أها يا عكود عشان خاطرك... (أي بت شديدة بتحب ليها طُلبة «صبي بناي»)

[طارق جبريل]

[align=right](43)
من دربي داك مشيت علي المظلة الفي شارع الصحافة شرق..
ياها بُكانا وكتين تضيقبنا.. وكتين نزعل نمشي نقعد فوقها ووكتين نفرح نتوهط فوقها.. ولفت علينا وولفنا عليها.. فيها قرينا (ماجدولين) واستمتعنا مع (مصطفى سعيد) وحبينا (البحث عن وليد مسعود) و(مدن الملح) و(مائة عام من العزلة).. ما خلينالنا شي ما سويناهو فوقها حتى القرايي سويناها هناك... تمرين 23 بتاع حساب المثلثات الصعب داك حليناهو فيها... شاغلنا فيها بنات فاطمة عبد الرحيم رحمها الله... ووكتين مات صديقنا فتحي رحمة الله عليه بعد الدفن مشينا انا وعوض قعدنا فيها نبكي...
والقعدي فيها حسب الحالة.. وكتين نكون فرحانين بنمشي سوا ونحكي عن الشي المفرحنا... ووكتين نكون زعلانين الزعلان بيمشي عليها في الأول والثاني يبراهو...
وصلت المظلة وعيني لي عوض متشنقل وراسو متوسد السفنجات وكرعينو المكعوجات ديك تاكلِن في حديد المظلة علي المقصُوصة المعلقالا في مسمار في التُكل .. اصلي ما ناضمتو.. لقيتلي ورقة ألت فلسكاب جنبو وفوقها قلم بيق.. ومكتوب فوقها:
السمحة يا ست الخلوق
الدنيا من بعدك عذاب
لا حالفة يوما تحن
لا عايزة تسعدني وتروق
البسمة وحاتك غالبها المروق
والدمعة سايقاني سوق

ما قلتلو شي مشيت علي الكوشة القريبي ولميتلي علب ألات صلصة.. ومشيت رصيتن فوق بعض وجبت الحجار ختيتن جنبو وبقيت اشوف في الحافلات والعربات ماشي فوقنا وتنوني علي الجقور وكتين يكتشفلهن بُكان في المخزن فوقه عيش...
عوض قام يرمي في العلب بالحجارة ومرة مرة يشرد بعيد وعينو في الفسحي البين الامتداد واركويت (هسي اتملت ملي)...
- اسوي شنو يا طارق
- تسوي شنو في شنو
- الراجل دة قال لي بديك ستة شهور بعد تتخرج عشان تعمل العرس وتتزوج البت دي وكدة بكون ما قصرت معاك.. قال لي يا ولدي الناس اكلوا لحمنا وخطبتكم دي طولت وانا بقيت ما قادر اوري وشي الناس
- وانت قلتلو شنو
- هو ما اداني فرصة شان اقولو شي.. قهمني وكسر مقاديفي من الاول.. ومعاهو اخوه النحس داك..
- أصلك وقفت مبلم قدامهم وما قلت شي
- ياخي أقولك دة يشيل ودة يخت قبل ما افتح خشمي التاني ينط في حلقي.. لكن قلت ليهم انتو عارفين وضعنا في البيت وتاني ستة شهور ماهن كافيات فشان اجهز واعرس...
- اها..
- قالولي ما ترد هسي كدي امشي ورتب امورك وانت علي وشي امتحانات بعد تنتهي وترتب امورك تعال قولينا رأيك...
- طيب الجكس كلمته..
- ما قدرت... خفت عليها.. لو سمعت كلامهم دة بتموت...
- نان الحل شنو
- انت شايفلك حل.. القصي بايني ماها دايرلا درس عصر.. عمها دة ابو الولد الكان دايرها.. وهسي ضاغطين علي ابوها وشافوا الحِجى ألت الوقت دي عشان ما يكون عندهم ذنب ان بقوا فسخوا الخطوبة..
- طيب القول شنو... يعني إنت أكنو فهمك شنو
- انا ناوي اشوف خالتها عشان تدخل في الموضوع غير كدة ما عندي حل
- طيب والبنيي حا تعلقها كدي وما تقولها مالك مكوزم (مادي بوزك) كدي..
- والله يا طارق ماني عارف اسوي شنو حتى امي ما قدرت اقولها.. حاسابي بس ماني داير اكدر عليها.. وكتين اشوف في تعبها مقابلي اللقيمات والصيجان انعل ابو الفقر خصوصا وكتين يجي مصطفى اخوي ماشي ولابلسلو رداء مقدود ماشيبو المدرسة وتمسكو امي كل يوم تخيتو ليه وتاني يتفتق... باقيلك دي حالة ألت عرس.. افوتهم امشي وين ومحمد اخوي الحمل تقل عليه والمسكين لاهو قادر يتكلم لاهو قادر ينقنق وانا جيت وسويتها خطوبة وعرس وحب وجن...
- ياخي بتتيسر لا تسدها في وشنا... هسي انا قاعد اقول انت حا تفتحلنا النفاج نطلع من الفقر دة...
- يا زول نفاج شنو.. انا باقيلي دة زردوية ألت مشنقة وياني الحا افطس فيها واحتل ضُمة ضُمة..
- إني آمنت بالله يا زول اليشوفك متحنبك وكتين كنت اناضمك زمان ما يشوفك هسي... ياخي مشيت الصعب وفضلك الساهل..
مالك داير تتجن في آخر الطريق...
- طارق جبريل.. القصي بقت ماها ساهلي.. كفتين محال يتعدلِن.. يا أهلي يا العرس.. يا اما انساهم وامشي اشوفلي طريقة اعرس البت دي يا كمان اكمد المغصة في قلبي واشتري أهلي.. دا الشي الشايفه أنا وماني شايف غيره هسي... تعرف قبيل كنت بسمع في اغنية شادية:
شادية ما عارف ألت الله تراني بزرع
دحين من هني لامن اتخرج يحلها الف حلال... وتراني بزرع...[/align]

[طارق جبريل]

[align=right](44)
ونحن قاعدين ممحنين كدي جات وقفت علينا علوية شمشرة:
- هوي يا اولاد قوموا خالتي سكينة تفتش عليكم.. انتو مالكم
- علوية... القصي ماها ناقصاكي انت كمان
- بري يا اخوي انا مالي خالتك سكينة شافتني ماشي علي الزلط وقالتلي ان بقيتي شفتي الاولاد ديل قوليلم انا عايزاهم.. عليك الله يا طارق الفي شينو
- عاد أنا فشان غتاتك دي آبولدك... يبقالك السم
- اصلك فقر من يومك... لا تقولي شي لا تناضمني
- انت اصلك جنك دة آبتخلي.. لليلي تتحاومي في الحلة زي كلب الحر وتفتشي للاخبار والقيل والقال
- النبي يضريك ويقيفلك تقولي الفي شنو... ياخي كدي بتخلي راسي يودي ويجيب
- عوض قوماك انا عارف النصيبي دي ماها نصيحي....
مشينا علي البيت لقينا خالتي سكينة ماسكي جرادلها وواقفة جنب الباب... شلنالا الجرادل ووصلناهن جنب الدكان وقعدنا جنبها مبلمين ضُمة ضُمة...
- عوض يا ولدي مالك ليك اكتر من شهر لا تنضم لا قاعد تقولنا مال... يا ولدي مالك داير تقصر عميري معاك... انا اتهديت يا ولدي.. وماني قادري علي وجع قلب من تالاكم
- عوض: يمة مافي شي بس الامتحانات قربت ودي سنتنا الاخيرة.. ومقلق
- نان يا ولدي انت مفروض تفرح خلاص حا تخلص وتنتهي من اللت والعجن أليل القرايي دة.. بس ما اظن القصي ياها القرايي... القصي باقيلي فيها نصيبي في العمارات.. بس ماك داير تقول شي..
- يمة مافي شي قلنالك..
- طارق آآآولدي اخوك مالو... مالكم دايرين تكتلوني ناقصي عمر
- خالتي مافي شي... بس مهموم بالقرايي
- باقيلي متفقين... بس بيعفن وبينشم..
- خالتي قلنالك مافي شي... انا باقي عارفك وكتين تحكيها..
- اي كدي.. قوموا املولي حقتي صعوط من دكان المحسي
ما صدقنا قالتلنا كدي شلنا الحقة ومشينا علي دكان المحسي في مربع اربعة..
- عوض امك دي ان صادها شي انت السبب
- فشان كدي تراني مابي اقولها شي
- نان داير تدسو لا متين.. وهي قالتلك بيعفن وينشم
- والله يا طارق ماني عارف.. باكر عندي لقاء مع الجكس في اسكريم 41 ونشوف البيحصل..
- وووووب عليك عاد... انا اصلو لا تقولي يلاكا ولاني ماشي من جهتها العمارات دي
- ههههههههه والله سحر جاية مخصوص عشانك
- ياخي مالك داير توجع مصاريني
- والله ضربت قبيل في دكان الهادي وقالت لي جيب طارق معاك
- ان شاء الله تجيك حمى انت... يا زول اختاني
- هههههههههههه نان انت اصلك قايل نفسك ماك وكران معاي
- يا زول هوي انا لا قلت لي بت بحبك لا التزمتلي بي شي.. خشمي وماسكو عندي
- طيب لو هي قالت ليك بحبك حا تسوي شنو
- حباك برص انت وهي... انا من غير قولان اتهريت ورقدت خل... والله يا عوض البت دي وكتين تغمض عيونها وتقول لي: يا طارق... وحات الله انا اصلي لا بعرف انا وين ولا قاعد اقول في شنو ولاني كمان بقدر اشوف في عيونها... اذتني ياخي الله يعلم..
- طيب مالك متجنن..
- عوض زمااااان قلتلك القصي ماها لافقي يا الحبيب... ياخي شوف بس في وشوشنا اللافحها السموم دي.. يمين اتحرقنا رسمي... وشوف في جضيمات البنات ديل... يمين منديات علي نقاع الزير ياخي.. انا مرات يقولي راسي أتبِن جُضُم سحر دي... النصيبي علي البديفورد.. شكلها ناعمي...
- ههههههههه حرام عليك يمين نجضتها نجاض
- شوف يا ود امي... انا ناسك ديل ماني لافق معاهم لا هم لافقين معاي... دحين الله يسهلك..[/align]

[منال]

ود جبرين صباحك زين

نتابع و النفس طالع نازل فى شان صاحبك ... الا انت يا اخوى حكينا بقصتك كلها النشوف نهايتا ...

حكى طاعم

الا و ما بنختا قولة الا دى

مالو طارق ده بطئ ... و لا داير تشعتفنا سااااااااااااااى

[نادر السماني]

ود جبرين صباحك زين

نتابع و النفس طالع نازل فى شان صاحبك ... الا انت يا اخوى حكينا بقصتك كلها النشوف نهايتا ...

حكى طاعم

الا و ما بنختا قولة الا دى

مالو طارق ده بطئ ... و لا داير تشعتفنا سااااااااااااااى

هو ذا يا منال إلا (تشعتفنا ) بالحاء وليست بالعين

[طارق جبريل]

[align=right]سلام يا الحبان
الجن كفتني تاني فشان اتم النصيبي الوكرت فيني دي
ههههههههههههههههه


(45)
اصبحت الدنيي يا الحبان وزي مانا متعودين انا وعوض كل زول جا شايلو كباية شُب
ملياني شاي باللبن وعوض جابلو صحن طلس مليان لقيمات من عند خالتي سكينة واتقنطرنا في
الحجار القدام الباب .. نلغف في الشاي المقنن ونبلع في اللقيمات...
- عوض هسي الشورة اكنها شنو
- والله يا طارق ماني عارف تراني مواعدها الساعة 12 ونشوف البيحصل شنو
- انت مالو كلامك بقى ميت كدي وقاطع اللهجي
- آآآرسوول آآطارق لا توجع مصاريني انا براي بقيت علي الهرود(دة يشرحها ليكم شايقي)
- يا زول انت مالك تكورك فيني.. الريدي مو ياها ألتك أنا شن سويت
- هسي كدي لا تكتر الكلام قوم اكويلك بنطلون وقميص عشان تمشي معاي
- تمشي بطنك قلتلك ماني ماشي انا
- هههههههههه ياخي والله والله سحر تسأل منك
- انا واااااااااا وجع قلبي..آآآرسووول قالتلك جيبو
- اي وحات سكينة امي
- ما دام حلفت بي سكينة ياها القالتها.. يا الحبيب ان البنيي دي وكتين اقعد جنبها
كلي اكركب علي شوال القزاز وكتين بتاع القزاز يلكز في حمارتو
دحين لا توكرني معاك الله وكيلك ماني قادر علي الوجع دة
- يا زول انا الوكران .. انت تراكا تكاكي من لااااااابرة
- نان انت اصلك قايل المكاكا دي ساهلي.. يمين الجدادي تكاكي يومها كله
فشان ترميلا جنى جداداييي ويحيدي... وكتين تشوف المكاكا دي تقول دايري ترميلا فيل
- ههههههههههههههه كدي قوم اكوي هدومك ونتقابل حداشر هني عشان نمشي
- سمح الله يعدلك
مشيت ولعت الفحم ومسحت المكوة وفرشت الملايي فوق الطربيزة الكبيري
وكويت هدومي ومعاهن عراريق ألات ابوي.. ومشيت علي امي في التُكُل
- انت تكوي في هدومك ماشي وين
- عندي مشوار مع عوض
- العمارات يا ابن الهرمة
- هههههههههههه شن عرفك بيها انت يا بت ابو دية
- كيفن آآبعرفها.. وكتين تكوي وتغني لي محمد كرم الله.. وحات نضري
بعرف القصي فيها نصايب العمارات ديل..
- ههههههههه يعني اغني للنعام ولا محمد جبارة
- هن البنات ديل اصلهن ماهن دايرات يفوتنكم
- هييي انا مالي عليهن كمان
- امشي... وحات الله خالتك سكيني قالتلي خاتات عينن عليك..
شوف يا ابن الهرمة.. البتعرسك لليلي ما اتولدت
- هههههههههههههه نان دايراني اشوفلي شُوويفعي واربيها ولا اكنو شنو فهمك
- انت كمل قرايتك والعرس ملحوق
جات الساعة حداشر لبست وطلعت علي برة لقيت عوض جاهز ومشينا علي زلط
شرق وركبنا الحافلة ومشينا علي العمارات..
وصلنا لقينا البنيات واقفات قدام عربيتن
-سحر: اخيرا يا دكترة سألت مننا
- سحر ازيك ياخ ان شاء الله بخير
- جكس عوض: احم احم.. وانا ما بتسلم علي يا دكترة
- افو انت عاد بيفطوك.. بعدين انت موش قالدتي زولك انا وين تطيريني
- ههههههههههههه والله يا طارق لمن تسافر بقول لي عوض ياخي اشتقت لي مناكفة
طارق ولسانه السليط داك
- كدي خلونا من السلام هسي انتو فهكم شنو واقفات برة كدة
- ياخي انا الليلة عايزة اعزمكم في محل تاني زهجنا من اسكريم 41 دة
- محلا تاني اكنو وين يعني
- في محل سمح اسمه سلفرمون
دنقرت علي عوض وقلتلو: انت دحين وكتين جيتك في الداخليي وقلتلي نمشي علي بابكر
في البركس موش دخلنالنا فيلما في النيل الازرق اسمه لاينغ مون..دحين في زول سوالو محل
أليل فول وسماهو بي اسم الفيلم..
- طارق روق عليك الله
- مالك يا دكترة
- ابدا بس سلفر مون دة يطلع شنو
- سحر: لمن نمشي حا تعرف يا دكترة يلا اطلعوا العربية عشان من هناك انا عازماكم غداء
وحات نضري البنات ديل باقيلي قايلاتننا عندنا مجاعة في بيوتنا.. قربت اقولهن:
يا بنيات المصارين البيض نحن نحمد الله بي كسرتنا وويكتنا والعجب سخينة خالتي سكينة بالدكوة
ولا تركين بت ابو دية وكتين ترمي فيهو القدحة والريحي تدقشك في نخرينك.. الله الله..
خُفت اقلهت حتة التركين دي يقومن يغمرن ونبقى في اليفكنا منهن.
جكسوية عوض ركبت قدام مع السواق وعوض دخل قدامي وانا دخلت وراهو وجات سحر قعدت جنبي... اصلي اصابعين يديني ديل بقن يرجفن علي جريد النخل وكتين تدقشوا زيفي
والعرق ينقط منهن علي نقاع الزير.. ورجعت ابلع في ريقي.. ووكتين العربي دايري تقوم
كتفها دقش كتفي.. يمين حلاوة قطن ضربت في ترلة قندران... عيوني نططن وحسيت بي اضنيني بقن طوال ومسخنات علي طار المداحين وكتين يسخنوهو قبل ما يبدوا المديح..
شوية طلعت ليها شريط لي محمد ميرغني قالت للسواق شغله..
كلمني حاول حس بي
كلمني ارمي اللوم علي

ووووووووووووووووووووووووب وووووووووبين علي[/align]

[طارق جبريل]

(46)
وقفنا يا الحبان قدام المحل الاسمه سلفر مون دة ودخلنا..
ان كان نلقالكم الدنيي ملياني بنوت واولاد متمرين كدي.. والمحل مضلم وفيهو انوار ضعيفي
زي نور الفانوس وكتين الشريط أليلو يكون باقي عمر والقزازي ألتو ليها سبوعين ما اتمسحت..
وكل اتنين ولا تلاتة قاعدلهم في طرابيز زي ألات العرس ويتهامسوا ويتضاحكوا..
طوالي نطة في راسي دكان الهادي والناس قاعدي في الحجار... شي ياكل في البوش
وشي ياكل في اللقيمات مع الشاي.. وشي يقرش في البصل مع الفول..
وأمة الله دي تراها تقهقه وشي يجوعر وشي يدوبي.. وشي يرطن
هني الكلام كله همس.. باقيلي مافي زولا فيهم قاعد يعرف ينبز ولا يشتملو زول
قعدنالنا في طربيزي انا ضهري علي الحيطي وجات جنبي سحر..
وعوض وبنيتو قدام مننا علي ان بقوا يتهامسو آآآبنسمعم..
سحر: شنو يا دكترة مالك مقاطعنا
- ابدا والله بس انت عارفة الجري والبنا والقصي خلاص بقت آخر سنة
- طيب ياخي وسط الحاجات دي كلها ما لقيت ليك فرقة تجي تشوفنا
- والله دايما في البال... بس القدم ليهو رافع
اخدتلي لفتي وشفتة في البنيي... والله يا الحبان قلبي فرا وأصله انبهطة وبقيت مقهي
الوجنات علي الجلي وكتين تشيلك منو ملعقة ضواقة... شويتين قعدت تعضعض في شفتها
التحتانية والشفة تنبعج بي هني وهني... ماها ترياني وملاني وناعمي زي كعكي العيد
موش زي شلاليف عوض علي القرقوش الاتحرق في الفرن.. يمين الاصابعين منفخات
علي الموز المقشر.. ووكتين تخت اصبعها في وجنتها
بس سامبوكسة وقعتلها في صحن أليل جلي...
هسي دي بنيي ما تتراد.. وحات الله قربت اطلع برة واكشح التراب في وشي
زي حبوبتي نفيسي وكتين تزهج من واحد من ولادها وتكشحوا بالتراب وتقولو:
هاك دي في خشكم ان بقيت نفَعتة...
عوض يتهامس مع بتو وعيونو واقعي وشايلو هما الله بس يمرقو منه
وجكسويتو فرحاني ومدخلة ايدها في ايدو زي حلاوة قطن ملصقالا في مُفراكي...
سحر: طارق انا عايزاك براك ضروري شديد
- سحر مالك عيونك كدة مقلقة ونبرة صوتك ماها عاجباني
- طارق اعمامي قاعدين يدبروا في حاجة لي عوض واختي ما عارفة حاجة
- حاجة زي شنو يعني
- عايزين يفركشوا الموضوع بس بي طريقة انه عوض الما قدر يعرس
- هم من الأول عارفين ظروف عوض وابوك عارف كدة
- ابوي ضاغطنوا يا طارق
فجأة جكس عوض ناداني: يا طارق موش امبارح جانا لص في البيت
- شنو... لص
- ايوة ياخي جانا لص في البيت
- ولص دة أكنو شنو ضيف ولا شنو
- ياخي لص.. حرامي يعني
- بالله انتو حتى هني الحرامي اسمه لص ... اها وشن سويتو
- ياخي كان عايز يفتح خزنة بابا في اوضة المكتب وقام شافوا الغفير وجرى وراهو ما لحقو
- غفير... يعني ناس ابوكي ما جروا وراء الحرامي
- لا ياخي ابوي صحا بي حركة الغفير وقام نزل لقى الحرامي هرب.. والصباح مشى
نقطة البوليس الفي شارع واحد وبلغ عنه...
بالله عوض دة نصيح.. ديل ناس يعرسوا منهم.. حتى الحرامي أليلم حرامي خزن
ماهو متل أليلنا.. يدخل يسرقلو ملاييي وتكون كلها مكرتبي بالكركار
وإن بقى شالو لحاف يلقاهو مطرف ناس البيت خاتنوا في الشمس فشان ينشف من بول
الولاد وكله خرايط بول ومصَنِنْ والضبان كابسوا..
ولا إن بالغ يسرقلو سفنجات من تحت السراير ويلقاهن نخرينن ملصقات بالمسامير
ولا يسرقلو توب جارات نصه مقطع وطرفه فيهو حلاوايي ألت ريرة مربوطة
تكون نستها المرة لمن مشت تباركلها شي وربطتها فشان تديها ولدها الصغير..
والعجب ان بقى مسكوهوا ولاد الحلة... يمين حتى الشطة يقشطوها في عيونو
دة ان بقى ما قشطوها في بُكانا تاني... ويجلدوا فيهو الليل كله لامن تصبح وبعداك يودوهو
البوليس... هنا اسمه لص.. وهناك حرامي لمن يتقبض تلق الشفع جارين وراهو: ياهو.. ياهو... ياهو...
وهني سحر رقبتها منديي زي قزازة الببسي لمن تطلعها من برميل التلج
وهناك خالتي سكينة.. رقبتها معضمي وناشفي علي شجرة الدوم اليابسي..
وعوض يقولك يضع سره في أضعف خلق...
اييي سر شنو... الواطة في خشمك

[طارق جبريل]

الحبيبين كيفنكم

(47)
كملنا يا الحبان الداندورمي في سلفر مون الجن دي وطلعنا..
جكسوية عوض قالت للسواق امشي وانا بسوق وبرجع البيت
سحر: ياخي انا جعانة شديد وعايزة اعزمكم بيتزا في نمرة اتنين..
جكس عوض: بختكم الليلة سحورة راضية عليكم يلا اركبوا
- سحر لا انا عايزة اتمشى.. ممكن يا دكترة نتمشى انا وانت وهم يسبقونا
- مافي مشكلة.. نحن من قالولنا: تاتي ترانا ماشينا.. عجلة ماها عندنا
عوض: ههههههههه.. الله معاك يا فردة
عوض وجكسيتو ركبوا عربيتم ومشوا وانا بقيت مقاصد محكمة المظالم دي
قلبي قرب ينقلع من مكانه.. ويسوي ربربربرب..
- معليش يا دكترة حبيت اتمشى معاك.. رغم اني ما شاورتك
- يا زولة ولا يهمك انا طول عمري جاري... واقول ليك شي زمان انا وعوض
لمن نزهج بنجي من الامتداد كداري ونحوم في العمارات ونمرة اتنين
ودي كانت فسحتنا الوحيدة... نقعد نحلم اننا عايشين زيكم كدة
- هههه يا دكتور في زول بيتفسح كداري..
- عاد نسوي شنو قدر قدرتنا..
- معليش عايزة اتمشى معاك ياخي.. ما دام انت ما شغال بينا
- يا زولة اخدي راحتك.. الدنيي دي مانا حارلنا منها شي
- طارق..
واااامغستي انا وكتين تنطق اسمي دة لامن بطني توجعني
واحس اني بطني جاريي عديييييييييل
- نعم يا سحر
- بحب اسمع اسمي بي صوتك
- اسمك سمح يا سحر ماهو متل اسامينا الهناك ديك
- ليه اساميكم مختلفة عن حقتنا
- اقولك شنو.. انا خالتي وقرايبي كلهن يا ستنور يا ست الدار يا بت موزة
يا الزهرة بت ككو.. ولا بت بلولة ولا الدعبونة
- طاااارق ديل اساميكم ولا بتضحك علي
- يمين ديل كلهن خالاتي وعماتي وما جبتلي ويحيدتا من بُكان تاني
- بس تعرف شكلها اسامي حنينة
بت ككو حنيني.. هسي البت دي اشوفلي منجل احش رقبتها
- يا زولة هي ان بقت مافي المحنة دي ما كان عدمنا زماااان
يمين ليلنا ونهارنا نقرض في محنة الجن دي لامن فترت مننا
- هههههه لا ياخ ما تقول كدة انا شفتكم هناك.. دايما بتضحكوا
- نان ان بقينا ما ضحكنا ما بنفقع يا بت الناس
- طارق انا خايفة شديد علي اختي.. طارق انا مرعوبة وما قادرة انوم
- الحاصل شنو بالضبط
- طارق ود عمي عامل القصة تحدي كيف عوض يجي يخطب اختي كدة وهو عايزها
وكيف اختي ترفضه...
- ياخي دة زول مطرطش.. يمين انا بت ترفضني ان بقت قمر آآآبقبل عليها
- طارق حا تقيف معانا
- يا سحر انا في ايدي شنو اسويهو... انا يا دوب صديق عوض.. وما عندي أي تأثير
علي ناس بيتكم...
- طارق بابا دايما كان بقول انك عقلاني شديد ودة نوع الشباب البيحبهم
- بس برضو مافي شي حا يخليني اقدر اسوي حاجة
- طارق اختي حا تموت لو ما عرست عوض.. وانا يا طارق ما قادرة اتصور ما اشوفك تاني
يعني انا القادر ما اشوفك تاني... وحات ود الكرسني انا وكتين يجي
اسم البت دي في اي حتة قلبي دة ياخدلو فرة فرتين ويرجع تاني... وبطني لامن تمشيني
- سحر حاولي تفوتي حتة الامتداد دي.. دة حي مليان احباطات.. ناسه حلوين وطيبين
بس الدنيا فايتاهو لي غادي.. ماها دايري تديهو ريقا سمح
- طاااااااااارق ما تخليني اكره القروش ويوم القروش
الله بيسألني البنيي دمعت... لا عرفت احضنها وأواسيها... لا عرفت اقُشلا دمعتها
خفت اجرح خدودها العلي الكعكي الناعم دي بي يديني العلي صنفرة الحدادين ديك
- سحر نحن في الشارع
- انعل ابو الشارع علي العمارات علي الناس الفيها
- سحر اهدي.. لو بتعزيني اهدي...
- طارق ياخي والله انا تعبت.. وانت ما عايز تقول اي حاجة.. طارق قلبي وجعني
- يا سحر زماااان قلت ليك.. القول التزام... وانا ما ممكن التزم بي شي ما بقدر انفذه
- ياخي بتقدر بس انت قول خير...
يا ألطاف الله ياخي... البت دي فتتو عدييييييل وانا قاعد مبلم كدي زي المحكوم بالإعدام
ربنا يجيبلك السعد لااااعندك وانت ماك قادر تتهنابو...
- سحر...
- نعم يا طارق
- غلبني الأقوله..
- طارق اعتبر دي اجابة بي نعم..
سكتة وغلبني وحسيت رويحتي دي دياري تمرق من بُكانها... وانا ماشي معاها جاني طيف
ابوي مصرصر وشوا... وامي خاتي يدها في حنكها... واخواني واخواتي..
وصلنا محل البيتزا لقينا عوض وجكسويتو طلبوا الاكل..
قعدتة في طرف الكرسي زي الضاربني حقنة ملاريا...
واول مرة اشوف البيتزا... ختوها قدامنا... بقتلي زي الفطير الكابين فيهو دمعة مسبكة
ومقطعلهم فيها فلفلايي من فوق وجا زول بي سكين قطع الفطير دة مثلثات...
بيتزا شنو يا ربي...
يا الله هوووووووووووووووووي تحل قيدي دة

[اشرف السر]

This is beautiful Forum, beautiful Sudanyat

[هيثم علي الشفيع]

طارق جبرين(بالنون)
إزيّك


ياخ عندي سؤال
لي زمن طويييييييييييل
داير أسألو بخصوص البوست دة ...

يمممكن يكون تعسفي شوية..


القصة دي عندها نهاية؟؟؟؟؟
ولاّ غلبك تتمّها!!؟؟؟


وحاة سيدي علي
بي سودانيات دة
بتكون لاقتني
في المنتدى التالت ولاّ الرابع

ولا واحد فيهن جايبنها لي نهايتا مافي

[طارق جبريل]

المشاركة الأصلية كتبت بواسطة هيثم علي الشفيع

طارق جبرين(بالنون)
إزيّك


ياخ عندي سؤال
لي زمن طويييييييييييل
داير أسألو بخصوص البوست دة ...

يمممكن يكون تعسفي شوية..


القصة دي عندها نهاية؟؟؟؟؟
ولاّ غلبك تتمّها!!؟؟؟


وحاة سيدي علي
بي سودانيات دة
بتكون لاقتني
في المنتدى التالت ولاّ الرابع

ولا واحد فيهن جايبنها لي نهايتا مافي

هيثم كيفنك
ياخي القصة دي بقت زي اللعنة هههههههههههه
محل امشي القاها قدامي....
اول شي الزولة الرئيسية في القصة قالت يا احكي كل شي يا اقيف
ودي مسألك مؤلمة ياخ....
والجزء الاخير دة عايز ليه قعدة لانه انا بكتب من الذاكرة طوالي ما قاعد احضر
او اكتب وامسح وكدة لمن اتذكر التفاصيل كنت بجي ارشها هنا وبمرق
وما قاعد اقراها ذاتو هههههههههههه