نكت الخليجين البايخه في السودانيين
النكته فن في القائها وتوصيلها للمتلقي بطريقه دراميه حتي يستوعبها مع اختلاف درجات سرعة الاستيعاب هنالك نكته بايخه طريقه القائها ربما تعدل في استحسان قبولها .... تم تعيين موظف معنا بالبنك من اولاد نيالا حديث التخرج وفترة تواجده معنا بالميز كان يحاول جاهدا الدخول في مود الونسه اتذكر كنا عندما نلقي نكته يضحك بعد نص ساعه والجميع تجاوز النكته في الونسه درجة الفهم عندو بطريقة عربية الديزل من احدي مشاركاته البايخه وقد قمنا بمجاملته بالضحك حكي نكته:
قال في واحد استاذ شغال في قرية اسمها شق تم نقله لمنطقه اخري بها قرية اسمها شقوق مشي لي ناس التربية والتعليم قال ليهم من شق لي شقوق انا ضب . بايخه ((نكته زي دي لو تم صياغتها في مجال اخر من الشقوق بتكون جميلة المشكله اللوائح)).
من الصباح ويوم سبت بعد اجازة خميس وجمعة مدير الشئون الاداريه سعودي عامل فيها دمو خفيف مر علي في المكتب لادخال السرور الي نفسي بنكته.
قال في سوداني جابو ليهو 9 اولاد سود العاشر ابيض .... سألني تعرف ليه؟؟؟
قلت ليهو ليه...
اجابة النكته: عشان الحبر كمل........................ بالله دي بضحك
ضحكته ضحكت مجامله قلت ليهو بإندهاشه ومعاها تنطط عيون ياخي انتو لونا الاسود ده مطلعين فيهو نكت كثيرة رابطنها بي الظلام قبل كده قلت لي نكته السوداني في الظلمه ما بتعرفو لو ما ابتسم اها انا اقول ليك دي.
في واحد سعودي ولد 9 اولاد الواحد فيهم عينو صغيره زي قد الابره الولد العاشر طلع عيونو كبااااااااااااااااااااااااااار تعرف ليه ؟؟؟؟؟
قال لي بدهشه ليه يا زول.
قلت ليهو السواق الفلبيني عملو ليهو خروج نهائي.
|
