قاموس المفردات العامية فى اشعار حميد

[أبوبكر عباس]

المشاركة الأصلية كتبت بواسطة نغم

سلام برضو فى اول المقطع قال بلد صمى
وتعنى بلد ما مقسم وتوضيحو لفكرة الانفصال ذاتها كانت كالشمس (رفضو طبعا)
و شوف يا بابكر جات كيف المفردات
بلد صمى و شعب واحد
احساس عال و تعبير سلس ساهل من بطن بيئة كل السودان

دا، ما موضوع الخلاف مع طيبان وماريل! كدي أشرحي الأبيات البعد بلد صمي وشعب واحد

[أبوبكر عباس]

المشاركة الأصلية كتبت بواسطة وجدي الأسعد الأسعد

عليك الله يا بابكر قول لي القاريء استفاد شنو من مشاركاتك في البوست دا؟

القارئ العضو، عليك الله، إستفدت من مشاركاتي شنو في البوست دا؟

[نغم]

المشاركة الأصلية كتبت بواسطة طيبان
تصوير حالة البلد أثناء وجود الخواجات
وبعض الناس درشو الكرملة
حلاوة كرملة اندرشت واستعيض بها عن السكر للشاي ..
ناس في الفيها ..وناس في الفيها ..قمار بي جيهة وطار بي جيهة ..
كل زول في همو ..الناس في حالن كربة ، مالاقين سكر للشاي ، وناس واقعين القمار ، القمار بيلعبوهوا السفهاء . .
وبرضو ناس المديح في حالهم ، كل البلد جابت ممثّليها اليوم داك ..
في القراءات القديمة للرسايل ورد الآتي :
التموين أحزان ما جفًن
ضر ياعُمدة نسايمك هبًن .........( البيلقى هواهو يضرّي )
,يا خواجة زمانك لبًن.( لبّن كحال العيش أوان نضجه ،عز لقاهو الخواجة )
ستة خرًفن وتيس إنصفًن
,ستة خرفن فى فد يوم
الكتشينة..الودِع..البيرة..
الهدّام..( الهدّام أكل أراضي كتيرة في نوري وكان مشكلة حقيقية )
الزحف. (الصحراوي)
الحِيرة.

طرتنى حبوبتى
تقول لنا
شفن زمن نشرب الشاهى بالتمره
الله لا عادو
لكن يا حبوبه الزمن جاى علينا الله يستر
المهم حميد ناقل للاحداث بصورة تدهشك و تقنب تفتح خشمك

شوق شدّت لها ست جُرارة ، جرارة مريسة طبعاً ، الناس كانوا بيشربوا المريسة في اللمّات الزي دي ،، حميد في قصيدة السرّة بت عوض الكريم أورد في معرض احتفالاتها واحتفالات البلد بالإستقلال مخاطبا السرّة ( لي دور كبيقاتك تدور ) ..والكبيقات مفردها كبيق وهو اناء فخاري صورة مصغّرة من الزير ، يستخدم لحفظ الماء ويستخدم كذلك للمريسة ، ولي دور كبيقاتك تدور ، أي لأسبوع والمريسة تدور على الناس ..
الحتة دي أنا سرحت فيها شويّة لأفلت - ومافي قاسي علي الله - من تعقيب أحمد سليمان طه على اسم (شوق) الشدّت الجُرارة دي .

اها جبت الرايحه
تعرف كنت مع تفسير انها الشول سرنا تعبير حميميه
و حميد قاصد سرنا الخادمه فى البيت الكبير ودى لى اليوم فى
وانفر من حكاية ما عندهم نسب دى لعنى عشت معاهم فى الخرتوم دى جوا مع ناس جدى و خيالنى يقولو لليهو خالى عبدالفراج و بناتو اخواتم و المنحه بيناتم و عندما توفى جدنا عبدالفراج (وهو كان مشهور بعمل الزباله للبيوت) ذاعهو فى الرادى باسم خال فلان و فلان (خيانى انا)
وجدى يقوم بتزويج البنات و اياهو خالم
عندى سرنا ممكن تؤرل لقريبنا البعاد
او سرنا الخادم فى البيت وتفسيرى لسرنا هنا
انهن كانن يمتلكن كل اسرار البيت اى المفاتيح و الخزن و تموين البيت
و العلاقات الاسريه بعنى دورهن الاجتماعى ذات كبير
وده الخلا حميد يتقينو بهذا الاسلوب الفنان
اترحت كيف من تفيندك ده
الله يريح اختنا ماريل

[طارق صديق كانديك]

المشاركة الأصلية كتبت بواسطة بابكر عباس

القارئ العضو، عليك الله، إستفدت من مشاركاتي شنو في البوست دا؟

كأحد القراء الأعضاء أقول :

تحريك الحوار بشكل ايجابي جدا، مما دفع الأعزاء، اسامة وأحد طه وطيبان وأزهري سيف الدين وعبدالمنعم وغيرهم بشكل اساس الى التداخل الذي أنتج مداخلات متماسكة ومهمة في تناول بعض دلالات قصيدة ست الدار.

ياوجدي لو كلامي ده عصر عليك، عليك الله اعفي لي

[نغم]

اقتباس:
المشاركة الأصلية كتبت بواسطة بابكر عباس
دا، ما موضوع الخلاف مع طيبان وماريل! كدي أشرحي الأبيات البعد بلد صمي وشعب واحد
سمح عرفنا
وبما انك ح تلقنى من ست الدار ل قصيدة سوقنى معاك يا حمام (قطعت متابعتنا ل اسامة و طيبان فى البحيت)
لكن برد عليك عربون تبادل معرفه

بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
... ...
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام

مشهاداه : تم شرحو
تشهلنا: الشهيل عندنا تجهيز المسافر او الراحل الى دار تانيه جديده
وبقصد هنا تقاسم الثروات فى الوطن الكبير بالعدالة لانو بشهلنا على الدوام يكفينا شر الحاجه و بساط احمدى السبقتا رمز التعايش السلمى اللهو شيلنا لاعند اليوم ده و الله لا جاب غيرو من فرقه و شتات
نقل ليلنا: نزيح الضلمة البركت فينا دى
التقوى حيلنا: رمزية تماسك و وحدة
ودليلنا: فى عقل كل زول مننا دليلو علا دليل حميد ماف زول بينكرو ولاهو مدسوس عبر عنه تام التمام

نلقم:نعدل و نصلح فى السقف المعنى كل التمزقات الحاصل نرتقها
و التلقيمه افتكر انها بتاعت عرش البيت اى السقف والمعنى الكبير عملية البناء (دى اجتهادى)

الباقى ناس واضح ناس كتار دى مواريثم
تهدل: المشئ البطئ و طبعن فى الخنادق
مهبر: هبر يعنى قبض وده الشرك حق الطير وعندو هبر القتله ( ديل منو؟)
الفلاحة : تعنى النجاح ( زولن فالح و نجيض حميدنا)
برى ايمه: تعبير عندنا صادر كلو حنين و محبه من قلب الام الكبير استخدمو حميد بى لسان الام فى شان ناس المنافى الزيك ديل
بريه ياخ متين ترجع تعود تكابد فى بلدك

ثم انو ده حسب سماعى لا فى زولن شففنى ولا زولن دقيتو تلفون
يجوا الفطاحله يصلحونى شان اعقل

تخريمه
القصيدة دى قاعدة تبكى امى بشكل ماعادى
لامن اظنها من ناس المعارضه

[نغم]

فى ضمتك يا احمد طه
اكان ما صلحتنى فى اجتهادى ده
باقى الجنا ده داير يمتحنى
قايلنى هوينى
هو ما عارف انى لكه

انت فى مقام المعلم وهم قد شهدوا لك بانك الموسوعة
ياسلام ياخ
وسط اهلى الحنان ديل بس تتعلم و تستفيد
و ما تختا الدرب
ولا تتضهب


الفتل الفتل

[نغم]

المشاركة الأصلية كتبت بواسطة بابكر عباس
القارئ العضو، عليك الله، إستفدت من مشاركاتي شنو في البوست دا؟

خيل .. كلمة الحق التّناهِدْ في الشِّفاه
تعقِر بسيمة الصِّحْ
مع لوبي الجّروفْ
تغرِزْ ضريعات الحروفْ
ينشف مُرَاح الأمسيات ..
تتمطّق الأرضة المروق والأغنياتْ
اللّي الشّروق ..
والأرض
والحب والمطر
تضْهَب تتوه ..
وكتين يضيع عرق الجِّباه الشُّم ..
شمار في مرقة

اجابتى انك زول مهتم بالشعر
وتحاول ان تبحت و لك الاجر وحق الاجتهاد

لكن كمان شطحاتك
زى سنة قلمك


المقطع برضو عربون
طول بالك

[ماريل]

المشاركة الأصلية كتبت بواسطة اسامات

افتكر نحن مرقنا تماما من مضمون وهدف البوست ..
ماريل شوفي دربك راح وين وتعالي نمشي لاقدّام


.

لي ايلاف قريش تملانا هريتي
بنوك العيش تنفضنا فقر
ندقش شقيش بغادي كتر
وبجاى الديش
معقول ده قدر ؟
معقول ده الدين ؟
صلّوا مصلين ..
زكّوا مزكيين
اصبروا صابرين
قصرنا في ايش ؟
يا الزين معليش
معليش .. معليش
يا الزين انا اقول
قول بت حمدين
يوم لقت القش مسرق حوضين
قالولا قدر ما الله اراد
غامتلا حجر هاجت يا ولاد
ايوة الله اراد
نعم احن عباد
لكن ده اتر يبقى الله بشر ؟
ما معقول
شايلالي يمين
مع الله في زول
والزول بيبين
بيبين يا الزين
الله حي والعبد حنين
إنذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
ليك سنتين يا الزين اشمعنا
ما لمّيت في بيت يجمعنا
اختك قالت جاية متين
وكيف اخبار المغتربين
المدة آآ الزين طالت مالا
سلم لينا على العزابة
واي انسان النار صالا
من سور كوبر ولي شالا
قوللو صحانتك بكرة تفت
أي يا الزين زغرد ما قتلك
بت تام زين جابتلها بت
ست قصاف حتان البت
كيف الناس والحالة عموم ؟
والعزابة الكحيانين
سيد البيت عل ما كشاكم
لسع تقعو تقومو براكم ؟
قلبي معاكم
ربي يخدّر عود ضرعاتكم
بالي معاك يا الزين ود حامد
بالي هناك والشوق الشوق
خلاّ شدير الجوف محروق
راجي مطيرة الزين ود حامد



.

اسامات
كيفك و وينك انت من الحجى دى
اشكر لك حرصك على المواصلة
فى متن الخيط....
نمشى خطوة لى قدام زى ما انت قلت
ما تم تلوينه بالاحمر من النص اعلاه
يبدو له دلالة محددة...
السؤال موجه ليك يا اسامات
واسامة وطيبان واحمد طه
وسماح(باعتبار انها ما قاعدة ترطن)
وبابكر المجتهد جدا انو يخت عصاتوا(هنا)
و كانديك(الذى اعتقد ان له معرفة لا بأس بها)
ونغم المحبة (لشعر حميد)
ماذا يقصد حميد ب:
الاولاد السته
والبت
وماهى دلالة تام زين هنا؟؟
يا جماعة السؤال ده صعب
الماعندو فكرة ما يجى يدغمس
(وجدى خلينا نرجع نبنى وبطل الشوطنة البتعمل فيها دى)

[tahmoi]

بسمك اللهم
ماريل مرارت ومرات الف شكر على هذا المجهود لك ولك المشاركين ، لتوضيح هذه المفردات التي حقيقة كونت معجم ...
احتاج مراجعة الكثير مما فاتني فترة هذا الغياب
لي عودة

[ماريل]

المشاركة الأصلية كتبت بواسطة tahmoi

بسمك اللهم
ماريل مرات ومرات الف شكر على هذا المجهود لك ولك المشاركين ، لتوضيح هذه المفردات التي حقيقة كونت معجم ...
احتاج مراجعة الكثير مما فاتني فترة هذا الغياب
لي عودة

مرحب بى رجعتك
وانت من اوائل الذين مدوا لى يد العون فى هذا العمل
فى انتظار مشاركتك وكلى يقين بامتلالك ما يدعونى للعشم
اتمنى الا تطول بك الغيبات .....
مودتى والاحترام

[wadosman]

سوقنى معااك ياا حمام..

ود النصرى

[rams]http://sudanyat.org/vb/uploaded/741_1347039504.mp3[/rams]

لينك للحفظ

[أبوبكر عباس]

المشاركة الأصلية كتبت بواسطة نغم

مشهاداه: تم شرحو

بس التمّ شرحو دا، ياهو موضوع الخلاف؟
منتظر شرحك يا "أبيّة"

[ماريل]

المشاركة الأصلية كتبت بواسطة بابكر عباس

بس التمّ شرحو دا، ياهو موضوع الخلاف؟
منتظر شرحك يا "أبيّة"

ابدا ابدا
لا موضوع خلاف لا حاجة
انا مقتنعة بى كلام طيبان

[أزهري سيف الدين]

المشاركة الأصلية كتبت بواسطة ماريل

ماذا يقصد حميد ب:
الاولاد السته
والبت

تحياتي يا ماريل، بخصوص رمزية الرقم ستة والبت، أحيلك إلى دراسة الأستاذ كمال الدين بشير بخاري (حميد، ثروة الشعر وثورته):


*********
من يقرأ حميد بتأني يستطيع أن يرى عدة رموز تستوقفه ، فمثلا لابد أن يلاحظ تكرار الرقم ستة في العديد من القصائد والمناسبات فمثلا في قصيدة ست الدار يقول:
ستة خرفن وتيس ما كفن

وفي نفس القصيدة يقول :
هي يا الزين زغرد ...
بت أم زين جابتلها بت
ستة أولاد حتان البت

أما في قصيدة الجابرية فيقول :
إلا في ستة من الجابرية قالوا ..
تعبكم خارم بارم
يذهب حاكم خلف الحاكم
والجابرية بلد في حالها
أو :
ستة سنين قابض فوق جمرو
أو :
إلا الستة الصارو جماعة
فماذا يقصد حميد بالرقم ستة ؟
كنا في جلسة مناقشة نحن مجموعة من الأصدقاء ودار جدل حول هذه النقطة فقال بعضهم إنها ليست إلا رقم عادي جاءت به أوزان القصيدة وزعم البعض أنه يقصد أيام الأسبوع ويقصد بالتيس الجمعة ولكن هذا الرأي ليس صحيحاً لأن حميد يقول :
ستة خرفن في فد يوم إنصفن

فالرمز الذي يقصده حميد بالرقم ستة هو الأحزاب ( الاتحادي الديمقراطي – الأمة – البعث – الشيوعي – الناصري – الوحدة الجنوبي)أما التيس فيقصد به الحركة الإسلامية أو الجبهة الإسلامية القومية آنذاك ، بالإضافة إلى أن اللحية التي هي أحد صفات الإسلاميين ، وحميد يجعلها وجه الشبه بين الإسلاميين والتيس ، وكان الرئيس جعفر نميري قد انقلب على جميع الأحزاب لذا أشار حميد إلى أن :
ستة خرفن وتيس ما كفن
ثم عاد نميري فاستعان بالإسلاميين وصفى وحَجَر على بقية الأحزاب وطاردها ومنع نشاطها لذا قال حميد :
ستة خرفن في فد يوم إنصفن
ولم يأتي لذكر التيس ، ثم نجد نفس الرمز يتكرر في نفس القصيدة عندما تقول ست الدار مخاطبة زوجها الزين :

هيي يا الزين زغرد
بت أم زين جابتلها بت
ستة أولاد حتان البت

نجد أن ميلاد الأحزاب السودانية الستة أقدم من ميلاد الحركة الإسلامية أو الجبهة الإسلامية القومية أو جبهة الميثاق ، وهنا حميد يسخر سخرية مبطنة داخل الكلام حيث أنه من المعروف في البيئة السودانية عدم الاهتمام بميلاد الفتاة حيث يرغب الناس في ميلاد الأولاد ، وعند الفرح تزغرد النساء وليس الرجال لذا ينعكس الحال في واقع القصيدة إذ لابد أن يزغرد الزين لأن بت أم زين " وهي السودان " جابتلها "بت" فحميد في عداءه للحركة الإسلامية يجعلها تيسا وسط الخراف ، أو فتاة وسط الأولاد واختياره لوصفها بالفتاة إذ أن وجهة نظره أن التراخي من سمات الحركة.


المصدر:
http://www.hummaid.com/vb/showthread.php?t=152

[أبوبكر عباس]

المشاركة الأصلية كتبت بواسطة ماريل

ابدا ابدا
لا موضوع خلاف لا حاجة
انا مقتنعة بى كلام طيبان

إذاً، موضوع خلاف بيني وطيبان بعد سقوط شرحك