ناجى القدسي ... محمد أحمد سوركتى ... أيوب فارس (بحث عن فترة فنية غائبة)

[طارق الحسن محمد]

طبعا يا عمو
لقيت لى معلومتين صغار لكن الاولى غير متوقعة
والتانية مفاجاة
طبعا فيما يخص ايوب فارس
لكن يسمك
بيهن
الا نشوف اخرك شنو

مودتى

[رأفت ميلاد]

المشاركة الأصلية كتبت بواسطة طارق الحسن محمد

طبعا يا عمو
لقيت لى معلومتين صغار لكن الاولى غير متوقعة
والتانية مفاجاة
طبعا فيما يخص ايوب فارس
لكن يسمك
بيهن
الا نشوف اخرك شنو

مودتى

لا لا لا أتوسل اليك
إنت المكرفون باظ تانى ولا شنو ؟

مستنيك والله

[طارق الحسن محمد]

المشاركة الأصلية كتبت بواسطة رأفت ميلاد

لا لا لا أتوسل اليك
إنت المكرفون باظ تانى ولا شنو ؟

مستنيك والله

يا حبيب
انعل ابو خوة الجريوت بتاعتكم دى

لكن ما مشكلة
بجيك بيهم بمهلة
بالنسبة للمكرفون لعنته تركتنى
ولكن للاسف الشديد
نقلت من السكن لسكن اخر
وما عندى dsl
فى السكن الجديد
وما زلت انتظر
مودتى يا جميل

[رأفت ميلاد]

مرحب بعد غيبة
وكل عام وأنتم طيبين و تامين

التحية للأخ طارق الحسن محمد الذى لم يوف بوعده
كل سنه وأنت طيب والله يعرس ليك


التحايا من البعد للأخ الذى أفتقده من زمن "بندر شاه" ملهم البوست
وتحيات وشوق للأخوات .. حنينة .. وسارة

وتحية صادقة للحبيب أسعد البرير

وهذا ما أهاجه فى قلبى هذا البوست

-------

سأواصل وأنا أرمى " بياضى" فى هذا اليم العميق "الإنترنت" لتوثيق ذكريات مرت بنا خاطرة توسعت بالمعرفة وجهد الأصدقاء ..

وصلتنى أخيرآ مجموعة من أغنيات الراحل أيوب فارس .. وخاطرة من أخى اللندى بما يخص أخبار الموسيقار ناجى القدسى الحزينة ..

سأواصل ..

[فتحي مسعد حنفي]

بوستك جميل زي بسمتك يا رأفت ي جميل0
دي غشوة ساكت والدخول الرسمي بعد العودة باذن الله لان الموضوع عايز تفرغ0فالمرحوم أيوب فارس صديق شخصي وياما كانت لينا سهرات في رملة بحري المقابلة جزيرة توتي0 وسوركتي درسني في العزبة الاولية0أـما ناجي القدسي فود حلتي وشبه كان ساكن في بيتنا لصداقته الحميمة مع خالي محمود الهندي0
ايوب كانت له اغنية واحدة وهي يادرتي الغالية البيكي طال سهري وزي سواد حظي انا جار علي دهري0
أرجاني لما أرجع وحأحاول أجيب تسجيلات لأيوب

[رأفت ميلاد]

أخونا فتحى

بصراحة منذ حضورك هنا وأنا أفكر فى رفع البوست .. بإعتقاد واثق بأنه "يجب" أن يكون لديك الكثير ..
أبشرّك .. وصلتنى أكثر من خمسة عشرة أغنية بصوت الراحل أيوب فارس .. وسأنزل هنا بعضها إثراء للبوست وتجميله .. وباقى الأغنيات سأنزلها لنكات للحفظ لك وللجميع ليعود أيوب فارس لوضعه الطبيعى فى القلوب .. وحب الناس والغناء الذى لم يبخل بهما فى حياته الزاهدة القصيرة

مودتى

[فتحي مسعد حنفي]

المشاركة الأصلية كتبت بواسطة رأفت ميلاد

أخونا فتحى

بصراحة منذ حضورك هنا وأنا أفكر فى رفع البوست .. بإعتقاد واثق بأنه "يجب" أن يكون لديك الكثير ..
أبشرّك .. وصلتنى أكثر من خمسة عشرة أغنية بصوت الراحل أيوب فارس .. وسأنزل هنا بعضها إثراء للبوست وتجميله .. وباقى الأغنيات سأنزلها لنكات للحفظ لك وللجميع ليعود أيوب فارس لوضعه الطبيعى فى القلوب .. وحب الناس والغناء الذى لم يبخل بهما فى حياته الزاهدة القصيرة

مودتى

كتر خيرك وانا فعلا كنت متابع البوست بتاعك في سودانيز اون لاين وللاسف ما كان عندي طريقة زي ما انت عارف والاخ صلاح شكوكو ما قصر لانو فعلا باحث جيد
من الحاجات الما عارفنها ناس كتار انو أيوب كان بيلعب في فريق الاتحاد سلاطين سابقا وكان صاحب لمسات سحرية ولكن بنيانه الجسماني لم يكن يساعده كثيرا زد علي ذلك السهر المتواصل ولكنه كان بالتاكيد انسان مميز في كل شئ وموته كان خسارة كبيرة رحمه الله وهو بالمناسبة ابن عمة سلامون سليمان بخيت وأنيس وفريد وألولا والعجيب انه رغم صداقتي اللصيقة به لم أعرف أو أسأل ان كان مسلما أو مسيحيا فكل عائلته كانت مسيحية ولكنه كان سودانيا بحراويا لا يعطيك الفرصة كي تتسائل عن مثل هذه الأسئلة التي يعتبرها البعض مهمة حتي ولو علي سبيل المعرفة بالشئ0
في انتظار الدررالموعودة

[رأفت ميلاد]

العزيز فتحى
بصراحة مداخلتك بها مفاجاءات لن نمر بها هكذا ..
ولكن ..
قبل الإسترسال أضيف خاطرة أخونا الليندي عن ناجى القدسى
ونعود

العزيز رأفت ميلاد

كم كان السودان جميلاً كان ملتقى كل المبدعين حتى 89 ( احمد ربشة - ناجي القدسي وغيرهم ) وما بعد 89 رحل الكثيرين اذكر منهم استاذ محمد صالح من اصول يمنية كان استاذاً بمدرسة المايقوما ( بالديوم الشرقية ) وصديقاً وجاراً للراحل مصطفى سيد احمد وكما ذكرت في حديثك فقد لحن ناجي القدسي أغنية ( مهما هم تأخروا ) للاستاذ مصطفى سيد احمد واغنية اخرى كلمات الصحفي حسن ساتي ( تراتيل ) والذى يقول مطلعها ( ليه بتسأل عن عيونك ديمة بتأمل عيونك ) وغناها مصطفى بعد أن اتى بها ناجي ملحنه ولكن بعد أن عرف مصطفى أنها من كلمات الصحفى حسن ساتي رفض أن يغنيها باعتبار أن حسن ساتي كان مايوياً خالصاً وكما ذكرت بالفعل كان ناجي معجباً بصوت مصطفى سيد احمد وكان همزة الوصل هو استاذ محمد صالح وأذكر أن ناجي تحدث مع استاذ محمد صالح بأن لايقف مصطفى جامداً في المسرح وأنو من المفترض أن يهتز ويتحرك مع الغناء وعندما تحدث محمد مع مصطفى كان رده ( قريبك ده دايرني ابقى ليهو قرد ) وبعد ذلك لم يتم اي تعاون بين ناجي ومصطفى .
الصدفة وحدها قادتني للقاء ناجي القدسي في عام 96 او 97 وقتها كنت طالباً بجامعة امدرمان الاهلية وكالعادة كانت الجامعة مغلقة بسبب الاحداث السياسية وكانت جامعة السودان هي ملاذي اذهب مع صديقي وأبن عمتي الفنان ( عاطف انيس ) ونجلس في قاعة الفنون ويبدأ عاطف بالغناء وكان عازف الاورغن ( عمر قصاص ) طالباً في كلية الفنون وعاطف طالباً بكلية الدراسات التجارية جمع بينهم الفن اذكر أن الاخ عمر قصاص طلب من عاطف الذهاب معه الى منزله بالصحافة وهناك التقينا بناجي القدسي ومعة أبن الشاعر محمد الفيتوري والممثلة اسيا محمد ( سكرتير فرقة آل البيت ) وعندما غنى عاطف ( مهما هم تأخروا ) بكى ناجي القدسي وانتحب كثيراً فتحدث أبن الفيتوري بأن ناجي القدسي عاد ليكون ملحناً لفرقة آل البيت وأنه لن يلحن غير المدائح وطلب من عاطف أن ينضم لفرقة آل البيت ولم يتحدث ناجي القدسي وظل صامتاً فخرجنا وخرج ناجي القدسي مع ابن الفيتوري في عربة جيب مكتوب عليها آل البيت ومن حينها عرفت أن مبدعاً اخر قد ضاع لعدم وجود الرعاية ولضيق اليد فقد كانت حالته يرثى لها ولم يجد من يحتوية غير أبن الفيتوري الذى ليس له علاقة بالابداع فكان من الطبيعي أن يعود الى صنعاء غريباً فيها وبعيداً عن الابداع
الذى تفتق في السودان

عزيزي رأفت آسف للمداخلة الكلها حكي دي لكن لم نعاصر هؤلاء المبدعين فقط سمعنا الحانهم وكلماتهم لذا يتملكنا الفرح عندما نجد بوست يتحدث عنهم فشكراً لك كثيراً وانت تنبش لنا الجميل ومزيداً من التوثيق وايضاً شكراً لود حلتنا جمال دفار التوثيقى المميز ولكل من اثراء هذ البوست

الليندي

[رأفت ميلاد]

مرة أخرى فبل ما أرجع ليك يا فتحى ... برواااااقة ..

أرجع لأيوب فارس .. فاتحة شهية

------

وصلتنى رسالة داخلية من الأخ هيثم لبيب

أخونا رأفت ...



سلام ياغالي ،،،



معاك هيثم لبيب من أولاد بحري ... مزاد بحري .. ومن معجبين أيوب فارس وقريت البوست حقك وأول حاجة عملتها لمن نزلت السودان لميت كل التجيلات البقدر عليها وهديته ليك في اللنك التحت ده :::



(اللنك ما بظهر معانا هنا)



أتمنى أني أكون وفقت في أني ألقى ليك العاوزو ... وبالمناسبة معظمها لو ماكلها مهدآة ليك فالله يعينك تسمعه واحدة واحدة ...



أخوك ....



هيثم لبيب ( أبومحمد )

الشكر كله للأخ هيثم .. والإرث يجب أن يكون للجميع

إخترت أولآ هذه الأغنية لسببين :
أولآ التعرف على صوته بهدوء .. فى الجلسات الخاصة
ثانيآ التعرف على إيقاع "الكبريتة"

كثيرآ سمعنا عن الغناء "بالكبريتة" الإيقاع الوحيد المصاحب للأغنية .. وهذا يتطلب أن يكون صوت الفنان مسيقى جدآ

وكما ورد من قبل .. كان أيوب فارس عاشقآ للغناء لا يمتهنه ولا يضن به ..

بي الشوق تضيع عمري
[media]http://aafat.org/upload/uploading/faris.mp3[/media]

[رأفت ميلاد]

يا فتحى مسعد حنفى
صباح الخير
جاييك بعد ليلة ليلاء .. فيها إسعاف .. وبوليس .. ونوم قليل
"تعرف الخواجات ديل زينا ..الكرسماس عندهم سكر وما بقدروا عليه .. زى الضحية شربوت ودكاى .. ورمضان .. خم رماد .. "

نبدا واحده .. واحده .. وما زال الليل طفلآ .. إذا أمهلتنا الدنيا ..
قلت:

المشاركة الأصلية كتبت بواسطة فتحي مسعد حنفي

أيوب فارس صديق شخصي وياما كانت لينا سهرات في رملة بحري المقابلة جزيرة توتي0 وسوركتي درسني في العزبة الاولية0أـما ناجي القدسي فود حلتي وشبه كان ساكن في بيتنا لصداقته الحميمة مع خالي محمود الهندي0

نبدأ بأيوب فارس ..

المشاركة الأصلية كتبت بواسطة فتحي مسعد حنفي

فالمرحوم أيوب فارس صديق شخصي وياما كانت لينا سهرات في رملة بحري المقابلة جزيرة توتي0

أصبت بالذهول من المعلومات .. "الأولية"
أولآ :

المشاركة الأصلية كتبت بواسطة فتحي مسعد حنفي

ايوب كانت له اغنية واحدة وهي يادرتي الغالية البيكي طال سهري وزي سواد حظي انا جار علي دهري0
أرجاني لما أرجع وحأحاول أجيب تسجيلات لأيوب

هل هى أغنية خاصة به ؟؟ .. معرفتى إنه يغنى للآخرين ولكن بإنتقاء للأغانى وليس للفنانين .. فهو عاشق للمعنى أولآ .. تم اللحن .. يعنى مغرم بالأحسايس .. وعمق الكلمة ..

المعلومة الثانية:

المشاركة الأصلية كتبت بواسطة فتحي مسعد حنفي

من الحاجات الما عارفنها ناس كتار انو أيوب كان بيلعب في فريق الاتحاد سلاطين سابقا وكان صاحب لمسات سحرية ولكن بنيانه الجسماني لم يكن يساعده كثيرا زد علي ذلك السهر المتواصل 0
في انتظار الدررالموعودة

لاعب كورة ؟ .. أول مرة أسمع بيها .. هو كان عليل .. السهر .. والزهد فى الحياة .. حياة "هيبية" لحظوية ..
وبعدين ما تنسانا من الضمن بقليل من الإسهاب عن فريق الإتحاد .. وأنا من الذين لا يمتلكون المعلومة

المشاركة الأصلية كتبت بواسطة فتحي مسعد حنفي

فريق الاتحاد سلاطين سابقا

المعلومة الأخيرة

المشاركة الأصلية كتبت بواسطة فتحي مسعد حنفي

وهو بالمناسبة ابن عمة سلامون سليمان بخيت وأنيس وفريد وألولا والعجيب انه رغم صداقتي اللصيقة به لم أعرف أو أسأل ان كان مسلما أو مسيحيا فكل عائلته كانت مسيحية

دى معلومة مذهلة .. أعرف إنه شقيق سليمان فارس "السد العالى" ولم يتردد يوم على مسمعى أن لهم علاقة بالمسيحية .. لا إعتناقآ .. ولا تداخل عوائل .. مثل آل شاشاتى .. وعبجى .. ودولتلى .. ونحن أيضآ .
ولكن كما قلت أنت

المشاركة الأصلية كتبت بواسطة فتحي مسعد حنفي

ولكنه كان سودانيا بحراويا لا يعطيك الفرصة كي تتسائل عن مثل هذه الأسئلة التي يعتبرها البعض مهمة حتي ولو علي سبيل المعرفة بالشئ0

بالفعل هذه الأشياء لم تكن تلعب فى حياتنا معنى .. أتذكر عندما كنا نلعب فى نجمة المسالة .. ضد حى العمدة أو أبروف وغيرهما .. كان لدينا لا عبين "محمد زكريا" و "فكرى زكريا" كان الأغراب يعتقدون إنهما أشقاء .. ولا يفكر أحد إنهما مختلفان فى العقيدة ..

قبل يومين كنت أتسامر مع صديقى عمر سعد فى "دولة قطر" وإندهشت وهو يحكى لى بأريحية بأنه عندما لعب فريق المودة فى مكة .. زملاء عبد النور تداركوه أن يملأ إستمار الوصول "مسلم" وإلا يُثتثنى من الفريق ويُمنع الذهاب الى مكة !!!
ما أدهشنى إنها كانت أول مرة أعرف عبد النور "مسيحى" ..

بوظوها لينا الجماعة المهاجرين من الأقاليم .. والجبهجية المعفنيين ..


ما طلعنا من موضوعنا .. ومستنيك برواقة " بس ما زى رواقة مراد فى بوست صادق بدرى "

محبتى

آخد لى نومة وأرجع ليك

[فتحي مسعد حنفي]

ايوة يا رأفت أغنية أيوب درتي الغالية هي الأغنية الوحيدة الخاصة بيهو وفيها يقول:
يا درتي الغالية البيكي طال سهري زي سواد حظي أنا جار علي دهري
أصلو ديل أهلك الخالفوا السنة وبدلوا الريدة بالدرهم اب رنة
يادرة لو تدري أنا قلبي كلو حنين وبحمل الريدة من سنين وسنين
يادرة لو تدري أنا قلبي بين نارين الأولي نار حبك والتانية نار البين
أما حكاية الكورة فدي حقيقة مؤكدة وكان بيلعب في الاتحاد هو وصديق عمرو الأوحد هادي ميرغني أخو ظريف بحري عكاشة ميرغني الكان في شهرة ود نفاش0وأيوب زامل حارس المرمي عبد الحميد محمد صالح شقيق ابو زيد محمد صالح وحربي مصطفي ومحجوب الفيل وفتحي مصطفي وكمان لعب في فريق الكفاح وكنا بنمشي دار الرياضة بحري عشان نتفرج عليهو ونشوف لمساتو الساحرة لأنو كان بيلعب بي (مزاج عالي)
أما حكاية المسيحية فانت عارف انو سليمان بخيت راجل مسيحي من أصل حبشي وابنو سلامون وكنا بنسميهو سمير في كمبوني وناس الأحفاد فيما بعد سموهو قسيس وبالمناسبة شوقي بدري بيعرفو كويس0
سمير أو قسيس دا ود عمة أيوب وسليمان رحمهما الله0
آخر مرة شفت فيها سليمان كانت قبل وفاته بأيام قليلة عندما زرته أنا والمرحوم حسن عطية لاعب الهلال وكان قد جاء الي القاهرة للعلاج وأذكر انه قد كان متخوفا من اجراء عملية في القلب أولا لتكاليفها العالية ثانيا لاحساسه بأنه لن يخرج منها حيا وقد قمنا باقناعه بالاتصال بصالح سليم صديقه وزميله في الأهلي لأن سليمان كان صرحا عاليا في نادي الأهلي عندما كان يلعب له ويعيش في السعودية وكان الملك فيصل الذي كان وقتها الأمير فيصل يرسله للعب المباريات في القاهرة بطائرة خاصة تعود به بعد المباراة الي السعودية0
بالفعل اتصل بالمرحوم صالح سليم الذي قال له انت يا سليمان ليك حقوق علي النادي الأهلي ووافق علي تحمل تكاليف العملية علي نفقته الخاصة0فدخل سليمان العملية وخرج منها جثة هامدة فكان احساسه حقيقي بانه لن يخرج حيا من العملية رحمه الله0
نعود الي أيوب الذي كان بالفعل لا يغني الا بالكبريتة وفي الحفلات بالرق واتنين شيالين من اصدقاءه وقد كان متأثرا بخضر بشير مثله مثل معظم شباب بحري في ذاك الوقت وحتي أغنيات الحقيبة التي كان يغنيها كان يرددها باسلوب خضر بشير ومن لم يسمع أيوب يغني دمعة الشوق وما هو عارف قدمو المفارق كمن لم يسمع تلك الأغاني مطلقا ولو امتد به العمر لكان مثل ظاهرة كابلي وزيدان اللذان اشتهرا قبل ان يغنيا بالاذاعة فنحن مثلا كنا نسمع كابلي وهو يغني أمير قبل أن يسمع باقي السودان بعبد الكريم الكابلي لأن كابلي برضو من أبناء بحري وحلة الضناقلة شمال هو وعبد العزيز محمد داود وكان كابلي أيضا يلعب معنا كورة وعبد العزيز يكتفي بالفرجة واطلاق التعليقات التي كانت عبارة عن نكت وليدة اللحظة0
يا رأفت دا شنو العملتو دا خليت الواحد رجع لي حاجات اندثرت في الذاكرة لدرجة انها رجعت زي المسجون الاتفتح ليهو باب السجن وقام يكابس عشان يطلع قبل ما يغيروا رأيهم وحتي الزكريات متداخلة مع بعضها لدرجة انو من الصعب تركز علي شخصية معينة والا تنط ليك شخصية تانية تفرض نفسها عليك عشان تاخد حقها00الله يسامحك ويسامح مجدي اخوي الليهو سنين بيترجاني أطلع الجواي وأنا رافض أسمع الكلام وأبتدي أحكي لدرجة انو مجدي قال لي في يوم انا بيتخيل لي انت بتعرف السودان كلو شخصيا0

[رأفت ميلاد]

لا حولاااا
الليلة باقى لى ما راح أنوم فى يومى "المهبب" وراجيانى وردية ليل تبدأ الساعة خمسة ..
ياخوى واصل .. ما تقيف ..

ولسة راجيك .. ناجى القدسى .. وسوركتى ..

ياخوى الحق بقى ما حقك .. كلامك ده ماشى "أسوط" بيه النت كله .. وفى بوست توثيقى عند يحيى قبانى يفضل وثيقة للأجيال ..

لما تقلب الصفحة أخت ليك "خدعوك" لخدر بشير يصوت أيوب فارس

واصل ..

[فتحي مسعد حنفي]

يا رأفت شكيتك علي الله خدعوك أنا أبيت أجيب سيرتها عشان بتضرب جواي جرح اندمل من زمان لكن انت أكيد في زول محرشك علي0
مادام البوست دا للأجيال يبقي أحسن بي رواقة خليني أسافر وأرجع وكلها عشرة أيام الحأغيبها في السودان وبالمرة أقدر أرجع الذكريات لأن الزهايمر شغال تش معاي0أيوب بيتهم في حلة الضناقلة فاتح علي بيت خالي وشمالنا بيت الزين قديم حارس مرمي التحرير السابق وفي صف بيت فارس بيجي بيت دولي وبدوي وعثمان الحاج0
لكن تعال انت بحري دي ما منها شنو سر الاهتمام دااغشي ليك عكاشة ميرغني ومن نوادرو انو كان عندو صاحب اسمو عمر الحلبي ودا كان في بداية الستينات عندو حكاية مشهورة وهي انو ختف واحدة حبشية معنكشة دهب وطلع ليها مسدس لعب وشال دهبها ولما المرا وصفتو للبوليس عرفوه طوالي وقبضوا عليهو ويوم المحكمة جابو عكاشة شاهد لانو صاحبو وما بتفارقو فالقاضي بيسألو اسمك شنو؟رد عليهو:عكاشة ميرغني المأمون وأحمد حسن جمعة0
طبعا القاضي اتنرفز وقال ليهو انت يازول جايي تهزر في المحكمة قام عكاشة قال ليهو لا ما بهزر سعادتك دا اسمي ولو ما مصدقني أثبت انو ما اسمي فالقاضي فوتها ليهو وقال ليهو طيب ياعكاشة احنا عارفين انك صاحب عمر المشهور بكاوبوي بحري (لان الجرايد كانت سمتو كاوبوي بحري بعد الحادثة )طيب يوم الحادثة انت ليه ما كنت معاهو.عكاشة رد عليهو وقال لاني سعادتك يوم الحادثة حصاني كان في البيطري ومسدساتي في التصليح. القاضي اداهو شهر سجن.

[رأفت ميلاد]

المشاركة الأصلية كتبت بواسطة فتحي مسعد حنفي

يا رأفت شكيتك علي الله خدعوك أنا أبيت أجيب سيرتها عشان بتضرب جواي جرح اندمل من زمان لكن انت أكيد في زول محرشك علي0

إنت آلاء مشت تشرب موية ولا شنو ماخد راحتك

المشاركة الأصلية كتبت بواسطة فتحي مسعد حنفي

لكن تعال انت بحري دي ما منها شنو سر الاهتمام دا.

يمكن عشان كدا ..
رغم إرتباطى ببحرى كتير .. أصدقاء فى الشعبية والمزاد وغيرا .. وسليمان أخوى رحمه الله سكن الدناقلة ردح من الزمان قريب من بيت أبو داؤود رحمه الله .. وأختى فى عدة أماكن آخرها الصافية .. والعمل كان فى المنطقة الصناعية "شركات الخليج" وعمارة إبرهيم طلب والمؤسسة زمن ناس سلوى بوتيك "ده زمن شغل المراجعة" .. دا غير سعد قشرة وزنك الخضار والفسيخ من أقباط بحرى .. وكنيسة بحرى .. غير جنينة البلدية وسلاح النقل .. بنمشى أدرمان بى بحرى ..
رغم ده كله بدخل غريب و أطلع غريب .. ولا أعرف شيئ عن بحرى .. يمكن دا الشادينى ليها

كتر لينا من قصص الأفراد .. طبعآ عكاشة سمعنا بيه زى ود نفاش كدة لكن ما شفناه .

تمشى وتجى بالسلامة
والبيت بقى بيتك .. ونحن ضيوفك

تحياتى للعائلة

[فتحي مسعد حنفي]

تمشى وتجى بالسلامة
والبيت بقى بيتك .. ونحن ضيوفك

تحياتى للعائلة


دايما تكتل قلبي بي أدب الأقباط المافي ليهو مثيل ودي حقيقة ما كشكرة.
======الليلة باقى لى ما راح أنوم فى يومى "المهبب" وراجيانى وردية ليل تبدأ الساعة خمسة ..
ياخوى واصل .. ما تقيف
==========
هنا لينا وقفة0 تعرف يا رأفت زي ما في عربي جوبا برضو في عربي أقباط زي( ما راح أنوم )دي لو تتكلم سوداني سنة متواصلة برضو بتقع0

الله يرفعك من الوقعة يا أمير وأوعي مخك يروح لي بعيددي سنون فيصل سعد.
أما أنا فساكن بين اليافطتين بين كنيسة ماري جرجس والجنينة البلدية .شفت الهنا دا