سفرا ما معروف اوصاف ترحالو
في يوم
والريح بتولول جوة قليبي تنوح
شفتك وانت بتمرقي من بينات النيل
والقيف مجروح
شايلة علوقك صبرا كان
منقوع في جوة الروح
كم عانيتي
وكم عانيت يا حلوة معاك وانت بتندهي لي
ياوليدا فايت
اوع تروح
وحين ياغالية
شالني زمان السفر المامعروف
اوصاف ترحالو
ليك كتبت حرف مذبوح
سال جواي نزيف الكلمة
وكنت بونس بيك نفسي
خوفا من
نأمة
بتسرق مني حنين الشوق وابوح
ويظهر عشقي اليك
في اشعاري
وانسى الوعد الكان بيناتنا
انو غرامك جوة ضلوعي
هو العيد لم يبين
في اجمل بوح
بخلي عيون اطفال الحلة تشع
وكل نخلات الحلة معاها تدوح
واتغربت
واتودرتا
واتدردرت
وشفت خلوق
مرة اغني
ومرة اناغم طيفك وابكي ومرة اسوح
وجد يا غالية
من فارقت دعاش المطرة الوقفت عند الخط الوهمي
البين وجدان الناس الفوق
والناس البعد الجوف بتشابي
عرفت الخوف
وضمير الرعشة الصار مملوح
وبس
|
