يا أخي الكُبر دآ حاجة ثقيلة بشكل

[Abdullahi Gaafar]

دكتور بابكر
رمضان كريم
غابتو البقت علينا حاله ما تتوصف

كبر وصيام وحظر وعزوبية وزيادة وزن ..... والحمد لله علي كل حال

ربك يزيح الغمة

[بابكر مخير]

المشاركة الأصلية كتبت بواسطة Abdullahi Gaafar

دكتور بابكر
رمضان كريم
غابتو البقت علينا حاله ما تتوصف

كبر وصيام وحظر وعزوبية وزيادة وزن ..... والحمد لله علي كل حال

ربك يزيح الغمة

أبو عبد يا أخوي..
عات الغمة إن مشت ولا قعدت!!
بترجع لينا شبابنا وقوتنا

[بابكر مخير]

ما أحلى إجترار الذكريات لمن تكون جميلة. ذي الفيلم التشوفهو مرات ومرات ويكون ناسهو هم البتريحك شوفتهم ويسعدك العيش معاهم لحظات معادة ومتكررة..
بتذكر زواج خالي محمد بدري من دكتورة فاطمة عبد الكريم بدري في حي الشيخ دفع الله في بيت ناس العم ذي أمس القريبة دي.
رزق الخيلان الإتنين بي باكورة العيال وسمي بابكر ولقب بأشرف وكان حقا قد شرف الأسرة الصغيرة بإطلالته عليهم وزان من إسم بابكر تكرار في الأسرة الكبيرة.
جاء أشرف "بابكر" يحمل جينات متقاربة وعلى عكس ما يتحدث عنه الطب فقد جاء نابغا ومتكامل المظهر والشكل ووظائف الجسد كلها.
كان ثائرا على ما لا يقنعه ورافضا لما لا يلائمه. شعلة متحركة لا تحرق ولكنها تضئ، نسمة جامحة عاتية عذبة تنعش ولا تعيق، خلق سامية مترفعة عن الصغائر، متواضع لا يرضى بأن يُخدم ويقنع حين يخدِم. أتذكر يوم حنته كان وكأنه يجلس على مقعد من نار لأن الكل كان يخدمه وما أن إتشالت الحنة تلاحظ أنهو إستعاد عافيته وتهياء للعودة لي طباعه. هنا يسأل أجيب ليك شنهو وهناك يتناول الصينية ويحضر الضيافة للضيوف وحتى وكت العروس في نص السباته إتا يا "شروفي" تناول دآك شئ وتتناول من دآ حاجة..
مندفع بعاطفة نحو الخير وام أعظم خير غير خدمة الناس ومتهور في ردع الظالم لنصرة المظلوم وذكر لينا مصطفى الصادق بدري واحدة من المواجهات..
رحمة الله تنزل عليك كل لحظة وكل حين..
أشرف يابا كنت غير إعتيادي ولا عجبا أن المولى عجل ليك منادي.....

[بابكر مخير]

المشاركة الأصلية كتبت بواسطة بابكر مخير

أشرف يابا كنت غير إعتيادي ولا عجبا أن المولى عجل ليك منادي.....

من منا لا يعرف شخصية شوقي بدري..
شديد الشكيمة، كاظم الغيظ لكنه أيضا رقيق القلب وناعم الحواس..
فقد صهره أشرف بدري فجر في دواخله، حزن خفي. صاغه بطريقته الخاصة وكلماته الخاصة...


شوقي بدري

 لهذا لا أبكي على اشرف
 نتباكى على الزمن الجميل ونتحسر على بيوتنا التي كانت  تمتلئ باعز البشر واكرم الصحاب ، الحب والحنية . يذهب اصدق الاهل  والرفاق . وبدلا عن التحسر والبكاء نقول .... الحمد لله لقد كان عندنا كل تلك الروعه والسعادة . تخيلوا اذا لم يكن عندنا مثل اشرف ، واذا لم ننعم بكل تلك السعادة والذكريات . الا يعني هذا ان حياتنا كانت  قاحلة وخالية من  الروعة . هل نحن جاحدون بنعمة الله ؟
 اشرف اكمل رسالته  . اعطى واعطى ثم اعطى . ترك ذكرى عاطرة . لم يكن بخيلا ، ثقيلا او انانيا. كان شجاعا نقيا وصاحب رؤية . ترك خلفا صالحا  واعمالا  رائعة اعطي الآخرين اثمن شئ ، العلم والمعرفة  . الا يكفي هذا ، لكي نكف عن البكاء ؟
 قد لا يعرف البعض انني كنت اتراسل مع  اخي الاصغر اشرف طيب الله ثراه . ولا ازال احتفظ برسائله منذ السبعينات . كان ابو الكل طيب الله ثراه يحمل على اشرف في بداية شبابه ، وقد يدفعه ببعض قسوة حتى يكون اقرب الى الكمال  ، وقد يحتد معه  في بعض الاحيان وربما بسبب اختلاف الاجيال . كنت قد عجمت عود اشرف في الكثير من المواقف  لأن ابو الكل كان صديقي  كتبت له خطابا . قلت له . الم تلاحظ ان اشرف رجل هميم  والرجل الهميم لا تثريب عليه  وسيكون اشرف عند حسن ظنك . وانت قد عشت دنيتك كما لم يعشها الآخرون . وتعرف كيف تقيم الناس .
 كتب لي ابو الكل قائلا  ...... كلامك صاح انا ما  لا حظت ان اشرف هميم جدا ز بعد جوابك  لاحظت  لمن يكون موجود ما بيخلي زول يعمل ايا حاجة . وتغيرت  معاملة ابو الكل .
 فاطمة بدري ابو الكل واشرف وايمن كان من عادتهم الحضور الى براغ . صحبت اشرف وايمن  الى حديقة الحيوان مع  مارسيلا الشيكية . قالت مارسلا في نهاية اليوم . ان اشرف له عيون جميلة مليئة بالحياة وكان يتصرف  بمسؤولية وكأنه  ليس كطفل في العاشرة . كان يهتم بشقيقه ويمسك يده دائما بحنان . وايمن كان متمردا  وعنيدا في طفولته  . اذكر انني احتفظت لهم بصورة التقطها مصور في الحديقة  . ولكن قبل سنوات ارسلتها لاشرف وقلت له انها يجب ان تبقى لاحفاده .
 تأخر زواج اشرف ولمياء ، او زوبا كما عرفناها وهي صغيرة . كان هنالك بعض سوء فهم  وتخلف من البعض . آخر زيارة للسودان  قلت للجميع . قد لا تقابلوني مرة اخرى . انا هنا لاحسم هذا الزواج . وليس هنالك من هو اصلح لشقيقتكم غير اشرف الذي اعرفه جيدا . وان عليكم ان تفرحوا باشرف لانه انسان مميز . وتركت السودان .
  قبل عقدين وعندما كانت  الانقاذ تحارب الاحفاد اتوا بليل وانتزعوا تمثال بابكر بدري  . وصاروا يستدعون مسؤول الاحفاد الى مكاتب الامن  لاخافته . كان  اشرف يذهب مرفوع الرأس ولا يبدوا عليه الخوف . كان يبقى للساعات الطوال بدون كلل او ملل، ويعود في اليوم التالي ، حتى قنعوا من اخافته . هجم رجال الامن  على الاحفاد باسلحتهم المشرعة  ومجوعة من السيارات  ارادوا اخذ المسؤول في الاحفاد. كان  قاسم  في اجتماع مع ممثلي الامم المتحدة  . برز لهم اشرف بكل شجاعة وتبعهم خارج الاحفاد ألا ان الضابط في الخارج قال .... مش ده انحنا عاوزين الطويل .
 في احدى مناسبات الاحفاد اتى بعض رجال الامن وارادوا الدخول . قال لهم اشرف  مرحب بيكم  ، لكن عربيتكم دي ما بتخش . وبالرغم من التهديد والصراخ لم يتزحزح اشرف فانصرفوا .
 قالت لي الهام بدري  وهى قد حزنت على اشرف  منذ بداية مرضه وبكته بطريقة قد خفت على صحتها ..... اشرف يا شوفي احب تلاتة حاجات  في الدنيا امه اسرته والاحفاد . علاقة اشرف بزوجته  لمياء سارت بذكرها الركبان لم اعرف انسانا احب زوجته ، اشاد بها  وعظمها مثل محمد بدري ابو الكل مع فاطمة . اشرف كان الفرع من ذلك الاصل ...... هل يصح ان  نبكي على اشرف ؟

[imported_عبدالله الشقليني]

[rams]https://www.youtube.com/watch?v=CEg00UOQqQA[/rams]

رحيل أشرف رحيل القرى والمدائن

أشرف ابن أستاذنا محمد بدري ، ناظر الأحفاد الثانوية.كان أبوه غليظا معنا في التربية ، لحكمة عرفناها بعد ذلك بمدة طويلة. هؤلاء إرث الشيخ بابكر بدري الذي عيّن في ثلاثينات القرن العشرين مجلس أمناء لمدارس الأحفاد، حيث لم يتعرّف الناس على مصطلح مجلس الأمناء. إن أمثاله من الشرفاء نذكرهم لأن في تاريخنا أمثال هؤلاء الأبطال. إن لنا معلمين في مدرسة الحياة ، وهو لا شك واحد منهم. دائما النجباء نفتقدهم في الطريق. إن تاريخهم يبقى مُرشدا إلى آخر العمر.
أشرقت حاضرا وغائبا يا أشرف . بكتك القرى والمدائن في صمت، لأن الحُزن يشل التفكير.
العزاء لكل منْ يحمل شعلة مُضيئة للطريق الطويل

[بابكر مخير]

بتذكر كان لينا خالة. مرضت وتعبت تعب شديد.
ولمن إتوفت بعض الأهل قال: والله إرتاحت..
الوالدة عليها الرحمة كانت ديمة تقول؛ إن شاء الله من القوة للهوة..
بعضهم تسمع أنهو، كان شديد وما حاسي بشئ. بعد إتغدآ رقد في المغرب لمن جوا عشان يصحهو كان متوفى. قالوا واحد لمن حكوا ليهو الحكاية دي، قال دي الميتة المتمنيها أنا..
بعضهم يقولوا تخفيفا لحزن الأخرين: كلنا لها. هم السابقون ونحن اللاحقون. الموت حق...
إذن يبقآ أنهو فعلن في الموت رحمة وراحة إستشهادا من ما الناس بتقول، إرتاح وبرضك الموت ما هو شيتن غريب في سلسلة حياة الإنسان في قولة الموت حق....
الكرونا بعضهم قال: يا أخي خليها التجينا وتاخدنا بيبقى أحسن من جوك جوك... وهي قريبة من قول دي الموتة المتمنيها..

[imported_عبدالله الشقليني]

بعض الأبطال يعرفهم أقرباءهم يا دكتور

[بابكر مخير]

ما هو حبس منزلي لكنهو برضك الساعات البتكون فيها في البيت طويلة..
قاعد في الأوضة وما قدامك إلا تلفزيون في الأوضة وعشان تتفرج فيهو إلا تصنقع ومع العمر الثقيل دآ.. الرقبة أصلن عصباتها رقن وما بتحملن رميىت الراس عليهن . تاني في الأوضة لابتوب رفيق طيب وظريف ومطاوع وأجمل حاجة فيهو أنهو معاك مليون في المية وما بيرفض ليك أيتها شيتن عايز تعملهو من خلالهو..
إن شكر بيرص ليك البتقولوهو دون إضافات أو تحسين.
وإن زم وقدح هي نفس أحاسيسك البتكبها بينزلها لا نقص ولا تعديل يعني ما ذي نوع البيقولو ليك دى ما صاح ودآ غلط.
اللابتوب هو الشارع البتتحاوم فيهو لمن تكون جوآ الاوضة وياهو الفريق الإتا ساكن فيهو.
تواصل وتراحم وملاقاة، مش مافي مرقة وحوامة أهو الحبيب اللاب بقوم بالواجب ويفتح ليك الحياة من خلال شاشتهو وبيسوقك فيهو بدل رجلينك أصابعيك لمن يلعبن بالكيبورد...
فيهو التواصل الإجتماعي بكل أوجهه، فيهو النميمة والقطيعة وتبادل المحنة والمحبة بشكلها دآ وهو غريب الوصف. فهي محبة وعواطف جارفة وأحاسيس مرهفة، لا تلامس يشوبها ولا تلاصق يحرمها.
كله على كله شوف بالعين لرسم ممكن يكون واقعي وممكن يكون إفتراضي لعب فيهو الفوتشوب وشوهو أو أبدع فيهو وأحسن حتى أنك تنجذب اليه وهو في الحقيقة "فشوش"..
فييهو وما فيهو الواتساب والفيسبوك والإنستقرام والمسنجر كتابة وفيديو فيهو صفات السين بي حدين، نفع ومضرة..
فيهو الأخبار وترامب، فيهو الفرجوني وغناء الحقيبة وفيهو الناس السماح والناس السناح وفيهو أسماء من حياتنا وفي حياتنا ولي حياتنا وبي حياتنا هي كسبت وإستكسبت الشهرة وحكمت وإتعرف..
وأنا طاقي الحنك مع صاحبي والمسافة الباعدآ بيناتنا حوالي عشرة كيلومتر وفي نفس الوكت بنتفرج في برنامج غنائي فيهو الجميل الحلو ياسر تمتام ومقدمة البرنامج السيدة هديل المشرف ومن باب الفضول سألت العم قوقل عن؛ من هي هذه السيدة لأني كنت ذي شفتها قبل مدة ظنيتها سنين في برنامج خاص عن التجميل.
وعند العم قوقل لا واردة تتوه ولا شاردة تضيع لادن يديك المفيد وفعلن ما قصر ولكن أثار فضولي أنهو في اليوتيوب هي مستضافة من أحمد في الصندوق ويلا. يعني لاحق شنهو ما كمان نشوف شنهو هو الحاصل.
حقيقتن السيدة وجيهة وجذابة وهي صورة من أوماتنا في الثقة بالنفس والإعتزاز بما هي فيه وتعمل من أجله وفي أخر صندوق "الأسود" كان سؤال هل فعلن تفكر في أن تفتح دار تجميل للرجال.
قلت ليكم العجبني فيها ما موضوع العفوية في الإجابة لكن الصدق في الرد وقالت: أيوة..
الغريبة أنهو مقدم البرنامج إستغرب ما كونها ردت بصدق لكن؟؟
كيييييييف يعني دار تجميل للرجال وبذكاء سألتهو إتا ما عملوا ليك مكياج في يوم زواجك وأجاب بنعم..
غير ذلك أحمد بيه دآ قبل ما يجي على الهواء ما قعدعهو قدام المريا ومكيجوهو "عات كان ما متنا شقينا المقابر" أنا لاحظت أنهو قص شعرهو كان إستايل وموحفحف بالموس ومجلط بي ذي عشرين جرام جل...
معاكم الحلقة دي وماني ندمان على أني كنت منشغل معاها وفات بي هناك لقاء لقمان تلميع مع السيد وزير الصحة الإتحادية.. يعني إتصور لقمان ةبعدهو لقاء ترامب..
الله يزيحك يا الكرونا أقله تخف علينا طلة ترامب اليومية



[youtube]https://www.youtube.com/watch?v=e_1539S68fI[/youtube]

[بابكر مخير]

الكُبر
رزانة وتقلة وكتير مرات حكمة
بيقولوا: الما عندهو كبير يشوف ليهو كبير. يحميهو، يوعيهو، يشفع ليهو ....
ما هو الكُبر ما بس عمر لأنه ممكن يكون مكانة زول الإجتماعية أو إقتصادية أو علمية مرموقة وزولن جسده من طول قامة وعضلات مفتولة أو صاحب كلمتن مقدرة وعند الجميع مقبولة..
يعني ممكن نقول أنه الكُبر ممكن يعتبر ذي النعم الربنا بيتكرم بيها على الإنسان من نقول مثلن جمال في الطلعة أو كمال في الخلق وكدآ يعني..
أها إن المكرمة الإتخصا بيها زول الكُبر دآ ما عمل بي الحفاظ عليها يبقى برفس في النعمة..
قول مثلن كاتب مرموق وبقى زولن كبير مشي يسقط في التعامل مع معلومات كآذبة ولا فطرة وغير موثقة. قول زولن أدهو مكانة وختوهو فوق وكبروا مقامه يقوم يفسد ويتمكن وكدآ يعني.
أها ذي ديل كُبرهم شين..
ذي الزول البيكبر في العمر ويكضب (ما عمر البشير كان كبير وبكضب)، شفتهو هبل نفسه كيف. ولا زولن كبير في العمر ويقعد يلقط في الكلامات والقوالات وفلان قال وفلانة سوت ذي دآ مش بيقولوا ليهو كِبر بي جهلتهو وحكاية كِبر بي جهلته دي النقيف فيها؛ زول ذي إتختا ليهو في مكانة ما مكانته وعمره ما كان لا في الحير شافها ولا من عند الطير سمعانها.. بيقوم يتصرف كما أنه في وضعه الأساسي. قول بقآ دكتور وإسم وسكنن زين والعربية طولها مترين لكنه في جواهو لساتهو دآك لا طور من فكرهو ولا صان نفسهو. حاقد يكره لكل جميل مع أنه ممكن يكون صاب منهو الكتير لكن تقول شنهو ما هو الصغير بيستمر صغير حتى لو وصل من العمر عتيا وفي المكانة عليا ودا هو ظااااااااتهو الكُبر الشين..

[imported_عبدالله الشقليني]

حبيبنا دكتور بابكر
ان شالا عيدا بخيره عليك
ويحفظك المولى بجلالة نعمتو

[بابكر مخير]

بي بركت العندهو لي كل مكشوف غطآ والعندهو لك محتاج عطآ
إن شاء الله ربنا يحفظك لي روحك ولي أسرتك ولي أهلك وأحبابك وحتى للما ليك فيهم غاية. نورن في الأدب كفاية وقلمن بكتب بلا دواية
أخوي شقليني؛ إن شاء الله اللطيف يلطف ويرفع عننا الوباء ويدينا علامة كآملة في تحملنا لي البتلاء وترجع الأيام لي قديمها وجمالها. هدوها والحنان ملوها. لا شدت أعصاب تشوبا لا نرفزة ولا إحباط وعصبية ومترستن تصيبا..
ربنا يديك الصحة والعافية وطولت العمر

[بابكر مخير]

لا ولا ومليون ولا حتى لا البليون ذي الكل يوم ترامب ممغسنا بيها وكيف رصدها دولارات لي شنهو ولي شنهو.
ذي الكُبر ما في شيتن أثقل.
أمسك عندك أولن كل شئ قديم في نظر الناس العادية ليك هو مقدس (بالله دي ما طلاشة وقلة فهم و و و حقيقي "خرف"):
أمسك وتقول تلبس، تلقى روحك تفتش في الهدوم القديمة أيام عافيتك ما هو لو قميص قديم حلاتهو أنهو بيكون فضفاض ومهيل وإتا أصلن برآك روحك في طرف نخرتك وما كايس مضايقة..
الجزمة ديك أيام شبابك بتكون دقشتا بيها وجلدها إترخا وترهل ذي جضومك، طريْ وهين ولا الشية ديك اللمن تتبلها بمسحوق حبوب الباباي وتسيبها يوم كاامل بي حالهو في درجة حرارة المطبخ (طبعن ما "تُكل" لأنهو دآك بتكون درجة حرارتهو بتدخل الكرنتينا بتاعت مصابي الكرونا يعني 38 سلسيآ وما فوق)..
البطلون الكان مقاس الوسط 36 بوصة وحسي إتا حِسيت وبقى الوسط بالكتير 32 يعني ما بشدك في بطنك وبخليك مرخرخ ومتمهل..
_________

والكُبر هو الحُزن؟!
أمسك عندك حتى الحاجات القديمة العندك ليها قدسية بِتحزن؟؟
تحزنك شوفتها لأنها في عداد الذكريات وقبل ما تلمسها تتحسر على الذي مضى وكيف كان المقاس ياهو المظبوط وحسي بقى زمبوط (والله أخدتها كدآ عشان تمشي مع الكلام وما كنت قايل أنهو عندها معنى، لمن لقيت عند عم قوقل "وهي الجزء الذي يتوسط نبتة البصل عند النضوج").. وبرضك يقولوا علينا متعربة وإحنا الجيل الغير محسوب من بعد وجود العرق العربي في الكون بنستعمل كلمات عربية بالفطرة الغير مقصودة.. "ما عارف العايز أقوله شنهو والقاصدهو شنهو لكن ما فرقت".. المهم نرجع لي موضوع الحُزن والكُبر..
حُزن الكُبر ما حاجتن خوارزمية ولاها تفاصلية ولا عايزة جمع وطرح عشان تتوصل لي فك طلاسمها..
أمسك عندك غير الحاجات البشوفها وتتذكرك الشال كل السمح في لفات وفات.
الأحر أنهو تتلفت حواليك تلقى الكون فضى من ناس الكنت بتسمع منهم خبراتهم وتتستمع بي حكاويهم. ديل مشوا وفاتو..
تتلفت تقول تتونس مع زولن قدرك بيفهمك وتفهم قولهو ما تلقاهو وتسأل تقول تلاقيهو.. ما تلاقيهو لأنهو مشآ..
يا أخي بقوا مشو الأصغر والأنضر..
دحن دآ ما الياهو الحزن ظاتهو...
ثقيل يا الكُبر المتلازمتك الحُزن

[بابكر مخير]

مع إزدياد سنين العمر بيقولوا الإنسان بيكسب تجارب ووعي ودراية أكتر..
وكمعادلة جبرية بسيطة ما ذي (س² - 5س = 6/6).. أسهل وأقصر نل لي هذا الحل:
بما أنه الإنسان بإزدياد سنين العمر بيكبر في العمر! فمعناها بيكسب تجارب ووعي ودراية أكتر..
طيب أنا دلوقتي كبرت في العمر معناها والمفروض أكون زدتا في الفوق دآك كلهو..
بس الغريبة مع زخم الزيادات المتركمة مع عدد السنين إتواجهتا بي حقائق ثابتة ومسلمات واقعية.
الأفندي ود الأفندي ياهو الميري هو شيتهو البيعرفو وما يمشي يتحشر في أمورن غير شغل الميري وشغل الميري هو امقصود بيهو العمل في دواوين الحكومة. مستني العلاوة والترقية، صرفية الماهية معروفة يوم كم ومنها كم بيمشي وين وكم بيبقى ليك للماهية الجاية وللعلم برضك المير قدر ما أنهو التسمية جات مربوطة بالعمل في الحكومة لكنه برضك بيشمل كل زول شغال براتب شهري وأخرتها تنتهي خداماتهو فرضا أو قسرا ويبقى يترزق من قروش المعاش الهي قدر ما طالت ما بتحصل ربع الراتب الكان بياخدهو إلا كان (ميرهو مجيه) ووصل رتبة عميد وما فوق في القوات النظامية والحكاية دي بتنطبق على المهنيين عامة. برضك تلقى كتير في الأحيان حتى الحرف تفرض نفسها على الأبناء فيطلع ود الحداد على طريق أبوهو وكذلك ود الخباز وهلما جرآ
نبقى نقول أنه التجارب مجرا إكتسابها في أغلب الأحيان بيكون مربوط بالحياة الإتا إتوجدتا فيها وما موضع فهلوة عشان تكون ود موظف وتبقى تاجر ناجح إلا غايتهو فلتات لكن ود المهني أو الصنايعي ممكن يكون لأنهو عمله أصلن مربوط بالتجارة وبيكتسب خبرة ممكن تأهله ليكون تاجر ناجح..
أجيبا من أخرها
طبعن العبد لله قدر ما المعادلة الجبرية كانت تؤهلني عشان أنجح في العمل في مجال خارج مصفوفة الميري من كمية السنين وقصة الخبة والدراية والوعي إلا أني فشلت فشل ذريع في أني أطلع من جبة الميري وأتزبط بهندام رجل الأعمال...
فهل الغلط فيني ولا في ال (س² - 5س = 6/6)

[imported_عبدالله الشقليني]

أنت ناصح ونصيح يا دكتور................
دة الكُبُر الخايف منو بعيد إن كنت لس بتكتب معادلات رياضية
يا حبيب خت في بطنك بطيخة حمرة كبيرة

[بابكر مخير]

النفس
توليفة من متناقضات تتحكم في الإنسان
نفس طيبة ونفس لوّامة ونفس كريمة ونفس خبيثة ونفس أمارة بالسوء...
لكن في حقيقة ثابتة وهي بتفوت على النفس أمرها..
وهي أنها مهما كانت وقدر لها أن تصبح أو تصير. إن كان يشار لها بالبأس أو التواضع أو الخنوع أو الغتة أو الكرم فهذه النفس ذائقة الموت ولا محال...
بنقول: إن كنت ساكن بيت قزاز ما تطقع بالحجارة وهي يعني إن نفسك أمرتك بالسوء شوف في روحك قبل ما تطلق لسوء الحديث عنان لسانك فما تعرف ربنا مكن يسلط ليك البقطعهو وخلينا على كدآ من أين سيحشر وأنت أين ستحشر بسبب رمي الناس كذبا..
هناك نفس قل أن تجدها في سودان اليوم وهي النفس اللوامة. البعض يرمي الحديث جزافا بغية شهرة رخيصة او لأمر في نفس من يمسك زمام أمره (شفتا ليا فييو لي "التفاف" وبيتكلم فيهو عن التأريخ وبيحلف بإسم الله الكريم) حسي دآ يقولوا عليهو شنهو غير النفس الأمارة بالسوء وبعيدة كل البعد عن النفس اللوامة.. زول ربنا أداهو الفرصة عشان الناس تسمعهو مش كان الأنسب يكون حديثه في جمع الشمل وخلق الوئام بين الأمة "الشعب السوداني"..
اللهم يا ربي أجعلها (( يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي )) صدق الله العظيم