الأدلة القاطعة علي وجود الله ... لعناية هشام ادم ...

[فتحي مسعد حنفي]

شكرا ليك يا أمين والجيلي كان ماعارف براهو هو بالنسبة لي شنو يبقي كلامك دا تحصيل حاصل وما ليهو داعي..

[أمين محمد سليمان]

طبت و طابت نفسك السمحة دي يا عم فتحي ...
------
شكرا يا الجيلي ...

[أسامة معاوية الطيب]

المشاركة الأصلية كتبت بواسطة فتحي مسعد حنفي

للأسف سودانيات ما زي الفيس بوك عشان الواحد يريح راسو ويشيل زول من لستة الصداقة ويعمل ليهو بلوك..لكن ما مشكلة أنا هنا عندي شخصيتين من أحب وأعز الناس لي عملت لنفسي بلوك ولي شهرين لا دخلت في بوستاتم ولا حتي اتداخلت معاهم في أي حتة والظاهر كدا بقوا تلاتة..وبي كدا تبقي الصداقة ويذهب النت الي الجحيم..

البروف ازيك ... برغم تشجيعك للكورة الكعبة دي
انا قبل فترة ليست بالطويلة قليت الأدب مع عمنا وكبيرنا فتحي حنفي واسع ماني عشمان أكون من الشخصيتين الذكرن ديل لأنو لو طلعت منهن بتضايق ضيق شديد ... ياريت أكون من الشخصيتين الما احب ولا اعز الما كتبن هنا
وأرجو ان يتقبل اعتذاري البالغ بمناسبة راس السنة ومناسبة فوزكم الكعب دا
عم فتحي ... ياخي كل عام وانت أجمل ... وكل سنة ونحن كويسين ومبطلين شكل
سلامات ياخي وعام سعيد

[أبوبكر عباس]

المشاركة الأصلية كتبت بواسطة بدر الطائف

يابابكر بتبالغ لكن .
كونو الفريقين ماعندهم دفاع وقاعدين فى السهلة دى مابيعنى انه اللعيبة من عندنا.

تصدق يا بدر، واحدة من الحاجات الخلتني أزهد في كرة القدم بتاعتنا دي، هو قلة الأهداف وبالتالي قلة الإثارة، يا أخي، ما ممكن تسافر من مدني للخرطوم وتدخل كورة من العصر، وتطلع من الإستاد الساعة عشرة، وبعد دا، كلو، تكون نتيجة الكورة صفر صفر.
كرة القدم الأمريكية والسلة مثيرات جدا وكذلك أمريكا حبيبتي.

أمين يا اخي، ما كمان عيناك نائب أمين إستباقي لمنع الجرائم الإسفيرية؛ تقوم تحرمنا من شكلة محتملة زي بتاعة فتحي والجيلي دي!

[فتحي مسعد حنفي]

المشاركة الأصلية كتبت بواسطة أسامة معاوية الطيب

البروف ازيك ... برغم تشجيعك للكورة الكعبة دي
انا قبل فترة ليست بالطويلة قليت الأدب مع عمنا وكبيرنا فتحي حنفي واسع ماني عشمان أكون من الشخصيتين الذكرن ديل لأنو لو طلعت منهن بتضايق ضيق شديد ... ياريت أكون من الشخصيتين الما احب ولا اعز الما كتبن هنا
وأرجو ان يتقبل اعتذاري البالغ بمناسبة راس السنة ومناسبة فوزكم الكعب دا
عم فتحي ... ياخي كل عام وانت أجمل ... وكل سنة ونحن كويسين ومبطلين شكل
سلامات ياخي وعام سعيد

وانت بالصحة والسلامة يا اسامة
تصدق انت ما من الاتنين ديل ودا لسببين,أولا اهن سيدتين ما فيهم راجل عشان الراجل بقدر أغلط فيهو بدون أي ندم..
ثانيا أنا قلت من أعز وأحب الناس وما أفتكر الوصف دا بينطبق عليك ولا من بعيد وعارف كلامي دا قلة ذوق ولكنها حقيقة ويكفي اننا ما أعداء..المهم أنا في علاقاتي مع الناس ما بعرف لا أنافق ولا أجامل والبعتبروا صاحبي بكون ليهو صاحب بلا حدود وأنا قبل كدا قاطعت أخوي لمدة تلاتة سنين عشان كلمة بسيطة..وبالنسبة ليك انت طلبت طلب وأنا نفذتو ليك فورا بدون تردد..
عموما ياخ عفي الله عن ما سلف وكل عام وانت بخير..

[أسامة معاوية الطيب]

المشاركة الأصلية كتبت بواسطة فتحي مسعد حنفي

وانت بالصحة والسلامة يا اسامة
تصدق انت ما من الاتنين ديل ودا لسببين,أولا اهن سيدتين ما فيهم راجل عشان الراجل بقدر أغلط فيهو بدون أي ندم..
ثانيا أنا قلت من أعز وأحب الناس وما أفتكر الوصف دا بينطبق عليك ولا من بعيد وعارف كلامي دا قلة ذوق ولكنها حقيقة ويكفي اننا ما أعداء..المهم أنا في علاقاتي مع الناس ما بعرف لا أنافق ولا أجامل والبعتبروا صاحبي بكون ليهو صاحب بلا حدود وأنا قبل كدا قاطعت أخوي لمدة تلاتة سنين عشان كلمة بسيطة..وبالنسبة ليك انت طلبت طلب وأنا نفذتو ليك فورا بدون تردد..
عموما ياخ عفي الله عن ما سلف وكل عام وانت بخير..

واسي الواحد يتصرف كيف
مش قت ليك يا بروف كورتكم دي اكعب حاجة

[فتحي مسعد حنفي]

المشاركة الأصلية كتبت بواسطة بابكر عباس

تصدق يا بدر، واحدة من الحاجات الخلتني أزهد في كرة القدم بتاعتنا دي، هو قلة الأهداف وبالتالي قلة الإثارة، يا أخي، ما ممكن تسافر من مدني للخرطوم وتدخل كورة من العصر وبعد دا، تطلع من الإستاد الساعة عشرة وبعد دا، كلو، تكون نتيجة الكورة صفر صفر.
كرة القدم الأمريكية والسلة مثيرات جدا وكذلك أمريكا حبيبتي.

أمين يا اخي، ما كمان عيناك نائب أمين إستباقي لمنع الجرائم الإسفيرية؛ تقوم تحرمنا من شكلة محتملة زي بتاعة فتحي والجيلي دي!

بالعكس يابابكر أمين وفر عليك انتظار بلا فائدة عشان أنا والجيلي لا يمكن تكون بيناتنا شكلة وعشان كدا أنا قلت تبقي الصداقة ويذهب النت الي الجحيم..الجيلي ما معتبرني عم ولكن معتبرني والد عدييل والابن عندو حدود بقيف فيها وعشان كدا خاطبني بي شهاب الدين وما قدر يخاطبني باسمي..لكن تفهم كيف زول عايش مع الابل

[أبوبكر عباس]

المشاركة الأصلية كتبت بواسطة فتحي مسعد حنفي

وعشان كدا خاطبني بي شهاب الدين

عليك الله يا فتحي، أعفي لي؟
لانو أنا وديت شهاب الدين؛ لصواريخ شهاب الإيرانية وكنت مترقب الكيماوي.
الله يجازي البروف

[فتحي مسعد حنفي]

المشاركة الأصلية كتبت بواسطة بابكر عباس

عليك الله يا فتحي، أعفي لي؟
لانو أنا وديت شهاب الدين؛ لصواريخ شهاب الإيرانية وكنت مترقب الكيماوي.
الله يجازي البروف

انت كدا خليت الفار يلعب في عبي والظاهر حأحضر لي كم جراد علي كم سكود لزوم الاحتياط..لكن تعرف يابابكر تحليلك دا وارد جدا وأنا القلبي طيب وعوير

[تماضر حمزة]

المشاركة الأصلية كتبت بواسطة أمين محمد سليمان

طبت و طابت نفسك السمحة دي يا عم فتحي ...
------
شكرا يا الجيلي ...

خلّي المحاكاة!

أنا العملت فيها حمامة سلام هنا
وانت البعاتي..

[وهاد ابراهيم محمد]

غايتو الله يجازي الـ playoff و وهاد زاتها
خايفة أقول حاجة تاني تقوم تجي في راس البروف شخصياً
نحيّر الناس في البل
_____

كل سنة وانتو طيبين كلكم..
سنة سعيدة وزايدة حلا.

[أمين محمد سليمان]

ساره القاعدة !

المشاركة الأصلية كتبت بواسطة سارة

انحنا الشحدة دى فترنا منها
الشى بالشى هسى عمو امين
البتفاصح دا لو ما سبحتى ودعواتى كان
لقى الفوز المهبب دا

والله يا سارة فزنا في آخر ثانية في المباراة ... أتاريك واصله !!
-----------------

المشاركة الأصلية كتبت بواسطة بابكر عباس

تصدق يا بدر، واحدة من الحاجات الخلتني أزهد في كرة القدم بتاعتنا دي، هو قلة الأهداف وبالتالي قلة الإثارة، يا أخي، ما ممكن تسافر من مدني للخرطوم وتدخل كورة من العصر، وتطلع من الإستاد الساعة عشرة، وبعد دا، كلو، تكون نتيجة الكورة صفر صفر.
كرة القدم الأمريكية والسلة مثيرات جدا وكذلك أمريكا حبيبتي.

يا بكة ... كرة القدم الأمريكية - في تقديري - أكتر لعبة مثيرة و في معظم الأحوال ما بتعرف البغلب منو لحدي آخر ثانية، مشكلة الناس انها ما عارفة قوانينها و بتشوفها كلها دفير و شلاليت و الموضوع غير كده خالص ... مشكلتها الوحيدة انها ما ممكن تتلعب في بلد تعبانة لانو فيها تكنلوجيا ما أظنها تتوفر في بلاد قريعتي راحت ...
-----------------
سماسم البلال !!
لعلك بخير يا صديقي

المشاركة الأصلية كتبت بواسطة أسامة معاوية الطيب

واسي الواحد يتصرف كيف

تتكي علي كلام عمك فتحي ده :

المشاركة الأصلية كتبت بواسطة فتحي مسعد حنفي

عموما ياخ عفي الله عن ما سلف وكل عام وانت بخير..

----------------

المشاركة الأصلية كتبت بواسطة فتحي مسعد حنفي

لكن تفهم كيف زول عايش مع الابل

فتحي يا عمك، بكة ده مخلوق من طينة الاسي، لو في حاجة واحدة محسنه ليه فهمو و أخلاقو ... ياها الابل دي !!
-----------------

المشاركة الأصلية كتبت بواسطة تماضر حمزة

خلّي المحاكاة!

أنا العملت فيها حمامة سلام هنا
وانت البعاتي..

حمامة سلام ؟!!
بامارة المغنطيس الجايه تلميني بيه !!
---------------
وهاد يا ستهم ...

المشاركة الأصلية كتبت بواسطة وهاد ابراهيم محمد

غايتو الله يجازي الـ playoff و وهاد زاتها
خايفة أقول حاجة تاني تقوم تجي في راس البروف شخصياً
نحيّر الناس في البل
_____

كل سنة وانتو طيبين كلكم..
سنة سعيدة وزايدة حلا.

و إنت و المعاك طيبين ..
عليك الله ما تقولي ... يا دوب روقنا المنقة !!
بعدين يا وهاد البروف ما عندو راس، عندو صلعة تنوء عن حملها الجبال !!

[أمين محمد سليمان]

المشاركة الأصلية كتبت بواسطة نسرين عزت

حقيقة وجود الله سبحانه وتعالى
ففي كل شيء له آية تدل على أنه الواحد
وجود الله سبحانه ابتداء من ضمير الإنسان وفطرته
بسم الله الرحمن الرحيم
{ فأقم وجهك للدين حنيفا فطرت الله التي فطر الناس عليها لا تبديل لخلق الله ذلك الدين القيم ولكن أكثر الناس لا يعلمون }( الروم: 30 )

المشاركة الأصلية كتبت بواسطة اثينا

يسخرون كل قواهم العقلية ويجهدون امخاخهم ليشككوا في وجود الله كحقيقة...وباابسط مقومات العقل وصلت البهائم لذلك من قبلنا من الاكثر بهيمية اذن.... انا من متابعه جيده لقناة النايشونال جغرافيك .....من هناك اذدادت قناعتي قناعة ان الله نور وهو دليلنا للاشياء ويوما لن تكون الاشياء دليل اليه

نسرين و أثينا ... شكرا علي المرور الجميل

[أمين محمد سليمان]

المشاركة الأصلية كتبت بواسطة خالد غالي

امين ياصديقي
لغاية الان ماقادر اقتنع بمبررات البوست ده ... قلة ادبو عليك شخصيا رديت عليها هناك في وقتها بنفس الكلام ده ... اعادتها هنا للرد على قلة ادبه تجاه الآخرين وتجاه الرسول صلى الله عليه وسلم .. انا عن نفسي شايفها غير مبررة وحتى اداة الرد المستخدمة شايف فيها استقواء ومسك يد ملوية سلفا
المهم ما اطالب به هنا قد يكون فيه مثالية عالية وهي قطعا غير ملزمة لك .. فقط هو العشم في اخلاقك ونبلك
يبقى الاختلاف في موضوع البوست وفي طريقة التعاطي مع الموضوع ككل .. وتبقى المحبة والاحترام

الغالي خالد

المحبة و الأحترام ديل ما ممكن يتغيرو لإختلاف وجهات النظر ... طالما مبرراتي ما اقنعتك مافي مشكلة لكن تأكد إنو أنا كنت و ما زالت صادق فيها .
الحاجة الوحيدة الوقفتني في مداخلتك دي انك ما ناقشت كلامي، بس جيت قلت إنو ما مبرر ليك و طبعا دي ما مشكلة، لكن شايفك مصر علي قصة إنو البوست ده إعادة للبوست الفي س. أونلاين رغم إنو أنا كررت إنو البوست ده كان مفروض يكون فيهو زيادة خير
هشام يا خالد ما ناقش و قش خشمو ، هشام ناقش و أساء في حتت ما بتستحمل الأساءة (علي الأقل بالنسبة لي ) ، الحوار و النقاش حبابو الف ما كلام ساي حقيقة واقعة من يوم بقيت اكتب في اسافير الله الواسعة دي، اساءة و قلة أدب ما معانا ... الزول الداير الناس تحترمو بحترم الناس عشان ما نبقي في جنس الكلام ده ..
و كويس جدا يا خالد انك منتبه لمسألة المثالية العالية دي لانو نفسي الأمارة بالبل دي لو كانت فوتت لهشام كلامو ده كنت ح اتحير حيرة شديدة جدا !!
محبات و إحترامات لا ليها أول لا ليها آخر ..

[أمين محمد سليمان]

المشاركة الأصلية كتبت بواسطة الرشيد اسماعيل محمود

كل الناس السافة، انتبهت للجزء دة، لأنو دي حتة المقارنة البتجي بعد السف

يا رش ... إنت قايل خالد الغالي واجع قلبنا مالو ؟ ما لانو ما سف !!
هسي لو كان سف و قارن من الأول كانت القصة كلها وقعت ليه ؟!
-----------

المشاركة الأصلية كتبت بواسطة خالد غالي

انا قصدي الدافع الحقيقي الخلاهو يقدم الاعتراف ده وركز لي على الحقيقي دي بالله واديها سفة

غايتو كان فهمت كلامك صاح يا خالد يبقي أخير منك أنا ده في قصة النبل دي !!!
الفهمتو انك بتفتكر إنو الدافع الحقيقي الخلا هشام يعترف بسرقاتو الأدبية ياهو البوست ده !! بالله لو فهمي ما صاح و زعلك أمسحو في وش الجيلي أو بكة، أيهما أقرب !!