ساعة الحساب وقتها وجب الليله مابفيد الندم

[مجدي مسعد حنفي]

الجهاد ياعازه غايه
ـــــــــــــــــــــــــــــ
اشتعال الثوره بي عزم الرجال
ماخيال وماهو في حكم المحال
...............
خلف السكون بركان غضب
مستني يدفّق حمم
ساعة الحساب وقتها وجب
الليله مابفيد الندم
لا سبتو بترول لا دهب
للشعب خليتو العدم
تاريخكم اليوم انكتب
بحروف مدادها من السجم
...............
قلتوا أخوان في البدايه
وقلتوا إسلام في النهايه
انحنا صدقنا الحكايه
والسبب حسن النوايا
بس دحين الحاره جايه
والجهاد ياعازه غايه
لا مذلّه ولا شكايه
والحصل يازول كفايه
...............
كم صبرنا والصبر عدّى الحدود
وكل اول ليهو آخر ياشهيد
مهما غطّت عتمة الليل الوجود
الصباح لا بد بيشرق من جديد
بدمانا عنّك ياوطن حالفين نزود
وكل خاين ليهو وصمه وليهو قيد
الفرح ايامو باكر ليك تعود
والحزن من دارنا يرحل ويبقى عيد

مجدي مسـعد حنــفي

[فيصل سعد]

الاخ / مجدي مسعد حنفي
جميلة و صادقة قصيدتك الوطنية.
كل عام و انتم بخير.

[مجدي مسعد حنفي]

العزيز فيصل سعد
وانت بالصحه والسلامه
وان شاءالله عام جديد كلو خير على الجميع .
شكراً اخي على مرورك الجميل