اقتباس:
المشاركة الأصلية كتبت بواسطة أمين محمد سليمان
ياخي قمر الحقد الأصلع فتحو ليه بوست .... لي شهرين هنا ... زول عبرني مافي !!
|
يا أمين ...
خليك أمين في نقل المعلومة بالله ..انا زول هبب لي مافي أصلا..انا كان فتحوا لي بوست ترحيب كنت زغت..اخوك زول ضللة ساي ما بحب الحركات دي.وهسة اشبكك المصدر والدليل أو تعتذر..ونبقي في العوارات البتعرفها..
عن نفسي وفي رمضان سابق.كنت بتونس مع نبرا وحاتم ..قام حاتم قال لي امش سودانيات واكتب عندهم.. لهم ادارة لايظلم عندها احد ويا نبرا انا بزكي الزول دا,,,نبراس قامت باللازم.وتشكرات يا نبرا.
والنحكي ليك....
أول ما جيت خاشي يا أخينا غير اسامة معاوية ما عرفت زول.نوهائي كدا..حاولت اذكره بالايام الخوالي عمل لي جادي خالس..تركته ..قلت ليه يا الشايقي انا عارف الم فيك وين.
اسامة دا زول شاعر وكاتب وبحار ودبلوماسي وشايقي وعنده صلعة..مؤهلات كتيرة بروف كبير يعلم الله..لما كنت سكرتير رابطة النوبة في الجامعة هو كان رئيس رابطة مروي..قمنا عملنا منتدي سميناه نبته,,ناسهم كانوا بقولوا شعر ونحن الرطّانة بنصفق ليهم..يغنوا بالطمبور ونحن نبكي..المهم لا أطيل عليك واطيل عليك زاتو ما مشكلة..اسامة في تلك الأيام قمنا عملنا حاجة اسمها تجمع الروابط الإقليمية عشان نستعيد النشاط الثقافي في الجامعة بالقوة.. زي عشرة روابط..سنار كردفان النوبة مروي بورتسودان وامدرمان وغيرهم .عملنا يا بروف هرجلة وكركبة شديدة في الجامعة..أسامة الفلوتر دا خاطب الحشد ووعد الكيزان الشايلين سيخ وراكبين مواتر بالويل الثبور..تخيّل!! ..الشيوعيين اصحابنا غتتيتن جدا ..بدوا يدونا معلومات مفادها انكم ناس فلوتر وبقيتوا مراقبين فأعملوا حسابكم...انا عملت حسابي غايتو..
يوم اربحاء كدة نهاية شهر اسامة لقيته كاتب قصيدة جديدة كدة وقاعد في البنش راجي لي زولة كدا..أديته رسالة مفادها يا اخينا أن الجامعة فاضية قوم اتفكفك...ما اشتغل بي..خاشي ليه في برطمانية رومانس علي تي شيرت مخطط عرضي شاكيه كأنه حبشي بطوله داك القصير..خليته لمصيره ومشيت..
نفس الكيزان الكورك فيك ووعدهم بالويل بالثبور بعد شهر هو نسي لكن هم ما نسوه..لموه ليك مع 13 شيوعي و17 سياسي من مختلف الاحزاب..
السبت عرفنا الحاصل..كان معاهم الفاتح شيوعي رسمي أحمر هندامه جارنا انا واسامة في الحلة معتقل برضو.. جاء عمل مؤتمر صحفي قال في نفس اليوم فكونا الشيوعيين واسامة رفضوا يفكوه...الباقي يجي يتمه هنا...قلبي ما بتحمل والله
انا اسامة دا لو ما جا رحب بي وعمل لي رايح بفت الباقي
باقي الحكاية
قبل يومين تاجاب جا شايل ليه وصلة توثيق للفرعون في الفيس..عاينت للوصلة وقلت زي اللمبي –هي بقت كدا!!!-وجيت خاشي..ريكفري للباسويرد والقي الحلة كلها شيوعيين ورطّانة..يا جماعة انا ما داير كدا والله..عموما انا بوصي بإنو يرفدوا فيسل هليل وهدر حسين.كشيوعيين ورطانة..والمركب بتستعدل...أذر وايس بفك البيرك وبرجع اكتب في تويتر مع ناس ضاحي خلفان وجنيفر لوبيز،اندرياس انيستا..وقايمة الفرد بهناك بتطول..إذ ان لي متابعين كثر وانا متابع شخصيات كبيرة...باقي اخوك احلامه اكبر من هيك اسافير.تلمني بيك..مع الشكر لكل الذين رحبوا بي.
_
مرة قاعد جنب البابور في الشمالية ومعصنج دايرنه ندّوره بالبخرة..السامنسوق عمل Alert مفاده انو في حاجة جديدة.. فتحته علي عجل وقلت للترابلة استيف جوبز تعيشوا انتو مات...عمك تربال كبير قاعد فوق في القيفة كرعينه ما شايلاتنه.. قال لي يابني يلعن ابو تعليمك جوبز شنو وكوبس شنو دا بابور موية ما كهربا يا كوماري,,,ادوا البابور دا جاز في العادم عشان نسقي الباقي دا,,لا اله الا الله.