ليست بيت أحد منا .. ( سودانيات) منبر للجميع!!

[أبوبكر عباس]

المشاركة الأصلية كتبت بواسطة عبد الجليل سليمان

هذا هو البوست. فلماذا الهروب من الحوار حوله والإنصراف إلى أمور مضى عليها سنة كامله .

سودانيات ليست بيتنا .. هي منبر للجميع !!
عبد الجليل

- أنا ارسل رسائل داخلية (خلف المنبر) لـ( ناس بابكر عباس) عشان استأذن منهم وأشكى ليهم – هم منو ديل يا ناصر (ناس بابكر ديل)، هم اسياد البيت دا – هكذا تشي عباراته، وكل مداخلاته وكتاباته بإستثناء (معالجة الإقتباس) – الفائدة الوحيده – وذلك مكسب أفرحني جداً. أها يا ناصر – لي حق وما لي.

نرجع للموضوع الاساسي حسب طلبك
و نناقش بابكر عباس كنموذج لناس البيت:
- طلبي ليك بارسال رسائل داخلية عشان أرخي ليك، هو تعبير ساخر و ما ممكن يفسر بانو انا دايرك تاخد مني إذن بصفتي مالك بيت!
- ليش يا سيدي بتخاطبني بضمير الجمع؟ أنا يا سيدي في المنتدى دا بمثل نفسي و بس، و ما عندي علاقة بالإدارة و علاقاتي خارج المنبر محدودة جدا... يعني عشان انت بتمثل كوم بتاع ناس لازم أنا يكون عندي كوم؟
- الاشارة بتاعة انو عباراتي و مداخلاتي ما فيهن فائدة، أعتقد دي ما عندها علاقة بالبوست و نحليها جانب، لكن قصة انو كل عباراتي و مداخلاتي بتشي بانو أنا مالك البيت، دا شغل بتاع كوار ساكت، ما حصل يوم واحد انو انا إستخدمت جملة "سودانيات بيتنا"

لو سحبنا كلمة بيتنا دي، أعتقد انو أي زول مفروض مداخلاتو و عباراتو تكون قوية و معبرة عن موقفو من غير مجاملة، و كونو مداخلاتي و عباراتي توصلك للشعور بسيادتي للمنتدى (و ليس بيتي)، دا شعور بتاع هزيمة منك، و نوع كلامك دا برسل لي رسالة سالبة، انو أنا ما أعترض على كتاباتك مستقبلا.

[الرشيد اسماعيل محمود]

سلام يا جليل..
أدلق ما في جوفي في الجزئية التي لم اتفق معك فيها فقط.. ولسّع متفق معاك في باقي الكلام بشكل إطاري وليس تفصيليّاً..
ولأني شايف انو جزئية الاتفاق ملحوقة.. يبقي يا سيدي انا مهتمّ بالمختلَف عليه من النقاط.. وهي ما يتعلّق بكون "خراباً حاق بالحريّات" ودة في ظني كلام مطلوق ومجحف وتعوزه الأمانة ولا يمكن الإستناد عليه بشكل مطلق.. وبعدين مفردة خراب الحريات دي كلمة انا شايفها غير دقيقة وبرضو حأجيك لرؤيتي الحأطرحها ليك فيما يختص بالموضوع إطاريّاً..

أنت يا رشيد – لو عدت قليلاً- لنفسك وثبت إليها متمهلاً ومترفقاً بها – لوجدت أنك حين (النفزاوي) – كان مسخن- في رمضان(الفائت) اتخذت موقفاً سلبيا تجاهه لم تكن مع مصادرة البوست أو ضدها، وكانت لديك مداخلات خجوله وتلطيفيه،

كلامك غير دقيق هنا يا جليل.. علي الاقل كنت تتحقق مما تقول..
لأنو رمضان الفائت، أنا كنت خارج التغطية الإسفيرية لأسباب خارج يدي.. يعني تزامن غيابي مع افتراع بوست النفزاوي الاباحي.. ولكن لاحقاً اطلعت عليه.. وشايفك وصفت مداخلاتي فيه -الناجرها من خيالك- بأنها كانت تلطيفية وخجولة.. مع اني ما كتبت فيهو ولا مداخلة من الأساس لغيابي.. فتأمّل..!!
يلزمك قليل من النزاهة يا جليل.. ولو كنت ناسي الناس.. نحن ما ناسيين..
وبهذا يصبح كلامك عن تغيّر موقفي المنبني أساساً علي رأيي الكتبتو-حسب نجرك الأخدر- في بوست النفزاوي.. يصبح بلا معني.. ولا يؤخذ به..

فمن يضع (يارشيد) الكتابة (أياً كانت) في قوالب وتصنيفات وأوصاف جاهزة فهو (سلفي) التفكير، ينظر للأشياء بعقلية استسلامية خانعة وضعيفة،

ومن يستنكرعليّ تصنيفي لكتابة ما بأنّها اباحية بدعوي ان كاتبها هو رجل دين وقاضي انكحة وفقيه سلطان تونس و..و.. من التأطيرية البائنة.. يصبح في رأيي، اتجاهو واااحد وينظر للأشياء بعقلية استسلامية ضعيفة.. وتنميط تفكيري ليس إلاّ.. شنو يعني قاضي أنكحة ورجل دين..؟..

تعرف يا رشيد – تتبدى سلفيتك – وبالمناسبة السلفية في سياقك هذا تعني نمط تفكير – وليس تديناً- فأنا لا أعرف ما إذا كنت متديناً أم لا- تتبدي هذه السلفية أكثر في محاولاتك لما يُسمى إسفيرياً بـ( فتل البوست)، فأنت وعبر انتقالك من موقف يقول (انا أتفق معك في الكثير) إلى موقف مناقض تماماً – أنت من ذكر النفزاوي – والنواح – والإباحية- و ...، فأجبرتني على ترك موضوع البوست الاساسي لأرد عليك،

شنو هو موضوع البوست الأساسي ..؟.. مش الخراب الحاق بالحريّات بسبب الإدارة البتحذف وتصادر وتدسدس..؟ زول جا قال في خراب حاق بالحريّات (كون الإدارة تستمع لآراء فئة بيتوتيّة).. وقال الإدارة صادرت ودسدست وفعلت وتركت.. انا-بحكم عضويتي- وكوني قاريء لما كتبته انت.. جيت قلت ليك أدّينا نماذج واستدلالات عشان نحكم .. يبقي كيفنو الفتل هو..؟ مش دة ياهو صلب البوست ولا الفكرة نطّيط نطّيط...؟
ولي هسّع منتظر تجيب لي النماذج لما تمّ مصادرته ودسدسته مما جعل الخراب يحيق بالحريّات علي حد تعبيرك..

[مبر محمود]

المشاركة الأصلية كتبت بواسطة عبد الجليل سليمان

صحيح أنا أذنت أن يُسحب بوست خلف المنبر ريثما يكف عن دواره المكان، ثم مكث بين ظهراني الإدارة زمناً ولم يعد البتة، لدي رسالة منك إلى (آيات) تقول فيها أن (صندوقي الخاص بالرسائل) ممتلئ، لذا عليها أن تخبرني بطلبك الشخصي أن اقبل مؤقتاً بسحب البوست المعني لأن أموراً كثيرة غير لائقة حدثت على إثره

تحيّاتي مجدداً يا عبدالجليل..
رسالتي إليك لم تتضمن أي وعود بإرجاع البوست مستقبلاً..
كاتبتك عبر آيات "راجياً" سحب البوست، وقد وافقتني مشكوراً على ذلك.. هذه كل الحكاية.

[الرشيد اسماعيل محمود]

ثمّ..
التصنيفات يا جليل ما عندي أيّ مشكلة معاها.. كوني سلفي ومنغلق و..و..
دة ما موضوع بستوقفني من الاساس.. فسمِّي يا صاحب.. فاللغة مليانة أوصاف علي قفا كل ماهر في اللغة زيّك.

لدي رسالة منك إلى (آيات) تقول فيها أن (صندوقي الخاص بالرسائل) ممتلئ، لذا عليها أن تخبرني بطلبك الشخصي أن اقبل مؤقتاً بسحب البوست المعني لأن أموراً كثيرة غير لائقة حدثت على إثره_ فقلت (مالو ولو)، ثم لم يعد بوستي غلى المنبر العام حتى اللحظة،

طيّب ما أهو انت اعترفت بموافقتك للإجراء.. وانت شنو الخلاك توافق علي السحب من الاساس..؟ تقديراً لشنو مثلاً.. ومراعاة لشنو؟ بالمناسبة:
أيّ تبرير ممكن نقبلو منّك.. بس ما تجي تقول تقديراً لفلان وعلان أو المصلحة العامّة.. لأنّك كان قلت السبب ديل.. معناها إنت قبلان ضمناً بفكرة البيت.. الإنت رفضتها ابتداءً..
لو جيت قلت والله ناس الادارة قالو لي نسحب.. انا رفضت، لكن البوست رغماً عن ذلك تمّ سحبه.. كنت حأتفق معاك في أنو الادارة صادرت البوست.. لكن اعترافك الصريح دة بيخلي كلامك متناقض مع تجريمك الأوّلاني دة:

- ثانياً : أين هو (بوست) خلف المنبر ، إذا لم تتم مصادرته.

وإنت مش قلت (ومالو ولو) تعبيراً عن موافقتك للسّحب..؟ طيّب كيف تتهم بعد دة إنّو تمّت مصادرتو..؟ أنا فهمي للمصادرة ابتداءً أنها فعل يتمّ دون موافقة الطرف المصادَر منه.. وبما انك وافقت.. يبقي انتفي فعل المصادرة بكل معانيه.. اللفظية منها والاصطلاحية.. وكونو لم يعد حتي الآن دي.. ليست قرينة لوصف الامر بالمصادرة بأثر رجعي.. لأنّك يلزمك التأكد عبر الوسائل اللائحية.. يا إدارة وين البوست القلتو حتسحبوهو مؤقتاً(ده طبعا اذا تأكّد لنا أن اتفاقك معهم كان يشترط التوقيت.. شايف مُبر نفي وجود الشّرط) وحتي لو اشترط التوقيت.. هل تمّ تحديد زمن محدّد مثلاً ..؟
تلخيصي so far :
موضوع البوست المحدّد والمكتوب من أوّل مداخلة بيقول في خراب حاق بالحريّات.. ليه.. لأنّو الإدارة بتسمع كلام ناس البيت.. جيت سألت عبد الجليل.. جيب لي نماذج عشان نحكم علي صحّة الفرضية بتاعتك.. ما قدر يجيب ولا نموذج.. قلت أقترح حسب قرايتي للأمر.. فتحت ليهو سيرة النفزاوي وخلف المنبر.. قام مسك فيهن بكل ما أوتي من بلاغة.. وفي النهاية مرقنا بالآتي:
بوست خلف المنبر ودعاوي مصادرته التي أعلنها عبد الجليل.. طلعت لا مصادرة ولا شي.. والدليل، إعترافه الصريح بأنّه كان موافقاً علي الإجراء بكامل قواه العقلية والقانونية.. وما تبقي من مرافعته هنا.. أنّ الإتفاق كان يشترط التوقيت(والذي تفضّل مُبر بنفيه).. وهذه الجزئية إقترحت لها اللائحة سبلاً قانونيّة للمضي عبرها..
بالنسبة لإزالة إسمك يا عبدالجليل من قائمة الكتّاب.. كنت ترسّل للإدارة وتسأل عن السبب.. لأنّك ما جبت لينا سيرة لأيّ إستفسار.. بل وبشكل موتور.. قمت طوّالي اعتمدت علي إنّو الإدارة شايلاها معاك ومضيّقة عليك حرية قلمك ورؤاك.. الإستفسار يا جليل عبر الوسائل الحددتها اللائحة .. وهو الطريقة المثلي.. ودة بالمناسبة بيوحي للقرّاء بأنّو الموضوع كلّو انحصر في إطار الشخصي ومجرّد احساس مغبون غير مستند-علي الأقل حتّي الآن- علي دليل قوي..

[عادل عسوم]

عبدالجليل ...
السلام عليك ورحمة الله وبركاته
لم يأت بي الاّ قولك:
اقتباس:
أنا أتكلم باسم كثيرين- ومؤثرين حاورتهم على مدى أكثر من شهر حواراً عاقلاً وعميقاً_- و كلفوني بهذه الكتابة-

طالما كانوا كذلك..
فلم الخوف على المنبر من (قلة) (غير مؤثرة) (لاتعرف الديالكتيك ولا التشرنق للتاليب والاقصاء)؟!
...
لك وللغير أن يقرأوا ماذا كتب الراحل خالد الحاج رحمه الله عن من يراهم يستميتون لاحتكار هذا المنبر!!
...
مودة تسع الناس جميعا

[أبوبكر عباس]

المشاركة الأصلية كتبت بواسطة عبدالمنعم الطيب حسن

الطيب اسم ابوي
فلا تلونها بالاحمر وتقصد بها معاني اخري

عارفة لوبابكر كتب ياعبدالمنعم انت طيب عادي معاي هذا رايه
عبد المنعم الطيب

المشاركة الأصلية كتبت بواسطة عبدالمنعم الطيب حسن

ياخ والله انت مسيكين

شايف الإعتذار فرحك! يا أخي دا كان إعتذار مشروط و بعد مراجعتي لبوستات كثيرة لورا لقيت انو عبد الجليل بتصلبط فيني ساكت، عشان كدا سحبت ثقة الذكاء و بالتالي الإعتذار ليك غير فاليد.
يا طيب
من غير تعريف و لا تلوين يا عملات السعوديين!

[الرشيد اسماعيل محمود]

المشاركة الأصلية كتبت بواسطة عبد الجليل سليمان

آمال الشيخ .. من التحايا ما أعجز عنه:
ثم أنني يا سيدتي – فيما لو عُدت قليلاً إلى متن هذا البوست قبل تحريفات الرشيد – تقرأ – تخريفات – إن إردت، .

سلام يا جليل..
مبدئيّاً خلينا نسمّيها تحريفات أو قل تخريفات لو أردت.. بس عليك الله وبما إنّك كاتب:

بالفعل هذا ما يحدث هنا، مثيرو الهرج العظيم لا يكتبون، ينتظرون من يكتب ليهرجوا ن ثم تأتي الإدارة لتصادر و (تدس) وتقصي، بناء على عبارة (سودانيات بيتنا) والبهبشنا في عقر دارنا فـ( عضلاتنا تبش)

لكن أن يخشى الناس الكتابة والحوار ويحتفون أكثر بـ( عزائم) ولقاءات اجتماعيه، وفلانه (عرسوها) وبنت (فلان) نجحت، ويفردون لذلك مساحات حُرة في المنبر العام، مقابل (دسدسة) كل الحوارات الجريئة والكتابات الخلافية الكبيرة والعميقة في داخل (البيت) حتى لا يطلع العابرون على (عوراتنا)

يبقي أنا مبدئياً حأعتبرإفتراضاً إنّو مداخلاتي-المنحرفات، وقل المخرّفات إن أردت- الفاتن ديلك.. خارج النّص.. بس بطالبك تجيب لي نماذج للكلام الفوق دة.. لأنو حسب تفسيري فهمت إنّو الإدارة ليها اليد المباشرة -كأداة إجرائية- في قمع الحريّات..حال إنّها بتسمع كلام ناس البيت (اللسّع ما عرفناهم منو).. وعشان أنا اقدركمان أحدّد موقفي باعتباري عضو بسودانيات.
عليه يلزمك إنّك تسعفنا باستدلالات واضحة.. غير نماذجي المنحرفة والمخرّفة ديك.. أسعفنا بنماذج لبوستات-وتُقرأ كتابات- تمّت مصادرتها من قبل هذه الإدارة.. وخلينا بعد داك نواصل.. وحينها أنا حأعتذر ليك عن تحريف البوست..
ودي الجزئية مثار اختلافي معاك.. جزئية من صميم البوست وجزء أصيل منّو.. نمسكها ونخلص.. ونمشي لي قدّام..
ملحوظة:
من غير نماذج لإتهاماتك دي.. بيبقي كلامك كلام ساي.. وأيّ زول ممكن ينجر زيّو.. حال إنّو الكلام ما بقروش.
تحيّاتي مُرفقة..

[رأفت ميلاد]

المشاركة الأصلية كتبت بواسطة عبد الجليل سليمان
رأفت ميلاد .. منك السلام وإليك السلام
تعرف يا سيدي .. المشكلة ليست في تلك العقليات السلفية الناصعة الواضحة، المشكلة في الملتوين من الرجال والنساء والولدان، هؤلاء الذين لا يملكون فكرة ولا خيال، يأتون صباح مساء لـ( يعرضوا) في حلبة حوار، هؤلاء (الرقياء/ الأمناء) حُراس (القيم والأخلاق) وأعداء الحريات، يشهرون دوماً أسلحتهم نحو (القلب)، وعندما يفشلون في إصابته .. لا يرضون أن يأكلوا زادهم ويتركوا لللآخرين زادهم .. زيبدو أنهم لم يسمعوا بقصة المهدي وعلى بن سليمان (وزيره) والتي وثقها ابو دلامة في هذه الأبيات ..
قد رمى المهدي ظبياً
شك بالسهم فؤاده
وعلي بن سليمان رمى كلباً فصادة
فهنيئاً لهما كل أمرء يأكل زاده
__
لا يريدون أن يدعونا نأكل (ظبي حريتنا)، ونحن لا مانع لدينا من أن يأكلوا ( كلب) قمعهم و مصادراتهم - هنيئاً لهم.

البوست طرق كل الفرعيات وتجاهل الجميع أصل الموضوع ..
ولكن لكى يكون لى دلوى فى مسألة البيت .. سودانيات ليست لى بيت .. أنها وطن .. وهذا ليس تلاعب بالألفاظ .. بل الوطن يشمل الطيبين والملاعين .. والأغنياء والفقراء إلخ .. ولا يمكن تركه أو (حرده) من أجل فلان أو علان ..

ملحوظة:

جلبت مداخلتك أعلاه .. ويهمنى فيها بوجه خاص .. لماذا يغير (التكليف) من سلوكيات البعض .. (عموماً) .. حتى المداخلات العادية أختلف فيها الأسلوب .. ولماذا لا يكون النقد فائدة وليس تعصب وغضب .. قد يؤدى الى الإستقالة

[عبدالمنعم الطيب حسن]

المشاركة الأصلية كتبت بواسطة بابكر عباس

شايف الإعتذار فرحك! يا أخي دا كان إعتذار مشروط و بعد مراجعتي لبوستات كثيرة لورا لقيت انو عبد الجليل بتصلبط فيني ساكت، عشان كدا سحبت ثقة الذكاء و بالتالي الإعتذار ليك غير فاليد.
يا طيب
من غير تعريف و لا تلوين يا عملات السعوديين!

ياخ انا اصلا ماطلبت منك اعتذار عشان تتشرط وتعلن ثم تسحب
وهذا بالمناسبة الاعتذار التالت منك لشخصي
ومسيكين دي تنطيق علي مداخلاتك معي ايضا
يا لها من فجة من فج
وطيب دي مباشرة مقبولة منك انطلاقا من اذا اتتكا مذمتي....
يا رخيس

[سارة]

عبد الجليل سلامات واريتك طيب{ياخى مرات اسال بيننا فول وزيت وجبنة حبشية}

قلت بعضمة كيبوردك

تأتي الإدارة لتصادر و (تدس) وتقصي، بناء على عبارة (سودانيات بيتنا) والبهبشنا في عقر دارنا فـ( عضلاتنا تبش)

لكن أن يخشى الناس الكتابة والحوار ويحتفون أكثر بـ( عزائم) ولقاءات اجتماعيه، وفلانه (عرسوها) وبنت (فلان) نجحت، ويفردون لذلك مساحات حُرة في المنبر العام، مقابل (دسدسة) كل الحوارات الجريئة والكتابات الخلافية الكبيرة والعميقة في داخل (البيت) حتى لا يطلع العابرون على (عوراتنا)

الكلام دا وين لو سمحت؟؟؟ مهم جدا نعرف

[أبوبكر عباس]

المشاركة الأصلية كتبت بواسطة عبد الجليل سليمان

آمال الشيخ .. من التحايا ما أعجز عنه:
ثم أنني يا سيدتي – فيما لو عُدت قليلاً إلى متن هذا البوست قبل تحريفات الرشيد – تقرأ – تخريفات – إن إردت، قلت أن عبارة (بيتنا) هذه أصبحت آلية خطيرة لمصادرة الحريات عندما استغلها البعض للمثابرة على التحريض بالمصادرة – كنت حينها بعيدة يا آمال- ولم تشهدي – ربما شهدت من على بعد – مطالبات البعض بمصادرة رواية الجنقو مسامير الأرض – للزميل ساكن،وحرقها ومنعها من دخول البيوت ( سودانيات بيت أيضاً)، ثم توالى استخدام عبارة (بيتنا) النازعة إلى مصادرة الحريات، و أول من ابتدر هذه العبارة لم يكن يعني بها سوى – ما قلتيه أنت- تلك الحميمة الجميله- لكن السلفيون والسلفيون الجدد – هم الذين ابتذلوها حد انها أصبحت مخيفة وقاهرة وقامعة.
يا آمال .. سودانيات منبر للكتابة وللتداول حولها إبتداءً، لكنه عندما يتحول إلى بيت لا يستطيع أحداً التعاطي معه لأنه يكتسب خصوصية المنازل، ونحن ضد خرق هذه الخصوصية، لا استطيع أن أفرض على (أسرة) أن تقرأ كتاب الأغاني، الروض العاطر، كتابات على محمود – ولا (اصل العائلة والملكية الخاصة والدوله) لإنجلز، لكني استطيع أن أضعهم في منبر (صنع خصيصاً) لهذا الغرض ، فيقرأ من يقرأ – ويمسك من يمسك – وينتقد من يريد، ويهتف الهتيفة و ....، لكن البيوت لا تسمح بذلك، لذا يا سيدتي – إذا أردنا أن نجعل من هذا المنبر حراً وديمقراطياً بالفعل فلنتأمل على الأقل في مخاطر (بيتهم هذا) ومنبرنا نحن.

يا أخي ردك دا غير أمين
يفترض ردك على آمال هنا يكون مربوط بمداخلة أم التيمان، القالت فيها انو مرة آمال قالت ليها ما تكتبي نوع الكلام دا لانو بتي بتدخل سودانيات!!

[أبوبكر عباس]

تاني إتذكرت لي حتة بتاعة عدم أمانة منك:
في بوست خلف المنبر موقفي كان (فيما معناه) انو دا بوست أدبي و يجب محاكمة الراوي و النممام و انت همسيلف (يا عملات قيقا) أشاد بالمداخلة
ليش بس ماسك لي في موقف النفزاوي دا؟ وعلى ما أذكر أنا في بوست (القاضي و رجل الدين) دا انا طالبتك توضح لي فكرتك شنو من نزيلك لكتابة بتشبه أفلام الجنس؟

[أبوبكر عباس]

المشاركة الأصلية كتبت بواسطة عبدالمنعم الطيب حسن

يا رخيس

لو كان كتبتها لي بالصاد كنت إشتكيتك (لناس البيت).
كدا بالدارجي لا تخالف اللوائح

[الأغبش]

ساقية جحا ...

[عبد الجليل سليمان]

المشاركة الأصلية كتبت بواسطة مبر محمود

تحيّاتي مجدداً يا عبدالجليل..
رسالتي إليك لم تتضمن أي وعود بإرجاع البوست مستقبلاً..
كاتبتك عبر آيات "راجياً" سحب البوست، وقد وافقتني مشكوراً على ذلك.. هذه كل الحكاية.

يعني صودر تماماً.
هذا ما قلته.