يا أخي الكُبر دآ حاجة ثقيلة بشكل

[بابكر مخير]

حب، شوق، ريدة وحنين
في رأيي الشخصي!!
كلمات جميلة تعبر عن نوع من العاطفة ومنها واحدات صاحبات إستمرارية أكتر من الأُخريات..
الحب في رأي هو الرغبة في شيئ مربوط بحاجة أو غرض ونذوة وممكن فترتها تكون مربوطة بين أنك تصل قصدك أو تصيب مُرامك أو يبقى الأمر مسلك وإتا راغب فيهو عشان يستمر ويبقى طريق لحياتك إرتبطا بيهو طوالي..
الشوق هو إحساس مربوط بفترة زمنية، زول غاب منك لي فترة وتشتاق ليهو وبعد تلاقيهو الإحساس دآ بيروح، بعدين ما شرطن الشوق ديمة للأشياء الحلوة وجميلة... بتذكر أيام كنت شغال في الامارات في أواخر السبعينات وأوائل التمنينات كنت طوالي بشكي من حصوة الحالب "شوقي الشديد والأكيد سيتمر وبلا لقاء في دنيانا هذه ليتنتهي مدته. للمرحوم دكتور عبد المنعم بله وهو الكان ديمة بعالجتي لمن الحصوة تطلع" فكان لمن تمر عليا شهور وما تألمني؛ سبحان الله كنت "بشتاق" لتلك المعاناة وذاك اللأم وتلك الفرح والسعادة والنشوة لمن تجي نابلة وتمرق...
الريدة، هي بالواضح وما فاضح كميييية مهولة وكبيييييرة من الرغبة في التملك ولكننا هناك نستعملها بقصد الحب وهو البرضهو نوع من الرغبة في التملك وعندنا في السودان وبي لهجتنا العفوية هي تساوي دايرك وتعني أرغبك في ذاتك، في أداءك، في عطاكا أو غيرهو...
الحنين في شكلهو أنهو إحساس مقارب لسابقاتهو مع القرب الضعيف للشوق ولكنهو في الواقع أنهو بيمثل الماضي وكت ديلاكآ بيشكلوا المستقبل.. بحن لي أيامن مضت، بحن لبلدن بعدتا منهو..
الوالدة عليها الرحمة كانت من ديكآ البيتكلموا عنهو أنهو إحساس مثالي وهو شئ عفوي وما بيكتسب، ما هو الحب ذي البيقولوا عليهو من النظرة الأولى دآ ناتج عن شغف ورغبة ووليد لحظة وجاء عن أنك شفتا شئ وأعجبت به ورغبته كان سماحة، كان خفة روح، كان هندام يعني المهم شئ من الظاهر وأمي مدينة عليها الرحمة كانت بتستعمل قولة (بفتكر أنها سمعتها من أماتها الهن برضك يكونن سمعنها من أمهاتن وهلما جرا) تصورن أن الحنين وصفه "المحنة" وظنيتهو لغويا ما صاح (ما مهم ما إحنا مستعربة فلا حرج علينا)....
المحنة يا جنا حشاي، لا دق عصا ولا مشي مدارس.. هي شيتن جوا القلب......
وأنا رأيي...
آي واحد من السابقات ديل بيكونوا بي قيمة لو حصل التوافق وتبادل الأحاسيس..
عديييييييييل كدي... تبادل منافع..
وإن لم، فلن.....

[بابكر مخير]

يا أخونا مشكلتنا مع الأكل مشكلة...
يقول ليك: والله أكلنا بوش "حسي مسمينهو فتة حيت تمت إستعاضة اللحم بالفول" تأكل أصابعنك وراهو..
ولا يقول ليك يا أخي أكلتا ليا إستيك لكنهو من جوآ ما نجيض "يعني الخواجات ديك ما عارفين قيمة أنهو يكون كدآ" وهو يكون من أكلة كبد الإبل بي مزاج.
حسب تجاربي البسيطة والهي فوق الخمستاشر سنة مع دنيا "الأكل .. مندولا لندن حقت يوسف مخير، ذائعة السيط وسط المجتمع الندني ومندولا أبوظبي محدودة العرفة.
اؤكد أننا ما بنعرف حتى تذوق الطعام والتفرقة ما بين النوع والجودة والقيمة "كان غذائية ولا مادية". في المندولتين وين كانت تجاربي لم يكن هناك طباخ بشهادة إلا اللهم يوسف أخوي ومن باب الإحترافية عمل بيها وحتى كان بدآ هو وزوجتهو السيدة كيثي مخير العمل لإصدار كتاب يتناول المطبخ السوداني. بتذكر من الأقوال التي كان يوسف بيطلقها من وقت وحتى لمن سألتهو عند طرق الطبخ المتبعة وهو معلم كبير قال ليا: يا زول شغل كاوبويات سآكت...
دآ لاحظتهو هنا في الإمارات (بس التقول الغرب الدامي كلهو كاوبويات) وإحنا والحمد لله ناسن طيبين.. جيب ليا لحمة ضأن هندي وقول ليا سوداني "عشان إثارة العاطفة والهي ديمة بتتغلب علي توجهنا في الحياة" بصدقك ولا جيب سمك قشر بياض وقول دآ عجل برضهو بصدقك... لكن لو بعرف أميز الطعم أكيد بكشف لعبة الكاوبوي وبعرف أنه مسدسه فاضي لكن سمعة قادر يلقى الإحترام...
ما قاعد أمشي كتير مطاعم سودانية وما لأنهو عندي المندولة الأنا واثق بأنها تقدم الأحسن بالكاوبوي الفيها واللهو في اغلب الأحيان بكون أنا.. لكن هناك مصداقية في ما يقدم ورغم التقاضي عن الأسعار وهو أمر يصعب أن يفهمه السوداني المغترب الذي لو عليهو ما يصرف درهم ولكن يلقى حسب رغبتهو (من شر البلية ما يفلس)..
بتذكر مرة جاني كاوبوي والمفروض يعمل ملوخية طبيخ ومفروكة بامية وشوربة ومشا السوق جاب نص كيلو لحمة. ختا نص الكيلو في حله براهو النار وعليهو بهارات مع قطع الماقي والبامية مع بصلة في حلة براها والملوخية وشية موية وعليها بصلة وصلصة في حلة... ونجض علي كدآ وفرك البامية في الخلاط وانا أعاين وقلت أنتظر أشوف حيعمل شنهو..
جاء ضيف وطلب ملوخية فشفتا ما لا يخطر على عقل بشر ويرضاه القلب.. أخد من طبيخ الملوخية خالية اللحم في الصحن وإستنضف ليهو تلاتة قطع من نص الكيلو بتاع الهندي "ما هو لحم خرافهم برضهو ضعيف ومجلفط" والله بالظبط الحصل.. مسكت الصحن وقلت ليهو دقيقة... مشيت لي الضيف وإعتذرت ليهو بأنهو الكاوبوي لساتهو بيتعرف علي الشغل فما طبخ حاجة وذهب الزبون "والله ما ظنيتهو تاني رجع".
لمن سألتهو دآ شنهو؟؟ قال أنهو دي الطريقة البيتعمل بيها في المطاعم.. مسكتهو وحكيت ليهو كييف أنهو يوسف في لندن والحاجات فيها غالية. كان بيأكل زباينهو نفس الكان بيكهو في بيت مدينة بدري.. وكان ردهو بي شفافة عالية؛ لو عملت بالطريقة دي ما بتربح لأنهو بتتطر تبيع صحن الطبيخ بمكسب بسيط ممكن يا دوبك يصل ربح خمسين في المية...
عرفتا من زباين مطعم سوداني هنانا أنهو بيبيع كيلو السمك مطبوخ بي ظنيتهو سبعين ولا خمسة وسبعين درهم وعلى أنهو سمك هامور.. صدف مرة واحد صديقي جابوا ليا عشان أجيب ذيهو للمندولا.. السمك هو يا أخونا قشرة البياض واللهي كيلوها وإن طار السما ما بيفوت الخمسة وعشرين من السوبرماركتات وطوالي طلبت من الكاوبوي المعاي أنهو يعمل لينا طلب صحن وهو قيمتهو عشرين درهم لي نص الكيلو وصاحبنا إندهش لمن لقا أنهو ياهو ظاتهو نفس السمكة وبدون مفخرة لو ما أحسن..
تقول ليا بوش وفتة فول؟؟؟؟

[بابكر مخير]

الأيام دي مصاب بمرض مشاهدات المسلسلات التأريخية
بديتها بالقديم بالفايكنقز ومستمر لغاية أخرها كانت أمس تميت الأسطورة جون لونق سيلفر..
وكلها عن الغرب.. ملوكهم وأساطيرهم ذي ناس سبارتوكوس..
وحتى لغاية ملوك أوربا المسيحين...
كلمهم كلهو عن الحضارة.. حتى في مسلسل جينكز خان.... كيف أنهو عايز يهدم الحضارات...
المسلسلات دي كلها مؤامرات داخل القصور ودماء سيول وفوضى عارمة في كل أوجه الحياة...
تخليك تقر من التأريخ دآك وتحتقرهو. لكن كمان لمن تشوف يوم الليلة..
ويييييين الناس دي مشت
تقول ليك شكرا في أقل خدمة
تلبس نضيف
تاكل بدون جم جم جم
تشرب وما بتشفط
تتكلم بصوت هادئ..
تتحير وتقول:
هل أنهم كملوا كل الهمجية وخلاص إتنضفوا منها وبقوا ناس حلويين
ضد العبودية ومع حقوق الناس
مع السلام وضد التحارب
مع الولفة وضد التسلط...
وبرضك تفكر؟؟
يا ربي إحنا وييييييين من دآ؟؟
يمكن عشان نحنا جديدين وحسي بنبدا من الصفر..
أمن وبيوت أشباح وقتل وتقتيل؟؟؟؟

[بابكر مخير]

الشتاء أحد فصول السنة
وفي حضنه يضم النقيضين. الحنية والخوف ذي ما "الجميلة والوحش"
بتذكر أيامنا الزمان كان لمن يجي الشتاء وليلهو معروف بأنه طويل. الناس تلم من بدري في بيوتها خوفا من الوحش البيكون متسيد الطرقات ومتسلم الشوارع.
بتذكر الأيام ديك لمن يكون شئ ناقص في البيت ويطلب منك أنك تمشي تجيبوه من الكنتين في ناصية الشارع. أولن تبادي تضع خطة وكأنك ماشي ليك لي حرابآ. كيف لا وهناك في الشارع مفتوح الطرفين "زيفة" تطلق عليك سهامها وهي تصيب الوجه وكأنها طلقة قصد بها زولن محجب "بالنجاسة".
(في حوادث 76 أو كما يسميها البعض حركة محمد نور سعد أو "المرتزقة" كان قناصة تلك الجحافل بينشنوا علي الرأس لأنه الوحيد الذي إصابته بالطلقة تميت في الحال وهو أكثر أجزاء الجسم المكشوفة و في نفس الوقت منعمة بماء الوضوء "ناس اليد والقدم لا يتسببوا في الموت حتى لو بترتا" وهو الغالب من الحجبات المستعملة في الغرب وعليه فالغالبية من قوام تلك الحركة كانوا محجبين بيها ووهم يعلموا أن الكثير من أبناء جلدتهم بيشكلوا نسبة عالية من أفراد الجيش وإحتمالية أنهم يكونوا محجبين بيها عالية. وخلاصة القول أن هذا الحجاب يقصد أطهر الأماكن ليدمرها "يعني أنه من عمل إبليس" والله أعلم..)
قلنا الواحد لمن يجي مارق بيكون وكأنهو ماشي ساحة الوغى فيلبس خمسة ويزيد عليها توب دمور تقيل وكأنهو درع سيف الله المسلول بن الوليد وبكل هذا الكم الهائل من حاجات تقيلة لكنه يكون أخف من الريشة في وسط عاصفة هوجاء فلو كان المسافة في الأوقات العادية "ما شتاء" تستغرق خمسة دقايق. كانت تقطع في ثوانن معدودات كيف لا وهناك الوحش يترصد بك ليفترسك وهو الخبير في تقنيته. أولن تبادي عيون ترقرق حتى تصعب عليك رؤية الحفر الفي الشارع فإن سقطت في واحدة يصعب عليك القيام لأنهو بيكون خدر ليك رجلينك وعطل حركتك فيطلق عليك جم غضبه لتحديك السافر لسطوته وقوته وهو ينظر اليك لا حول ولا قوة لك فترقد في مكانك وبعد يدينك ورجلينك تتجمد كل الأطراف ويبرد الدم في عروقك من درجة السبعة وتلاتين لمن يساوي درجة حرارة الجو..
في أكثر الأحيان وتفاديا لذآك الغول سيد الطريق كنت وأنا صاحب الفكر الثقيب "المتوهج" أصدر صوت بالباب بصورة يسمعها حتى الأصم ليشعر أهل البيت أني خرجت. حين أكون أنا فعليا بالداخل ملاصق للحيطة وكأني حبيب هلكه طول الإشتياق لحضن محبوبته فأبعث فيها من مخزون الدفء الذي نعمت به في داخل الغرفة كعربون لسكاتها عن أن تفضحني في عملتي دي. وبعد مدة من ذآك العناق، أخذ حفنة من التراب وأمسح بها وجهي ليكون أغبش مثل وجه البطل العائد من الحرب منتصرا على ذاك الوحش البي الخارج وأعيد فتح الباب بهدوء وصوت أعلى حين إغلقه وأدلف للداخل مع إفتعال رجفة وكأني شبعت من ذاك الزمهرير بالخارج وطواااااالي تحت البطانية وبصوت متحشرج وبتقطع مفتعل ولكن بكمية من الحرفنة يفشل في إبدائها أبرع ممثلي هوليود. أردد الدكان مقفول. ما قال ليك "الجبان ربآ عيالهو" وإلا ما كنت حسي مستمتع بي بنياتي وأخوهن الحبيب "توتو"....
هذا هو الوحش "ذي بيست"
أما الوجه الثاني فهو المحنة.
ففي تلك الليالي الطويلة هي فرصة لتكون في حضن أمك وقدامكم صحن هانقدر من الفول السوداني المغلي بي قشرتهو والشاي باللبن الممتع وليس أجمل من الأنس البيملى البيت ويفيض بالمحنة...

[imported_فيصل سعد]

واصل يا حبوب.. و
أرقد عافية..

[imported_عبدالله الشقليني]

أرقدو قفا ...

[بابكر مخير]

ذي ما قلتها قبل كدآ؛ الحمد لله الأنعم عليا أني عشت يوم قررت الجمعية التشريعية الإستقلال من الحكم الثنائي وكنت متواجد وتؤم الروح قسيم "بروف قاسم بدري" يوم إترفع علم السودان بألوانهو ديك "أزرق أصفر وأخضر" وحضرت أول حكومة ديمقراطية منتخبة وحكومة عمنا عبد الله خليل وبعدها حكومة العسكر "عمنا عبود" وبداية المعونة الأمريكية وتلفزيون السودان بدعم وإعانة المانيا "الغربية" ومعهد جوتة والبرتش كاونسل وأكلت آكلير الجي بي المميز لمن رحلنا وسكنا الخرطوم شرق بي همبريبا من كتاحة أمدرمان.
شاركت في أكتوبر كطالب في المظاهرات وحكومة سرالختم الخليفة وحضرت الندوات في دور الأحزاب وطعمت الفرحة بزوال حكم العسكر الهو كان نسبيا أهون الحكومات العسكرية.. أكيد إنقلاب عبود ما كان وراهو دعم شعبي وما كان تحركهو أيدلوجي أو جهوي ومع أنهو كانت فيهو دماء سالت إلا أنها كان أهون حكومات العسكرتارية وحتى لمن الشعب قام وطالب بذهاب العسكر، إستجيب له وسلم الحكم لجبهة الهيئات. (http://www.sudanile.com/index.php/%D...A-%D8%B7%D9%87 ).
وبعد سنة سافرت للقراية في الجامعة وما إتنعمت بالفترة الديمقراطية التانية لأنهو قام نميري بإنقلابهو وأنا برآ وكان الإنقلاب المرة نقدر نقول عليهو أيدلوجي لو ما كان عديل كدي في بدايتهو فكان تغلب عليهو صبغة يسارية متعاونة مع شخصيات ناصرية وإستمر لمدة 16 سنة ومن حسن حظي شاءت الأقدار أن أحضر سقوط ذاك النظام لأني كنت في إجازة في السودان من مكان عملي في دولة الإمارات.
وكانت الإنتفاضة وعلى نهج مقارب لثورة أكتوبر وللنقابات الدور المعلى في تحريك الشارع.
ومن ثم الديمقراطية الثالثة التي كنت محظوظ أن عشت داخلها من خلال أروقة الحزب الحاكم في دور مسئول عن شباب هذا الحزب وبعد هذا جاءت الطامة الكبرى وإنقلاب أيدلوجي بحت ولمدة تلاتين سنة ضاق الشعب فيها كل مُر وسيئ إلا أن إنتفض الشعب للمرة الثالثة وهذه المرة لم يكن للنقابات دور فيها وحتى ممكن نقول أنهو ضد ثورة ديسمبر 2019 .. لأنهوالنقابات كانت تحت عباية الحكومة ومن كوادر تلك المجموعة وها نحن نعيش في الفترة الإنتقالية الثالثة. نمني النفس بحكم ديمقراطي رابع في هذه الأربعة وستين سنة...
طيب!!!
الإنتفاضات قلنا البنظم تحركها هم النقابات، عدا إنتفاضة ديسمبر لأنهو النقابات كانت ملك الحكومة فكان هناك تنظيمات هي في الحقيقة سياسية تعمل على الإطاحة بالحكم وتعمل في الخفآ ووجدت في تململ الشعب وسخطهو وكسرهو لحاجز الخوف بوادر ثورة شعبية ولكنها دون قيادة ميدانية.
ففرض تجمع المهنيين والهو ذي ما قلتا قوامه تجمعات حزبية كانت تقريبا كلها أيدلوجية يسارية معادية بشدة للكيزان. نفسهو كقيادة لهذا الحرآك وإستطاع أن يثبت موقعه في المعادلة البديلة لإستلام الحكم ولكنهو برضك شعرت قياداتهو "من الأيدلوجيين وبالتحديد الشيوعين والبعثيين" أنهم محتاجيين للتعامل مع الواقع أنهو الشعب السوداني في جماهير غير بتاعتهم وقامت "قحت" وأصبح المهنيين واحد من مكوناتها وإتعمل ميثاق إرتضاهو الجميع وإتشكلت حكومة صابوا منها من المناصب ما صابوا.
طيب ليييه اليوم تجمع المهنيين إبتدآ في تحرك ودفتر حضور ومسيرات...
هل القصد إستعراض عضلات يثبتوا أنهم هم الأقوى والأقدر علي تحريك الشارع
ولا شافوا أنهو الكيكة مفروض تكون حقتهم براهم
ولا غلبهم التعامل مع الواقع وبقت عليا وعلى أعدائي ونجوطها وما حدش حوش...
ربنا يستر ويخلي شويييية من الغيرة علي الوطن في قلوبكم وبطلوا لعب العيال دآ..

بتذكر قبل إنقلاب الكيزان..
كل الهيئات والنقابات والأحزاب السياسية عدآ الجبهة الإسلامية وقعوا ميثاق حماية الديمقراطية في مدني وفيهو نص صريييييييييييييييييح معناهو. أول ما تدق المسيكة في الإذاعة وينقال بيان هام فترقبوه..
الناس تدخل في عصيان عدييييل كدي...
ودقت المزيكة ووالبيان ما إتقال إلا بعد نص يوم بي حالهو والنقابات لا قطعت الكهربا ولا مهندسين التلفزيون والراديو وقفوا البث..
تعرفوا لييه.
لأنهو كل تنظيم كان قايلها حقتهو حتى الدياشة إنخموا فيها..
حاجة مؤسفة أننا ما بنحفظ المواثيق وأننا لسة ما قدرها ....

[imported_عبدالله الشقليني]

http://sudanyat.net/vb/showthread.php?t=30293

[بابكر مخير]

المشاركة الأصلية كتبت بواسطة عبدالله الشقليني

http://sudanyat.net/vb/showthread.php?t=30293

يابا
ولو هبش طرف مسامعي لحنن جميل بلهفة وبسابق الريح لي ملاقاتهو
ووين ما يلمع قمر في السما إلا تلقاني بي لهفة تابعتهو..
دا أخي الحبيب
متين ما إنكتب منك سطر
ما ممكن أنوم قبل ما أقراهو حتى لو كان وكت السحر...
قريت البوست..
وفتشتا، بحبتا ، قوقلتا ووكوكتا "ويكيبديا" في شان القى ليا شيتن أوري فيهو إندهاشي وأشرح مدى إعجابي...
تعرف زولك دآ..
يذكرني بكم هائل من ناس أمدرمان بالله التقول الهادي نصر الدين "الضلالي"...
شكرا ليك يا

[imported_عبدالله الشقليني]

والله مشتاقين

[rams]https://www.youtube.com/watch?v=OcEgxdvBDNk[/rams]

[بابكر مخير]

يااااااااااااااااه
الأيام دي بتجري وتجري...
قبل كميييييين سنة كدآ..
ود البنا، السني، أباذر، الكمان من عثمان وحضرة محظوظة بالمرحوم محمد إسماعيل الأزهري في لندن وفي الشقة الصغيرونية وين كنت ساكن..
إجتمعوا وكان العمل الجميل دآ...

[youtube]https://www.youtube.com/watch?v=8Gy-kK99vlQ&feature=youtu.be[/youtube]

[بابكر مخير]

الحمد لله
أنه ربنا عز وجل مكني من حضور تلاتة أنواع حكم مختلفة (إستعمار، مدنييية وعسكرية) وتلات ثورات شعبية.
وحضرت خمسة أجيال من انواع الحروب...
أستعملت فيها أنواع أسلحة متفواتة الفتك بعداوة وخبث..
كان وراها في أغلب الأحيان جهات تخطط عشان تتسيد العالم ولكن بي طريقتها...
أمس ولي التمرضني حضرت خطاب ترامب في يوم الاتحاد.. طبعن كان في ناس بتصفق ليهو مع كل كلمة يقولها والمشهد ذي برامج التلفزيون من مسلسلات على الهواء البيكون فيها زول ماسك يافطة... (أضحك، صمت، تصفيق) ودي طبعن ظاهرة لأنهو الجميع بيقيف عن التصفيق في وقت واحد..
المهم إتكلم في ضمن ما قال عن حاجة كدآ زرقة في غير محلها كليا وهي أنهو حيدعم صناعة الدواء.. مصانع السلاح بتتفهم، المستشفيات معقولة جدن ولا حتى الضمان الصحي أنهو يكون بس للمواطنين بالمجان فما في زول يقدر يقول بغم..
لكن اليوم وبعد ما قريت اللينك دي...
عرفتا أني بحضر في بدايات الجيل السادس من الحروب....
https://ida2at.org/news/2020/02/03/5...8A%D8%B1%D8%A9

[imported_عبدالله الشقليني]

حبيبنا دكتور بابكر
تحياتي
وأمنياتي لك بطول العمر ، ولكن النبي استعاذ من الشيخوخة، خليك شديد ولضيد. كتابتك الدُقاقة توري أنك بتشوف كويس وبتقرأ كويس . وتاكل كويس وتشرب كويس.
وريني وينو الكُبُر؟

[rams]https://www.youtube.com/watch?v=pa0aEFcC2S0[/rams]

[بابكر مخير]

واحدة من الألعاب الكانت زمنا وهي ذي ما تقول؛ حجوية "الغلوطية".
يدس واحد شئ والتاني ياخدهو ويبدا السؤال..
آ أنا سرقو...
هذه اللعبة أساسها قايم علي النكران والكذب.. لأنهو إتا البتكون أخدتا الشئ وتنكر أنهو بحوزتك..
حسي علي اللعب خلاص كبرنا مع الزمن وخلاص سبحان الله مع العمر الكذب صابهو الهون والعجز والضعف..
لا قوة في العضلات تشيلك ولا قوة في التركيز تساعد عشان تمارس أيتها نوع من الرياضة من ناس كورة وباسكت ولا رياضة ذهنية في حل الغلوطيات "سنة يا حسين خوجلي والقرد" وإن لي الكذب دآك؟!
لو درتا تكون كضيضيب "كذوبن"، فكن ذكورن والزهايمر قرب ينسي الزول إسمهو...
طيب حسي
1 البرهان دآ أكييييد قريييب من دفعة ومع مراعاة أنهو عايش في السودان والجفاف بيكون خلاهو وصل لي ما أمر بيهو أنا حسي
2 حمدوك دآ يكون دوفعة كورية "أحمد أخويا البعدي طوالي" وبرضك مع القراية الكتيرآ والشطارة بيكون بي جسمهو دآ حصل تغيرات فيسيلوجية وبيكون برضك حالهو حالي دآ
3 فيصل "الناطق" كان أيام كنا في القاهرة وشذف من الإحنا برضك صبناهو من تلتلة وجهجة وشوف بقآ أنا إتحظيت مشيت لندن والعناية الصحية والرغد النسبي في العيش وهو تراهو من مصر للسودان يعني الدنيا تكون عصرتهو والحمد لله ما لحقتهو أمات طه بل أنعمت عليه بوزارة لكن بعد ما إتعصر وياهو بيكون مع المعانة الماضية لحقنا بي جآي..
طيب الثلاثي ديل...
ما يورونوا آ أنا سرقو ولا منهو السرقو..
حمدوك عارف ولا ما عارف بعملة البرهان ولا فيصل هو المغيب؟؟؟؟؟

[imported_عبدالله الشقليني]

البرهان دفعت الكلية الاتخرجت 31
ودفعة كوريا 24


ومن ديك وعييييك