صدام

[أبوبكر عباس]

قلت ليهو الجابك الشبك* دا، شنو يا صدام؟
- خلصت شغلي بهناك جيت أساعد الجماعة ديل
- دمي فار فورة شديدة؟؟
قبل أوريكم سبب فورة دمي، خلوني أقدم ليكم بطل الحدوتة
* الشبك هو حظيرة الإبل (قلت بدل أشرحها نهاية الصفحة وأتعبكم، أحسن انزلها هنا، أصلو الكتابة زي الأكل بتتخلط في البطن)
أقول ليكم حاجة؟ أحسن أقول سبب الفورة هسع، وبعدين برجع لصدام العجيب.
الفورة:
قلت لي يا صدام، خلصت شغلك وجيت تساعد الباكستان الجداد ديل؟ عرفتهم متين؟!
ردّ: أيوة وفيها شنو؟ عرفتهم هسي
تعال أركب خليني أشوف شبكك
فعلا خلص شغلو بشكل ممتاز، لم أتحدث معاهو ورجعتو للباكستان وإكتشفت انو يتحدث الأوردو بطلاقة ويضع سماعة التلفون دائما في إضني.
أصعب حاجة في الدنيا دي، انو أكتشف انو في زول كويس من غير مقابل، وممكن يعمل حاجة لله ساكت؛ لذلك رجحت وتمنيت انو الود دا، يكون مجنون. غير كدا حسابتي بتتلخبط.
الراوي هنا، مشرف عُمال في دولة خليجية إسمها الإمارات

[wadosman]

صدام عنيف

يااخ جننتنا...قلنا الزول دا اتشبك مع منو...

**كان تريحنا و تريح روحك و تقول ود حسين ولا تلبسوا شده يااخ...

[أبوبكر عباس]

تاني يوم وقفت جنب مكان شغلو وناديتو وما زالن السماعات في إضنيهو
- بتسمع في شنو؟
- راقصاتي البراقع
- اتّا ليك معانا ست (أو ستة) شهور، إتعلمت الأوردو دا، وين؟
- زمان كنت هنا
- أهلك كانو هنا؟
- لا، كنت وحّدي
- بسري قلت : الود دا، ح يجنني، وتابعت، عمرك كم سنة؟
- ولدوني أيام صدام دخل الكويت
- يعني عمرك تلاتة وعشرين، طيب متين جيت هنا؟
- جيت عمري أربعة سنوات جابني أخوي وشغلني ركبي في الهجن في المرموم.

بسري قلت: دا زول حدوتة وناس سودانيات تعبوا معاي وبطلع البانر بطلعو.
معقولة لحدي هسع ما وريتكم انو صدام سوداني من الرهد القرية تلاتة؟!

[طارق صديق كانديك]

شفت العنوان، قلت جاتك يا ضبعة عشاك في جحرك، الليلة الزول ده جاني في الأتو

بس برضو صدامك يستحق التحية.

قلت لي لابسات البراقع؟ لاخلاص زولك ده عدى بهناك

[الرشيد اسماعيل محمود]

صدام

ملاحظات عامّة حول كتابات الكاتب النبيل:
إذا كان أسلوب تداعيات يحي فضل الله يُعرف بنهج "السرد الخشن"، فإنّ الكاتب النبيل، واضح إنو يكتب بأسلوب "السرد الخشن جدّاً".
عناوين كتاباته دائماً مباشرة من غير لولوة، يعني لو قال طحنية معناها طحنية، لو صدّام يعني صدّام، إبل يعني إبل، وذلك صدق ينتهجه الكاتب في كل كتاباته، حيث لا يعمد لإرهاق القارئ بالتفكير والتحليل، بل بالعكس، بجيبها ليهو مملّحة، ما يجعل القارئ حين يقرأ عنوان له، يكون مطمئناً أن الكاتب النبيل لا يخبئ له شيئاً آخر غير ما يشير إليه العنوان.

[أبوبكر عباس]

المشاركة الأصلية كتبت بواسطة الرشيد اسماعيل محمود

عناوين كتاباته دائماً مباشرة من غير لولوة، يعني لو قال طحنية معناها طحنية، لو صدّام يعني صدّام، إبل يعني إبل، وذلك صدق ينتهجه الكاتب في كل كتاباته، حيث لا يعمد لإرهاق القارئ بالتفكير والتحليل

المشاركة الأصلية كتبت بواسطة wadosman

**كان تريحنا و تريح روحك و تقول ود حسين ولا تلبسوا شده

نشدو ليك يا ود عثمان
صدّام
أصلن ما ح نغّلط على زول ولّ نتعبو بالتفكير والتحليل
صدّام يعني صدّام، طحنية يعني طحنية
لكن بتعب القارئ بحاجة واحدة: الكومديا القدام عيونو وما داير يشوفها، بجيبها ليهو من غير بهارات بس مملحة وأحكّ بيها أنفو، مثلا:
الدكتور المعتصم عبد الرحيم، من حاكم ولاية بقى وكيل وزارة التربية والتعليم لأكثر من عشرين سنة، في التسعينات سكّن مرتو التانية سمية القاضي في بيت حكومة تاني بعد ان طرد أستاذي عز الدين محمد سعيد من بيتو، ومرتو بقت رئيس تحرير جريدة التعليم العالي، مرتو أصلا كانت شغالة في الوزارة، كتبت رسالة لعمر البشير قالت ليهو: معتصم ما شال ال165 مليون ساكت وهو مخلص! معتصم قال في لقاء تلفزيوني أولادو الصغار (من المرة التانية) بقروا في مدارس خاصة.
جانا في "حتا" قدم ندوة عن فوائد توقيع معاهدة السلام مع الجنوب، سألتو: لو البشير غاب عن البلد، قرنق ح يكون رئيس بالإنابة؟؟ القصة دي لقيتوا ليها مخرج فقهي من وين؟ ما جاوب وصديقي العازمو عشا بعد الندوة أبى يعزمني وقفل تلفونو.

* بعض معلومات المعتصم من مقال قديم لسيف الدولة حمدنا

المشاركة الأصلية كتبت بواسطة طارق صديق كانديك

شفت العنوان، قلت جاتك يا ضبعة عشاك في جحرك، الليلة الزول ده جاني في الأتو

بس برضو صدامك يستحق التحية.

قلت لي لابسات البراقع؟ لاخلاص زولك ده عدى بهناك

قبل ألبس النضارة، عدى دي، قريتها عُدي

عشاك حاضر حاضر
بس ساعدونا بالبانر

[أبوبكر عباس]

قبل عشر سنوات، كان الاطفال (من سن 4-7 سنوات) هم الركبيّة، الآن وبمجهود من اليونسيف وكثير من الحادبين تم منع الأطفال وإستبدالاهم بريبوت صناعي.

[مبر محمود]

قبل عشر سنوات، كان الاطفال (من سن 4-7 سنوات) هم الركبيّة، الآن وبمجهود من اليونسيف وكثير من الحادبين تم منع الأطفال وإستبدالاهم بريبوت صناعي.

بابكر

سؤال لحضرة الدكتور الأديب:
هل حدثت سابقاً حوادث تعرض فيها هؤلا الأطفال للإصابة؟

[يحي عثمان عيسي]

اقتباس:
المشاركة الأصلية كتبت بواسطة الرشيد اسماعيل محمود
ملاحظات عامّة حول كتابات الكاتب النبيل:
إذا كان أسلوب تداعيات يحي فضل الله يُعرف بنهج "السرد الخشن"، فإنّ الكاتب النبيل، واضح إنو يكتب بأسلوب "السرد الخشن جدّاً".
عناوين كتاباته دائماً مباشرة من غير لولوة، يعني لو قال طحنية معناها طحنية، لو صدّام يعني صدّام، إبل يعني إبل، وذلك صدق ينتهجه الكاتب في كل كتاباته، حيث لا يعمد لإرهاق القارئ بالتفكير والتحليل، بل بالعكس، بجيبها ليهو مملّحة، ما يجعل القارئ حين يقرأ عنوان له، يكون مطمئناً أن الكاتب النبيل لا يخبئ له شيئاً آخر غير ما يشير إليه العنوان.



معقول؟؟؟؟
الغيره الادبية تصل للدرجه دي
يعني نص الليل تفرق شنو من نص الليل تماما

[أبوبكر عباس]

المشاركة الأصلية كتبت بواسطة مبر محمود

سؤال لحضرة الدكتور الأديب:
هل حدثت سابقاً حوادث تعرض فيها هؤلا الأطفال للإصابة؟

حباب حضرة المفكر المُبر محمود،
لا حظ يا مبر للصورة هؤلاء أطفال صغار جدا يتم تربيطهم على ظهر جمل بتصل سرعته لستين كيلومتر في الساعة، الحوادث كانت تحدث بإستمرار،
المشكلة يا مُبر الاطفال ديل، كانو بيحرموا من طفولتهم، حكى لي أحدهم:
جابوني من السودان عمري اربعة سنين ونص وبعد خمس شهور تدريب شاركت في أول سباق، قال لي: أيام التدريب كان صلبي يدمي ويتم رشه بمضاد حيوي رشاش وكانوا يمنعوا علينا الحلويات والأكل الدسم حتى لا تزيد أوزاننا، أتذكر كيف كنت أتحاوا في أخوي الكبير لمان يجي العذبة لإستلام الراتب وزيارتي.
قال رجع السودان بعد أربعة سنوات، لم يتعرف على والده، لكن قال لي: الغريبة أمي عرفتها بالإحساس ساكت، لكن أبوي دا، أبدا ما قدرت أخاويه للآن.

[أبوبكر عباس]

سجلت لصدام حكايتو في فيديو، لكنو رجع ومنعني من نشرها.

[مبر محمود]

المشاركة الأصلية كتبت بواسطة بابكر عباس

أيام التدريب كان صلبي يدمي ويتم رشه بمضاد حيوي رشاش

شكراً يا بابكر على المعلومة،
طبعاً لا يخفى عليك إني سألت طمعاً في إجابة تخالف ما تفضلت به. فللأمانة كنت أنتوي الطعن في تدخلات المنظمات الدولية (اليونسيف نموذجاً) كونها، بتدخلاتها هذه، كثيراً ما تعبث بثقافات الشعوب وفقاً لمعايير العقل الإجتماعي الأوربي. عموماً إجابتك الوقائعية منحتهم البراءة في هذه القضية، ولكننا وراها حتّى نراها!

[أبوبكر عباس]

المشاركة الأصلية كتبت بواسطة مبر محمود

شكراً يا بابكر على المعلومة،
طبعاً لا يخفى عليك إني سألت طمعاً في إجابة تخالف ما تفضلت به. فللأمانة كنت أنتوي الطعن في تدخلات المنظمات الدولية (اليونسيف نموذجاً) كونها، بتدخلاتها هذه، كثيراً ما تعبث بثقافات الشعوب وفقاً لمعايير العقل الإجتماعي الأوربي. عموماً إجابتك الوقائعية منحتهم البراءة في هذه القضية، ولكننا وراها حتّى نراها!

سلام يا مٌبر،
حوادث السقوط وكسر الأيدي والأرجل كانت كثيرة جدا وشخصيا حضرت حادثين بالطائف عام 2001 وحينها كاتبنا مكتب الأمم المتحدة بالرياض وقد شاركت مع شبكة تلفزيون فرنسية في تغطية لهذه القضية سنة 2001 بدبي (لكن للنصيحة ما متذكر مشاركتي مع القناة كان سببها مشكلة الاطفال ولّ لطافة البت الفرنسية القائمة بالبرنامج).
الحوادث الجسمانية يا مُبر كانت لا تحصى!
في حاجة تانية يا مُبر وهي إحتمال الإعتداء الجنسي على هؤلاء الأطفال من بقية العمال كبار السن داخل المزرعة.

[أبوبكر عباس]

في شئ تاني يا مُبر:
شخصيا عاصرت مشاركة الأطفال في سباقات الهجن لمدة سنتين وبعدها قام الشيخ زايد بإلغاء ركوب الأطفال.
أعترف بمشاركتي المتواضعة جدا في محاربتها، ومعروف السبب هو: المضارفة على الرزق في دول الخليج.