طيارة جات بفوق ... قصيدة هاشم صديق

[سارة]

انا يا روفى ما بغمز انا بقول كلامى عيانا بيانا
اسمعنى النحدثك انت اتعاملت مع الاراء المخالفة
بلغة التجريم وحات اب قناية كلامى صحى وما لقيت كلمة غير تجريم
ياربى تجعل كلامى خفيف عليهو
يعنى اى زول قال كلمة وقفت ليهو فى حلقو وفى النهاية قسمت الناس كيمان
فيا روفى يا حبيب ألبى اتعصب لرايك ما قلنا حاجة
لكن ما تمرقنا بقد القفة

[رأفت ميلاد]

المشاركة الأصلية كتبت بواسطة سارة

انا يا روفى ما بغمز انا بقول كلامى عيانا بيانا
اسمعنى النحدثك انت اتعاملت مع الاراء المخالفة
بلغة التجريم وحات اب قناية كلامى صحى وما لقيت كلمة غير تجريم
ياربى تجعل كلامى خفيف عليهو
يعنى اى زول قال كلمة وقفت ليهو فى حلقو وفى النهاية قسمت الناس كيمان
فيا روفى يا حبيب ألبى اتعصب لرايك ما قلنا حاجة
لكن ما تمرقنا بقد القفة

يعنى أنتى تتقلى على كيفك والله يجى يخفف ليك .. شوفى قصة (التجريم) دى عجز فى قاموسك اللغوى .. أنا ما طلعت من حيز أحساسى بالقصيدة والطعم المر فيها من الهوان .. أما فى مخاطبتى للزملاء تسمح مساحة العلاقات بينا حدود المداعبة .. لكن مفردة (التجريم) دى أتهمك بيها أنتى عايزة تجرمينى

[سارة]

المشاركة الأصلية كتبت بواسطة رأفت ميلاد

يعنى أنتى تتقلى على كيفك والله يجى يخفف ليك .. شوفى قصة (التجريم) دى عجز فى قاموسك اللغوى .. أنا ما طلعت من حيز أحساسى بالقصيدة والطعم المر فيها من الهوان .. أما فى مخاطبتى للزملاء تسمح مساحة العلاقات بينا حدود المداعبة .. لكن مفردة (التجريم) دى أتهمك بيها أنتى عايزة تجرمينى

ديل على راسك يا جميل

[خالد الأيوبي]

سلام يا أيوبي،،
أنا في رأيي إنو الاولوية ليست في اقناع الطرف الآخر، بل في إنك توصِّل وجهة نظرك، ودة الجزء الأساس في مسألة الحوار دي.

تعرف يا الرشيد

كلامك سليم في جانب أنو المفروض الواحد يركز في إيصال وجهة نظره . لكن إقناع الطرف الآخر برضو حاجة كويسة والإجتهاد فيه محبذ

المشكلة الناس مرات ما بتبدي وجهة نظرها و إنما تقعد تنتقد و جهات نظر الآخرين وتحاول بإستماتة دحص آراءهم و مغالطتها.

علي العموم. وجهة نظرك واضحة ... و فعلا جودة التصوير و القدرة علي التعبير هي العامل الرئيس في تحديد درجة الإبداع عند أي عمل فني
ولكن (.. شفت لكن دي ؟؟ ... عشان أنا برضو كمان أوصل و جهة نظري )

في المداخلة القادمة أواصل

و تسلم

خالد

[خالد الأيوبي]

العزيز رأفت: شكرا للتوضيح ... وأنا سألت الرشيد مش لأنه ولي أمرك .. بس لأنو إنت مخلينك للأسئلة الصعبة ( إبتسامة كاربة)

العزيز / الرشيد (برضو رأفت و كل المتداخلين) ... نواصل:

كما قلت لك: وجهة نظرك واضحة ... وأتفق معك علي أن جودة التصوير و القدرة علي التعبير هما عاملان رئيسان يلعبان دورا في تحديد درجة إبداع أي أديب أو فنان وفي جذب الإعجاب لإنتاجه.
و قصيدة هاشم صديق هذه بلا شك تتضمن بعض التصوير الجميل و الوصف التعبيري - برغم أنه دون مستوي غيره من نصوص هاشم صديق -

أقول بعضها. لأن الأمر مختلف في الجزئية المتهمة عندنا بممارسة السخرية من ضحايا الطيارة التي جات بي فوق. في تلك الأبيات يجنح الشاعر في وصفه للمشهد إلي إستخدام بعض التشبيهات - ربما ظنا منه أنها ستجعل تصويره أكثر دقة و جمالية و لكنها (التشبيهات المستخدمة) في تقديري غير لائقة ولا تنسجم مع مأساوية المشهد لأنها تحمل إيحاءات كوميدية واضحة توحي بالسخرية قبل أي شئ آخر. ولا أدري كيف فات علي شاعر كبير ملتصق و منفعل بآلام و معاناة شعبه أن يتجنب ذلك.
بل إن هذه التشبيهات (الساخرة) جعلت من ذلك الجزء من النص شيئا أشبه بالشعر الحلمنتيشي. والشعر الحلمنتيشي كما نعلم كلنا لا يحقق أغراضه ولا تكتمل عناصره إذا لم تقاطعه القهقهات و الضحكات:
أقرأوا معي : (كأنها قصيدة حلمنتيشية للشاعر المتهشم الصدقي):

اتطايرن دانات
واطاقشت عربات
و اتفرتقت ( قعدات )
واتكسّرت ( كاسات ) .
السرة ( بت تمانين )
في ( الجكّة )
( بت عشرين )
وادريس
وليد مرسال
كان بمشي بالعكاز
أصبح
بطل جمباز
طار فوق
ونطّ السور
سبق الجموع
جاري
زي التقول
( هايس )
دايس علي البنزين
..............

و برضو القصد إيصال وجهة نظرنا ...
.
و تسلمون

خالد

[ود المامون]

[QUOTE=النور يوسف محمد;499828]بسم الله الرحمن الرحيم



بعدين يا حبيبنا ود المامون ،
مش فى عشرات الشعراء الذين استخدموا لغة الناس البسطاء
وقدموا لنا أجمل القصائد ..
لا يمكن أن تكون لغة التداول عائقاً فى تقديم نصوص رائعة
وأكرر ما قاله أسامة ، المسألة ليست مفردات المسألة فى عضم النص الذى يخلو من شاعريه ..


...

.. يا جنابو .. اتفق معك بان كثير من الكلام العادي من حيث الالفاظ.. ينطوي على صور مدهشة تسحر الخيال ... وعضم النص يفيض بروح السخرية .. والتهكم من بدايته الي نهايته... سخرية مؤلمة موجعة... وهاشم بذكائه .. في لحظته الانفعالية .. استخدم الصور الكاريكاتيريه حتي يصيب هدفه في مقتل .. سهولة في الاسلوب.. والبساطة في التعبير والصياغة.. اعتقد بان الاسلوب الساخر الكاريكاتوري .. رسالته اقوى ويصل لغايته بطريقة اسهل.. ويتناقله الناس .. فهو مركب بالغ التاثير في ايصال الافكار ...

..هل تعتقد بان هاشم .. الذي استطاع (.. ان يهز السودان من اذنيه .. ) ..عندما نظم الياذته (الملحمة) .. استخدم اللفظ المبتذل من الناحية الجمالية .. والذي اثار الجدل .. لكشف (عورته ) .. وهو من الاخلائقين واوصياء الذائقة الادبية ..

.. انا في تحليلي ( الخاص ) بان هاشم .. كان مؤلم وموجع في السخرية .. عندما استخدم اللفظ ... لكشف (عورة ) صوره الكاريكاتورية .. وكمان ما طلع من السياق البنيوي للمعني .. بمعني ان ( الموصوفة ) .. بقدلتها .. لما تدخل السوق اي واحد ممكن ( يرصدها ) لبط حركتها و (اعلان ظهورها ) .. الواضح .. ولا يغيب عليك .. ان لوزير الدفاع تقنية حديثة اسمها (الدفاع بالنظر ) .. لمواجهه الغارات ..... طيب .. خلينا نقول ( الموصوفة ) دي غارة .. ... بالتاكيد لطبيعة حركتها الكل يستطيع ان يرصدها ( بالنظر ).. ... الا .. (رادارنا ) .. تجي فوقو حوفا .. ساكت ..



...

* بالمناسبة مسرحية الفاضل سعيد ( اكل عيش ) والتي عرضها بكل مدن السودان .. كان عندو لازمة .. يرددها باستمرار .. وهو ان يهمز زميله عندما يكون غافلا قائلا .. ( اهـ يا ... ) ..


.. كل الحب ..

[رأفت ميلاد]

المشاركة الأصلية كتبت بواسطة خالد الأيوبي

العزيز رأفت: شكرا للتوضيح ... وأنا سألت الرشيد مش لأنه ولي أمرك .. بس لأنو إنت مخلينك للأسئلة الصعبة ( إبتسامة كاربة)

العزيز / الرشيد (برضو رأفت و كل المتداخلين) ... نواصل:

كما قلت لك: وجهة نظرك واضحة ... وأتفق معك علي أن جودة التصوير و القدرة علي التعبير هما عاملان رئيسان يلعبان دورا في تحديد درجة إبداع أي أديب أو فنان وفي جذب الإعجاب لإنتاجه.
و قصيدة هاشم صديق هذه بلا شك تتضمن بعض التصوير الجميل و الوصف التعبيري - برغم أنه دون مستوي غيره من نصوص هاشم صديق -

أقول بعضها. لأن الأمر مختلف في الجزئية المتهمة عندنا بممارسة السخرية من ضحايا الطيارة التي جات بي فوق. في تلك الأبيات يجنح الشاعر في وصفه للمشهد إلي إستخدام بعض التشبيهات - ربما ظنا منه أنها ستجعل تصويره أكثر دقة و جمالية و لكنها (التشبيهات المستخدمة) في تقديري غير لائقة ولا تنسجم مع مأساوية المشهد لأنها تحمل إيحاءات كوميدية واضحة توحي بالسخرية قبل أي شئ آخر. ولا أدري كيف فات علي شاعر كبير ملتصق و منفعل بآلام و معاناة شعبه أن يتجنب ذلك.
بل إن هذه التشبيهات (الساخرة) جعلت من ذلك الجزء من النص شيئا أشبه بالشعر الحلمنتيشي. والشعر الحلمنتيشي كما نعلم كلنا لا يحقق أغراضه ولا تكتمل عناصره إذا لم تقاطعه القهقهات و الضحكات:
أقرأوا معي : (كأنها قصيدة حلمنتيشية للشاعر المتهشم الصدقي):

اتطايرن دانات
واطاقشت عربات
و اتفرتقت ( قعدات )
واتكسّرت ( كاسات ) .
السرة ( بت تمانين )
في ( الجكّة )
( بت عشرين )
وادريس
وليد مرسال
كان بمشي بالعكاز
أصبح
بطل جمباز
طار فوق
ونطّ السور
سبق الجموع
جاري
زي التقول
( هايس )
دايس علي البنزين
..............

و برضو القصد إيصال وجهة نظرنا ...
.
و تسلمون

خالد

سلامات يا خالد
تعرف الصورة دى والبعدها والقبلها وصف للحال بصورة ساخرةومحزنة .. تكتمل الصورة بباقى القصيدة ..

المشاركة الأصلية كتبت بواسطة نغم

.............
الله ليك
من مغسة
اليرموك
يا حاج عطا
والله ليّا
كمان
من كضبة الوالي
يا حاج أنا ،
صرح وقال للناس
- ( الوضع ما مقلق )
و ( الحاله حسه
تمام )
- أصلو الحريق
يا ناس
شرارة
جات طايرة
من مكنه
نارا ( لحام )
وحسه الأمور
( هدأت )
والجو ( نسيم )
وسلام
ما تصدٌّقو
العُملا
والخونه
في الاعلام .
طيارة كيف
يعني
تدخل سمانا
تحوم ؟!
وتجينا من
من بره
لامن تصل
( خرطوم ) ؟!
وتضرب كمان
صاروخ
في المصنع المعلوم
لمّا الحديد بالنار
أصبح كمان
( لكُوم ) ؟!
..............
- اهمال وبس
حنشوف
ونلقي دليل
..............
عامل لحام
مهمل
( يلحم )
في ( نص الليل ) ؟!!
يمكن ( عميل )
مدسوس
زرعوه
جّوه الحوش
أو يمكن التحقيق
يلقاهو
زول مهبوش
راكب
( حمار النوم ) .
...............
يا حاج أنا
خلي الهوان
والسوق
شوف الضمير
ممحوق
و ( حبل الكضب
مطلوق )
زمن الصِدِق
مسروق
...............
كنا العُزاز
ما ( نُوق )
وكت الحقارة
نثور
الدم يفور
في عروق .
حسه البلد
مفتوح
وبقت الكرامة
جروح
ووش الخجل
محروق
ياحاج أنا
..............
.............
( في الجو
طيارات )
( اسرائيل ) هنا
يا حاج أنا
............
في بحرنا
( مدمرات )
( ايران ) هنا
يا حاج أنا
.............
............
طيارة
جات بي فوق
خشت
علي الخرتوم
كتلت
( جداد ) التوم
............
الله ليك
يا حاج عطا
والله لي
يا حاج أنا
.............
ليمون سقايتو
عشيه
والمويه
لا ملقيّه
لا محرية
............
مقطوعه
من صبحية
يا حاج أنا .


29/11/2012

الصورة الأولى بعد كل الدمار أو (البشتنة) بلغة القصيدة .. صورة أخرى لواقع مر .. تصريحات عشوائية لأناس من المفترض مسئوليين .. والمضحك والمحزن الصورة الأولى ليست لها أعتبار فى تصريحات الحكومة .. بل عمدوا لتحاشيها ودس الكذب لتخفيفها وأخفائها .. وظهرت الحقائق .. إستباحة لإيران لأراضينا .. ضعف كامل لدولة جبروتها فى قهر مواطنينها .. كيف لهم كشف طائرات فى سماء عتمة وهم لا يعلمون بأسطول بحرى إيرانى يرسى على مينائهم ..
أصل الصورة .. المواطن مسحوق مسحوق بدون هجوم إسرائيلى .. فى بلد معدوم فيه الضمير من حكامه .. يعنى إيه كان ضربتم دانة ..
حسه البلد
مفتوح
وبقت الكرامة
جروح
ووش الخجل
محروق

يا خالد الناس سابت الرسالة وقعدت تنتف فى الشاعر .. مع أتفاقم التام بعظمته التى كانت .. وقصائده التى تربعت فى علياء الأدب .. فى عهود الأدب والرقى .. فهو هنا يبكى عهد الإنحطاط ورخص البنى آدم ..

وصفك يا خالد للقصيدة بالحلمنيشى لا يقلل من الرسالة ولا قيمتها ولا يقلل من النص .. والشاعر المتمكن يكتب بكل الصور الشعرية لتوصيل رسالته فى كل محفل .. المنلوج فن والحلمنتيش شعر متمكن لا يكتبه من هب ودب .. والدوبيت أمكانية خارقة .. والذى يكتب فى كل هذا فإنه متمكن من الشعر كله .. وملتصق بتراب الوطن ..

الرسالة القصيدة أو القصيدة الرسالة هى التى تصل الى الجميع

[ود المامون]

المشاركة الأصلية كتبت بواسطة أسامة معاوية الطيب

حبيبنا سيدأحمد ازيك ياخي
كلامك دا وقع لي في جرح وحا يبعدني من برجي العاجي القعدني فيهو رأفت ميلاد مع سبق الإصرار والحاجات
فكرتك جيدة ولكنها تنزل بالشعر للعادي ولا تصعد بالعادي للشعر ... ودي المعادلة الصعبة
شوف حميد لمان قال فيما قال " بعتو شفيعكم للراسمال ؟ هاكم دي " ويتبع النص حركة تتعمل في الخيال لحركة كشح الواطة في العيون ... هي من نفس ونسة زولتك دي لي زولك داك ... بس معاها شيلة الناس لسما الشعر ... مش رمي الشعر في واطة الله
ياخي انا تماضر حمزة دي ماقعد تشوفني واللا شنو ؟

...

..اخي اسامة

..لك السلام ..

.. هاشم ما كتب قصيدة .. شريط الاحداث كما هو .. عمل ليهو تحرير .. ولا اجتهد في ابتداع صور .. بس وضعها في قالب كاريكاتوري ساخر .. لتوصيل فكرته باقصر الطرق ..

.. يا زول واطات شنو .. لو الموضوع كده كان من ( طرطبة ).. المتنبي ما قامت ليهم قايمة ..



.. كل الحب ..

[أسامة معاوية الطيب]

المشاركة الأصلية كتبت بواسطة سيد احمد محمد علي المامون

...

..اخي اسامة

..لك السلام ..

.. هاشم ما كتب قصيدة .. شريط الاحداث كما هو .. عمل ليهو تحرير .. ولا اجتهد في ابتداع صور .. بس وضعها في قالب كاريكاتوري ساخر .. لتوصيل فكرته باقصر الطرق ..

.. يا زول واطات شنو .. لو الموضوع كده كان من ( طرطبة ).. المتنبي ما قامت ليهم قايمة ..



.. كل الحب ..

يا حبيبنا ما دام هاشم ما كتب قصيدة خلاص !!!

[نغم]

المتابعة بتكون فى رايك حول المدخلات وده العملتو

- عدم استحسان لطيارة من حيث النظم والشاعر ما جود كتابته
- مفردات ماليها لزوم
- راى بقول نص بنض الشارع



قلت اجيب تماذج للشاعر غير الاكتوبريات التى كانت فى مرحلة عمريه
اثرت فى افق تفكيره تداعيات متعددة منها
الزخم الفكرى و الثقافى فى ذاك الزمان

مع انى انائ بى اصابعى عن الولوج فى عالم الشعر و تشريحه فله اساطين لايقبلون حتى

[نغم]

عرضحالات شعبية (مونتاج قسري)

أطول من السور
القلم
تعظيم سلام للكلمة
لي إبل القصايد
للحروف المابتسبّح
(للمكوك)
لي كل والي
أكان ظلم
تعظيم سلام
لي(قبر أبويا)
و(أمي آمنة)
وللدروس الماخصوص
للجمرة في بطن القدم
أغظم من الوطن الوطن
وأغلى الكنوز السُترة
لو(حق الكفن)
وأصدق من الفرح الألم
***
غايبين في الزحمة
اللخمة
الطمع
الصرع
الونسة
الكبسة
الحُمى
الغُمة
الشهوة
الشرقة
السرقة
وقل القوت
أيامنا تقيف
وعمرنا يفوت
بيوتنا قبور
وقبورنا بيوت
سُكاتنا نضم
ونضمنا سكوت
نحلم بالرحمة
رغيف ولحمة
مكان في الصف
قبال الزحمة
***
سألتك ياوطن أرتاح
فديتك ياوطن تسلم
قريت في دفترك شجنك
وذاكرت المعاني حكم
مشيت بي قصتك للريح
وشديت في مسارب الهم
لقيت حالك سؤال محتار
وجرحك من نقيحو نضم
وتتعلم تغني غناك
وفي حلقك غبار وألم
وتتعلم تبارك النار
وكت حلمك برد وأظلم
وتتعلم تموت وتعيش
كأنك حاجة ما بتكمل
ولابتزيد ولابتتم
***
زاحفين في العاصفة
الراجفة
الصاخّة
الطاخّة
النار
التار
الشك
العك
الفتر
الكدر
الزيف
الجيف
الشجن
المحن
وقل القوت
عايشين في الوجع
البدع
الهوس
الهلس
مدن الموت
***
بركة شيخنا
تنجض لينا
تمرنا و عيشنا
بركة شيخنا
ترخص فولنا
رغيفنا و زيتنا
بركة شيخنا
تشيل دقداقنا
تسفلت لينا
مدنا و ريفنا
بركة شيخنا
تكب بنزينا
سيوبر و عادة
بركة شيخنا
تعشي ولادنا
الليلة جدادة
بركة شيخنا
توفر لينا
لبن و لساتك
بركة شيخنا
تسعل لينا
رغيف فنتاستيك
مسكينة بلدنا
شقاها لحافها
و غيظها وسادة
جروحها معادة
بحكم العادة
***
أشوفك بالعذاب مصقول
و بي لهب الجروح مغسول
و لسع لا سكت عرقك
و لا فتّر شقاكا قدم
سواعدك ضاربة
فوق الريح
و جرسك ديمة
صوتو فسيح
و نجمك في الأماسي
علم
سألتك يا وطن إرتاح
فديتك يا وطن أسلم
متين تلمس صوابعك
قيف؟
متين تعرف خلاصك
كيف؟
متين تفرح؟
متين تنجم؟
***
أحلامنا تطير
تقع في البير
عرقنا غزير
وشقانا وفير
و حصاد الرحلة
تعيس و فقير
صدورنا تولع
من نار غيظنا
عذابنا مساهر
و تحتو حصير
أيامنا مسيخة
و حالها عسير
و لاتنا ينقطو
سمنة و نعمة
و نحن ضلوعنا
خطوطها حفير
***
إنتظري
إنتظري عينيك ما تغمض
و دمك يسرح
مجنون الليل
البكتل وهجك
و مجنون الكضب
السّمو بينقح
يا بنية إنتظري
السور منخور
من ساسو مرنّح
و همبول الطاقية
و كوم المافيا
ستارهم بنزل
فوق المسرح
إنتظري عينيك محمومة
سؤالها بيعذب
و مصلوا بيجرح
هتافك شال
من غبن الحال
رقرق بالضيم
إتشكل غيم
في الشارع جنح
إنتظري
اليل مدحور
الطاغية بيغور
و ينشق السور
و الدنيا بتصبح
***
غايبين في الوجع
الطمع
الشك
العّك
الكّد
الجذب
السبّ
فرحنا خطب
بكانا خطب
كضبنا خطب
صدقنا شرار
مدنا حطب
صدقنا شرار
مدنا حطب
***
فترنا من الخطب
يا وليد
من قل القرش في الإيد
و من تعب الوقوف في الصف
و من غبن الرصع بالكف
و من حفر الدروب و اللف
و من خط الحلم في الرف
كل يوماً
نقيحنا بيزيد
دحين يا وليد
هو كم دغشاً
عشان نلاقاهو دافرنا
و تعبنا شديد؟
كم حولاً صيامنا صبر
عشان يشرق هلال العيد؟
آح ح يا وليد
لا حتي الخبيز إنضاق
و لا هدماً كسانا جديد
***
أولاد الحلة
إتلموا إتباروا
وصفوا طبايعك
و حلت الجلسة
دسيت أوصافي
عشان ما يقروا
هوايا و سرّو
و تبق النار في قلوبهم
مغسة
هواي كرهان
في وصفك ديمة
كلام الخطبا
و مدح الخلفا
هواي بالطين
ممهور و محنن
مرسوم بالنور
في خاطر البسطا
بيني و بينك
إنشق الشارع
و وقف الطاغية
عرفت الطعم الكان
ناقصني
زمان ماكنت
بعرف الدنيا
الدنيا دي كانت
طيبة و سمحة
لا حسيت في بطن
أقدامي
بجمر الحاصل
لأني فهمت
الحد الفاصل
و حسه الزمن
إتفتح غبنو
و شفت ضلامو
و غدرو و سجنوا
بديت إتعلم
أغمس قلمي
في دمع المُرة
و أرسم طيرة
طليقة و حرة
***
غمّست الوتر
الصابر فيكا
و إتنسمت غبار
إيديكا
شالني الهم
في الروح
في الدم
في النور
في الضلمة
في التيه
في اللمة
و لبست الريح
طاقية و عمة
إصبحت كبير
بهويه و همة
إتدردرت
في درب الشمس
التطلع حتة
تغسل الجتة
إتوترت
جروح و صدام
سكوت و كلام
من كل مسام
الشجن العام
و لا نقنقت
و لا إتجرست
و لا إتفيك من ريد الأمة
***
أطول من السور
القلم
تعظيم سلام للكلمة
لي إبل القصايد
للحروف المابتسبّح
(للمكوك)
لي كل والي
أكان ظلم
تعظيم سلام
لي(قبر أبويا)
و(أمي آمنة)
وللدروس الماخصوص
للجمرة في بطن القدم
أغظم من الوطن الوطن
وأغلى الكنوز السُترة
لو(حق الكفن)
وأصدق من الفرح الألم

راحيل

راحيل
عضو نشيط


عدد المساهمات: 55
مساهمة رقم 3
رد: هاشم صديق .. مجموعة قصائد
راحيل في الإثنين يوليو 19, 2010 7:37 am
يا عازة الصبر غربال

يا عازه الصَبُر غربال
مراجيح المديح والذم

شن جاب المديح
للذم؟!
وشن دفن الفرح
في الهم؟!
وكيف ضاعت
سبيبْة «الكيف»
بأمر السيف
في تبن «الكم»؟!!
وشن خلّى العَشَم
وهمين
كراع في الغيب
وإيد في الدم؟
وكم زاجل
ضهب في الريح
وكم مرسال
طواهو اليم؟
كُت عشمان
يهل فجراً
أقول لعنيك
بشارْة الخير
كُل ما تبوس
عيوني فَجُر
- بعد لبّن -
يغيب مني
ويشيلو الطير
وكلْ وطناً
خريطتو خلاص
يقع ويتماص
بإييد الغير.
وكل ورداً
في سدر الناس
يموت وينداس
في وحل السير.
وكلْ وتراً
لهج انجاز
ولى نبض الجروح
انحاز
طريقو سِدِر
وسجنو شِبِر
وحزنو سفير.
حُزُن يابا
حُزُن يمه
حُزُن يا قوم.
حُزُن راقد
حُزُن بالكوم.
........
حُزُن في صنة
الدنيا
حزن في «تيمة»
الغنية
حُزُن في سرحة
في الحافلة.
حزن في زفرة
القافلة
حزن في خشعة
النافلة.
حزن في بحّة
الآذان.
حُزُن في أنّة
أمدرمان
حُزُن في وحّة
الخرطوم
حُزُن يابا
حُزُن يمه
حُزُن بالكوم
......
أريت لو الفرح
في السوق
وكان ريل الأمل
مطلوق
وكان جري الزمان
ملحوق
وكان في البال
دُعاش وبروق
وكان خاصمنا
صوت البوم
وباس عينينا
ناي النوم.
هاك منديل ورق
لفّة
لا مُزن الدموع
كفّ
ولا بحر العَرَق
جفّ
ولا كمل السعال
خفّ
ولا راح الطرش
خلانا في زفه
ولا خيلاً أصيل
جازانا في اللفّة
ولا حيلاً
وقف ممشوق
في وسط السوق
وفي وش الكضب
تَفّ.
تسامحيني؟!
نسيت وردك
على رمل البوار
والعك.
وطشّ بهاك
بين جن العُصار
والسك.
هوْ كان وطناً
رهانو شمس
وكان وعداً
عليهو الرك
وكان مجبول
على الأوراد
وكان إيمانو
قاطْع الشك.
منو الوداهو
حد القيف
وحشّ حشاهو
بي حَدّ الكضب
والسيف؟!
وشن سوى الصباح
مَغرب
وأنسام الضلام
تخويف
وشن خلى الشرف
طُرفه
وكت عابن
بنات الريف؟!
وكيف يا بويا
- في قبرك -
يكون باطْن الحِكَم
تزييفْ
ويا يُمه الفَقُر
قالّينا يضحك
- كُر
وكت صاهر
عيون أم دُر
ومدّ الإيد
صبح تشريف.
.......
يِفَط يابا
يِفَط يمه
يِفَط بالكوم.
......
حُزُن يابا
حُزُن يمه
حُزُن يا قوم.
حُزُن مكتوب
حُزُن مسموع
حُزُن في الشوف
حُزُن مرسوم
.......
حُزُن في الخوف
حُزُن في الونسه
والنظرة.
حُزُن في الحلوه
والمُره.
حُزُن في سحنة
البيبان
حُزُن في نقرة
الضيفان.
حُزُن في زفرة
الحيطان.
حُزُن في الغيبة
والرجعة
حُزُن في العَكَره
والنقعة.
حُزُن في الرقدة
والقعدة.
حُزُن في الكَسْره
في الفتحه.
حُزُن في الضمه
في الشدّه
حُزُن في الشْوله
في المدّه
حُزُن في السكته
في النُقطه
.......
لا الماضي
هوْ صار فعلاً
صمد فارع
ولا الحاضر
بقى مضارع
ولا «سوف»
بقت تصبيرة
للشارع
ولا «الانشاء»
بقت قمراً
أكيد طالع.
«كان» غنانا
في الحصه
ولسه دَرِسْنَا
في لسه.
وبين الرجفه
والزفه
وقع قلب القلم
مكسور
وسال دمع الحِبِر
مغبون
من التاريخ
من الجغرافيا
والمافيا
والخسه.
هاك فنجان
أمل قهوه
غسلت هواك
بي مطر الخريف
المُر
من لطعة لسان
الناس
ومن شُبهة
ومن شهوة
....
أيا عازه
أقِلْديني
وضميني
على سدرك
بشارات الأمل
إحساس.
فترت من الجروح
والصوم
وموت النوم.
أريت لو مره
في كتفك
أخُت واتكل
عذاب الراس
وأشم شعرك
تجيني مروّه
في الأنفاس.
أيا عازه
شفايفك جمره
تغلي عروقي
لو تنباس
أعود فارع
صبي مضارع
وأقيف بينك
وبين الفاس
كم مرات
تضيق الدايره
واتكرفس
في قد الإبره
واترضرض
من الهتيفه
والحراس
هواك يمرقني
من سجني
يفتفت طبلة
الترباس.
.........
مسيخه الدنيا
دون سُكّر
عذاب عشقك
وكل سؤال
مصيرو الريح
بدون يرتاح
على راحة
برش ردِّك.
ومافي مطر
نزل «واقع»
بدون رعدك
وجن برقك
عشان يغسل
هوان ونعاس
ويصحصح لي
هتاف الناس
ويخط الحاضر
المأمول
على الأحلام
وفوق
في صفحة الكراس.
أيا عازه
نفخت رماد حُزُن
قيّل
على الأوراق
عشان يشرق
جَمُر يلمس
بطن قلمي
وأحس بي حُرقة
المشتاق.
وأشرِّط فيزا
في الخاطر
وأقَبِّل من مطار
مفتوح
بناغم يأسي
في الآفاق.
..........
أيا عازه
سعيت كم مره
هرولتَ
بين «مروة» جروح
قصة عذاب
العام
وبين لُجة
«صفا» الأحلام.
ولا حجيت
ولا عمّرت
للأيام.
نساسق
بين وهم مفتوح
وبين ضيقاً
يسل الروح
ونِتْدَردق
علي الصحرا
نرقِّع بالصَبُر
جُبَة هوى الفُقَرا
ونتململ
من المارشات
ومن موال
نشاز السادة
والخُلفا
كتير صنقعنا
لما فَتَرنا
شان نلمح
هلال يمرقنا
من صومنا
وبدراً تام
يجامل
ويقْلد الأيتام.
شن جاب المزاد
والبيع؟!
منو السَلّ الحروف
والصوت
ومين إيديهو
في التربيع؟!
أيا عازه ....
لو وقعت
جبال «التاكا»
أو «مَرّة»
وحاتك ما بخيب
ذره
أكان مطلوق
سراح جني
أو يوماً
لقيت أقدامي
مُنْذرا.
لحافك شوك
لا غشوني
لا غشوك
هواك يا ستي
دام سيدي
وأنا الخادم
أنا المملوك
وحاتك ما فتر
يوماً
غبار كرّي
ولا حافر
نَقز بره.
رهاني الباقي
ديمه عليك
حرفو «كتابه»
ما «طُره».
لا بتباع
ولا بصبح
نديم عولاق
ولا بركب
جناح فِرّه
مساهر في الصريف
صاحي
وقابض سيف
حروف حره
أيا عازه
تسامحيني؟!
زمان كانت عيوني
يباب
لاركّ الخريف
فَد يوم
ولا قالَد
رموشها سحاب
ودار زمني
شَرَق ريدك
قفار رملي
سمعت صرير
على الأبواب.
مَدّ عزاكِ
إيد الريح
شبابيك المطر
فتحت
لقيت دمعاتي
صبحو قُراب.
هواك يا عازه
جَرّسني
ولا خجلان
ولا زعلان
ولا مكسور
ولا مشرور
ولا مرتاب.
ولا نافسني
في ريدك
غرام سلطان
ولا غشّاني
ضُل أحزاب.
.........
أيا عازه
بصيرة العاشق
المكتول
عيون درويش
تشوف في الليل
ورا الظاهر.
وتتصفح
كتاب باكر.
ومكشوف
عنّها المستور
ومرفوع
من رؤاها حجاب.
أيا عازه ...
الفرح مكتوف
ولا القيّدنا
حبل الخوف؟
أو شان جوعنا
نار في الجوف
والتاريخ
ورق مكشوف؟!
أم يا عازه
جاي «خليل»
في نص الليل
يبل الشوق
عيون «أبروف»
ويزقزق
في غمام «نملي»
ويبَشِّر
فوق بنات «مروي»
«يهرول»
بين ضفاف «سنجه»
ويطوف بي فرحو
لي «راجا»
يقيّل في ربوع
«فاشر»
ويمسح دم جرح
داشر
يراجع دنيا
محتاجه.
يرك في دومه
في «توتيل»
ويأذًّن
في دغش بدري
- منو البِدْري؟ -
عشان يطلق
عقال النيل؟!
سلام سانتينو
ود شول دينق
سلام محجوب
سليل شاويش.
سلام ميري
سليلة شول.
سلام يا بُقجة
المسلول
سلام يا آفة
المشروع
سلام يا كُربة
الأبرول.
سلام يا حال
جهات أربع
سلام يا حُرقة
الشُفع
سلام (ناكيت).
سلام «النعمه
بت وراق».
سلام يطلع
من الأوراق
سلام يبرد
حشا الآفاق
سلام يطرانا
كلنا جد
ويشيل قدامنا
سور السد
وخوفنا الحِلِم يِنْهَد
ويغيب من عيّنا
ضو رقراق.
يا عازه
الوجع بي طال.
يا عازه
الصَبُر غربال
يا عازه
النقيح بطال.
متين دغَشك
يفج الشوف
متين يا روحي
«سد المال»؟!
متين المُزن
يهز الأَرْض
أريت «القبلي»
حسع شال
تَتَرْتَري
يا عروس أُمه
أشيل منك
جنس شبال
أطمبر
«أغْبَش التربال»
وأقول للدنيا
عَصْرنا آل
بدون اليانكي
والهتيفه
والعُزال.
وشن جاب المديح
للذم؟
وشن دفن الفرح
في الهم؟
وكيف ضاعت
سبيبْة «الكيف»
بأمر السيف
في تبن «الكم»؟
وشن خلّى العشم
وهَمين
كراع في الغيب
وإيد في الدم؟
وكم زاجل
ضهب في الريح
وكم مرسال
طواهو اليم؟

[نغم]

بين النيل وحمد النيل

إتوهـــطّت
في قــد الإبره
إتمــددت
خَــلفـــت الصبر
كراع في كراع
حـلفت أعضّي
الحُـــزن الحـنضل
لا أتلفــّت
لا أتفـتت
لا أتبـاع .

في قــد الإبـره
حرثـت زرعـت
مُــطُـرق نـخــلة
كِبـرت طـالت
صبحت تمـره.

حرثـت زرعـــت
كــمـان قطعـية
بنيـت و عـرشـت
عـديل قــطـية
وكان غــير الله
في زول زارعـني
يــجـي يقـلعـني
وكان سـلطـان
أو والـي معـالي
عـصر في إيـدي
فرح أو دهـــشه
كــراني و غـــشّ
اليـجـي يمسكـني
من الايــد
البتـوجعــني
الله نحــتنـي
وكرمـو وســيع
من طـين ســوداني
في مجري الســـــيل
ومما قمت
فتحــت

وشفــت الـنـور
وقـف بيـتنــا
عـــديل مســتور
بين النيــل
وحمــد النيــل
في نـص السـكــة
بــس بالضبـط
تقــول قاســوها
بالميــللي
تقـول حسـبوها
بوصة وســنت .

يوماتـي الشمـس
تطلـع
صـبيـة وخــيل
ويومــاتي الشمــس
تشهـــق
تقــع بي طــولها
جــوه الليل
ممـا قمـت
عـارف الدنيـا
تبـدا شــروق
وعــارف الرحــلة
شــيلها تقــيل
وفــاهم الدنيـا
يوم بتمــيل
وتمـدد في حمد النيــل .

واتعلمـت
من النيــل
وحمــد النيــل
أهــرول
بين شــروق
وغــروب
وصــبر أيـوب
عـــذاب الرحــلة
نار وخطــوب
شـيتاً أعافــر
فيهــو بي إيـدي
وشيتاً بالقــدر مكتــوب .

ويامـا جــروح
أبــت ما تروح
ويـاما أزاي
صــبح ضُـلي
يزازي معــاي
ويامـا النار
سـقت للروح
ومن جنـي
أبـل قلـمي
في دم جــرحي
أشــخـبط للفـرح
في لــوح
وامــد للساني
للهــدّانـي
وأضــحك
والعمــر مضـبوح
واعافــر
في الرياح صـابر
أدندن بالألـم
مشــروح
أفرتــق
لي زرار صـدري
واقــول لعــدوي
تعــال بارز
لهــب غبــني
والشــاريني
والبايعــني
يمســكني
من الإيـــــد
البتــوجعــني
والـزارعــني
غــير الله
يا طـمـباره
يقلعــني .

مما قمــت
قرص الشمــس
بـيـطلع
بين جبـين
النيـــل
وفي الآخر
بيــدخل
جوه بـيـر الليــل
ينــوم حـبه
ويطلــع تانــي
من بــدري
يوشوش
في رموش عينــي
يتـــــبتـــــب بالشعاع
حــاني
علــي أوتــار
شغــاف صــدري
أقــوم أزرع
جــروف عمــري
واشــد الحيــل
أباري الشمــس
من النيــل
لحمــد النيــل.

أيا حــزني
يا ضــلي المــلازمني
ويا كفــوة
رمــاح الفجعــة
في ظــني
ويا مُــترار
حــداد القنــجة
في مــأتم
برق وطــني
ويا جــني المشــتت
في الــورق تيــراب
يا نبتــاً حــلف
ما يســقي عــودو
ســراب
ولا يــرزف
دمــع كضــاب
ورغــم الحربــة
والنشــاب
بفــتش
في تبــن عمــري
عن الضحــكة
وعن الأصحــاب
منــاديل الــورق
كمــلت
من جــدول
مطــر وجعــي
ولا إتبـــــــل
يوم مــنديل
ولا اتقـــــــّرح
سنام ســفري
بحمــل الشــيلة
والتنــكيل .

لا اتنابــرت
في فد يــوم
أدق صــدري
واقول يانــي
ولا نقــّــــزت
واتشــابرت
لي لافتــات
ولا ألقـــاب
ولا أحــزاب
بطول عمــري .

لا اتوســـلت
لي غافــلة
ولا عيـنــي
بقت غافـــلة
ولا طأطأت
غير لـي الله
غير الشعــب
أجــلبق
في جــداول الحــب
واسـبّح للرحيــم
الــرب
ولا اتجــرست
يوم شــالوني
- زي يوســف -
ايد ناســي
أسف جــدعونــي
جــوه الجــب .

اتعــذبت
بالطمبــارا
والشمشــارا
واتقلــبت
في صــاجاً
لهــيبو حقــاره
لا فــترت
رمــاح وطنــي
ولا سابتنــي
مافيــا ( سفــارة)
حــت إن جـيت
أونــس ناسـي
في غــربه
واحجيــهم
بــجرح النــاس
وحــال دارهــم
ونعــل الوالــي
والحــراس
وســم السلطــة
والكــربه
ألاقــي المافيــا
جــاريه
ورايــا
سفــارة مــِرايا
وش السلطــه
والحــاحــايا
ناس ( حســونه)
(ود الـــدايه)
والطمــبارا
بي نُـقـــارا
حجــار الكــضبه
والكسّــارا
ناس عــدمو
الضمير ودبــارا
حجــاهم طــقّ
من ( مــروي )
ولي ( بــارا )
مســاكين الرجــال
بين بين
تقارير الكضــب
تلقــين
وسب الشٌــرفا
باســم الدين
والإرهــــاب
بـُحــمرة عــين
وجــدع السُــتره
لبـس الشــين
خســـــــارة
خســــــــارة .

مما قمــت
فتحــت
وقـف بيتـنـا
بين النــور
ووش الســور
طــيــن منخــور
يومــاتي
الشمــس تطلــع
يومــاتي
الأرض بــتـدور
جراح بتقـيف
جــراح بتغــور
أماني تجــي
أماني تغــيب
ظلال ترمـي
ظلال بتشـيب
صباح يطلــع
ضٌهر يضلع
ومــوت في مــغيب .

ما لّفـّـت
شمس يومـاً
و جات بالعكـس
ولا ليلاً بــرك
في الرحـــله
يوم بالدس
ولا كمل العشــم
في بــكره
ضــاع الحــس
يومــاتي الأرض
بــتدور
ولو طــال العمــر
يقصــر
ويوم لا بــُد
بجــيكا الـدور
بس يا زول
تموت واقف
متل نيمـتك
تمــوت مســتور
لا تدخــل
في ســوق الطــاغـيه
كــوم للبيــع
ولا تهــاتي
في نـار غُــبنك
تفتــش لي نصـير
ووجـــيع
براك عــارف
براك شــايف
قــد الأبــره
كـون ووسيـع .

إتعــلمت
من ضـيقك
تمــد رجـليك
وتتمـّـطــا
لا تدنقــر لجــاه
سلطــان
ولا تصنقّــع
لوش يافطــه
شوف بعيــونك
الدنيــا
لا تعــاين
بعــين الغــير
وشــيل منّ الجــراب
تمــرات
ولا تفــتش
للـبن الطــير
وكـان كتّــف
خطــاك والــي
جــناح حــرفك
كـبير وبطـير
ولو ضاع
في الطــريق
اصحـاب
وغــاب جــوه
الرمـاد أحبـاب
كفــاك
سمــر الموســيقا
رفــيق
كفــاك
حــبة ورق
وكــتاب
ورأس مرفـــوع
في خــط الســير
وريــد للــرب
وشــوف وضــمير
كفــاك حـُـزن
الزمان المُــر
يغــرد في الحـــروف
تفســير .

( يا قابــض هــوي السكــين )
وما مسكــين
جــدعت وراكــا
شــال الماضــي
ما هّــماكا
لو أوغــاد
وكان هــمباتا
لو اشباح غـجــر
مسّــاكـا
كتيــر قامــت
حــداك صاخّه
وناش ضــهرك
هوي الكـنداكا
والله معـاكا
ما همــاكا
تعــيش وتمــوت
لا كســروك
رمم تفـتيش
لا سـاقوك
غنـــم ابلـيس
فقــير من كـــلْ
نِــعَــم وريـاش
غِــناك بنك الوطــن
والنــاس
جـعيص
ما بعلـن التفـليس .

دق ســدرك

كأنك في زمان
الحــب
ولا اتـــفــلي
شــعَــر في الوهَــدَه
تتجـهجـه
ولا تســلم
لـُحـفـــَر السكــة
والفجعــه
وكـــت ساقـوك
إيــديــن ناسـك
متل يوســف
أسف جــدعوكا
جوه الجــب
دق ســدرك
عــديل وأهـتف
أريـــد الله
وأريــد الشعـب .
واتعلمــت
من النيـــــل
وحمــد النيــــل
أهـــرول
بين شــروق
وغــروب
وصــبر أيـــوب
وأتعــودت
تقل الشيــل
ألم وأقــلد
في ضـيق صــدري
وطــن مجــروح
ويــرد الــــروح
بمليــون مـيل .

[نغم]

تلك النيمة


خرج من جلدي... سجني الآبدي
أركض في رمل الزمن الحارق... لا ألوي
أبحث عن سمر ينسيني سجني
يطلقني للبحر والآعشاب البرية
أبحث عن قمرا لا يفشي أسرار العشاق الآزلية
أبحث.. أبحث مثل النملة عن ذرة خبز في زمن عاصف
ومن سقف
العالم ينزف مطر الحزن
يعاند طبل الرعد القاصف
يجرفني الماء فلا أمسك ذرة خبزي
لكني أمسك روحي مثل القابض لسع الجمر
وأعود الي سجني جلدي
تفشي الصدأ علي المزلاج
لا أعبأ أبدأ
فلتبق هذي الروح حبيسة هذاالحزن الفاني
تفشي الصدأ علي المزلاج
لا أعبأ أبدأ
فلدي دفاتر في الآدراج
لو طالعت سطور الحزن الراكض فيها
لن أسأل عن شئ خارج سجني... لن أحتاج
امرأة كانت.. يومأ شيئأ ما.. لا أستغني عن صمت عناء
الوهج الضامر فيها
كانت ملهاة وطنية.. كانت تعويذة
كانت تجعلني أتذكرأن العالم ذكر.. أنثي... رجل.. امرأة
وأن الطقس يزمجر صيفأ..وأن الدفء رفيق شتاء
وأن سقوف الغرف الوردية قد تجمع أحيانا أجساد الغرباء
كانت شئ أو لا شئ لا أدري
لكنها كانت يومأ غصنأ لزجأ في جذع الزمن الآغبر
وذات مساء عاصف..
ذهبت في صمت تسبح في حلق الريح الزمن الأخر
الآن طرق بابي أحيانأ بعض نساء.. فأتذكرأن هنالك شئ في صدري
اسمه قلب...
وأن هنالك.. تحت رماد السنوات الشوكية جذوة جمر
تثرثر بعض النسوة عن أشياء فكرية..
لكني أسرح في زهرة شفاه الآنثي وأنسي العقل
وأحيانأ تتحدث أنثي في صمت عن كل الآشياء تحديد..فيزغرد عقلي..
لكني لم أسمح يومأ أن يدخل فجر غرفة عقلي..
هذا شئ لا يحدث حتي في " الآفلام الهندية"
أصحابي يومأ ملء الآرفف... معارف... ضجة... أوتار
تواصل بين الرئة ونفس العمر
لكن العمر رصيف.... والزمن قطار
وأنفاس الصبر قصار
فتدحرج منهم في بعض محطات العمر...أثر همه
والبعض تفرغ للآنخاب
والبعض تفرغ للانجاب
والبعض انتحر بسوء تفاهم أسخف من أن يذكره التاريخ
والبعض تقافز مثل " الكنجارو " علي نعل السلطان
والبعض استل حسام الخمر... ليقطع أوردة الآحزان
والبعض التوم الصمت عن التفسير
والبعض
البعض
البعض
لكن العمر رصيف .. والزمن قطار.. وأنفاس الصدق الآبدي قصار
صدري قد أصبح مقبرة لكثير من زهر رفاق العمر...
هنا يرقد نجم.. وهذا قبر نبيل..
وتحت رخام القبر العاجي هذا ترقد أنثي لا تنسي...
وهذا قبر صديقي البطل الثوري...

وهذا قبر ال.....
لا... لا أذكر من يرقد من أصحابي من يرقد تحت ثري هذي " التربة "
ما أتعس ذاكرتي الخربة
أسخر من مثل يضرب عند الضيق يصور أن العالم قد أصبح
" قد الابرة "
هذا مكان واسع.. استلقي وأركض فيه.. وأكتب أشعاري في دوحته الرحبه..
وأجني فيه ثمار الصبر الرطبة
هماك فراغ وسكون
العالم مجنون
لكن الراحة في " قيمة " ... كانت غصنأ طفلآ غرسه أبي..
أضحت ظلآ حصنأ وملاذأ....((تلك النيمة))

[نغم]

التقويم السنوي الشعبي

الى
لينة هاشم
خلي ثغر الشِّدَّة باسم
كففي الدمعة البقت موسوعة
في خد المواسم
خلي جيلك شوفو حاسم
عندي إحساس
- رغم أحزان المراسم-
( إنو باكر بيكي أجمل
وانو باقي الرحلة أسهل
والأماسي الشارقة
من ضلفة عيونك
شوفا أنبل)
(1)
صورة الغلاف
صباحات الوطن
غُمه
عصر كف الحُزُن
أُمة
يتيم قلب البحس
يمه
مات خيل الفرح
مسكين
حَزّ وريدو
حد سكين
وكِت لا ضحكة
لا لمّه
.........
كسر سيف الحنان
نصلو
ونبضات الأمان
كملو
تقول وجع البلد
جَنّ
ومن كل الخشوم
طلعت
مع شايي الصباح
أنّه
(2)
رمضان
رمضان كريم
الصام يصوم
القام يقوم
سمح الصيام
تقوى القيام
ومن دون
تصاديق أو رسوم
الحال كعب
السوق صعب
الزيت غِلا
والعيش تِغا
وجانا البلا
(الفقري) ده.
ناساً تصوم
كل يوم تعوم
فوق الفواكه
والفطاير واللحوم
لازّه الكروش
نافخه الجضوم
وناساً عضام
لابسين هدوم
ورِجلين حفا
وساعة الفطور
(لُقمه) وملاح
حبة تمُر
(جك) للعذاب
(جك) للهموم
(جك) للأسى
وموية وكفا.
... ... ... ...
رمضان كريم
قول يارحيم.
(3)
الفطر
ياتو عيداً
جانا قادل
والحلق ما فيهو
غَصّه
وكلو دمعه
وكلو وحّه
وكلو قرصه
ليها قصه .

كم (خليفة)
دسّ من عينّا
الرغيفة ؟!
وكم إمام
باع وجعنا الغالي
في سوق الكلام ؟!
وكم (غُلام)
ساقنا زي زفّة هوام
وطاش وكضّب
في منصه ؟!
وكم (شريك)
باس جرحنا
في أي مِحْنه
وضاق عَرَقنا
وتفّ حسه.
... ... ... ...
كلو عيداً
زار ولفّ
والفرح مسكين
وهاجد في محّفه
(السادة) سادرين
في النعيم
والشعب دايخ
وراسو لفّ.
... ... ... ...
إلا عيدنا
أكيد وجاي
ماكان عذابنا
رخيص وساي.
الأمل زاد المسارب
الشمس ترجع
تبارز في المغارب
الجموع تصحا وتْصارع
الوطن مربوع
وفارع
الفعل ما بيبقى
ماضي
ديمه بتْنفّس
(مضارع)
راسو مرفوع
في المنصة .
(4)
الأضحى
ضحيتّ
وكان كبش الضحية
خروف وهم
جركانة زيت
من رف خَبَل
ورسمْت في ورقه
البصل
ودبّرت في الأحلام
فحم.
عيدين وانا (الحاج)
المهرول
بين (صفا) الكعك
المحال
و(مروة) الشوق
للحم .
كلو عيد وانا زفّه
في الغيظ والأذية
راجي عيداً
ألقى فيهو الفرحه
واقع
والمباهج أبجدية.
حُرية في شفق
الصباح
وسُترة في الأيام
هدية
...
كلو عام
وانتو (شاهد)
ما ضحية .
(5)
اكتوبر
يا اكتوبر
جيت مشتاق
حضنك رقراق
ذكّرت الناس
الألم العام
الغضب النام
الحق ينضام
الصوت معبور
السيف مكسور
والساقية تدور
... ... ... ...
وانحنا زمان
(للشمس النايره
قطعنا بحور
حلفنا نموت
أو نلقى النور
وكان في الخطوة
بنلقى شهيد
بي دمو بيرسم
فجر العيد
وما اتراجعنا )
... ... ... ...
يا أكتوبر
هلّيت فِي اللّيل
نقّرت وترنا
تبّيت حفيان
بي غبني فتحت
لقيتك خيل
سلامك حار
وغناك بِندار
في الحال صَحْصَحْت
واتذكرت
القسم الغالي
وصية وذِمّة
وهموم الناس
وعذاب الكلمة.

اتهجيت
من لفحة لهبك
اسم الشارع
ومعنى الشارع
واتعلمت دروسك
(ماضي)
(مضارع)
يا نبض أمبارح
وراجع فارع .
اتعلمت أدوس
الجمرة
واعيش بالحسرة
وافك الشفرة.
واتوترت
جروح وصدام
من كل مسام
الشجن العام
لا نَقْنَقْتَ
ولا اتجرّسْت
ولا اتفكيتْ
من ريد الأمه
ولا اتبريت
من شرف الذمه
وِلبِستَ الريح
طاقية وعمه.
وأصبحت كبير
بهوية وهمه .
(6)
رجب – أبريل
ضُفرك محنن
بالسكن
نومك مقطّع
بالمحن
غيظك كِبر
جرحك رطن
ويبست شفايفك
يا وطن .
في عيونك
إندلع الشقا
وسرح الجفاف
ضِهْب الفرح
من دمعتك
وأنْشقّ
من غيظك
شِدَر نخل الضفاف
فلّوكا في لهب
الظروف
مدّوكا في إبر
الكفاف
كل البيوت
صبحت سجون
كل الحدود
قامت جدار .
وراها معزول
الزمن
ومن فوقها
مكتوف النهار
وزي كلو ليل
لو طال وجال
تتململ الشمس
العظيمة
وبكره الفَجُر
إنتظار
دمدم هديرك
ياوطن
صحّا العباد
قلعت شوارْع
الحِلّه
تيبان الأسى
نفضت غُبار
زمن الحداد
ورفعنا
صيوان الأسف
وطلينا
بالشمس السواد
وعَبَرْنا
فوق موج الغبينة
وفينا مات
زمن (التصحر
والجفاف)
إتْفتّح القلب
النعس
واتفجّر الصوت
البخاف
واتشقق الأسفلت
وقام فرح الشوارع
ومن مسام كل الأرِض
طلع الهتاف
طلع الهتاف
طلع الهتاف.
(7)
رأس السنة
أشتل
على الحجر الورِد
واخدع أناملك يا برد
بي غُنيه
عن ريداً بجي
وأسرح
مع العام الجديد
مستني (للخضر النبي)
يبكي الأسف
من وهمي
ويرتج الجدار
ويمشي الملح
بي دمعي للزمن البوار.
واهبط
من الزمن الجميل
متدلّي
في بير الغبار
واعزف
على الوتر الجريح
شجن المعارف
ووحّة الريح
في المدار.
... ... ... ...
رأس السنه
ويبدأ الزمن
نفس الزمن
زايف لزِج
يعتب جواد الرحلة
في شوك الصخور
ويتْهدّ حيل
عصب السرج
واسمع
صدى العام القديم
مترامي في الزمن
الجديد
- الحب مجرّح بالكذب
- نهر الصِدّق
جف ونضب
- عِشْق السلام
شجن الحرب
- مات الشرف
والسيف رجف
... ... ... ...
آخر السنة
ضاعت حروف كلمة فرض
وغابت شمس معنى العرِضْ
... ... ... ...



الهوامش:
1/ اختصرت القصة
في ورد الكآبة
واستويت بي فرسي
في جبل الغلابة
أستظل بالريح سقف
وانقش على (الهبباي)
حرف
واحصد عجاج الرحلة
واتوسد ترابا
.........
صدقيني الليل جواد
والدنيا غابة.
2/ أتجاهل حنيني إليك
أخاف يمكن يجيبني إليك
وأنا الضايق جمر غيرك
أشوف
شيتاً عصرني عليك
تقول مطراً هطل
دقّاني في السكة
جريت بي حيلي لي بابك
أقول أتضارى وادفا
أقول يمكن بنية اصيلة
زي خيلاً دفر بي زفة للفّة
وجيت كايس أمان حضنك
ودار عينيك
أخاف منك، وأنا العاشقك
وباقي عليك.
3/ الصاباحات والمسرة
النسايم سابحة حرة
الرسايل كلو مرة
الأماني صبية خضرا
الورود زاهيات وحمْرا
الشوارع ليها نظرة
الحُزُن بقطارو مرَّ
وإنتِ أسمع ألف مرة.
الغلاف الخلفي
سمعت الرادي
قال الشعب
قلت الرادي
حسه يقول
- حال الشعب
عسير وصعب
... ... ... ...
لقيت الدنيا
قايمة قيامه :-
الشتّامه
الحّكامه
الفهّامه
النضّامه
اللملالمه
الجضّامه
والكوراك.
... ... ... ...
ناس (مولانا)
ناس (سارتانا)
ناس (سيّدنا)
ناس (ديجانقو)
و(الله معانا)
ناس ( كللمبو)
ناس (كوجاك).
حتى (إمامنا)
صار (رأس حربة)
و(البهلوله)
لا عب (باك).
سيجار (هافانا)
كيف (الورطه)
اصبح زانه
(كيف) الشعب
صار (تمباك)
وكان فكرت
أو صنقعت
أو حللت
قبل المرقه
تبقى عميل
يحابي دخيل.
وكان ذاكرت
جرح الناس
وقلت الجايه
تبقى (خلاص)
لا (أوكامبو)
لا (حجاج)
ولا (رجراج)
أنحنا القاضي
بس للوالي
والداسونا
والحُراس
يكنكشو فيك
نياب واليك
من مغرب
شَمِس بلدك
وحتى بزوغ
صياح الديك.
... ... ... ...
وانت شنو؟!
في (نظرة) ديكا
أو عين ديل
غير انك
(ضعيف صوتك)
(صغير اسمك)
يسير موتك
فطورك عك
عشاكا هوان
... ... ... ...
وإنت منو ؟!
لا في (العير)
ولا الإمكان
ساعة الأزمة
تصبح (في)
بعد الأزمة
تصبح (كان)
... ... ... ...
وانت عجيب
نبيل وغريب
ما بتخون
عروق عزمك
شرف بلدك
تفتش نجده
من (لاهاي)
ولا نصروك
كبار بلدك
وكت باعو
البشاير ساي
أخير تختار
بدل تحتار
يا جبار
رغم الوعسة
والإعصار
بدل تبقى
خانة (كان)
أبقى دوام
تمام في (صار)
... ... ... ...
إنت (الواعي
ما بوصوك)
ولا بملوك
ولا بْغُشُوك
ولا بقودوك.
................
يا جبار
يا إعصااااااااار.
رقم الإيداع
ألفين وعشرة
أبقو عشرة
على الوطن
رغم المحن
الطابعون
دار صابرين
الطبعة الألف
القرن الواحد وعشرين.

[نغم]

زول بحبك وماكا خابرو.

زول بحبك

وماكا خابرو.

ياما لاقيتو وبسالمك

وداسِّي منك

حال دواخلو.

جُوّه فيها

الموج يدافر

وانت يا محبوبو

فاكر

انو رايق

وقلبو شاغر.

أصلو زول

بِتْدَّس ملامحو.

يَا ما لاقيتو

وبصافحك

موت بجيك

وما كا عارفو.



زول بحبك

وما كا شايف

يا ما سالَم

وصوتو غالَب

رجفه

فس همس الشفايف.

مره شَدّ

على ايديكا

وقلبو جنّح

ورقّ ليكا

ركّ

في شُرفة عينيكا

وقرّب يشرح

جنو بيكا.

إلا حلّق

في المخاوف

أصلو جرّب

وحلمو نازف

موت بريدك

وما كا عارف.



زول بحبك

وفيهو ساكن

يا ما دسّاكْ

في ملامحو

وفيها ليكْ

سوَّر مساكن.

كم لقاك

حياك وصبَّح.

وفي ابتسامتك

قرَّب يسرح

كان مناهو

يقيف ويشْرح

إلا خاف

من "بس" و"لكن"

وينكسر خاتر

مشاعرو

ويبقى صبح الدنيا

داكن.

أصلو زول

ممكون وصابر

جوه فيهو

الموج يدافر

وبره

في قسمات وجيهو

تلقى

موج البحرِ ساكن.



زول بحبك

وما كا خابرو.

يا ما لا قاكا

وبسالمك

وداسِّي منك

حال دواخلو.