زهرة الغَرَق

[Mohammed Qurashi]

بالله عليك يا صديقي العزيز، أوقف سيل المعلومات هذا الذي لا تجيد غيره، وأرني لك ملاحظةً واحدة ملكك، وأصيلة، عن هذا الوجود بكامله

كل الكون تقوم في أساسه العشوائية التامة .. و هي عين مشيئة الله المطلقة .. و أساس النظام الذي يتبدى لنا هنا و هناك !!

كل الذي أعرضه هنا من ألعاب وأمثال وحكاوي وقصص وجنون، هل سمعت بمثله في حياتك؟ هل تأمّلت فيه يوماً لتعرف مصادره؟
هل هنالك شيءٌ مخلوق يأتي من العدم؟

و لا يزال محسن يستعمل الجهل بإبريق الشاي في الفضاء* ليثبت أنه موجود
و بالمناسبة : كل شيء يأتي من العدم

لكن أمش وأجي أقول، كُلٌّ ميسَّر لما خُلق له، وأنا خيالي هذا سيقفز حتى إلى العدم لو لاحت فيه فكرة، ناهيك عما أفعله هنا، فهذا أمره آخر، آخر، آخر.
وأنا مالي منو ألف يد، مش يدين اتنين، ولما أنتهي من الحاني علي فيه دا، بجيك في محلك، وبنشوف.

ماقلت إثبات و قراية و تفاكر و بحث عن الحقيقة .. شايفك قلبتها تحدي
عموما لدي جاهز و لدي جاهز
و الفورة مليون ..

P.S:
خسارة كنت قايلك بتقرأ بين سيل معلوماتي ده أفكاري و مواضع نقدي لكن حأضطر أقعد أشرح ليك زي الزول الما لبيب .. الخيال من غير معلومات شن فايدته .. أسي متفنجط علي بالآلاف الرموز القريتها قبيل مالك كان شايف المعلومات ما بتقوم الشوف ؟؟
_________________
* التفاصيل في بوست شهااااااب كراااااار
و يا شهاب بطل شماته و ورينا رأيك شنو هنا .. ماتلخبط الكيمان

[محسن خالد]

والله ضحكتني بانتقام دي، هسّع ما بتخجل من شماتة شهاب تزيد أكتر
ياخي أنا والله برفعكم رفيع عشان (تتعلموا) منّي، عديل كدا، أقولها ليكم كلكم بالشارع المستقيم، عشان (تتعلّموا تبلعوا البحر).
تقعدوا سااكت كدا، لا معرفة بتراثكم لا مثل لا حجوة لا شعر لا تأمّل في ثقافتكم السودانية دي ذاتها، عشان تعرفوها جات كيف ومن وين؟
لا.. عطالة مطلقة بخصوص ثقافتكم، الخواجة قال، الفرجكاني قال... وحسبو كمان معاه عقدة الخواجة، حسبو دا هسّع قبل كدا سمع بالطاب وألا قول نفّة، الأقرب للخواجات والبهوات حسبو ود الخرتوم، وألا أنا ود الخلاء المالي جرباتي ثقافة سودان سودان سودان...إلخ؟
ياخي كلام الخواجات دا كللللو، قاعد في رموزكم دي، إنتو ما بتشوفوا هم بلقطوا فيها كيف، وبصرفوا فيها ملايين الدولارات والباحثين عبث يعني؟
إنتو لو ناساً بتعرفوا ثقافة، وبتعرفوا قيمة ما تصنعه كتاباتي عن ثقافتكم، كان مراجعي للغة الدينكا وتراث الدينكا كلو إنجليزي!!!
ما بتسألوا روحكم ليه؟ ليه الخواجة بهتم بالكلام دا وبدرسه وبقراه وبفككه، وإنتو لا. وإنتو أولاد الشمال السجم، وأولاد الجنوب الرماد، دا الرماد ودا قدحو، الثقافتكم لازم نقراها بالإنجليزي!

وقدر ما أطوّل بالي عشان تنتبهوا (لا) تجوا تعملوا لي فيها علماء، بكلام مُر، حتى غير منضبط اللغة.
أنا دا البالع اللغة بلع دا، ولاهسّع بتكلم في حتة اللغة دي ما اتعديتها، وأدهبش وأكوس في رموزها وأشيل وأقارن علي معابدنا السودانية، كان المروية دي تتباصر. تجوا تتمسخروا بلغة أي سطر فيها غلط. ولو سألت تا التأنيث الأنا بنقل فيها من محل للتاني دا شنها؟ ولا في زول جايب خبرها؟ ولو حكيت القواعد اللغوية دي مع أي متونس منكم، ح يقول لي إنت إسكافي، ودي ما شغلة العلماء، وبعد داك تفتوني في اللغة؟
تجي مرة تقول لي (توسل) مرة (حاني عليك) مرة (علم الأساطير) (مرة ح تعتذر عن كلامك دا)، أعتذر عن شنو ياخي؟ عن إني شوفتك لعبة أريكا لأول مرة في حياتك مثلاً؟ وإني رسمتها وسمحتها ونظمتها، حتى لو ما قدرت أفك منها طلسم رمز واحد، فياني جهزتها لمن يأتي بعدي و"لفت" إليها الأنظار؟ دا هسّع داير ليهو شرح عشان الزول يعرف مردوده على الثقافة السودانية، وينتبه لكمية المعرفة البدفقها هنا عن الثقافة السودانية، الشبعان منها شبع، لما أترّع عاااااع عاااع
والانتباهات دي والقراءات حتى لو فرضنا فرضاً إنها طلعت كلّها خاطئة، الأثر الآخر للجمع هذا ألا ترونه، فلماذا الاعتذار والندامة كأني بسوي لي في جَنيّة!؟
(توسل) مرة (حاني عليك) مرة (علم الأساطير) (مرة ح تعتذر عن كلامك دا)
وأنا أعاين فيك ساااكت، الزول الضهبان فوق حمار نوم دا ح يصحى متين، لأنَّ هذا الموضوع كان صاح كان غلط كلو فوائد، ومافي حاجة بتجيب الاعتذار ولا كمان (من يضحك أخيراً يضحك كثيراً)، شفتو المحنة كيف؟
لأنّي عارف رقبتي فمن ناحية تلقاني فنّان جد مش لعب، ولما تصادف الحتة دي منّي وتصطدم بيها بالحساب أكتر من سبع مرات، وبرضو ألقاك ما بتنتج أي حاجة كانت بخصوص الثقافة البشرية عموماً، وقاعد تتلاعب بجهد غيرك كمان، وتستخف، ح أعمل ليك شنو يعني؟
فطيرة بلبن؟
لا، ح أصحيك.
ح أجاملك يعني بحجة إنك صديقي؟
أبداً والله، صداقتنا محلها ما المعرفة.

-----------
ولو ربّنا رجعني السودان تاني، ومرضت، برضو ح تجيب الحقن الحارات ديك وتحرسني للصباح. الاستجدّ شنو يعني؟*
لما أقول ليكم عودكم لسّع طري، ما بتصدقوني. والله الخايف منو، إني أموت وأخليكم وراي بالحال الممزّر دا. دايركم تجهزوا وتصحوا لثقافتكم دي، فهي جذر الوجود، والناس المهتمين أصلا بالمعرفة شوية.


----------
وكمان أتعنقل في الكوريلا بتاعتك قدام، وأقول ليك "وصّلني" لعمك موسى في أم ضريساء

[شهاب كرار]

كل الكون تقوم في أساسه العشوائية التامة .. و هي عين مشيئة الله المطلقة .. و أساس النظام الذي يتبدى لنا هنا و هناك !!
محمد قرشي

اتفق معك ... بعد التلاعب قليلا بموس اوكام طبعا

و يا شهاب بطل شماته و ورينا رأيك شنو هنا ..

انا يا محمد الزي محسن دا لمن يقول انو انا شهاب دا راسي ماف، ما بمد يدي اهبش راسي قبل ما يتم كلامو...
أنا بؤمن بي بصيرة ذوي الموهبة - عليك الله اعمل كوت لي بؤمن دي وحوم بيها البوستات كلها سمح - ولمن محسن يقول ليك انا رأيت فقد صدق...
لكن تفسيرو للرؤية دي ما يبقى عامل زي تفسير فرويد الجا سبا ليهو دين قبل كم مداخلة كدا، يفسر احلامو براهو ويقول دا العالم...
يعني بعد ما يتم كلامو كان بقى زي فرويد السبا ليهو دين طار ليهو عدييييل كدا، بنخلي براهو يزعط نفسو حرم كوتات ساي من كلامو...
محسن يكمل كلامو الاول وكان اختلفنا ولا اتفقنا وفي النهاية بنساعدو انو يشوف الحاجات بوضوح...
كان بقا حلق بعيد شديد لمن الرؤية غامت والحاجات صغرت شديد بنوطي شوية...
وكان قرب شديد كمان من الواطة لمن بقا ما قادر يشوف بنديهو دفرا
انا وانت وبابكر ومبر وقيقا وحسبو وبدور وكل الناس الجميلين الهنا
لانو محسن جميل، جميل شديد ياخ وحق جمالو دا علينا نصبر عليهو
لمن يقول نقطة، اها رايكم شنو؟

محبتي التي لن تعلم بقدرهاا ابدا ابدا

[بدور التركي]

صبرا آل ياسر......

محمد امشي ذاكر
عايزين نجاح حلو زي اللكوم

الله يجعل ايامكم نور في نور كمشكاه....

[محسن خالد]

انا يا محمد الزي محسن دا لمن يقول انو انا شهاب دا راسي ماف، ما بمد يدي اهبش راسي قبل ما يتم كلامو...
شهاب

بالله شوف أدب الزول الما عندو دين دا سمح كيف!؟

-------
المحيّر في محمّد ما داير يسمع ذاتو أنا ح أقول شنو، كلامي لازم يتفطّس قبل ما يتقال ذاتو.
المسألة بتاعة عدم التصديق دي، محل نقاشها معاه ما هنا، وجميل أنَّك أنت الذي أشرت لها يا شهاب وليس أنا.
بعدين يا شهاب الموضوع دا لو طلع ممزّر، والله إلا يكون من استحضاري ليه.
وممكن الناس تستفيد من الروايش البتجي فيه، ليه محمّد ما داير حتى دا.

أمّا لو طلع ممزّر جد جد، ح تلقاني أوَّل زول بدأ الضحك من (استحضاري) ليه، وح أقتنع إنو كلام موسى صاح، وبتمها جكّة إيمان
لامن نلاقي ربنا عدييل، والخطفناه بالقلبة، يقع لينا سمح.

[الجيلى أحمد]

سلام ياود البتولا
مواصلة لى كلام الشباب وكلامك

عندى مشكلة عويصة مع (دى جافو )

[محسن خالد]

أدناه أحدث أبتية عثروا عليها قبل فترة يسيرة جداً وأعلن عنها الباحث الذي عثر عليها وزوجتُه الباحثة في مؤتمر صحفي، ولم تفكُّ رموزها إلى الآن. ويعتقد الباحثان أنَّها أبكر هيروغليفز حسب تصريحهما. بالوسع مقارنة هذا الطائر أب عرف مع الطائر الذي رأيناه من الهيروغليفز المروية ويرمز إلى الحرف (ك).
انتبه لليد الممدودة في أوّل الشق الأوّل من الرسمة، وإلى "الـكـراع" "الهاربة" أسفل الشق الأوّل، وقارنها بالكراع الراسخة من الأبتية الأخرى أعلاه، التي في حقبتها كانت الكراع ترمز لحرف (ب).

ضع الحرفين أدناه في متناول التصوُّر (دال) و(باء)، من حقبة أخرى هي التي قلتُ عنها إنّ أبتيتها أقل وثنية.

حرف (دال) و(ذال) هما أدنى حروف الأبتيات جميعها من ناحية دلالتهما على السالب، هما الأخيران سوءاً (أي كعبات). حتى حرف (لام الخفض) قبلهما، وسنعرف السبب مستقبلاً لو ربّنا هوّن.
ولكن ركّز على رمز حرف (د) وهو (يد) بوضعية قتالية، أمَّا رمز حرف (ب) فيد مبسوطة، من هذه الأبتية التي سبق وقلتُ إنَّ نسبة الوثنية فيها ضئيلة.

قارن المحتوى الدلالي الذي تتوصّل إليه من طريقة رسم اليدين، بالآية الكريمة التي تُكَلّمنا عن توقيت المشاجرة بين ابني آدم، وقت الشكلة، وماذا قال هابيل المقتول، المسالم، للقاتل قابيل. الأسماء بالطبع ذكرتها القصص ولم يذكرها النص القرآني نفسه.
{لئن بَسَطَّت إليَّ يدك لتقتلني مآ أنا بباسطٍ يدي إليك لأقتلك، إنّي أخافُ اللهَ ربَّ العالمين} المائدة، الآية (28).
وضع حافظة المفهوم هذه في مدى استخدام مقارناتك:
{يا ود رَيَّا تعبّي الدَّيا}.
دَيَّا Dayya

لاحظ أيضاً، أنَّ هذه الأبتية تحتوي على غصن الجنّة الذي تقول القصص إنّ آدم خرج به، ما قلتُ إنّه جذر لعلامة السؤال. وتحتوي على الرأس المخاوس، رأس الشيطان، وتحتوي على مندوف، ورموز قصة الدينكا التي أشرت إليها سابقاً.. إلخ
تأمّل فيها جيداً، وحاول أن تختلق من خيالك قصة لهذه الصور، هل بوسعك فعل ذلك؟


---

هذا مدخل كي آتي وأشرح مسألة أنَّني أعتقد أنَّ الأبتيات هذه، كانت في أصلها تصويراً صامتاً، ومتسلسلاً لقصّة الخلق. ولكن تبدّلات الحقب والأديان هي التي كانت تقوم بتغيير رموزها بين كل حينٍ وآخر. يبدو أنَّ هذه النقطة ضرورية كي يكون ما أفعله في مدن الأسماء مفهوماً، سأشرح باختصار ومن خلال مجرَّد نموذج سأقوم بعده بتبديل الأبتية تماماً، حين طرحي لمقترح ختامي لها. أي أنّ تتبعي الحالي هو لتوضيح الفكرة فقط، ولا يعني أنّ هذا تصوري لأقدم أبتية كانت.
كُلُّ الأشياء على اتصال ببعضها.

[محسن خالد]

ياا جيلي القوم
مشتاقين ياخ
شنو الفتوح دا؟


---------
يا أخوانا الرشيد مشى وين؟
إن شاء الله بس يكون طيّب وبخير.

[Mohammed Qurashi]

المشاركة الأصلية كتبت بواسطة محسن خالد

ولو ربّنا رجعني السودان تاني، ومرضت، برضو ح تجيب الحقن الحارات ديك وتحرسني للصباح. الاستجدّ شنو يعني؟*
لما أقول ليكم عودكم لسّع طري، ما بتصدقوني. والله الخايف منو، إني أموت وأخليكم وراي بالحال الممزّر دا. دايركم تجهزوا وتصحوا لثقافتكم دي، فهي جذر الوجود، والناس المهتمين أصلا بالمعرفة شوية.


----------
وكمان أتعنقل في الكوريلا بتاعتك قدام، وأقول ليك "وصّلني" لعمك موسى في أم ضريساء

و الله يا محسن ما تتخيل كمية الحزن الدخلتني فيها بكلامك ده قدر شنو !!
حاسس إني دوافعي في حواري معاك ده مغيمة و ما ظاهرة .. تعرف لو كان أي زول غيرك كتب كلامك ده أنا أصلا ماكنت حأتداخل معاه و بستنى لحدي يخلص كلامه و السلام .. أنا حقيقي عارف كويس كمية الجهد و المعارف اللي إنت كابيها دي و ما طالبني حليفه أول إنطباع لي لما بديت تنزل كلامك ده كان إحساس إنك حتفك شفرة اللغة المروية دي .. بس بقيت لي عامل زي نيوتن اللي إنشغل بالخيمياء و التنجيم و كان بيفتكر شغله فيهم أهم بكتير من قوانينه الثلاثة لحدي ما نهره صاحب ليه علشان ينشر شغله اللي كان ما مقدر أهميته أو ما شغال بيها !! .. أنا في مكان ما جواي خايف من كلامك ده لأنو حاسس فيهو نبرة الوداع بتاعة الموت ديك أو على أحسن الفروض وداع عزلة ما مجيدة تبعدك عننا .. أظنك قايل إني بدافع عن وجهة نظر علمية ما بتعصب الجاهل لما لا يعرفه بس !! ما قادر تشوف عنصر الخوف عليك و الهلع من إنك تطش بعيد لمن ما نقدر نرجعك لينا .. يعني أنا أسي المؤمن ده حيضيرني شنو لو طلع كلامك كلو صاح ؟؟!! حأكون سعيد طبعا لأنك بتأصل لحرفية فهم ما محسوب على الدين في النهاية !! .. لكن يبدو إنو حساسيتي تجاهك هي المخلياني حاد في نقدي اللي إنت شايفه كعقدة خواجه و قصور خيال و جهل بالللغة !!
عموما ما مشكله .. حصل خير .. بعد الشر عليك من المرض و الألم (و لو كان من ثمار الحس كعطاء إلهي) .. و الحقن الحارة ديك الطب زاتو خلاها و عربيتي بقت مواكبة الحداثة و بتمهلك كويس بعد دلعك في لندن
كن بخير يا صديقي و قول كلامك .. قشة ما تعتر ليك

[محمد حسبو]

و الله يا محسن خالد بقيت تجليها واقفة، بعدين لو الواحد معصور مع الكفيل و ما بواليك كما يجب ما معناها تصلي عليهو صلاة الغائب، اللوح دا محفوظ و بيجي يتفلفل زنقة زنقة، تجليها واقفة دي زي مداخلتك رقم 565 من ضنبها لقرونها.
بعدين حكاية ما بتعرفوا تقروا و يلزم تمشوا تشوفوا الأقلام الخ الخ، الحكاية دي لن تنجح مع الشباب الثائر دا، بقيادة ود القرشي و شهاب كرار، بابكر عباس (الصادق المهدي) أنا دايما بفضل يخلوهو مع الخوالف، كان طلع مع الناس ممكن في أي لحظة يقلب طابور خامس، اعتراضاتنا عليك يا عبد المحسن مممننننننننهههههجججججييييييية، نحنا ذاتنا نتهمك بالتعامي عنها، و أنك بتجليها واقفة، لأنو نحنا المعارضينك ديل ما على قلب رجل واحد، و كل منا له ما يريد، دا عشان أنا عن نفسي ليست عندي نبؤات و لحظات تجلي، لكن شايف شهاب و محمد حكوا لينا بعض ما معهم من إشراقات، و أرى وجاهة في مقترح محمد قرشي، يمكنكم تكوين حلقة إشراقيين لتبادل هذه الأشياء و تزجية الساعات، ما علينا، دا استطراد ساي، أها أنا بقول ليك أنك بتكسر في رقاب الصور و الرموز و الأصوات كسر بالجملة، إبادة جماعية، تستخرج علاقات عبثية (أيوا من العبث) بينها، لا تعتد بمراجعة أيا كان فقط لأنك ترى هذه الأشياء، كأنما نحن ضد الرؤى بذاتها، مع أننا كلنا كتبنا في بوستك دا كل زول قدر فلاحتو أننا متفقين في مصدرية الرؤى هذه، لكن ماذا بعدها؟ بعدها التعبير و التعليل، ديل إنت هنا جايب فيهن سو فار صفر أبلج، المؤمنين بيك ديل ياهن مؤمنين بيك، ناس إن قالها فقد صدق و صدقت الرؤية، أما نحنا فبنصدِّقك في حدوث رؤاك فأنت أهل صدق عندنا، و لو أنك شلت رؤاك دي اشتغلتها زي شغل دان براون في الدافنشي كود لكنت أنا أول من يسعى بالكتاب، و هسة مقترحي ليك قايم، أنقل شغلك دا حارة تانية نحنا بنبراك، لكن هنا في حارة العلام، و الإقناع و الاقتناع، يلزمك تخلي شغل ما بتفهموا و ما بتعرفوا دا لأننا بنفهم و بنعرف و كان نحنا ما بنفهم ليك الرماد كالك يا زول ها، و حقو تتأنى في إرسال القطعيات المجانية زي التحت دي

اللغة لم تتطوّر، أي لم يصنعها الإنسان لتتطور، اللغة هي كلمة الله، وعلّمها اللهتبارك وتعالى لآدم عليه السلام كما قالت الأديان بالضبط.

و تلتزم بي كلامك التحت دا إن كنت جادّاً إنت ذاتك في أنك تؤسس لمعارف جديدة بعملك هذا:

موضوع وااااضح ويمكن اختباره بشكل وااااضح، يعني ما بدي فرصة للغلاط ولا التنظيرالكتير، لأنَّه قابل للاختبار. (بعد أن أكمل ما أودُّ قوله بالطبع، كي يصبح في حيزالاختبار)

عن نفسي يا سيدي، أنا معاك في القابلية للاختبار دي، القابلية للتفنيد، هي معيار العلم المقبول عندي، لأنك سألت عن علم دي نحنا بنقصد بيها شنو، دا مقصدي أنا، هسة نتركك تتم كلامك و بعدها نستأذن الكفيل يومين للتفرغ للمحاججة يا عبد المحسن.
نقطة صغيرة:
شايفك قررت أنو الإلحاد جبن، يا محسن هذا لا يقبله إنسان سوي، يا أخي كل مؤمن، بلا استثناء، هو مؤمن لأنه خائف بدرجة ما، و عدم امتلاكه إجابات مرضية تجاه الموت و أصل الكون الخ بالإضافة لعواقب ما بعد الموت بلا إيمان التي تمعن في وصف أهوالها الأديان بالذات، هي الدوافع المشتركة بين كل المؤمنين للإيمان، تفاوتهم فيها تفاوت مقدار، دعنا من دعاوى البعض الأكثر ثقافة عن وصوله للإيمان من دروب خالية من الخوف، هذه لوازم دعاوى الثقافة الرفيعة أو الدروشة لا غير. نعم قد يكون الإلحاد كسلا فكريا من البعض، رد فعل لدى بعض آخر، سوء أدب تجاه الخالق الخ الخ، لكن هو بالتأكيد ليس جبناً إذا ما قارناه بأقل درجات الإيمان، فيا أخي لا حرج أن تؤمن و تجي تقول هووي لحدي هنا و أنا خفت يا ناس، لكن كل الحرج أن تدعي أن أمرك كله حجة موضوعية و له أدلة قاطعة، و علم، و أشياء تقوِّلها لنا ما تريد، هذا لا نشتريه، الله و الدين ليسا في انتظارك لتبرهن عليهما، و حكاية أن من لم يجد الله فليشك في نواياه دي هي منتهى "اللاحجية" في النقاش، بالمناسبة أنا لستُ ملحداً، و لستُ متديّنا، و قلت هنا إنني أرى في اللا أدرية أفضل موقف فلسفي في الموضوع، و إن كان للدين قيمة ما في تنسيق العقل و الوجدان، فإنني اصطنعها على طريقتي، و في الخلفية يغني فرانك سيناترا رائعته ماي واي، و مع علمي إنني قد أموت الآن، بعد قليل، لكن هذا لا يشملني بالخوف، و خير لي أن أقابل هذا الإله و أنا صادق تجاهه على أن أقابله و عاطفتي نحوه متكلّفة و أساسها الخوف (و كل مؤمن يسأل روحو)، إذا لم يغمرني الإيمان فعندي أسبابي و هو من منحني أدواتها، و إذا اختص الله بعض خلقه بالدلائل القاطعة عليه فإنني للأسف لست واحداً منهم، و هذه ليست مسؤوليتي بأي حال.

ثمّ يا محسن أنا ما طالبك اعتذارات، أغلظ علي زيما عايز، و طخ و كاوي و والله كلو بقراهو بابتسامة و تبلد في الشعور، ياخي دا كلو عراك كتابة و لك المودة الدائمة صكها على بياض..
تسمع ماي واي؟
http://www.youtube.com/watch?v=6E2hYDIFDIU

[الجيلى أحمد]

سلامات يامحسن ,

موجود ياصاحبى ,
ومتابع جدآ ..

______________
محد حسبو سلامات

يااخى الاغنية البديعة دى تستاهل برضو يسمعوها
بصوت عمتك نينا سيمون

بالله شوف الشغل دا كيف

http://www.youtube.com/watch?v=OzQkX-IZDbQ

ثم
"أرفعوا أياديكم عن الرجل المجرى "

[وراق]

يا قرشي
رافع لينا القزاز مالك، الحاصل شنو ياخي


الشفيع

[أبوبكر عباس]

المشاركة الأصلية كتبت بواسطة Mohammed Qurashi

و الله يا محسن ما تتخيل كمية الحزن الدخلتني فيها بكلامك ده قدر شنو !!
......
تعرف لو كان أي زول غيرك كتب كلامك ده أنا أصلا ماكنت حأتداخل معاه

حننتني

هامش:
تمت إضافة الشفيف قرشي لقائمة الحساسين بالمنبر "الحر"

[أبوبكر عباس]

المشاركة الأصلية كتبت بواسطة محمد حسبو

الشباب الثائر دا، بقيادة ود القرشي و شهاب كرار، بابكر عباس (الصادق المهدي) أنا دايما بفضل يخلوهو مع الخوالف، كان طلع مع الناس ممكن في أي لحظة يقلب طابور خامس،

و الله يا حسبو أي زول البوست دا ما جهجه باكاتو بكون زول ساكت و لّ خايف زيك

[قيقراوي]

سلام يا حسبو
و عليكم بما قلتم :

المشاركة الأصلية كتبت بواسطة محمد حسبو

و حقو تتأنى في إرسال القطعيات المجانية زي التحت دي

نصرف ليك انت في ي ي رقبتك دي قصاد كلامك دا :

المشاركة الأصلية كتبت بواسطة محمد حسبو

نقطة صغيرة:
شايفك قررت أنو الإلحاد جبن، يا محسن هذا لا يقبله إنسان سوي، يا أخي كل مؤمن، بلا استثناء، هو مؤمن لأنه خائف بدرجة ما، و عدم امتلاكه إجابات مرضية تجاه الموت و أصل الكون الخ بالإضافة لعواقب ما بعد الموت بلا إيمان التي تمعن في وصف أهوالها الأديان بالذات، هي الدوافع المشتركة بين كل المؤمنين للإيمان، تفاوتهم فيها تفاوت مقدار، دعنا من دعاوى البعض الأكثر ثقافة عن وصوله للإيمان من دروب خالية من الخوف، هذه لوازم دعاوى الثقافة الرفيعة أو الدروشة لا غير. نعم قد يكون الإلحاد كسلا فكريا من البعض، رد فعل لدى بعض آخر، سوء أدب تجاه الخالق الخ الخ، لكن هو بالتأكيد ليس جبناً إذا ما قارناه بأقل درجات الإيمان، فيا أخي لا حرج أن تؤمن و تجي تقول هووي لحدي هنا و أنا خفت يا ناس، لكن كل الحرج أن تدعي أن أمرك كله حجة موضوعية و له أدلة قاطعة، و علم، و أشياء تقوِّلها لنا ما تريد، هذا لا نشتريه، الله و الدين ليسا في انتظارك لتبرهن عليهما، و حكاية أن من لم يجد الله فليشك في نواياه دي هي منتهى "اللاحجية" في النقاش، بالمناسبة أنا لستُ ملحداً، و لستُ متديّنا، و قلت هنا إنني أرى في اللا أدرية أفضل موقف فلسفي في الموضوع، و إن كان للدين قيمة ما في تنسيق العقل و الوجدان، فإنني اصطنعها على طريقتي، و في الخلفية يغني فرانك سيناترا رائعته ماي واي، و مع علمي إنني قد أموت الآن، بعد قليل، لكن هذا لا يشملني بالخوف، و خير لي أن أقابل هذا الإله و أنا صادق تجاهه على أن أقابله و عاطفتي نحوه متكلّفة و أساسها الخوف (و كل مؤمن يسأل روحو)، إذا لم يغمرني الإيمان فعندي أسبابي و هو من منحني أدواتها، و إذا اختص الله بعض خلقه بالدلائل القاطعة عليه فإنني للأسف لست واحداً منهم، و هذه ليست مسؤوليتي بأي حال

دا كلام - فيما عدى ما يخصك طبعاً *- كلو كلام عاير ساااي .. و مفكوك طلقيت بس!!

كل المؤمنين بس خافوا ساي قاموا آمنوا؟
يا للهول!!
و كلام الجمال و الحكمة و بقية القصص دي كلها داخلة في قفة [ عاطفة متكلّفة ]
ياخ هو وكت بنقدر نغشو، و ما بفرز الاصيل من المتكلف، البخوفنا منو شنو طيب!؟
انا غايتو - كمؤمن - إلهي كلي العلم، هو الخالق، البارئ، المبدئ، المصور
و العاطفة دي هو ذاته السواها .. اجي اغشو و اتكلفا ليو سااي!
يا ايها الذين آمنو.. اجي !! .. ما بالغتوا لكن!!!؟؟



----

* و بالطبع رأيك، و ما خصيت به محسن خالد



.