السني قبل مئات السنين من هذا التاريخ يقال عليها إجمالا " قذرة الى حد البشاعة. مما يعني أن المجهود البشري المادي الذي بذل خلال تلك الحقبة ضعيف جدا و غير معنوي.

أها يا عبد الخالق رفعنا ليك البوست بتاع مدني

[فتحي مسعد حنفي]

المشاركة الأصلية كتبت بواسطة رأفت ميلاد

عثمان الحضرى ولا الخضرى يا فتحى .. وعبادى ديل ناس عباس عبادى ؟
وطلعت من زمن عوض حلاوة

الخواجة ده أبو شمس .. بابكر عباس ناس أبو شمس ولمنيوس ما بعرفم .. الخواجة كان بعد موسم القطن بجوهوه العمال قابضين البونس .. بديهم التلاتة بيرة الأوائل مجاناً ترحيب .. آخر الليل بدفعوا حساب البار كله

عثمان الخضري المهندس الزراعي يارأفت ما الحضري الكان سفير السودان في واشنطن ومتزوج بت حسن شطة ضابط مدرسة حنتوب زمان وعثمان الحضري كان في الأصل طبيب وعمك حسن شطة جا واحد اسمو علي ملح يخطب بتو عمنا حسن رفضو وقال ليهو ياولدي يعني عايزني أرسم في كروت الدعوة ملاحة
بالمناسبة يارأفت في سؤال داير في راسي ليهو زمن وهو ليه اسم عباس كتير في مدني؟عندنا هنا بابكر عباس وعباس الشريف والسرق البنك في مدني برضو كان اسمو عباس وكان جاي من أمريكا وقالو لما ودو السجن كان بخوف الحراس والوقت داك كان عوض حلاوة في السجن..قال للحراس الليلة خلو لي زنزانتو فاتحة.وفعلا بعد ما المساجين نامو عوض حلاوة مشي ليهو في الزنزانة ما عارف عمل ليهو شنو لكن قالو الليل كلو عباس كان بكورك

[عباس الشريف]

اقتباس:
المشاركة الأصلية كتبت بواسطة فتحي مسعد حنفي
عثمان الخضري المهندس الزراعي يارأفت ما الحضري الكان سفير السودان في واشنطن ومتزوج بت حسن شطة ضابط مدرسة حنتوب زمان وعثمان الحضري كان في الأصل طبيب وعمك حسن شطة جا واحد اسمو علي ملح يخطب بتو عمنا حسن رفضو وقال ليهو ياولدي يعني عايزني أرسم في كروت الدعوة ملاحة
بالمناسبة يارأفت في سؤال داير في راسي ليهو زمن وهو ليه اسم عباس كتير في مدني؟عندنا هنا بابكر عباس وعباس الشريف والسرق البنك في مدني برضو كان اسمو عباس وكان جاي من أمريكا وقالو لما ودو السجن كان بخوف الحراس والوقت داك كان عوض حلاوة في السجن..قال للحراس الليلة خلو لي زنزانتو فاتحة.وفعلا بعد ما المساجين نامو عوض حلاوة مشي ليهو في الزنزانة ما عارف عمل ليهو شنو لكن قالو الليل كلو عباس كان بكورك

عمو فتحي مدني فيها عبابيس كثيرة سيرتهم جميلة ما فتشتا لينا غير عباس بنكي .... تعرف لقب ركس لي عباس اطلق علي لاعب الكرة الشهير باهلي مدني عباس ركس منها الناس بقت تقول علي اي واحد اسمو عباس ركس ..... ازيد ليك العبابيس كان اكبر خانة بنقو في مدني بتاعت واحد اسمو عباس اسأل منها رافت بعرفا كويس هي والنيافه فيها ايضا احسن واحد عندو زير نيفه اسموا برضو عباس ودي كسرة من كسرات ابو علي اشهر طبيب اطفال في تلك الفترة في السودان كان يوجد بمدني (( عباس رمزي))

[فتحي مسعد حنفي]

اقتباس:
المشاركة الأصلية كتبت بواسطة عباس الشريف


عمو فتحي مدني فيها عبابيس كثيرة سيرتهم جميلة ما فتشتا لينا غير عباس بنكي .... تعرف لقب ركس لي عباس اطلق علي لاعب الكرة الشهير باهلي مدني عباس ركس منها الناس بقت تقول علي اي واحد اسمو عباس ركس ..... ازيد ليك العبابيس كان اكبر خانة بنقو في مدني بتاعت واحد اسمو عباس اسأل منها رافت بعرفا كويس هي والنيافه فيها ايضا احسن واحد عندو زير نيفه اسموا برضو عباس ودي كسرة من كسرات ابو علي اشهر طبيب اطفال في تلك الفترة في السودان كان يوجد بمدني (( عباس رمزي))



يعني أنا ما غلطان لما ربط اسم عباس بي مدني
لكن برضو ما شرحت لي السبب شنو..أوعو تكونو من بقايا الدولة العباسية أو تقومو تبقو زي عباس بن فرناس وتقعو تكسرو عضامكم

[أشتر]

المشاركة الأصلية كتبت بواسطة عباس الشريف

والنيافه فيها ايضا احسن واحد عندو زير نيفه اسموا برضو عباس

دي المرة التالتة تجيب سيرة النيافة ...
يعني شنو النيافة يا ركس ؟؟؟
وشكرن ...

[عباس الشريف]

اقتباس:
المشاركة الأصلية كتبت بواسطة أشتر
دي المرة التالتة تجيب سيرة النيافة ...
يعني شنو النيافة يا ركس ؟؟؟
وشكرن ...




اشتر يا حنكوش البتشبه كاتب البوست كده اديتني فيك فرصة:
النيافه جاية من كلمة نيفه ومعني النيفه في المصطلحات الشعبيه وليس اللغه العربيه هي البقايا من الصوف والعظام وحوافر الارجل للحيوانات بمعني ان يقال لك (( امشي يا نيفه)) تعني يا بقايا حيوانات..... وهذه البقايا من ضلافين وصوف تتواجد بكثره في مصنع الكوارع والذي يطلق عليه النيافه والتي اشتقت منها كلمة نيفه ويقال لها في الحضر عندكم الكوارع ويتكون المصنع من ازيار جمع زير مصنوع من الفخار يستخدم غالبا في تبريد وحفظ المياه وهنا يستعمل في صناعة الكوارع بعد ان يتم دفنه في الارض وتكون النار التي يتم طبخ الكوارع بها تتكون من العظام ومخلفات الحيوان التي تزال قبل الطبخ ...... هذا هو معني النيافه يا شتوري

[ممدوح أبارو]

سلام بابكر وكل ولاد مدني

نكمل قراية لباقي الصفحات ونجي صادين

[جيجي]

غايتوا مدني دي كلها ماطلعت منها بشيء غير النيافة

[عباس الشريف]

اقتباس:
المشاركة الأصلية كتبت بواسطة جيجي
غايتوا مدني دي كلها ماطلعت منها بشيء غير النيافة


جيجي غايتو بالغتي تعرفي احنا ناس مدني حكايتنا زي المصريين مع مصر بنحب مدني شديد وانا زول مسامح بس عشان البقية ما ازعلوا منك تاني كلام زي ده ما تقوليهوا عشان تعرفي مدني هاك البسيط ده:
ودمدني المدينة الوحيده التي يحق لها منح الجنسية السودانية هي عاصمة الجزيرة وتحتضن كل أبناء السودان بقبائلهم ووجهاتهم المختلفة في سماحة وتعايش قل إن يجود الزمان بمثله ولها جمال اثري تحتفظ به وحزن في جميع جوانبها ونحيب اذ جار الزمن عليها وهي ساكنه لا حراك بها رغم عن ما قدمته للوطن الحبيب فهي مدينة الصوفيه بقبابها ينصهر فيها الانصار بإرث المهدي والحركة الاسلامية بانشقاقاتها ويعتبرها اليسار المدينة التاريخيه والاتحاديين حزب الاستقلال يعتبرونها قلعة بداية تنظيمات التحرر من المستعمر ... وهي مدينة الفن والرياضة تتسع لكل شيء برقعة مساحتها علي ضفاف النيل وشمولية رحابها بفيافي وربوع الجزيرة الخضراء.... انبعثت فكرة مؤتمر الخريجين من الجمعيه الادبية بود مدني عام 1937م، ومن أبرز أعمال المؤتمر المذكرة السياسية الشهيرة التي قدمها للحكومة عام 1942وضمنها مطالب وطنية مهمة إلا إن الإنجليز ردوا عليها في عنف مما زاد من قوة الحركة الوطنية واشتعالها الي ان تم الاستقلال ورفع اسماعيل الازهري علم السودان بالوانه الثلاثة الازرق يرمز للنيل الاصفر يرمز للصحراء الاخضر للزرع في في شكل مسطر مستطيل ولقد تشبع الزعيم الازهري بالحس النضالي منذ ان كان يتلقى تعليمه الأوسط بواد مدني، كان نابهاً متفوقاً، التحق بكلية غردون عام 1917م واذا نظرنا الي حركة اللواء الابيض التي قادت النضال ضد الاستعمار البريطاني وقادة اللواءالابيض علي عبد اللطيف الذي تلقى تعليمه في كلية غردون وفي مدرسة الخرطوم العسكرية وتخرج منها عام 1914 برتبة ملازم ثان ،كون جمعية قبائل السودان في عام 1921 خلال خدمته في مدينة ود مدني.

[youtube]http://www.youtube.com/watch?v=MwMw23d7Hzg[/youtube]

[جيجي]

عايك الله ياعباس ماتتعب روحك ساي