قهوة النشاط !

[ابرا]

المشاركة الأصلية كتبت بواسطة أبو أماني

رغم أنه قهوتنا دي تصديقها من المحلية .. أدبي إجتماعي ثقافي وممنوعين منعا باتا من تعاطي السياسة بداخلها .. لاكين في شمار حرقني بلحيل .. وأنا جاي على المكتب بمر بمكتبة وزي أي سوداني قح .. بدي نفسي الحق في التصفح المجاني للمانشيتات العريضة لكل الصحف .. الغريبة لاحظت أنه زبائن المكتبة من ناس الملح أكتر من البيشتروا .. والناس البيشتروا بيمشوا طوووالي بينما يتلكع أكبر وقت ممكن ناس الشمارات الملح .. وتلقى المكتبة مزدحمة بالناس وقد تحسد صاحبها بينما المسكين من الكاظمين الغيظ! .. وبنظر لصاحب المكتبة متعاطفا معه .. وأنا أري كل خلجات الضيق والتزمر الصامت من هذا التصرف العشوائي المتكرر صباح كل يوم .. بلا واعز أو ضمير .. وينفلت عيار الصبر من صاحب المكتبة عندما يتطاول .. أحد المتطفلين وينتزع الصحيفة ويقعد يقلب في صفحاتها بتأني .. فلا يملك المسكين إلا أن يزجره بصورة سافرة .. أوقف أحد المرتاحين أولاد المصارين البيض .. عربته الفارهة جمب المكتبة وترك الموتور شغال والباب فااااتح والمكيف يقول يا غربتي ومد لبتاع المكتبة ورقة من فئة الخمسين جنيه وطلب خمسة صحف .. منها ثلاثة سياسية وإثنين رياضيات .. وكان فرحتي أن الصحيفتين الآخيرتين كانتا من اللون الأحمر الفاقع غير أن فرحتي قد تلاشت وأنا الآحظ نظرات الحقد الطبقي تنبعث من عين(زميلي)! المتطفل جاري وهو يرمق الشاب الوسيم المرتاح بنظرات أشبه بنصل حاد يخترق الكبد .. ما كنت أقف طويلا تلكم الوقفة لولا أمرين أولهما أن الشاب دفع مقابل الصحف الخمس مبلغ 10 جنيهات حسوما! بينما طافت بخيالي تلك اللحظة صورة الخزين رحمه الله وهو يبيع صحيفة الثورة في عهد عبود رحمه الله أيضا .. وهو يصيح قائلا .. (البرش .. بي .. قرش !) بل وقبل فترة وجيزة جدا كانت الصحيفة بخمسين قرشا..ثم صارت جنيها..ثم ! الأمر الثاني إثنين من المانشيتات سمراني عند موقفي طويلا .. المانشيت الأول (إعتقال الصادق المهدي)!!.. وتعجبت في سري .. إذ كيف يعتقل رئيس حزب معارض؟ ومختلسوا المال العام يعتلون سدة الحكم! والثاني جاء بلسان المتعافن ! وهو يصرح بأن إنتزاع ملكية بعض الأفراد بالمنشية كان لصالح تشييد مسجد المنشية! شعرت بضيق وإختناق فأشحت بوجهي نحو الشارع مستنجدا بنسمة هواء زكية .. وكان لحسرتي أن وقعت عيناي بالجانب الآخر من الشارع على منظر آلة إزالة ضخمة تزيل كشكا للصحف اليومية والمستلزمات الطلابية بحجة إنه كشك عشوائي وإن المحلية تسعى لتجميل العاصمة!.. وبجوار الكشك عامود كهرباء تحيط بأسفله مجموعة أكياس قمامة متخمة بما لذ وطاب من فضلات الطعام حرصت محلية السجم والرماد على أن تتركها رأفة بالكلاب الضالة والفقراء المساكين! ..الذين عادوا من ديوان الزكاة بخفي حنين .. لك الله يا وطن .. ولك الله يا .. شعب معصوب الجبين.

تقايض

عده مثلا

[أبو أماني]

المشاركة الأصلية كتبت بواسطة ابرا

تقايض

عده مثلا

يازول جيب العدة وتعال .. قابلني قدام ميدان الأمم المتحدة المقابل لزنك الخضار الساعة تسعة ونص ..بستناك لحدي حداشر .. 11 ونص .. إطناشر الساعة واحدة كان ماجيت بديك فرصة لحدي الساعة أربعة قول خمسة .. ستة كده .. الساعة تمانية ونص كان ماجيت .. بديك فرصة لحدي 9\10 كده غايتو أنا لحدي الساعة حداشر إطناشر كده .. برجع البيت .. وتاني يوم أي عذر منك مقبول مع موعد جديد..أها بتجي ولا ما بتجي؟..هههههه باقي لي ما سمعت بي : حبل القرع ..الإندرع ..كااااااااااااااك

[أبو أماني]

في محاولة أرجو أن لا تكون يائسة .. أسعي لتنشيط قهوة النشاط .. مما سبق:-

* تحضرني طرفة أبطالها أبناء أخواني وأخواتي، كانوا في الثامنة من العمر وما حولها وكان الحوار بينهم كالنحو التالي بحذافيره:-
أبو القاسم: يسأل ابن عمه مصطفي .. إت أبوك كان قاعد يجي الكم في المدرسة لما كان قدرك زمان؟ فرد عليه مصطفي قائلا.. وبلا تردد .. الأول ..
أبو القاسم : غريبة أبوي برضو كان قاعد يجي الأول وود جيراننا وأي زول أسألو يقول لي أبوي كان قاعد يجي الأول .. يعنى يا مصطفي ناس زمان ديل ما كان فيهم أصلو زول بيجي الطيش؟

وتذكرت واقعة مضت عندما سألتني بنتي أماني وهي في نفس سنهم تقريبا.. نفس السؤال فمسحت كل ذرة حياء من وجهي وقلت لها بصوت يكاد يكون همسا حتى لا تسمعني مدام شمشرة (أمها)!.. أبوك طبعا دائما بيطلع (الأول)! ومحاولا التظاهر بالتواضع الزائف أردفت قائلا.. بس لكين مرة مرتين كده طلعت الخامس كنت عيـّـان.. فإرتاعت المسكينة وقالت جزعة كت عيان يابابا بشنو؟ فقلت لها مرة برجم ومرة (أبو عيديلات) وعانيت الأمرّين في سبيل شرح هذين المرضين!وبعدها تسللت بنتي من أحضاني برفق وهي تشرع الخطى لتلاقي صاحباتها وتحكى لهن بزهو بطولات أبيها .. الذي ويا حسرتي .. إحتضن كذبته التي أطلقها على بنته وأطلق عليها زورا لقب (بيضاء) متجاهلا وخز الضمير!..ومتجاهلا لونها الأسود الكالح المخلوط بسنر إظهار الغدوة الحسنة للأبناء .. وعندها داهمتني الذكريات المريرة، وكيف لا تكون مريرة وأنا لم أطلع الأول ولا مرة في حياتي!.. حتى في لعبة (سبق سبق) وأنا طفل صغير كنت أطلع الثاني والثالث بينما عدد المتسابقين لا يربو عن الثلاثة أو أربعة أولاد!.. بس الحمد لله ما حصل طلعت الطيش! حقا كان بالفصل ما يتراوح بين 58 إلى 64 طالب (نهرين) وكان ترتيبي غالبا في حدود ال 20 إلى 25 على مستوى المدرسة وكانت أحسن نتيجة حصلت عليها هي النجاح في امتحانات النقل من ثانية لثالثة ثانوي كمبوني وكنت ال (11) وكان ذلك عين الإنجاز والإعجاز!..فقد انهالت علىّ القبلات التي يأخذ بعضها طابع (البونية) أحيانا! وهدايا لا حصر لها كان أبرزها .. هدية من والدي وكان يعمل بالسعودية آنذاك فأرسل المصاريف ومعها أرسل لي مبلغا وقدره (ثلاثون جنيها) ماهية مدير في ذلك الوقت هدية وطلب مني أن أفصل منها بدلة صوف إنجليزي .. وقد كان .. ولكن كان لهذه الهدية .. واقعة جميلة جدا .. وكان أهم ما في تلك الواقعة أن اكتشفت في نفسي هواية قرض الشعر .. وسوف أسردها لكم في الحلقة القادمة .. فأبقوا معنا في ليلة مقمرة من ليالي الخرطوم.. إلى لقاء آخر .

[نزار حسن علي]

الحبيب ابواماني
صباح الحب والصحة والسعادة
نكته
مصري كضاب شديد شغال يفكها في السوداني انا رحت دنقلا ورحت بربر ورحت واو وجوبا ونيالا وسنار و....و..... السوداني قال ليهو مشيت براك قام المصري قال ليهو اها دي قعدت فيها ثلاثة ايام
ودقي يا مزيكة

[علاءالدين عبدالله الاحمر]

ياقهوتك

[أبو أماني]

المشاركة الأصلية كتبت بواسطة نزار حسن علي

الحبيب ابواماني
صباح الحب والصحة والسعادة
نكته
مصري كضاب شديد شغال يفكها في السوداني انا رحت دنقلا ورحت بربر ورحت واو وجوبا ونيالا وسنار و....و..... السوداني قال ليهو مشيت براك قام المصري قال ليهو اها دي قعدت فيها ثلاثة ايام
ودقي يا مزيكة

الحبيب تكعيب إبني العزيز جدا نزار ..كيفنك وكيف أمورك إنشاء الله سالكة .. لك الحب الصادق والشوق أضعاف .. أضحك الله سنك .. شنو؟ لسع في خفة روحك ودمك الزمان .. يعني الضغوط دي ما عصرتك زيينا كده؟ يلا .. تشاو

المشاركة الأصلية كتبت بواسطة علاءالدين عبدالله الاحمر

ياقهوتك

شنو يا علاء الدين .. وين البسمة ..وين الضحكة ؟ .. قلت لي قهوتي مالها ..؟ ما زينة ساااااكت .. بس إت تعال ما تخاف من الحكومة وصدقني البت الحبشية اللهلوبة تعملها ليك بدواها والفشار والبخور الما خمج! .. وعارفــك بتموت في (الجنزبيل) عشان هو بيسلّك ال... (حبال الصوتية) .. الرسول عليك تعال.. و.. كاااااااااااااااااك !!!.

[علاءالدين عبدالله الاحمر]

طبعا انا ماحصل شربت قهوة من حبش لاني بشجع دعم مواطناتنا بدل ديل تضامنا مع نتكيف من بلدنا ما برة البلد وكده وحبشيتكم دي كلو كلو ماعندي ليها اليكتح خشم حبوبتا هههههههه عارف مرة خرمان لقهوة وكنت في الشعبي امدرمان بس لقيت ليك القهاوي دي بين كل حبشية وحبشية حبشية زهجت وروحي طلعت وبطني وصلت حالقي بس ربك.كريم اسوف ليك مواطنتي واحده قاعدة ليك علي هباب وقفت قدام الراكوبة وقلت ليها :
- الاخت حبشية ( وقفت علي حيلة وقالت لي
يحبش قلبك ). فضج الجلوس ضحكا وانا مت بالضحك وبعد تحنيس قبلت تعمل لي قهوة

[علاءالدين عبدالله الاحمر]

كاااك دي مش حقت كانديك

[أبو أماني]

المشاركة الأصلية كتبت بواسطة علاءالدين عبدالله الاحمر

كاااك دي مش حقت كانديك

كااااااااااك دي حقتنا اللتنين .. بس كانديك بيقولها بطريقة (الشكابة) أي الريف الغربي لواد مدني .. يعني الجداد بيقولها والديك ما بيرفع رأسه من الواطة .. عاااادي وكده .. بس أنا بقولها بطريقة جداد الخرتوم!.. البندر!.. بموسيقة حلوة تخلي الديك يرفع رأسه وينفش ريشه ويعوعي كمان..وبعد داك الجدادة القالتها بيعاينن ليها رفيقاتها بكل حسادة .. كااااااااااااااااك.

تخريمة قوموا لمساديركم الكاربة يرحمني ويرحمكم .. الله .. يلا تشششاااوو

[أبو أماني]

من أيام رفعت البوست ده ورجعته أون توب .. (ويا فتحي مسعد برغم كمبوني بتاعك ده .. أون توب ما عندها ايتها علاقة ب.. لاب توب لذا لزم التنويه)! .. حقيقة يا أخوانا عزّ عليا أن يتوارى خجلا هذا البوست الجميل لمدة تقارب السنة (ليس لانه من صنع يدي والله) بس حقيقة لما رجعت للوراء لقيت الناس كانوا بيتعاملوا معاه بكل إلفة ومودة وحب صادق .. كما لو كان قهوة صحي صحي ولفت نظري أسلوب راقي في المناكفات والإريحية التي تشمل جميع المتداخلين.. ووجدت نفسي أقهقه من الضحك رغم قدم المواضيع التي أمر بها الآن والتي مررت عليها سابقا! كذلك لاحظت الغياب الإسفيري .. لو صحت التسمية .. لعدد من الأسماء التي لها شأن ومكان داخل القلوب .. أستعرض منها بضع .. و(أكرر) بضع أسماء هنا فالحصر صعيب .. وأتمنى أن تكون مناشدتي هذه بمثابة دعوة حميمة للجميع للعودة لسودانيات التي صارت بغيابهم .. قصرا منيفا يحن لقاطنيه .

أين بربكم الآن ذاك الشاب الرائع المتفجر رقة وعذوبة وحيوية وبهاء وحضورا جميلا يشرح الألباب .. (عندما أقول الشاب .. أقصد كلا من ): قيقراوي..شبارقة..عبد الجليل..أمير شعراني.. السفير جمال محمد إبراهيم .. السماني ..أبو ريم ..أبو مجتبى .. الرباطابي .. مهند .. نبيل .. أبو دعد.. هاشم طه أي (مواطن)! وكذلك أين .. همس الشوق .. مرافي .. هيفاء .. روبس .. سرورة ( أمينة ) وإشراقة .. واحة .. نور .. قوت القلوب .. وبدور والكثير من الأسماء بشقيها .. التي كانت تضئ دياجير رحاب سودانيات ببسمات حلوات وإشراقات مبهجات .. تعالوا عليكم الله ..فنحن في شوق (حارق) إليكم ولكم الحب صافي

[علاءالدين عبدالله الاحمر]

المشاركة الأصلية كتبت بواسطة أبو أماني

من أيام رفعت البوست ده ورجعته أون توب .. (ويا فتحي مسعد برغم كمبوني بتاعك ده .. أون توب ما عندها ايتها علاقة ب.. لاب توب لذا لزم التنويه)! .. حقيقة يا أخوانا عزّ عليا أن يتوارى خجلا هذا البوست الجميل لمدة تقارب السنة (ليس لانه من صنع يدي والله) بس حقيقة لما رجعت للوراء لقيت الناس كانوا بيتعاملوا معاه بكل إلفة ومودة وحب صادق .. كما لو كان قهوة صحي صحي ولفت نظري أسلوب راقي في المناكفات والإريحية التي تشمل جميع المتداخلين.. ووجدت نفسي أقهقه من الضحك رغم قدم المواضيع التي أمر بها الآن والتي مررت عليها سابقا! كذلك لاحظت الغياب الإسفيري .. لو صحت التسمية .. لعدد من الأسماء التي لها شأن ومكان داخل القلوب .. أستعرض منها بضع .. و(أكرر) بضع أسماء هنا فالحصر صعيب .. وأتمنى أن تكون مناشدتي هذه بمثابة دعوة حميمة للجميع للعودة لسودانيات التي صارت بغيابهم .. قصرا منيفا يحن لقاطنيه .

أين بربكم الآن ذاك الشاب الرائع المتفجر رقة وعذوبة وحيوية وبهاء وحضورا جميلا يشرح الألباب .. (عندما أقول الشاب .. أقصد كلا من ): قيقراوي..شبارقة..عبد الجليل..أمير شعراني.. السفير جمال محمد إبراهيم .. السماني ..أبو ريم ..أبو مجتبى .. الرباطابي .. مهند .. نبيل .. أبو دعد.. هاشم طه أي (مواطن)! وكذلك أين .. همس الشوق .. مرافي .. هيفاء .. روبس .. سرورة ( أمينة ) وإشراقة .. واحة .. نور .. قوت القلوب .. وبدور والكثير من الأسماء بشقيها .. التي كانت تضئ دياجير رحاب سودانيات ببسمات حلوات وإشراقات مبهجات .. تعالوا عليكم الله ..فنحن في شوق (حارق) إليكم ولكم الحب صافي

غايتو احتمال ذمان كنت من المرضي عليهم وعم فتحي اعلم بس هسي ثابر واعمل ترويج تاني بما انو كان في موسم هجرة للfacebook علي رأسها مواطني السابق البروف امين والمستنير وهبة واشرف السر ومن لف لفهم والايام دي جابت ليها الجيلي

[أبو أماني]

المشاركة الأصلية كتبت بواسطة علاءالدين عبدالله الاحمر

غايتو احتمال ذمان كنت من المرضي عليهم وعم فتحي اعلم بس هسي ثابر واعمل ترويج تاني بما انو كان في موسم هجرة للfacebook علي رأسها مواطني السابق البروف امين والمستنير وهبة واشرف السر ومن لف لفهم والايام دي جابت ليها الجيلي

حقيقي يا علاء لمست وترا حساسا جدا .. فالواقع هجرة معظم الأعضاء للواتس آب والفيسبوك وغيرها من المواقع بس أحب أذكّر من ذكرت أعلاه..والآخرين بأن كل المواقع الجاذبة لاتقاوّم سودانيات أو تعادلها من حيث الإحساس بال(هووم!) سودانيات علاقة أسرية دامت سنين عددا وفيها التقينا أناسا تنحنى أمامهم كل الهامات أدبا وإحتراما .. هي بالنسبة لنا .. أو لي على ألأقل البيت الإسفـيري .. الكبير الذي كبرت وترعرعت فيه طفلا .. فحقيقي عاصرنا فيها هامات ضخمة .. وأشبعتنا إحساسا بالإنتماء والولاء ..قبيل وبعيد رحيل مفترعها وباريها .. المرحوم بإذن الله الفقيد خالد الحاج له الرحمة .. فرجاء وكلامي للكل .. واصلوا أرحامكم بسودانيات .. ولا تنقطعوا عنا .. إحياء لذكرى الفقيد وتكريما لآسرته الكريمة .. وكما قال جدي رحمه الله في حكمة وعيتها طفلا ( من نسى قديمه ..تاه ) .. لكم الود صافي

[علاءالدين عبدالله الاحمر]

المشاركة الأصلية كتبت بواسطة أبو أماني

حقيقي يا علاء لمست وترا حساسا جدا .. فالواقع هجرة معظم الأعضاء للواتس آب والفيسبوك وغيرها من المواقع بس أحب أذكّر من ذكرت أعلاه..والآخرين بأن كل المواقع الجاذبة لاتقاوّم سودانيات أو تعادلها من حيث الإحساس بال(هووم!) سودانيات علاقة أسرية دامت سنين عددا وفيها التقينا أناسا تنحنى أمامهم كل الهامات أدبا وإحتراما .. هي بالنسبة لنا .. أو لي على ألأقل البيت الإسفـيري .. الكبير الذي كبرت وترعرعت فيه طفلا .. فحقيقي عاصرنا فيها هامات ضخمة .. وأشبعتنا إحساسا بالإنتماء والولاء ..قبيل وبعيد رحيل مفترعها وباريها .. المرحوم بإذن الله الفقيد خالد الحاج له الرحمة .. فرجاء وكلامي للكل .. واصلوا أرحامكم بسودانيات .. ولا تنقطعوا عنا .. إحياء لذكرى الفقيد وتكريما لآسرته الكريمة .. وكما قال جدي رحمه الله في حكمة وعيتها طفلا ( من نسى قديمه ..تاه ) .. لكم الود صافي

نهاراتك جرف اخضر
غايتو.علي صعيد.متصل سودانيات ظلت تحتفظ بنكهتها في قلب قلب كل منا وسودانيات هي المنتديات الوحيدة اﻷتي احتفظت بتفردها من.حيث المحتوي والشخوص ةالطرق الممتع برغم بعض الاشياء اللتي جعلت البعض يمتعض ويؤثر الابتعاد وغالبهم اسماها استراحة لاستعادة النفس والعودة متي اراد وسودانيات حملت كثير اسماء غائبة منذ العام 2006 ولكنهم اواقله من التقيتهم لازالة ينبضون بها حبا فسودانيات رقم.في حياة كل عضويتها لا يمكن تجاوزه دمت

[أبو أماني]

المشاركة الأصلية كتبت بواسطة علاءالدين عبدالله الاحمر

نهاراتك جرف اخضر
غايتو.علي صعيد.متصل سودانيات ظلت تحتفظ بنكهتها في قلب قلب كل منا وسودانيات هي المنتديات الوحيدة اﻷتي احتفظت بتفردها من.حيث المحتوي والشخوص ةالطرق الممتع برغم بعض الاشياء اللتي جعلت البعض يمتعض ويؤثر الابتعاد وغالبهم اسماها استراحة لاستعادة النفس والعودة متي اراد وسودانيات حملت كثير اسماء غائبة منذ العام 2006 ولكنهم اواقله من التقيتهم لازالة ينبضون بها حبا فسودانيات رقم.في حياة كل عضويتها لا يمكن تجاوزه دمت

كلامك عسل .. ولا تعقيب عليه .. وأهتبل هذه السانحة لأذكر هنا بعض الأسماء التي إستحضرتها منها من غاب عن سوح سودانيات غيابا متواصلا ومنها من غاب بصورة متواترة .. بس الغياب كله غياب ونحن الخسرانين ..نناشدكم بالحضور:

* آيات * أم بسملة * بابكر مخير * نبراس الدمرداش * عماد الماحي (العمدة) * إبن العم فيصل سعد * لمـــــار* واحـــــــــــة * ود بغداد * وهاد إبراهيم * ياسر إبراهيم * والأستاذه بت الأستاذ المرحوم إسماعيل حسن .. ومن لم يأت ذكره .. بعد .. عووووووك .. أدركونا يا حبائب مشتاقين ليكم والله ..

[أبو أماني]

عندما تصيب أحدنا سراء أم ضراء .. يتوجه تفكيره دوما لآحب الناس إليه لكي يجلس إليه ويبثه .. لواعجه حزنا كانت أم سرورا .. ويأخذ بمشورته .. لذا .. معظمنا يهرع للقهوة حيث ملتقى الأحباب وبهذا المفهوم جيئت إليكم لأطرح قضيتي للنقاش عسى أن أجد لي مساحة من إهتمامكم .

لي صديق عزيز ..هو بمثابة الشقيق بالنسبة لي يبلغ الآن من العمر الكم وستين .. نزل المعاش منذ أكثر من خمسة ست شهور ونال حقوق الخدمة والتعويض والذي منه وبالإضافه لمدخراته يقارب المبلغ المتجمع لديه حاليا نص المليار جنيه بنى بيت ملك أسكن فيه أسرته .. وحجج أمه وأبيه قبل رحيلهما .. وله ولدان وثلاثة بنات تزوجن البنات وإبنه الكبير خاطب والصغير شغال .. على قدر حالهما .. جاء لكي يستشيرني في كيفية إستثمار هذا المبلغ إستثمارا مضمونا يرجع إليه بعائد شهري وفير يكفيه شر الحاجة والسؤال في زمن..إنعدم فيه أبو مروووه..وطلعت أسعار السلع السماء السابعة..ولكي يضمن لأنجاله حياة كريمة مـن بعد رحيله عن هذه الفانية وضربت أخماسي في أسداسي وكان كلها .. قسمة ضيزى .. فما رائكم دام عزكم أفتوني بالمشورة الحسنة .. أثابكم الله .. ولكم الحب خالصا لوجهه تعالى ..