ناجى القدسي ... محمد أحمد سوركتى ... أيوب فارس (بحث عن فترة فنية غائبة)
الله يسامحك يافتحي يعني لازم تزنقني الزنقه دي ماانت عارف مخّي الفيهو مكفيهو وعشان يسترجع الذكريات ديك داير ليهو دفره عشان يشتغل غايتو ربنا يسهل ومايخذلني .
ياجماعه انا مااعتقد ان في زول عاش في بحري وماسمع بي ايوب فارس لان الراجل دا بغض النظر عن انه كان فنان من الصعب انو يتكرر تاني لكن كان انسان بمعنى الكلمه ومجامل لابعد الحدود وفوق مايتصور الانسان لدرجة اني بيتخيل لي انو بيعرف ناس بحري كلهم .
بالنسبه لي انا قبل مااعرفو شخصياً سمعتا ليهو عدّة شرايط وحضرتا ليهو عدّة حفلات ومعرفتي بيهو بدت زي ماقال فتحي بعد مباراه بين الكفاح وفريق من امدرمان .
بعد المباراه الجماعه وكالعاده دوروا الشكله بره الاستاد والوقت داك ايوب كان المدير الفني لفريق الكفاح وشفته بيحجز في الجماعه لغاية ماانتهت الشكله وكان معاي وقتها اعز اصدقائي واسمو صديق الشيخ ( اب تكّه) بكسر التاء فمشينا عليهو وعرفنا على بعض وطوالي سألني انت اخو فتحي مسعد وبالمناسبه الحكايه دي بتحصل معاي كتير بسبب الشبه الشديد بيناتنا لدرجة انو لما كان معانا هنا في الامارات كان بيسوق بي رخصة سواقتي قبل مايطلع رخصه من غير مازول يشك انها مارخصته المهم بعد التعارف اتفقنا نتقابل بالليل في حديقة عبود ودي كانت اول مرّه اسمع ايوب فارس في قعده وطبعاً الغنا كان بالكبريته ومااروع سماع ايوب بيغنّي بالكبريته .
طبعاً واحنا قاعدين الجماعه حولينا كل شويه يجوا يبشروا في ايوب لانو زي ماقلت ليكم بحري كلها بتعرفو
بالمناسبه من اكتر الفنانين الغناهم قريب من اسلوب ايوب فارس الفنان الجميل محمد احمد عوض وايوب ليهو طريقه واسلوب متفرد في الآداء يعني لو سمعتو بيغني ياجميل يااسمر او ليالي الخير جادن او اذكري ايام صفانا او البتوحي للناس العيون او ذبت وجدا في هواك او من يوم حبّي فارقني والكثير لو سمعهم من ايوب ما حيقدر يسمعهم من اي زول تاني ودا دليل على عبقرية الراجل دا الله يرحمو لانو ماكان بيغني الاغنيه زي مابيسمعها ولكن بيغنيها باسلوبه المتفرد والممتع وانا كنت بحفظ الغنا وبغنيهو بنفس طريقته ايام ماكنت فنان قعداتنا ايام الشباب واي واحد حيسمع شريط لايوب فارس طوالي حينتبه ويتذكر كلامي دا عن اسلوب
ايوب وطريقته في الغنا وبمناسبة الكلام دا بتذكر في السبعينات من القرن الماضي استاذنا الكبير اسماعيل عبدالمعين رحمه الله استضاف ايوب فارس في لقاء في التلفزيون واتكلم وركز في كلامو على نقطة اسلوب ايوب المتفرد في الاداء واتذكر انو غنا فيهو عدّة اغنيات اذكر منها قسيم الريد كلمات الوالد والاغنيه الشعبيه المنتشره جداً وقتها لبن ابو لي بيه .
ايوب كان من احسن المطربين البيغنوا اغاني خضر بشير لدرجة ان المرحوم الاستاذ خضر بشير ماكان بيسمح لاي فنان يغني غناهو غير ايوب فارس وبينطرب جداً لما يسمعو بيغني اغانيهو والكلام دا انا سمعتو من ايوب شخصياً .
من ذكرياتي ايضا اني طلبت منو انا وشلتي اننا نزورو في البيت ويسجل لينا شريط على مزاجنا نختار اغانيهو وطبعاً وافق بدون تردد وفعلاً مشينا واستقبلنا احسن استقبال واحنا قاعدين وايوب بيدندن لسه دخل المرحوم سليمان فارس ووقف يسمع وقال ليهو تعرف انك بتغني احسن لما تكون سكران ودي حقيقه لانه بيكون في قمة السلطنه والانسجام والتركيز وهو سكران ( حاجه غريبه مش كدا )
المهم لما جينا نشغّل التسجيل رفض وقال انو مامتعود يشرب ويغني في البيت قلنا ليهو والحل شنو رد واحد من الشيالين كان قاعد معانا وقال نمشي عندو البيت البيت قريب وفعلا مشينا وبعد ما ظبط الطاسه واتوزن تمام مسك الكبريته وبدا الغنا والنتيجه كانت شريط قمه في الروعه لدرجة صاحب الشريط الخام لما سمع التسجيل طمع وشال الشريط ورفض يرجعو لينا بقت زعله بينا استمرت لفتره طويله وبعد زمن واحد من اصحابنا قدر يقنعو يسلفو الشريط يسمعو وجابو لينا سجلنا منو نسخه بس للاسف ماكانت نضيفه زي الاصل .
قبل وفاة ايوب فارس كنت اديته اغنيه من اغنيات الوالد بيقول مطلعها
يامن بديتي اللوم** انا ليك بتمه
خبرك ويوم يطراك ** انهه واذمّه
فكري المشتت ** جاري وراك المه
ولكن كان القدر اسرع ومات ايوب فارس وماتت معه العديد من الاشياء الجميله وبقيت ذكريات مشتته في مخيلة العديد من الذين اسعدتهم الظروف والتقوا وجلسوا واستمعوا لذلك الجميل الخلوق المبدع الذي كان اكبر دليل على مكانته في قلوب الناس ومحبتهم له تلك الجموع التي خرجت وراء نعشه لتواريه الثرى في مثواه الاخير الا رحم الله ايوب فارس وغفر له بقدر ماامتعتنا واحبنا واحببناه .
التعديل الأخير تم بواسطة مجدي مسعد حنفي ; 24-12-2007 الساعة 02:30 PM.
|
