ما هو الفرق بين الغرور و الاعتداد بالنفس

[فيصل سعد]

سلام للجميع..

لا تقبل الإجابات المختصرة، دايرين اندياحات و أمثلة
و نماذج، و توضيح للخطوط الفاصلة و الحمراء..

و نواصل..

[قرقاش]

الحبيب فيصل كل سنه وانته طيب ..
اظنه الغالى حسين عبد الجليل ...هو الذى سبق له ان عرف الفرق بين الحسد والغيره ...وقال ..الغيره هي بلغه الكمبيوتر .. كوبى بيست .. اما الحسد فهى كت ..بيست ..

اما سوالك أعلاه ...فالمعتد بنفسه يرى نفسه عملاق ويريد ممن حوله ان يكونوا عمالقه مثله
اما المغرور ..فيظن انه عملاق وان الاخرين اقزام حوله...وفرق بين من يرى نفسه عملاق ومن يظن انه عملاق ..

[فيصل سعد]

المشاركة الأصلية كتبت بواسطة قرقاش

اما المغرور ..فيظن انه عملاق وان الاخرين اقزام حوله...وفرق بين من يرى نفسه عملاق ومن يظن انه عملاق ..

أن بعض الظن إثم.. مداخلة جيدة يا حبوب، و أعتقد هناك خيط رفيع جدا بين المغرور و المفترى ذاك الذي يرى الناس من حوله أقزاما.. و برضو في مغرورين مسالمين فاكنها في روحهم و مركزين على أنفسهم شديد و ما شغالين كتير بمن حولهم و ما شغالين بموضوع حواء والدة و كدا.. و طبعا كما تعلم هناك تحفيز سلبي و إيجابي و هناك استفزاز سلبي و إيجابي و هناك جمهور، فدايرنك تخش لينا في الموضوع دا بإسهاب أو في الحتة دي على حسب قول المثقفين،، بابكر عباس نموذجا..

يديك العافية..

[ناصر يوسف]

يا باذخ
كل سنه وانت معتد بروحك ياخ

انا عن نفسي دي

معتد بيها للطيش والله

لكن ... الاعتداد بالنفس ده بمجرد ما يشوبه الاحساس بالتفرد واني يا دنيا ما فيك الا انا

كده يا دوووووبك الفكيتها فوق روحي وبقيت مغرور بحاجاتي الانا شايفها فوق لمعرفة الاخرين

زمانئذ كان عندنا ود جيرانا
سافر ليهو كورس سغنتوووووتي كده لندن والكورس ده ءهلو عشان يمشي يشتغل غي السعودية بنين
مشي تم ليهو سنة وجانا راجع في اول اجازه ليهو

اهااااااا زولنا ده كان فاكيها فوق روحو جنس فكه .. اسكت بس

شايف نفسو يا دنيا ما فيك الا انا

القرش ... عندو
اللبس الكيف كيف داك .. عندو

الريحه ال .. ون مان شو .. في زمنها داك ... برضو عندو

ما يشرب اي مويه الا موية صحه
ما بياكل مع اي زول .. يقعد يفتش للاكابر في المناسبات عشان يقعد معاهم في صينية واحده

ما بيركب مواصلات
شايف نغسو كبييييييير علي الكل وما كل زول ممكن يكون صاحبو

مره مشينا لمناسبة في قرية من فري شمال كردفان .. وهاك يا قندفه

نو ايام سوري البتاعه دي انا ما بشربها .. ده بالنسبة لنشاة العيش
العصيده ... برضو .. ات از سو بريميتف

كلمة انجليزي يحشرها ليك فجأة كده في نص جملة متكلفة بالعربي

ياخي مرق ليك ليهو زولا عربي لابسلو عراقي وسروال ومركوب وطاقية حمراء
الساعه الرشاهو ليك بالانجليزي واداهو ليك شوية فرنسي وروسي وايطالي

صاحبك لامن فهم حاجه
وختمها ليهو بكلام خلاهو يفتش علي اووووول عربيه مغادره الحله يغور فيها

وراهو انو هو العربي المنجعص فوق الثباته ده
خريج لغة انجليزية .. ترجمه وانو بيتكلم 5 لغات وانو شغال ليهو في سفارة اجنبية في باريس واخد اجازتو وجاء يقضيها مع اهلو وحبانو في قريتو وعمرو ما نطق ليهو اي كلمة بأي لغة تانية غير لهجتو المحلية

غايتو صاحبنا داك لا يوم الليله بكون عندو اسهاااااال


هههههههه


ياخي التواضع ده اجمل منو مافي والله

انا طبعا بيعجبني اعتداد كاتبي المفضل بابكر عباس بنفسو ياخ


ههههههههه

[فيصل سعد]

تمام يا ابو رحيق و مداخلة دسمة و ثرة
سنعود لها قطع شك..

ارقد عافية..

"التواضع شيمة العلماء"

[فيصل سعد]

في ناس بيقولوا الزول في حقه
يتفلهم و يغتر زي ما عاوز..

أين الصواب و الخطأ؟؟؟

[فيصل سعد]

الغرور و الفلهمة و الافتراء حتما يقودوا
إلى الأنانية و النرجسية.. ما هي الإشارات
و الدلائل و المحاذير؟؟؟

[خال فاطنة]

حبيبنا فيصل...مساءاتك يا جميل.....
في تقديري...
الاعتداد بالنفس سلوك موجه نحو الذات، اما الغرور فهو سلوك موجه نحو الغير...

[فيصل سعد]

المشاركة الأصلية كتبت بواسطة خال فاطنة

حبيبنا فيصل...مساءاتك يا جميل.....
في تقديري...
الاعتداد بالنفس سلوك موجه نحو الذات، اما الغرور فهو سلوك موجه نحو الغير...

حبيبنا خال فاطمة كل سنة و انت طيب. كلامك حقيقة مافي شك
و نظريا صاح ، و لكن في الواقع الاعتداد موجه للغير اكثرمن الذات،،
انت ما سمعت المثل "اكل ما يعجبك و البس ما يعجب الناس".. نحن هنا لسنا بصدد منع و تسويق عدم الاعتداد بالنفس و لكن نريد ان يبتعد هذا الاعتداد المستحق عن الغرور و ما شابههة من الظواهر السلبية و النفخة و الافتراء و الشوفونية و زيادة فكة الناس في روحهم، و اثبات ان التواضع لن يخصم شيئا من الاعتداد و الفخر..

ابقى طيب..

[فيصل سعد]

المشاركة الأصلية كتبت بواسطة ناصر يوسف

يا باذخ

ياخي التواضع ده اجمل منو مافي والله
انا طبعا بيعجبني اعتداد كاتبي المفضل بابكر عباس بنفسو ياخ
ههههههههه

و الله اعتداد المستنير عاجبني انا اكتر منك..
اها اديك مثال و بيان بالعمل:

واحد لاقيته في النادي السوداني بالصدفة في رمضان الفات هسي دا و زاملته في الوست ، جينا يوم نتعشى في المطعم قريب الساعة 2 صباحا و ماشين بيوتنا، قلت لصاحب المطعم اعمل لينا واحد فول مصلح و كتر الجبنة و الزيت، زولك قال لي انا ما باكل فول!! قلت ليو ياخي بطل هظار اخر الليل "بابكر عباس بياكل فول" قال لي "بابكر عباس دا منو؟؟" قلت ليو دا واحد اخونا لو شفتوا احتمال تطلب ليك عدس و موية فول و تخلي لي الصحن دا استمتع بيو براي و كدا

[أسعد]

الأعتداد بالنفس هو ان تكون متسقا مع ذاتك في غسيل ملابسك وعدتك
الغرور هو أن تشتري زوجة على سنة الله ورسوله لكي تعمل خادمة عند اهلك!







وكل سنة وانت طيب يا معلم

[فيصل سعد]

نموذج تاني يا ابو رحيق:

قبل رمضان كنت مع واحد اخونا و قريبنا قي داره العامرة، بعد المغرب قال لي ارح نمشي نشرب قهوة و شيشة، كنت لابس بنطلون و تي شيرت و شبشب لا غبار عليهما البتة، زولك مشى انقشط فل سوت و كرفتة و جزمة تشوفه تقول ماشي انترفيو او مسافر لمؤتمر علمي قال لي مالك ما غيرت هدومك، قلت ليو هدوم شنو الاغيرها و انا ماشي اشرب قهوة و شيشة؟؟ قال لي انتوا السودانيين عمركم ما تتقدموا و تبقوا راقيين و متحضرين،، قلت ليو يا اخوي برايك و لو كترتها معاي قهوتك دي زاتها امشي اشربها براك و تجي تلقاني مطرت ليك تمباكك الضارب دا

[فيصل سعد]

المشاركة الأصلية كتبت بواسطة أسعد

الأعتداد بالنفس هو ان تكون متسقا مع ذاتك في غسيل ملابسك وعدتك
الغرور هو أن تشتري زوجة على سنة الله ورسوله لكي تعمل خادمة عند اهلك!

وكل سنة وانت طيب يا معلم

و انت بالف خير يا حبيبنا.. كنا منتظرين جيتك يشهد الله
و جيتنا بالنجيضة كما توقعنا موضوعي و لا موضوعي و
بينهما منزلة من المنزلتين..

قلت لي تشتريها؟؟؟ طيب لو لقيتها مجانا الراي شنهو؟؟

[ناصر يوسف]

المشاركة الأصلية كتبت بواسطة فيصل سعد

نموذج تاني يا ابو رحيق:

قبل رمضان كنت مع واحد اخونا و قريبنا قي داره العامرة، بعد المغرب قال لي ارح نمشي نشرب قهوة و شيشة، كنت لابس بنطلون و تي شيرت و شبشب لا غبار عليهما البتة، زولك مشى انقشط فل سوت و كرفتة و جزمة تشوفه تقول ماشي انترفيو او مسافر لمؤتمر علمي قال لي مالك ما غيرت هدومك، قلت ليو هدوم شنو الاغيرها و انا ماشي اشرب قهوة و شيشة؟؟ قال لي انتوا السودانيين عمركم ما تتقدموا و تبقوا راقيين و متحضرين،، قلت ليو يا اخوي برايك و لو كترتها معاي قهوتك دي زاتها امشي اشربها براك و تجي تلقاني مطرت ليك تمباكك الضارب دا

ههههههههه

والله يا باذخ زولك ده عندو حق وما عندو حق

يعني. .. هو ما عندو حق استنادا علي المثل الشعبي السوداني القااااااائل :

بلدا مو بلدك ... امش فيها عريان

وعندو حق يمكن لأنو هو ماشي بثقافة البلد الهو قاعد فيها والاصلا ما بنفع فيها مقولتنا السودانوية القاااااائلة :

الناس في العروض ما تقيسها بي تيبانها

ولا يهمك لباسهم والعروض عريانه


هييييييييع


ههههههههههه