راكوبة المجادعات.. النمة والدوباي

[علاءالدين عبدالله الاحمر]

الجن الركبني وساقني للماحبة
خلي قليبي دوبا في ريلا منالو الغبة
ماحن يوم لا التفاتة بيجنبة

[سجمان]

يا طير إن مشيت شيل السلام فسراع
لي القسم المنام شردني بالأصقاع
قول ليهو العلي كاللعجب الزراع
وفي اللاخر يهيج ما منو أي نفاع

[سجمان]

مشتول الخواجة الباني فيني ركايزو
"طندب" لماو رحق البنوني لذايذو
الشغل القلب توّر عليهو غرايزو
جمالاً في الأصل ختموهو من ناس أيزو

[عبدالله علي موسى]

المشاركة الأصلية كتبت بواسطة سجمان

مشتول الخواجة الباني فيني ركايزو
"طندب" لماو رحق البنوني لذايذو
الشغل القلب توّر عليهو غرايزو
جمالاً في الأصل ختموهو من ناس أيزو

بديع الزمان سجمان تحياتي و إليك هذه المحاوله الركيكة:

جمال في خواجة شبيهة جزر مغسول
جمالاً راكز يقلب علة المعلول
السبب الخلاني ساهر و جسمي زي مسلول
شقار في صفار مسخ دهب شنقول

[علاءالدين عبدالله الاحمر]

سجمان ياكا غايب سمح السؤال عن حالو
أن عاود بحنين طمبر غلب غنايو
وسورب بلاد النم حلو حشة الوحيح شاشيو
وأن عاود غيابو البركة في شبالو

[علاءالدين عبدالله الاحمر]

في بردي العلي مابدفي القعدت في صقتة
ولاني النجيت من هجمة يومتة
ولاني الدفيت وقت هبيت اتعرقته
لكني الهويت لي ليلي ‏‎ ‎جيت وعشقته

[علاءالدين عبدالله الاحمر]

المشاركة الأصلية كتبت بواسطة عبدالله علي موسى

بديع الزمان سجمان تحياتي و إليك هذه المحاوله الركيكة:

جمال في خواجة شبيهة جزر مغسول
جمالاً راكز يقلب علة المعلول
السبب الخلاني ساهر و جسمي زي مسلول
شقار في صفار مسخ دهب شنقول

خلو سجمان أن ذاد فوق تبرو
وناضم في وحيحا ماني بخبرو
لابان لغربة لا ذم حبيب في هجرو
ده الخلاني طاش بين ذخات سدرو
لا غي لا كبر باقيلي العوازل كترو
غزلو الما انشبه لا بان اسف في ضهرو

[حافظ حسن مختار]

قيس والبي ليلى نفسو كانت هايمة
جميعن وراي يا صحابي فوق القايمة
الخلاني مساهر وباقي الخلايق نايمة
زولاً في السماح قيامة وقايمة

[سجمان]

المشاركة الأصلية كتبت بواسطة عبدالله علي موسى

بديع الزمان سجمان تحياتي و إليك هذه المحاوله الركيكة:
جمال في خواجة شبيهة جزر مغسول
جمالاً راكز يقلب علة المعلول
السبب الخلاني ساهر و جسمي زي مسلول
شقار في صفار مسخ دهب شنقول

هلا بي زورق النضم المنضوم ومبحر ديمة
نشوانين بـ جيتك ضابحين عملنا وليمة
صولاتك في الحوار دايماً عليها صميمة
وكان رديت "نُقَط" جزم تكون ذات قيمة

والله شرفتنا بي زيارتك وآسفين للتأخير
ما داير نخش في برنامج مشغولين وهكذا دلاليك
فمتى ما الله هون بنجي نجرو..

التحايات الذاكيات..

[سجمان]

المشاركة الأصلية كتبت بواسطة علاءالدين عبدالله الاحمر

خلو سجمان أن ذاد فوق تبرو
وناضم في وحيحا ماني بخبرو
لابان لغربة لا ذم حبيب في هجرو
ده الخلاني طاش بين ذخات سدرو
لا غي لا كبر باقيلي العوازل كترو
غزلو الما انشبه لا بان اسف في ضهرو

سجمان العليهو ياخوي أسكت خلو
ممكون من جدي درفون سغير فاتنلو
يصبح من صباح جيش الغرام حاتلو
وكل ما يقول همد بالليل بجي يناتلو

[سجمان]

المشاركة الأصلية كتبت بواسطة حافظ حسن مختار

قيس والبي ليلى نفسو كانت هايمة
جميعن وراي يا صحابي فوق القايمة
الخلاني مساهر وباقي الخلايق نايمة
زولاً في السماح قيامة وقايمة

وييين "الأخيلية" للبي وماحق راحتي
ويييييين عزة و "كثير" للريدو زايدة مناحتي
كان اليمين مطلوق برق الأمل فوق راحتي
أفارقو مع الدغش حتى ان فقدتي نزاهتي

[سجمان]

مو إهمال جزم .. ولو طناش البتة
وامر اللايحة جت هامينا فيهو البتّ
مطلوب النقاش اللايحة ميهة "روشتة"
وان نزل المطر جامعانا فد "كارتّا"

إن درنا الكتابة اللايحة تبقى ضميرنا
ليه بندور حَكَم ما دام عدلنا مسيرنا
اللايحة البقت يا خلا في تقديرنا
عود نبلة ووقع "شتّير" وهجج طيرنا

[سجمان]

يا طير ان مشيت قول للحبيب في بيتو
ضايرني الهميل من شوقي حد وكّيتو
قول ليهو العُمر متل الهبوب حتّيتو
"سَمْبَرْت" الجديد والماضي جت دكيتو

[عبدالله علي موسى]

المشاركة الأصلية كتبت بواسطة سجمان

هلا بي زورق النضم المنضوم ومبحر ديمة
نشوانين بـ جيتك ضابحين عملنا وليمة
صولاتك في الحوار دايماً عليها صميمة
وكان رديت "نُقَط" جزم تكون ذات قيمة

والله شرفتنا بي زيارتك وآسفين للتأخير
ما داير نخش في برنامج مشغولين وهكذا دلاليك
فمتى ما الله هون بنجي نجرو..

التحايات الذاكيات..

سجمان عشا البايتات حرم إن ما خايفين النرجسية كان كلامك السمح دة ختيتو توقيع.


سجمان الأنيق السلام ليك واصل
أهلاً حباب فارس الحروف الباسل
مفطوم بالقصيد, كلامي تحصيل حاصل
و في نظم النميم ندر اللي حدودك واصل


نحن ياخي النتشرف بي راكوبتك و طلتك الأنيقة دي، أبقى عوافي.

[عبدالله علي موسى]

المشاركة الأصلية كتبت بواسطة سجمان

مو إهمال جزم .. ولو طناش البتة
وامر اللايحة جت هامينا فيهو البتّ
مطلوب النقاش اللايحة ميهة "روشتة"
وان نزل المطر جامعانا فد "كارتّا"

إن درنا الكتابة اللايحة تبقى ضميرنا
ليه بندور حَكَم ما دام عدلنا مسيرنا
اللايحة البقت يا خلا في تقديرنا
عود نبلة ووقع "شتّير" وهجج طيرنا

لايحة دون شورة لا بتنجح و لا بتسود
و كل ما صنع إنسان..قصير محدود
إن باظت النفوس حمير تبول في اسود
و إن طابت النفوس الطير يبيض في العود