اقتباس:
ياخي موضوعك ده فيهو جندرة واضحة.
ليه ما جبت سيرة الأتان، بالرغم من تحمّلها لصعاب لا يقدر عليها الحمار المحترم زائداً على إنّها الأكثر تعداداً من الذكور.
السبب شنو في الأكثرية؟
عكود
|
بجاوب ليك على الأكثرية وقصة الجندرة بخليها "للزميل" مُبر (تُقرأ الأصيل مُبر). أما سؤالك عن سبب كثرة الإناث دون الذكور؟ الناس يا سيدي بتشتري الحمير من أجل العمل بها وفي نفس الوقت بتفكر تحافظ على رأس مالها بتوالدها، يعني انت لو محتاج ليك لحمار ومشيت للنخفور في ميدان بلالة، على طول بتفضل الأنثى على الضكر، ليش؟ الحمار الضكر تكون راكبو وماشيلك لفاتحة، دخلتك للحلة والناس قاموا إستعدوا لشيل الفاتحة، يقوم يشوف ليهو حمارة حايل، والله يبهدلك جنس بهدلة ويزيل الحزن من ناس الفراش!
طيب، البيولوجي بقول: ولادة الضكور والإناث، فيفتي (50) فيفتي، طيب الحمير العايرة ديل بمشوا وين؟
أغلب الظن أصابع الإتهام بتشير للجزارين الكيري، انت قايل الكافتريات الكانن في قوز أبوضلوع والتبريد قبل الظلط ديك، لحمة طبيخن كانت ضان؟!
