رسالة لا أمل في وصولها
إلى السيد/ عمر حسن أحمد البشير رئيس جمهورية السودان الديموقراطية
سيدي الرئيس لقد حكمت فعدلت فدبلت ونومت نوم العافية
لله درك يا عمر ، لقد كنت مثل سميك عمر الخطاب رضي الله ، تسعى بالخير ، وتنشر العدل بين الناس ، بغض النظر عن هفوات بسيطة (قتل أرواح ، هتك أعراض ، نزع أملاك ، احتكار اسواق ، والخ الخ من حاجة تافه) وهذه الهفوات البسيطة قاموا بها مرؤوسيك ، وأنت لم تفعلها ، أي نعم أخوانك وزوجتك وداد أصبحوا يمتلكون ثروات لا تحصى ولا تعد ، ولكن ماذا نقول ذلك من فضل ربي وربنا يديمها عليهم نعمة ، بالمناسبة سيدي الرئيس أنا طوالي بدافع عنك وسط أصحابي واصدقائي ، بقول ليهم البشير معدنه حسن ولكن بطانته فاسدة وأنت سيدي منذ توليت السلطة لم تظلم أحد إذ كانت السلطة الفعلية في الأول بيد الزبير محمد صالح ومن ثم انتقلت إلى الترابي ومن ثم علي عثمان ومن ثم مجذوب الخليفة واخيراً نافع ، أنت يا سيدي الرئيس لا يمكن تكون عندك يد في البحصل في السودان ، وذلك لأنك أفشل من إن تكون ديكتاتور ، وأنا بصراحة ما عارف الورطك مع الجماعة ديل منو ؟! ، لذلك أنا بنصحك نصحية لي وجه الله ومحبة فيك ، إنك تتنحى الليلة قبال باكر وتقيل معاك علي عثمان محمد طه ونافع علي نافع وبكري حسن صالح والخ الخ لحدي عمر الجزلي تشيلوا معاك ، أنت عارف لييييه؟!
لعدة أسباب :
السبب الأول إنه ما أظن السودانيين ح يطلعوا مظاهرة قريب وح يتأخروا ، وبالتالي كلما تأخروا كلما كانت نهاية أذل وأشنع ، وذلك انطلاقاً من الآية (إنما نملي لهم لكي يزدادوا إثما) وحديث الرسول صلى الله عليه وسلم (إن الله ليملي للظالم حتى إذا أخذه لم يفلته) .
السبب التاني وهو إنك تشيل معاك باقي جماعتك ديل وما تخلي فيهم إلا عبدالرحيم حسين تمسكوا رئاسة الجمهورية وسافر امرقها في ماليزيا ، أقعد ليك سنة وتعال راجع ، ليك علي أضمن ليك انك ح تستلم الرئاسة مرة تانية ، بس اتنحى اسيع عشان الناس ما تكرهك
السبب التالت موش يمكن لو اتنحيت اسيع دي واعلنت ذلك ببيان اذعته على وسائلك الاعلامية ، موش يمكن الشعب السوداني ينزل الشارع ويعمل مظاهرة ضد قرار تنحيك (زي الوهمة بتاعتت جمال عبدالناصر) .
وهو زاتو لو الشعب ما اعتبر ليك قرار تنحيك جميلة من ضمن جمايلك ، صدقني التاريخ ما بفوتها ليك ، وحيسجلها ليك كأفضل رئيس افريقي يتخلى عن منصبه من أجل الحفاظ على أرواح شعبه ، وح تخش الجنة وتنبسط وبي كدة تكون لقيت استمتعت بسلطة رئاسة 22 سنة وراجل وداد عشرة سنوات وتخش الجنة وتلقى الحور (والله حظك)
يلا يا فردة اعلن قرار تنحيك ، والحق السوق وبيع الجماعة ديل ناس نافع وعلي عثمان وألحق اتغدى بيهم قبل يتعشوا بيك ، انت قايلهم بعدين بقيفوا معاك ؟! هاه عا العوير دا ؟! .
أنت ما قاعد تتصل علي مبارك ولا شنو؟!
ما قاعد تسالوا أخبار بطانته شنو أيام المظاهرات ، علي الطلاق كان سب ليهم دين وسب ليك أنت ذاتك ...
كنت عايز أقول ليك اتصل علي القذافي أسالو ، لكن لو اتصلت علي القذافي ح يقول ليك (من أنت؟!)
يا اخوي ألحق روحك واتنحى ، ولو ما عايز تتنحى وخائف من ناس نافع ، قوم شوف ليك ناس تحت تحت كدة يعملوا مظاهرة عشان يلحقوك السوق قبل ما القذافي وعلي عبدالله صالح يكملوا بضائع الدكتاتورية المتوفرة في السوق ....
الشعب السوداني دا ما تعمتد عليه في إنه يقوم مظاهرة براهو ، انت كمان خليك حريف ، حركهم من تحت تحت ياخ .
وتقبل وافر تحياتي
ووفقكم الله لما فيه خير العباد والبلاد
إبنكم المحب دائماً / شلاقة
