لـمـــا بـاكر تـمـرق الـنـاس للـشــوارع
لما باكر
تمرق الناس في الشوارع
وتضحك الشمس المغتغتة من سنين
ينكشف حجم السواد
يضرب الزيف بالصواقع
وتنفتح كل المجاري
ينهدم باب المنافذ
ويتنفس العيش في المزارع
لما باكر
ينهزم ليل الملالي
وتنكشف عورات دقون
غاتسة في ترف العلالي
وبرة ناسن عايشة في قمقم ضنك
لا لاقية كسرة
ولا ...
جفت العين من مدامع
لما باكر
القروش تمرق براها من خزاين
لا ذمم قرت قبيل
ولا حليفة
اصلو مبدا الحلفان مقسم
للرواعي الفي الضهاري
وللعقول السافرت شان تاكل نضيف
حلفوهم بالمصاحف
رغم انو في جبينهم ديمة باين
انهم ناسن بتاكل من عرق
نديان وصافي
ولما باكر
يمرق الناس في المداين
في قلوبهم كم سنين مليانة
بي كل الحزاين
من حواري ومن مصانع
لما باكر
يختفي اللون الرمادي
ويظهر اللون الروائع
للجموع الهادرة في جوف الشوارع
ويبقى تاريخ الحقيقة
انو ما كل البيدخلو للجوامع
جوة في جوفهم ضمير
وانو ما كل البخطبوا في الجوامع
بعرفو الزول الفقير
وانو ما كل البيلزمو للجوامع
بعرفو الدين العدالة النورو ساطع
ولما باكر
تنفتح كل الملفات
ويظهر العفن المغلف بالضلال
وتزكم الريحة الانوف
يطرق الصوت المسامع
نلقى ناسن كانو اطهر من نبي
صارو اتفه من توافه
وتبدا تتفتح مواجع
يا بلد ما نحن هيلك
لا بتغرينا المناصب
لا بتخوفنا المدافع
|
