يا متكفي من ضرع القوافي الدار
ومندفي
علی برد الغنا الوافي
ونشيدو الحار
وما اتهردت لهاتك يوم علی حرفك
ولا ضلت معانيك المرافي
السار
علی ضفة مساديرا القلم صباحي
والشعر الخرافي وطار
وبار في سوقك المتعافي
سوس الروس
ومارجت البيجري تقيك
غنا وعافي ونصيح أشعار
ويا متعبي بي ريحة بلد متخبي
في وجعة ولف راجعبي
تالا لحونك المليانة
زي البانة
ماحوّج غناك لي شعبي
راكزني وهواك مايلبي
يا الداخل مسامات شعبي
يا اتنفست فيك احزاني
يا فرحك عرف يمرقبي
واتلقاك ضنين الكلمة
فارد لي سماك النجمة
مارق من عيون النسمة
خيتا من شعاع في دربي
شارق في الليالي الغمة
فانوس الحنّين قلبي
حارق دمي
شان ينجم فوق عصب القصايد نمي
شان نتلم فوق دعواتك المبروكة حين تنجمي
واتوكل واغنيلك
تلاوي حروفي ريحة المطرة
واتجاسر علی وصفك واجي اشكيلك
وطول ما نشفت كتاحة شتلات العشم جواي
يبق نيلك
واناديلك
وحد ما سافرت غنواتي واتغرب تظل هيلك
تقوم مغصوبة للمرقة
وتقع دمعاتا بينات ايد مناديلك
واناديلك
حفيف الوجعة
صوت الرجعة
للقمري الطفر من عيني يحكيلك
ومنك جدعة ترتاح البلد تنجم
فوق وتر الغنا التريان وجاييلك
شقي وحفيان
ومليان بي غناك ولهان
وحد مابتقت جواي حروف والحان
يطير طير القصيد لا فوق
يقع مابين ايدين غنواتك المليانة كارس وصان
يشيل من صوتك البرجعبو لي بيت الشعر فرحان
ويتوسد مساماتك عشان ينضح
نشيد شوقو ويغني غنا السرور
يمرق عرق واشجان
ويتلافاهو عند المرقة نسام الوطن احضان
ويغرق في ليالي غناهو
حين دنياهو كانت حلمو يوم صحاهو
بينات المعاهو نشيد
وطفر دمعو من عين الحنين الجاهو
واتواتاهو
عيد في عيد
وفي ذات ليلة
كانت طيبة مجروحة غنا ومحمومة
ناديناها
ياتفل الأسی الجوانا
تقل شاي عزانا هموما
وهي المسكينة
كيف مقهومة
من يوما الوقع قداما باب الخلوة
سكران بي غناهو الفاوة
ما طقشت عيونا النومة
مسخانة الميهي
وحلتا الوسخانة
بي مرق الكضب مسمومة
لقطنالا من حبل الفريق
باقي الضحية وريحة السلخانة
كان تقدر تقيف لا حيلا
تتماسك تغني الحانا
تقدل بي قفا الشفخانة
تقدل في وشي الشفخانة
في مخلاتا تاريخ الولف والشوق
وطيبة احلام
ودمعات الأسی الطفرت علی الجبانة
يا طيبتنا
اميمتي واخيتي
وامال الصبا التريانة
ماغنيت قدر وصفك
ولا عشر المدسدسو ليك
بكا واشواق
ولا حتی ان كتلني الفاق
ولا النيل ان بقالي مداد
رسم جياتك الازهار
علي روض الغنا الحراق
يظل افراق
ويغزر في القلوب معناك
ويحفر حنو في الأعماق
يظل افراق
ويكبر شتلك الرويان
ويهطل غيمك الدفاق
واظل افراق
وشن تنفع مع ضلك
حبيبات حبنا الرقراق
وما قامت صلاة اشواقنا
في بعدك
علی لقاط تيممنا
وانت وضونا للأشواق
واظل أفراق
الا ان تصطفيني سماك
نبي الغنوات وتامن بالقصيد
اوراق
واهاجر في مدن عينيك
مسرج طيب هواك براق
واكوّع فوق ضهر ريدتنا
اكركع حنّك العشراق
وانز من كل مسام الروح
سماحتن أحلى من تنضاق
واضاير من غناك غناي
مخافة نورك البراق
وماغنيت قدر وصفك
ولا عشر المدسدسو ليك
بكا واشواق
ولا حتی ان كتلني الفاق
يا طيبة بطان الطين
وسكان الغنا الطيبين
وحراق الحشا الاخراني
واول من يباشر وزين
ويا طيبتنا
ياك سكتنا
فوق درب العديل والزين
وفراجة هموم دنيتنا
عصفورة الوفا الركابا
لحن الحلي فوق اغصان نشيد غنيتنا
واتكسرت عليكي الخطوة
باشرناكي في باشة جديد ايامنا
بشرناكي في حفلتنا
واستنينا لما سحابك المبروك
تدودرو الريح علي حلق الفيافي مطر
تقوم ضحكتنا
تقلع بالرفيف الفيها محناتن قبيل وطتني
جمر الآهة كم بكتني
ما خلتني انقنق في قفا الامات شكايات
الاسي اللخبتني
ورغما عن نهارات الاماني ضهرنا
كيف هرت الوساوس بطني
وكيف شاخت صبايا النية
واتسندت تعكز ظني
ادفق خوفي فوق واطات ابوي تحملني
ما حملتني
ما استنتني
اقح غنواتي ما خلتني
عد ما قطرت دمعاتي فوق الماضي
واتوضيت حبيبة الذكری جات صلتني
مصلاية هجير وقلتني
وعد ما زاوغت احلامي
شارفت الفرح بكتني
مشدود فوق قوافي طوافا
كعبة غنوتن فنتني
واتشايلت الملم روحي من اكفان ضلامي
واجيها
اكتب فوق مسارح الدنيا ريدتن فيها
يا نابع نشيدك منها وجاييها
هادي الدنيا ضحكاتا
وسمانا وشيها
هادي الوقفة في طرف المحنة مشيها
هادي الواقفي في درب القواسي
وحاسي
مافكت حبل ريدتنا ما غمتت تفك الجيهة
ما نست الخطا التمشيها
وهادي المرة ما اتلاكت لهند الآفة
مطروحة وشي وصلاية
ما فكت عقيدتن ليها
غنينالا فوق القيف
وكيتا تكوي هدام السنين السمحة
باريناها
لا طالت علينا الحومة
لا قصرت عليها الطرحة
من بينات انين احلاما
شرت بين عيونا الفرحة
واتقلدن خطاوي الشوق
تطفر دمعة من عين القماري نشيد
وتتشابك ايديات القصيد
قوقاي
يذكرني الزمان نستني
سهر الآهة قعدت بالكتير حستني
يا فارض براسيم الهوی القدامي
واقف زي رسول الغنوة
لي عالم زمان احلامي
فيك ايامي
تتماری المطر والعيش
وتتضاحك خدار بيوضة
تتفالع قموح وتمور
وتترامی الجداول شوق
يبل حلق الغنا العتمور
ولون بي جناحو الطير سما الغنوات
وبي ضحكات قلوب مفتوحة
زي حيشانا
فوق اسف الغنا المجروح
مدن مبنية من الدمعة من الضحكة
حرقة روح
وصرات الوشي المطروح
من يابا الكتم احزانو في
ضل همبريب راكوبة
من يمة الملتق توبا
جات تنفحني
بي طيباتا
والخاطر وراها لفحني
جيت ابكيلا غبنا فينا جات بكتني
ما استنتني اقح غنواتي ما خلتني
اكتب فوق ضهاري الغيمة
مطرا ما رجاك يبحتني
تيراب الولاد القامو فوق تقند غناك
وصتني
رغما عن شحيح القدرة
جيدا لي صباح باختني
واستنتني في الفجاج وجيت احكيلا
حكواتن قبيل في الحارة هدت سري
كم هدتني
ياطيبتنا بكتبلك مخافة الفتني
واكتبلك مسافة شهقتك تلفتني
مين يا طيبة ما بيعرف ملامحك فيهو
لو طقشت حروفك اضانو
أو لاقاكي بين عينيهو
منو الما اتنفسك في الكتمة
صرابك طرحتي وشيهو
ومين يا طيبة ما شاكل في ريدتك ضلو
أو حجز قصيدتن ليهو
وهاك يا شمشنا المتكابي فوق درب الترك تيراب
محل ما تدخل الغنوات تفرش لهفة الأحباب
تخيت بي خيوتك ضو
يلتق ضلمة الأيام وتفتح للأمل أبواب
ويا غنواتو واقفات فوق قيوف الشوق
وكاتحات همبريب الساب
علی خيل باكر الممدود
عنيقريب فوق ترا وهباب
واتكيفبك القراع ودودر شوقو
بي جبنة هواك الداب
علی سرج العشق واحلامو
راجعلك ينور سكتك وايامو
واحضان الولف والريد
ومسدار لوعتو الغلاب
ومين يا طيبة مين
غير شعب راجل ما بيموت
غير نسمة شالت لون فراشاتا
وغشت كل البيوت
غير دمعة في فرح البلد أو مأتما
بتنزل خيوت
غير نجمة تلصف فوق كتف هادي التمر
عقبان تغنيلو وتفوت
غير رعشة زي رجفة قلب
بي رجعة الغايبين تبوح
والحلي تتلملم ضحك
والحزن يتفرق يروح
والخاطر المكسور يطيب
والعافي ترجعلو ويفوح
زي الورود اللامست طرف الندی البي فوقا روح
وانت الوقف يدي الشدر لونو
وشقوق الارض يبقالن مسوح
الليل بحر
أو من ودك صبرو الفتر
لماها في ريقالغمامات الصبوح
بستأذنك يا طيبة
لو كسرت دواتي ايدين رياح
من شوقي لي شوقك علی باب الصباح
واستأذنك لو غلطت هادي القوافي علی وشيك
مسكيني ما قدرت تغني وشيكي صاح
واستأذنك لو كلم المطر الخلا
وبيناتن القلم استراح
واستأذنك لو ضحكت عينيك قصيدة
وبكت احلامي الجراح
واستأذنك لو مت بي شوقك ولف
واحياني نبضك بارتياح
واستأذنك لو غيم سأل عنك
ردت سنابل غنوتك قيساب
وطيّب بال جروفك نيل
حاضن خطاوي القمري والتمر الشهق
بوابة من حلمك علی درب المسافرين
اليغنوك في لياليهم حباب
وايدك في ايد المشتهنك
تدخلي الأوتار مسادير من حنينا
وخوفنا يا طيبتنا
في غيبتك علی هادا التراب
وايدينا في قلب القصيد نرجاك
نضاير من نشيد احلامنا
حمی الاغتراب
ياك ضحكتنا
فراقة سنين قهمتنا
فراجة هموم دنيتنا
مصلاية زمن صحوتنا
في باكرنا من ها الماضي
ياك طبقة سكر فرحتنا
غمدتنا البنحلم فيها
ما جات المحن صحتنا
ياك نقزتنا عز نوبتنا
يا طيبتنا
عصفورة الوفا الركابا
لحن الحلي فوق اغصان نشيد غنيتنا
واتكسرت عليكي الخطوة
باشرناكي في باشة جديد ايامنا
بشرناكي في حفلتنا
واستنينا لما سحابك المبروك
تدودرو الريح علي حلق الفيافي مطر
تقوم ضحكتنا
شفع من غنا وسمحين
وقادلنبك عديلة وزين
ويا طيبتنا
هاكي ايدينا نتقالد زمن لمتنا
نفلع للهجيري كلابا
بي صوت همبريب جيتنا
