التمساح سكن الشايقيه ..

[قرقاش]

وصلنى هذا الفيديو من صديق ..كدى هاكم اسمعوه فى الاول ..





http://youtu.be/SDHZwqUl6Kk

[قرقاش]

اخونا فى الله ( فلان الفلانى ) ..الضوء الشارد من منتدانا..اهدانى من يومين ..رساله .. تحت عنوان التمساح سكن الشايقيه..انا بعد ما استمعت للموضوع فى المره الاولى ظننت ان الموضوع.. منلوج زى منلوجات بلبل زمان ومنلوجات شكوكو .. او كوميديا او شعر حلمنتيشى او حاجه بالشكل ده وكنت اضحك وافصفص من الضحك مع كل بيت ومع كل مناشده للشيخ ان يلحقه الناس ديل ..خصوصا وانا سمعت تحت تحت انه التمساح المقصود هو شيخنا هناى داك ذاطو ..اذن الموضوع حرب بين المشائخ واستغلال تام لكل البركات..والدعوات وكشحات للفواتح المسيله للدموع ..واكيد ان هناك لعنات ارض جو..ومصدات باتروتيه لكل دعوات الخصم ..ومن المؤكد ان الشيوخ ..لديهم دعوات حربيه طائره بالاضافه الى غواصات حجابيه تحت مياه البحر ..المهم شكلها كده حرب ارضا وجوا وبحرا .. شخصيا لا انكر انه لدى شعور واحساس بان هناك ولوله ....
وطبعا كالعاده ..طوالى صره فى خيط رحته مرسل ليك الموضوع ..الى اخونا صديقى الصينى.. مين شان شو ..والذى سبق له ان تفاخر امامى بجدوده من اسره مين الرابعه قبل الميلاد..و قال ان يدهم لاحقه وكنت اظن اننى سادخل مع فى جدال تاريخى حول اصطياد التماسيح ومافيها من فوائد ومن من الناس اكتشفوا مافى التمساح من فوائد وانهم اول من اخترع الفياجرا ووجدها محفوظه ومصانه فى جزء من اجزاء التمساح ..والدليل كذا مليون مصرى تم انتاجهم فى السنوات الاخيره قبل ان يكتشف الخواجه سر اللعبه وينزل الفياجرا الاميركيه فى السوق...فالصينى متعجب ومندهش كيف يصرخ الناس هلعا من تمساح ..جلده دهب ..ولحمه عجب وفياغرته صعبه ..كيف يكون مشكله ..دى ثروه ياناس ..وبعدين من هم هولاء المشائخ الذين يناديهم هذا المغنى صاحب الصوت الرخيم والايقاع المميز ..( ولو الشكل حلو زى الصوت الراجل ده انا اتوقع له ان ينافس تامر حسنى فى عقر داره .. ) يسال الصينى عن هولاء المشائخ المندوهين ..هل هم المارينز بتعين السودان يعنى هل هم نيشنجيه ...100%..ولا صيادين بتعين سمك محترفين الصيد فى اعالى البحار ..طبعا الصينى ماعارف ان نيلنا ده جدول بالنسبه ..لليانج تسى كيانج بتاعم ..مع انه تانى اطول نهر فى العالم ..
قلت للصينى والله بصراحه انا مافاهم الشغله شنو ..لكن كدى زى ماتقول يمكن الشغله فيها شويه سياسه ورمزيه ..برغم انه طبعا الجماعه المشائخ المذكورين فى المدحه ..زى الشيخ ..ابن ادريس والذى يناشده المادح بان يبين برهانه فى التمساح وابن العركى والسمانى والشيخ الهوانى صاحب الفتح الربانى والشيخ عبد الوهاب التازى وحسن البصرى والشيخ عثمان شيخ الختميه المطلوب منه ان يعقد النيه ويشيل الفاتحه ويجيب للتمساح اذيه... ..ويصيح المغنى ان التمساح حجر عومنا وكان ماجينوا يالمشائخ عليكم لومنا ..
ولاادرى كيف يلوم هذا الرجل ناس هم اغلبهم فى عداد الاموات ولا اعلم كيف يمكن ان يكون عليهم اللوم ..اما الشى الذى لم يعجبنى فى الموضوع .. فهو استعمال كلمه يا ..حيث ان كل المشائخ المذكورين فى القصيده سبق اسمهم.. النداء يا ..يا ..وهو خطا دينى واضح ...حيث انه من المفترض هذه الكلمه لاتستعمل الا الى نداء الله عز وجل ..عند نشوب الملمات والمحن ..فانا اعتقد انه الشغلانه ماليها علاقه بالدين ..ولا انته رائك شنو ..قرقاش

[ZEIN ABDALLA]

وتقول الروايات بان الله قد استجاب لدعوة الاولياء الصالحين فخر التمساح
صريعآ وعلى جلده التخين وجدت آثار الاختام لكافة الاولياء الذين تمت
الاستعانة بهم.
اها رأيك تانى شنو؟
معقول يا قرقاش ما سمعت بقصيدة التمساح

[Hassan Farah]

انت يا قرقاش راجل بتاع فتن... تلقاك يا دنقلاوى يا بديرى دهمشى... وقصدك مفهوم عايز تفتن بين الشايقية وولاد اعمهم المناصير والرباطاب...الذين معروفين بعلاقتهم الحميمية بالتماسيح...نصفهم سحاحير....عندى اعمامى...اولاد فرح...الشيخ والخضر رحمة الله عليهما....ما خلولهم تمساح فى جزر الرباطاب من ارتل وحتى مقرات الا قبضوا... سلخوا جلدوا واكلوا لحمه...كملوهن تب ...عمى الشيخ قال ينزل لا تحت ...وحل بديار الشايقية وشرك... جوهوا شباب من الشايقية عاجباهم نفسهم واتحرشبوبوا ... قالولوا تعال نتصارع...قالهم سمح والشرط: قالولوا اليرمى اخوه ياخد ملوة عيش.. وجاهو واحد ماكن...عمى ما كضب شالو فوق وضربو الواطا...خرخروا...عترتلو,,,,قالهم خلاص مرة تانية...والمرة التانية شالو فوق وضربو الواطة....الشايقية لى زولن :الله يخيبك...الرباطابى العفين يغلبك....رد عليهم: نان الرباطابى العفين شاف ملوة العيش بى يقع لى.....ههههههه

[اشرف السر]

السلام عليكم قرقاش وزوار البوست

القصيدة مشهورة للمادح الأشهر حاج الماحي...
وكذلك قصة التمساح الذي وجد في اليوم الثاني بره البحر وبه عدد طعنات يساوي عدد الشيوخ المستغاث بهم..

سواء كانت الرواية واقع معاش.. أم انها من واقعية الشعب السحرية.. فاني لحظت كلامك عن عدم جواز المناداة ب (يا) لشخص ميت...
وانها من الشرك... هذا رأي وجدته قبل عشرات السنوات في كتابات أهل الجزيرة العربية من اتباع محمد بن عبد الوهاب..
وفي الاونة الأخيرة وجدت كتباً أخرى تجوز الاستغاثة بالأحياء وبالاموات وبشرعية التوسل بمن يعتقد صلاحه..

الإشكالية المواجهاني.. ان اصحاب الرأي الأول يأتون بآيات وأحاديث تنهى عن ذلك..
واصحاب الرأي الثاني أيضاً يأتونك بأدلة من الآيات والأحاديث تدعم وجهة نظرهم وان الأمرليس بشرك...
حقيقة محتار وما قادر اصل لترجيح حتى الأن

[رأفت ميلاد]

المشاركة الأصلية كتبت بواسطة اشرف السر

الإشكالية المواجهاني.. ان اصحاب الرأي الأول يأتون بآيات وأحاديث تنهى عن ذلك..
واصحاب الرأي الثاني أيضاً يأتونك بأدلة من الآيات والأحاديث تدعم وجهة نظرهم وان الأمرليس بشرك...
حقيقة محتار وما قادر اصل لترجيح حتى الأن

ده شغل ترزية ما بتقدر عليهو ياخوى .. الناس ديل كلهم ما عندهم شغلة بالدين وكلو واحد بلعب بيهو لصالح ورقو

يا قرقاش لسة ما سمعت المدحة .. عليت الصوت المرة نايمة هجرتنى .. أصلو نحن ناس سيدى بى سيدو

تعرف يا حسن فرح قالوا الشايقى سأل الجعلى من جنسو قال ليهو (جعلى أحمد الله) رد الشايقى وقال ليهو (والما جعلى ما يحمد الله؟) قال ليهو (يحمدو على شنو ؟ على ..)
دى إلا يتمها ليك شايقى معتق .. كدى جرب عكود ولّ الزول

[Hassan Farah]

المشاركة الأصلية كتبت بواسطة رأفت ميلاد

ده شغل ترزية ما بتقدر عليهو ياخوى .. الناس ديل كلهم ما عندهم شغلة بالدين وكلو واحد بلعب بيهو لصالح ورقو

يا قرقاش لسة ما سمعت المدحة .. عليت الصوت المرة نايمة هجرتنى .. أصلو نحن ناس سيدى بى سيدو

تعرف يا حسن فرح قالوا الشايقى سأل الجعلى من جنسو قال ليهو (جعلى أحمد الله) رد الشايقى وقال ليهو (والما جعلى ما يحمد الله؟) قال ليهو (يحمدو على شنو ؟ على ..)
دى إلا يتمها ليك شايقى معتق .. كدى جرب عكود ولّ الزول

----------------------------------------------------------
انت يا مقدس ماب تخاف من اولاد عمنا ديل يقبلوا عليك....
انا غايتو ما فارقا معاى اعشق طمبورهم ودليبهم...اعز اصدقائى من عيال شايق...المرحوم محمد عبدالجبار الكونج ضابط البوليس السابق وسر الختم محمد بادى ....من شايقية شندى ايضا ضابط بوليس والمهندس عثمان سرالختم والمرحوم المهندس محمد عثمان الذى مات غرقا زملائى فى مصنع النسيج والمرحوم المناضل على الماحى السخى وزميلى فى مدرسة كاتشا عبدالله عبدالرحيم من شايقية بورتسودان جمعتنا بهم اواصر الصداقة الحقة والاخوة والوفاء وكان من الطبيعى ان نتبادل القفشات نتهكم على بعض ونسخر وننكت كيف لا والرباطاب مشهورون بالمساخة والشايقية بالجلدنة والجعليون بالحماقة...
قاليك جعلى وقع فى بير جاء شايقى ينقذو نزل الحبل والجعلى مسك قوى والشايقى يجبد مسكين لمن خلاص وصل عند خشم البير الجعلى عرف الشايقى من شلوخو قام سل سكينو من ضراعو وقطع الحبل