و هذه مرثية هاشم صديق
........
عزيزى الدوش
طرف شاهد فى مليون ميل
فى مجرى السيل
طرف سدره
فى قاع تربه
مبلل بى مطر غربه
طرف وادى
رقد هادى
طرف أم در
طرف شارع مولع و حر
طرف عالم ... رجع سالم
صوابع اليد
بعد كمّل سنين العد
طرف وجعه ... بقت شمعه
طرف خاطر ومض لمحه
فِ بال سمحه
طرف حافر فى درب الخيل
طرف شاهد فى مليون ميل
زمان كنا ... و زمان يا حليل
نشيل الود فرح مطلوق
همس الشوق
عمار السوق
دخول و مروق
و كان شارع ... طويل فارع
و حسّع كيف ... غشانا الصيف
صبح دخرى العمر مسروق
عزيزى الدوش
مساء الخير ... صباح النور
شدرنا نشف ... بيوتنا قبور
حلم العافيه بات مطمور
بلد بى حاله صبحت سور
سقتنا الريح غبار عتمور
زمنا كضب ... جوع و كجور
شرقنا الخوف ... غلبنا الشوف
فى عز النور
عزيزى الدوش
طرف شاهد فى مليون ميل
زمان يا زول ... بلدنا جميل
نقول الحق فى عين الفيل
و حسّع كيف
و سيف شرف الكلام مكسور
عزيزى الدوش
قريت يا زول حروف نعيك
قريت يا زول ؟!
قريت يا زول ؟!
جاك ورد الشكر مفروش
و سيل الخطبا رجّ الحوش
بقيت يا دوش أمير شعرا
دحين يا خوى ... و قبل الموت
كان صوت الشعر مقروش ؟!؟!؟
أخير تضحك هناك
ياخى الضحك بى قروش
عزيزى الدوش
يا أشعث ... و يا أغبر
من الحُرقه و زمان الغش
زمن مجنون ... وجنّو فنون
حتى الضل يدُخل القش
يقولك كش
بقت أمثال برسم الحال
ده حال بطال
نحكّ الراس
و فوق الراس ... نلاقى الفاس
زمن ( دفار ) ملان بالعار
صوت مكتوم فى بطن الغار
زمن مجزوم كبار و صغار
و غيظ محموم و بارده النار
أه يا دوش
ده زمن البوش
و راس مدووش
أخير يا زول تنوم ترتاح
دحين يا خوى فى وادى الموت
فى زول مظلوم ... و حقا راح ؟!
دحين يا خوى ... فى ناس ناعمين
جُعاص و سُمان
و ناس ضامرين
نقول اشباح ؟!
عزيزى الدوش
تشد الخيل تفوت عدمان
و خيرنا حكِر على الكيمان
و فى الآخر كمان بتشوف
مرتب كم شهر موقوف
مسرح وين
بحل الدين ؟؟
دراما شنو ... و تحوق فى منو ؟؟
شعر مردوم
ونقحى الجوع يحاحى النوم
وكل الخير ... فى إيد الغير
و أسياد البلد بالكوم
يفوت كسرى ... يجونا الروم
يفوتوا الروم ... يعود كسرى
نبيت نحلم صباح بكره
يبل الريق طرق كسره
يضيق الحال خرم إبره
و من حالنا الأمير يبرا
و شوف يا دوش
محبوس الجعان فى العيش
و أسراب الصقور حرّه
أخوى الدوش
أخط فقدك ... أغمّس حرفو جوّ الدم
يدقدق فى الرويس ينتح
شقا المشوار و قطر الهم
أعاين فى الزن لافتات
حروفه كضب و لونه عدم
أشعار من رماد و سواد
جرايد للمديح و الذم
بنوك لملوك
و ناس صايمه و ناس بتلوك
و تسهيل للقريب و العم
دحين يا دوش قبُل ما تموت
أكان فى البنك حسابك كم ؟!
هو مسرح وين بحل الدين
دراما شنو ... و تحوق فى منو
معاهد إيه ؟؟
تدخل حاج و تمرق بيه
شنو التلفاز ... هو يا أستاذ ؟؟
و مافيا الحوش
تطرد ناس وتدخل توش
ده عصر المصْر
منة البحتاج دروس العصر
عشان يفهم فى ناس بتبيع
ذمم فى السوق
عشان تطلع تنطط فوق
شبك للحش ... و مليون وش
و حبل المكر صار مطلوق
عمر ياخوى
متين عبدو البلد ح يروق
متين دنيتنا تبقى شــروق
متين دنيتنا تبقى شــروق
|
