يايمه زايد شوقي ليك

[مجدي مسعد حنفي]

باين علي قربت اجيك
يايمه زايد شوقي ليك
------------
مشتاق لحضنك لي زمن
مشتاق لريحة قهوتك
وقعدتنا لي شاي الصباح
لامانا حولك بسمتك
بتذكرك ساعة الوداع
بي كل هدوء تتسحبي
خايفاني المح دمعتك
شربنا من بدري الحنان
من رقتك ومن ضمتك
--------------
بتذكرك
وانا اصلي مانسيتك ابد
دايما معاي يايمه
في همي وشقاي
ذكراك لي هيَ السند
في كل مشاويري وخطاي
في ضحكتي ولحظات بكاي
ماغبتي يوم
عن بالي لا طيفك شرد
----------------
بس الجديد
زايد علي شوقك شديد
وبقيتي دايما في المنام
كل ليله تقريني السلام
عارفاني من بعدك وحيد
والشي الغريب
مابترضي امشي معاك بعيد
وتقولي لي خليك هنا
لسَاك خلَي الشوق يزيد
وانا شوق ليك فاق الوصف
وما اظني محتاج للمزيد

مجدي مسعد حنفي

[د اسامه]

(عارفاني من بعدك وحيد
والشي الغريب
مابترضي امشي معاك بعيد
وتقولي لي خليك هنا
لسَاك خلَي الشوق يزيد
وانا شوق ليك فاق الوصف
وما اظني محتاج للمزيد)

يا الله
قصيدة بالجد معبرة
كانها تحكي عن امي غفر الله لها
اخ مجدي
الا رحم الله والدتكم
واسكنها فسيح جناته
مع الصديقين والشهداء
اللهم اغفر لها وأرحمها يارب العالمين
اللهم اسكنها فسيح جناتك وتجاوز عن سيئاتها

جرح الفراق صعب الاندمال
وخاصة فراق الام
توفت والدتي رحمها الله وغفر لها منذ اكثر من 15 سنة
وكأنها فارقتنا البارحة

متعكم الله بالصبر الجميل
اخي مجدي واخونا فتحي والاسرة الفاضلة

ورحم الله موتانا وجميع العالمين

[بله محمد الفاضل]

أدمعت عينايّ يا مجدي


....
......

[سارة]

لها الرحمة وحسن القبول ولكم صبرا جميلا
ما انبل حزنك يا مجدى ربنا يديك العافية ويطول عمرك

[مجدي مسعد حنفي]

الاخ العزيز اسامه
لك مني كل الود والتحيه
رحم الله امهاتنا واسكنهم فسيح جناته بغير حساب
وجمعنا بهم في الفردوس الاعلى
إن شاءالله

[مجدي مسعد حنفي]

الاخ العزيز بله
ارجو منك العفو لما سببته لك من الم
بغير قصد

[مجدي مسعد حنفي]

شكرا اختي العزيزه ساره
تمضي الايام والسنوات والام باقيه
في الاعماق بلسم من الالم ونبراس يهدينا
للصواب وحضن دافئ من رعشة الحنين
فالتحيه لكل الامهات.

[طارق صديق كانديك]

ذاك هو صدق الإحساس الذي يولد كل هذا الحنين.

للوالدة الرحمة

شكرا مجدي

[مجدي مسعد حنفي]

شكرا طارق
والاحساس بحب الام ربما كان
هو الاحساس الوحيد الذي لا يمكن
تزيفه ابدا

[علاءالدين عبدالله الاحمر]

الوفاء يحتمله الأصيلين فما بالك ان كان لأم حنون
عبرت مجدي بمكنون روحك وحبك لامك
فقد جليل
رحمها الله وسلواك صبرا جميلا ودعاء طيب من ابن بار مألوم

[زول الله]

مجدي حنفي يارائع الاحساس يامبدع
كان لي شرف قراءتها وضمها الى الملف الخاص بالروائع قبل ان يراها الآخرين
الفضل في ذلك لعمنا فتحي الذي شرفني بها قبل تشريفها للمنتدى في هذا البوست
كنت عايز اعمل معاك نفس الحركة العملتها مع اخونا قيس شحاتة في اغنيتة ياصباحات
بس غلبتني العبرة والله
لكن بجيك راجع بيها بعد تنجض
للوالدة الرحمة والمغفرة
ولكم الصبر وحسن العزاء
ولنا ماتبقى



اقول قولي هذا واستغفر الله لي..............

[مجدي مسعد حنفي]

شكرا اخي علاء الدين
وستبقى الأم هي الحب الخالد الصادق
في حياتنا وستبقى ذكري امي دائما في
وجداني وفي روحي فلها كل الحب والحنين

[مجدي مسعد حنفي]

زول الله ياخي كيف حالك
شكرا ياخي على الكلام الراقي الجميل
وماغريب عليك يااصيل
اما بالنسبه للقصيده فانا كل البهمني ان الكلام
يوصل للناس بالصوره المطلوبه يعني اللحن يكون
معبر عن الفكره وينقل للمتلقي احساسي بصوره سهله
ولكن مليانه بالشجن والحنين للماضي ولحنان الام
وانا واثق انك قادر على ده وانا قي انتظار سماع اللحن
في الايام الجايه

[مجدي مسعد حنفي]

يافتحي الظاهر فعلا
كلامك طلع صح وانت
عارف انا قاصد شنو ولا
داعي للتوضيح المسيخ