*** مصطلحات عامّية سودانية ***

[فيصل سعد]

مرحبا عبده سعد و حبابك مشاركا
فعالا في هذا البوست العامر بالجميع ..

[شبارقة]

المشاركة الأصلية كتبت بواسطة شبارقة

... زمان درسونا في المدارس بأن الساجور هو إسم لأحد الأنهار

المشاركة الأصلية كتبت بواسطة أشتر

يوم واحد ما لاقاني نهر اسمو الساجور ...
غايتو الا يكون نهر موسمي ماري بعندكم !!!

سلام يا ود أبوعاقلة ... نحن كما تعلم لا نستعين بقوقل في مصطلحاتنا العامية ... وبما إن نهر الساجور ليس من كلامنا العامي لذا فقد إستعنت بالأخ قوقل وذلك لمزيد من المعرفة وأيضا ً لإثبات إنو نحنا قرينا في الزمن السمح ياخ ..
قوقل قال : إن نهر الساجور طوله 74 كم ينبع من تركيا ويخترق الحدود السورية في عين عزة في محافظة حلب ويسير في سوريا وينتهي النهر باندماجه مع نهر الفرات من الضفة الغربية للنهر

.

المصدر:
http://ar.wikipedia.org/wiki/%D8%A7%...AC%D9%88%D8%B1

[سمراء]

ناس المصطلحات جيتكم "مغرودة " والله
عترت لى كلمة امس وقدر ماقوقلتها جوة حبوبتى ...ماعرفتها "ضمُـة" !!
اها هاكم ليها اتصرفو لى فيها ..
الدمبهوك و المعتوف

[خالد الصائغ]

المشاركة الأصلية كتبت بواسطة سمراء

ناس المصطلحات جيتكم "مغرودة " والله
عترت لى كلمة امس وقدر ماقوقلتها جوة حبوبتى ...ماعرفتها "ضمُـة" !!
اها هاكم ليها اتصرفو لى فيها ..
الدمبهوك و المعتوف

سمراء تحياتي ليك و لي حبوبة

متاكدة إنو الدمبهوك و الملتوف ديل من إندنا ما لسانن كتر

[أشتر]

المشاركة الأصلية كتبت بواسطة سمراء

ناس المصطلحات جيتكم "مغرودة " والله
عترت لى كلمة امس وقدر ماقوقلتها جوة حبوبتى ...ماعرفتها "ضمُـة" !!
اها هاكم ليها اتصرفو لى فيها ..
الدمبهوك و المعتوف

هو عليك الله حبوبتك (طوّل الله عمرها) ما عرفتن ...
جايه ومغرودة كمان تفتشي عليها هنا ...
لو شبارقة لبد انسي الموضوع ...

لكن احتياطي كدا الدمبهوك ومعتوف ديل اسماء لقرى جنوب النيل الأبيض ... أو جنوب كردفان ...
بتكون في قرى بالاسماء دي طالما عندنا اربعة وعشرين القرشي وحنبكت ...
واسماء تانية ما بقدر أقولا !!!!!!!!

[شبارقة]

المشاركة الأصلية كتبت بواسطة أشتر

لكن احتياطي كدا الدمبهوك ومعتوف ديل اسماء لقرى جنوب النيل الأبيض ... أو جنوب كردفان ...

سلام يا سمراء وعوافي يا ود أبوعاقلة

الدمبهوك والمعتوف (لم أسمع بهما من قبل) يمكن يكونوا كلمات في لهجة محلية وغالبا ً من شرق السودان.

الدمبهوك ومعتوف ديل اسماء لقرى جنوب النيل الأبيض ... أو جنوب كردفان ...

مافي قرى بالأسماء دي ... تنجروا ساااي
هناك معتوق بمنطقة المناقل .

والله أعلم ،،،

[سمراء]

العزيز شبارقة
كل التحايا ليك وللغالية الغائبة وللحبائب

بالنسبة للمعتوف عرفتة انها تعنى ....الزول المافوقو فائدة او زول اهبل ساى
اما الدمبهوك ...تعنى زول فارغ وفاضى ومابفهم

ده تأكد لى انو الزول السمعتو بردد فى العبارات دى كان بنبذ فى زول ماخلى ليهو صفحه يرقد عليها

لانو قالت ليها ، يازولة ها تعرسى لى شنو ؟ ده زول معتوف ودمبهوك ساى بس

التحية لكل من حاول ....اشتر وخالد الصائغ نموزجن

[همس الشوق]

اللهم كفين شر الراجل المعتوف والدمبهول ساي

سماره إزيك

[أشتر]

المشاركة الأصلية كتبت بواسطة شبارقة

سلام يا سمراء وعوافي يا ود أبوعاقلة

الدمبهوك والمعتوف (لم أسمع بهما من قبل) يمكن يكونوا كلمات في لهجة محلية وغالبا ً من شرق السودان.

اقوم اجيب ليك دي من شرق السودان ...
قالا واحد معانا هنا من عطبرة قبل يومين ...
قال لي بتعرف الشاكوين ...
قتا ليو الشاكوين فؤادي ؟؟؟
بعد تحانيس حتى وراني معناها ..

[أشتر]

المشاركة الأصلية كتبت بواسطة همس الشوق

اللهم كفين شر الراجل المعتوف والدمبهول ساي

الدمبهول ساي ؟؟؟؟!!!!!!!!
الدمبهوك ... الدمبهووووووك قالو ليك

غايتو نقوم نصبّنن لأقرب كوماج في المستقبل البعيد

[شبارقة]

المشاركة الأصلية كتبت بواسطة أشتر

اقوم اجيب ليك دي من شرق السودان ...
قالا واحد معانا هنا من عطبرة قبل يومين ...
قال لي بتعرف الشاكوين ...
قتا ليو الشاكوين فؤادي ؟؟؟
بعد تحانيس حتى وراني معناها ..

نوع من أنواع المسوح المحلية

مسوح من الودك المعطـّر

[شبارقة]

المشاركة الأصلية كتبت بواسطة سمراء

العزيز شبارقة
كل التحايا ليك وللغالية الغائبة وللحبائب
بالنسبة للمعتوف عرفتة انها تعنى ....الزول المافوقو فائدة او زول اهبل ساى
اما الدمبهوك ...تعنى زول فارغ وفاضى ومابفهم

سلامات يا سمراء وشكرا ً على التحايا

في بعض المناطق تنتشر بعض الكلمات (ليس لها معنى حقيقي) يقطعا واحد من رأسو ويشير بها إلى شئ معين ... وتجري على ألسنة الناس ... زي التوزة والتستوس وحمبرة و شتت وشتات وهكذا ... حاجة زي الراندوك (الراندوق) وهي كلمات محلية ولكن مع الزمن قد تنتشر وتعم مما يضر باللغة أو اللهجة الأصلية.

[أشتر]

المشاركة الأصلية كتبت بواسطة شبارقة

نوع من أنواع المسوح المحلية

مسوح من الودك المعطـّر

معطر شنو ياخ !!!
على اليمين قال لي ريحتو تجيب الضهبان ...
عفنااااااااااا وتشمها على بعد كيلو ... لو كان لاعب الهوا ضدك طبعا ...
هو الجاب السيرة شنو غير الريحة الخايسة ...
بس
كلامك صاح .. ودك .. وفي الودك ودك الجمال ...
ما الجمال الأذانا داك ...

[عكــود]

سلام يا أشتر، شبارقة سمراء و
أخص خالد الصائغ بالإقتباس ده:

المشاركة الأصلية كتبت بواسطة عكــود

الكرّوق= الكُرناف = بقايا الجريد الناشف الملتصق بالنخلة ليشكّل سلّم
الكَـوَرّيق = عُقلة (فص) من القصب عندما يجف
الكوريق = مِعول لجرف التراب (يشبه الملعقة) مقبضه من الخشب ورأسه من المعدن الكَـرِّقَـة = الراكوبة
الكارديق = معول مقبضه من الخشب ورأسه مثل المشط. يكون الرأس عموديّاً مع الأرض للَمْ الحشائش والتمور وما شابه
الأربِل = يشبه الكارديق غير أنّه مصنوع من الخشب ورأسه عمودي و عريض
الواسوق = مصنوع من الخشب، عموده طويل ورأسه عريض مربوطة عليه حبال، يستخدمه شخصان لتسوية الأرض. يُمسك أحدهما العمود والآخر الحبال، ليغرس ماسك العمود التُربة ويجر الآخر الحبال
الكركجي (الجيم معطّشة) = طين الجروف اليابس
السلّوكة = عمود خشبي طرفه حاد يغرس في التربة لبذر البذور
الكاويق = الصفق الناشف للنباتات و الحشائش (اللوبيا مثلاً)
الكُوريقة = نوع من أنواع التمور، سوداء اللون مركّزة الحلاوة وتظل لينة
الكرّقة = الراكوبة
الكتِّقة = باب زريبة البهايم، يُصنع من عيدان أفقية مثبّتة على أخرى (أقوى منها) عموديّة
السمندقيقة = أحد أجزاء الساقية
تُكُم = مقعد جلوس لمن يسوق الساقية ويكون خلف التور
السبلوقة = شبه قُمع مخروطي تثبّت على السقف لتصريف مياه الأمطار
البسدّيق = قطعة قماش لدهان الدوكة و إزالة ما بها من بقايا عجين.
آرتيق = الضل البارد
آرنيق = عمود من الخشب يثبّت وسط الغرفة ليسند السقف
أرقوق = تور الساقية عندما يؤدّي المهمّة وحيداً
قَسّيبة = مبنى أسطواني لحفظ التمور والمحاصيل
قيساب = كوم المحصول
قارسيقا = قاريقا = القصبة وهي فتيّة ولم يكتمل نموّها بعد (شديدة الإخضرار، لدِنة) إستعارها الشُعراء لتشبيه محبوباتهم بها.
دانقا = البرندة أو الصالة
دونكَا = التُكل أو المطبخ
ورتاب = حزمة القصب الناشف
بُتّاب = البقايا الجافّة من أوراق المحاصيل
بُتِّق = الشجيرات الصغيرة للذرة التّي تنبت بعد حصاده
متّيق = حش الزائد من شجيرات الذرة بعد أن يكبر قليلاً، حتّى يقوى العود الأصل
نوريق = دَرس المحصول (ذرة، قمح أو فول) بحوافر الدواب لفصل الحبوب
دوليق = اللقيط اليدوي لما تساقط من حبوب المحصول بعد نوريقه وجمعه
بُقُل = الظل الحار عند بداية تكوينه (ضُل العصر مثلاً)
السارة = جانب الماء من النهر المُحازي للقيفة
دالة = المكان العميق وسط النهر

سلام يا مُحسن،
هذه التعريفات حسب بيئة الشايقيّة وهي قابلة للمراجعة، التصحيح والإضافة من قِبل الآخرين.
أدعو أسامة معاوية، أحمد طه، الزوول، عبد العظيم الطاهر وعثمان الحليبي للتداخل والتعليق.

تسلم

مداخلة في بوست مُحسن (زهرة الغَرق)

[شبارقة]

المشاركة الأصلية كتبت بواسطة أشتر

معطر شنو ياخ !!!
على اليمين قال لي ريحتو تجيب الضهبان ...
عفنااااااااااا وتشمها على بعد كيلو ... لو كان لاعب الهوا ضدك طبعا ...
هو الجاب السيرة شنو غير الريحة الخايسة ...
بس
كلامك صاح .. ودك .. وفي الودك ودك الجمال ...
ما الجمال الأذانا داك ...

المهم إنو طلع نوع من أنواع الودك
سال من شعرها الودك وتدلى للحنك

لكن عموما ً النسوان بيضيفن حاجات للودك (بعض المعالجات الفنية) بتخلي ريحتو معقولة أقرب للكركار ... فمن باب أولى إنو الشاكوين يكون على نفس الشاكلة (وخد عندك مثلا ً الضـُفرة ريحتها لا تطاق وبالرغم من ذلك هي واحدة من مكونات الخـُمرة ) ... حبوباتنا ديل عجيبات ياخ .