أختنا في الله و الوطن سارة
نبدأ من حيثما إنتهيتي :
اقتباس:
المشاركة الأصلية كتبت بواسطة سارة
عموما يبقى الاحترام من قبل ومن بعد
|
يبقى الاحترام و العصرة و اليقين إنو هناك في مكان ما في هذا الكون العريض أخت كريمة و صديقة عزيزة ..
عني يا ستهم ... عندي ناس معينين ممكن اختلف معاهم في الرأي ... نحتد و تشاكل لكن كلو في إطار دائرة المحبة و الاحترام ...انت عندي من هؤلاء الناس ... يبقى فكرة زعل من نقاش معاك ... مهما كانت درجة الاختلاف ... ما موجودة أصلا ... و لو وجدت بتنتهي بانتهاء مراسم قفل الكومبيوتر !!!
اقتباس:
المشاركة الأصلية كتبت بواسطة سارة
والله يا عمو امين ما فهمت ردك لمداخلتى كلو كلو
وعشان ما يكون عندى سوء ظن لما تلقى وقت
اشرح لى كيف كيف يكون الكلام ماصاح بفهمى الكتبت بيهو
لانى ما عارفة انت وصلك شنو من فهمى؟؟؟
|
انتي قلتي : مافى انسان بشر سوى يقبل ما حصل ...
الفهمتو من كلامك ده إنو كل الناس هنا ما قبلانة القتل الحصل ده ... جيت أنا قلت ليك : كلامك ده ما صاح ... يااهم ديك قاعدين في المنتدى يبررو في الحصل و يشتتو في الكورة عن دور الشيوعيين في مذبحة بيت الضيافة ورغبتهم في المتاجرة بدماء الناس !!
و قلت ليك كلامك ( من جهة ما لم تقصدي (حسب فهمي ) ) إنو كلامك صاح : فعلا مافى انسان بشر سوى يقبل ما حصل !! ... و قلت ليك وصفك لمن يقبل بما حدث بانو انسان غير سوي ... وصف صحيح و مطابق لوصفنا لهم بالمنحطين !!
اقتباس:
المشاركة الأصلية كتبت بواسطة سارة
اولا انا لم احرمك من قول ما تريد ولما ارفض عنوان بوستك بدليل اول
مداخلة لى فى البوست راجع اول مداخلة.
|
يا ستهم مافي زول بقدر (يحرم ) زول تاني من قول ما يريد ... لكن ممكن يعترض على كلامو ... يسخر منو ... يستوسخو ... إلخ
إنت معترضة على استعمالي لكلمة (منحطين ) دي ... و أنا شايفها مناسبة ... و عمك رأفت شايفها حبة عليهم ... و هكذا !!
كل زول عندو رأي ممكن يقولو و يدافع عنو و مافي زول بقدر يحرمو منو و لو أراد ....
اقتباس:
المشاركة الأصلية كتبت بواسطة سارة
اما قولك هذا
لا الومك على القسوة ولا الومك على ما تفضلت ولكن يؤلمنى ان يكون هذا رايك
فينى
وطبعا يا صاحب مؤسف جدا ان تكون هذه نظرتك يعنى لو قلت مبدا الشتائم مرفوض
والكذب على القراء ونقل صورة واخبار مفبركة لا يخدم قضية بل يضعفها مرفوض
تطلعنى من الملة ؟؟ علانية عرفناه ممكن تفسر على صفحات المنتدى
لكن سرا دى اصلى ما عرفتها  |
أنا ما شايف و لا قاصد قسوة في كلامي ده ...لكن لو ده الوصلك منو ... امسحيها في صلعة الجيلي بالله ..
وين أنا يا سارة قلت مبدا الشتائم مقبول ... والكذب على القراء ونقل صورة واخبار مفبركة مقبول ... و وين أنا أصلا شتمت زول ولا كذبت على القراء ...ولا نقلت صور و أخبار مفبركة ؟!! بل وين أنا انتقدتك - إنت ولا غيرك - في قولك إنو (مبدا الشتائم مرفوض والكذب على القراء ونقل صورة واخبار مفبركة لا يخدم قضية )
وين ده حصل ... خليه من إنو أطلعك من الملة بسبب كلامك ده ؟!!
مرات يا ستهم بتخيل لي انك بتتخيلي حاجات أنا ما قلتها و تحاسبيني عليها ... أو بتوجهي كلامك لناس تانية عن طريقي !!
أنا نقدي ليك كان منصب على إنو صوتك يعلو ( معاي أنا ده ) دفاعا عن موالي النظام و إعتراضا على كلمات مثل منحطين ... فيما ضاع صوتك و انحبس عن فتاوى الخروج عن الحاكم .. و تشتيتهم للقضية و تركيزهم على مطامع الحزب الشيوعي المزعومة ... عن مباهاتهم بصورهم من القتلة حقيقة لا مجازا ... و ما كان لي أن أعترض أو أسأل أو أشكك في موقفك أو موقف أي أحد من أي قضية ما لم تبدئي انتي بالنقد و التشكيك في (طريقتي لمحاربة النظام ) على قولك .... و في ردي عليك قلت ليك اديني specifics لاعتراضك على (طريقتي لمحاربة النظام ) ... ما إشتغلتي بي شغلة ...و ما زلت في الانتظار !!
عموما يا ستهم خلينا نتفق و نختلف في إطار الاحترام و العصرة و عدم تجريم بعضنا ... و كوني بخير يا عزيزة
