عندي ملاحظة يا شئون العضوية:
ممكن حاجز الرقم 313 يكون إتكسر يوم ما أو أكتر من يوم ما، بمعنى ممكن يكون في مجموعة كبيرة من الأعضاء مرت على المنتدى خلال يوم و ليس بالضرورة في الثانية المحددة....
يعني أنا أم بارح كان أكتر يوم قعدت فيهو في سودانيات، و ملاحظ إن أسماء المتواجدون بتتغير و كذلك عدد المشاهدين عموماً، بمن فيهم القراء
العضوية النشطة الآن في سودانيات كلهم تقريباً ما بتمر 24 ساعة إلا و يكونوا مروا على سودانيات....
الغاية من البوست ضرورية و مليانة هم بالمنتدى و سيره...و طالما الجميع ممكن يتفق معاي في إن إذدياد حجم و قيمة المشاركات خلال اليوم أو الساعة الواحدة هو المقصود و الأهم، عليه أرى الآتي:
إن الناس الداخلو في البوست دا و أكدوا على أهمية البوست يفترض أن تكون مشاركاتهم قياسية في عددها و في قيمتها، دي أهم نقطة يا شئون لأن كلمة في كف و لا ألف كلمة طائرة، يعني لو الناس القالو البوست دا مهم براهم، و كلهم من ذوئ الأقلام المؤثرة، لو أى واحد فيهم شارك في عشرة بوستات مثلاً مشاركة فاعلة و قيّمة شوفي كمية الحراك و العافية الممكن تدُب في المنبر، و المشاركات الفاعلة لا شك بتستقطب مشاركات أخريات بحكم الإستفزاز و التحريض على الكتابة الممكن تفرزوا، أنا ما بقع لي كلو كلو زول يجي البوست دا و يؤكد على أهمية البوست و تلقاهو قاعد جاري بمبرو مع المتواجدين و ما داير يشارك...دا ببقى كلام ما منطقي خالص....أنا واحد ناس العهد دا قطعتو مع روحي تب والله، إن سودانيات دي أنا حاسي بإنتماء حقيقي ليها و إن ناسا ديل بيشبهوني في الملامح و القدلة، بالتالي قاعد أكتب أكتر من مشاركة خلال اليوم بغرض ضخ الروح في المنتدى و الحكاية دي نابعة من غيرة حقيقية، ما يجي واحد/ة يقول شوف البرلوم، لأن كونك تحب حاجة لأى مدى، الشغلانة ما مربوطة بعداد زمن معين....
طلبي دا كان إتنفذ بنكون ريحنا المنتدى و ريحنا شئون العضوية بتاعتو من حك الرأس من أجل أفكار لضخ العافية في المنتدى...لأن الحركة الواضخة و الكبيرة في المنتدى بتستفز الغائبين و بتستقطب عضوية جديدة...و أي زول ما قاعد يشارك كتير و بإنتظام و بفاعلية خلال اليوم الواحد ـ لا شكراً علي تامينو ولا حاجة
التعديل الأخير تم بواسطة خال فاطنة ; 27-05-2012 الساعة 06:32 AM.
|
