إلى هــدى الأمين مع حبــى !!! عايــد عبد الحفيــظ

إلى كل الأحباب في سودانيات !!! ود المامون

أصلي سميتك وطن !!! أريج محمد

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!
آخر الأخبار العالمية

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 11-09-2021, 07:12 PM   #[1]
أريج محمد
:: كــاتب جديـــد ::
 
افتراضي أصلي سميتك وطن ...

أصلي سميتك وطن ...

ومشيت وأنا ظني كان..

إنو المشي سكة بُعاد من مُناكِ وحضرتِك ...

ومشيت أفتش عن خيار..

ممكن أكون من غير عيونِك وبسمتِك...


ومشيت مزعزع ومُرتبك...

سارِق خُطاي من سكتِك ...

ومشيت ملفح بالحنين..

عطش السِنين ...

زيف المواعيد بين إنتظاري وجيتِك ...

ومشيت...

وكُلما الأيام تمُر ...

بتنسمِك و أتنفسِك...

أصلي سميتِك هواي ...


وكُلما الأيام تمُر..

عيني تصافِح طلتِك...

أصلي سميتِك رُؤاي


وكُلما الأيام تمُر...

أعرق وأضيق والدنيا ليل...

سهر العِشق.. وشمس الشقا..

وكُل المطارات والمُدن..

وحتى السراب..

صبر العُمر..

كُل المتاهات والجِراح...

صُور الوجوه.. والذكريات...

فجأه...

أشعُر لمستِك ...

أصلي سميتِك هَنَاي ...


وكُلما الأيام تمُر..

لا بتبعِدك..

لا إني قادر أوصلِك ...

لا إني مُشتاق أو حزين...

لا إني حُر  أو سجين ...

لا إني شقيان بيك هِنا...

وشقيانه إنتي وراي سِنين...

أصلي سميتٍك مداي ...


وكُلما الأيام تمُر...

بلقاكِ في كُل الكتب...

كل القُصاصات و الشِعر...

بلقاكِ في كل الصُّور ...

كُل التفاصيل...

ريحة الدُعاش...

زخ المطر...

راحة البُذور.جوُّه طيات الأرض...

أسراب حمام...

وورق الشجر...

في فجة القمر السِّحاب...

وشِنط سفر...

في حلي و التِرحال معاي...

عزّ الشتا.. نُدَف التلٍج...

واضحه عز الصيف شمِس...

وزهر ربيع....

وغمام خريف ...

أصلي سميتُك دُناي ...


سارياني زي النيل عِشق ...

وفي مضيق خصرِك هناك...

واقفات سُفن ريدي بي شُوق العبور ...

أصلي سميتِك مُناي... 


ومشيت...

و كُلما الأيام تمُر ...

بطراك سؤال...

من وين دخلتيني زي حِلم الصِّبا...

من غير ميعاد ...

من وين طلعتي عليَّ في زمن الأُفول...

داكة الحُصون..

فاجة الرماد ...

كيفِن فتحتي الروح فرح...

وندهتِي رجعتِي العُمر...

ورحل السواد ...


ومشيت...

و كُلما الأيام تمُر ...

بعرِف أكيد أنا ماشِي ليك...

وجاي مِنك...

أصلي كايسِك مِن زمن ...

ما بتفرِق الأيام معايا ولا السِكك ...

لا مدينة ولا بِلاد ...

لا مواعيد لا زمن ...

أصلي سميتِك وطن ....!


أريج محمد أحمد



أريج محمد غير متصل   رد مع اقتباس
قديم 12-09-2021, 08:52 AM   #[2]
عكــود
Administrator
الصورة الرمزية عكــود
 
افتراضي

هواي، رؤاي، هَناي، مَداي، دُناي، مُناي ...
كيف يكون الوطن إن لم يحوي كل تلك التوليفة!

قصيدة تُقرأ بنفس واحد بدون "مناهَدَة"، رغم إنها "تتوّر نَفَس" الحنين وشجن الفراق، فلحنها منها وفيها.

تحياتي يا أريج



التوقيع:
ما زاد النزل من دمع عن سرسار ..
وما زال سقف الحُزُن محقون؛
لا كبّت سباليقو ..
ولا اتقدّت ضلاّلة الوجع من جوّه،
واتفشّت سماواتو.
عكــود غير متصل   رد مع اقتباس
قديم 12-09-2021, 12:07 PM   #[3]
أريج محمد
:: كــاتب جديـــد ::
 
افتراضي

شكرا لحسن التلقي وجمال التعبير ...
تحياتي 🌹



أريج محمد غير متصل   رد مع اقتباس
قديم 13-09-2021, 11:59 PM   #[4]
ناصر يوسف
:: كــاتب نشــط::
الصورة الرمزية ناصر يوسف
 
افتراضي

شكرا أريج

نص باتع في حضرة الوطن البارح



التوقيع:
ما بال أمتنا العبوس
قد ضل راعيها الجَلَوس .. الجُلوس
زي الأم ما ظلت تعوس
يدها تفتش عن ملاليم الفلوس
والمال يمشيها الهويني
بين جلباب المجوس من التيوس النجوس
ناصر يوسف غير متصل   رد مع اقتباس
قديم 14-09-2021, 10:08 AM   #[5]
عايد عبد الحفيظ
:: كــاتب نشــط::
 
افتراضي

يمكنك أن تكتبي بالفصحى أو بالعامية
فجمال النص وعمقه ، واحد فى الحالتين ،
قرأته أكثر من مرة ، وفى كل مرة كان
إستمتاعى به يزيد .
عادت بى الذاكرة ، لتلك الأيام التى كنا
ننتظر فيها قصائد جديدة فى السبعينات
وبروز هاشم صديق والدوش ومحجوب
شريف والتيجانى سعيد الخ ، ثم فترة
مصطفى سيد أحمد وشعرائه ،
وهى فترة لا زلنا نعيشها حتى الآن .
وإذا كانت قصيدتك الفصحى أو
العامية تحمل جمال النص وعمقه ،
وفيها كثافة الصور نفسها ،
إلا ان العامية فيها موسيقى أكثر ، وعذوبة .
نص جميل ومبهر



التوقيع: وانا . . من انا يا سيدى
سوى
واحد من جنودك يا سيدى
خبزه . .خبز ضيق
ماؤه . . بل ريق
والممات بعينيه . . كالمولد
واحد من جنودك يا . . سيدى
يركع الان ينشد جوهرة
تتخبأ فى الوحل
او قمرا فى البحيرات
او فرسا فى الغمام
امل دنقل
عايد عبد الحفيظ غير متصل   رد مع اقتباس
قديم 14-09-2021, 11:48 AM   #[6]
أريج محمد
:: كــاتب جديـــد ::
 
افتراضي

شكرا ناصر يوسف 🌹



أريج محمد غير متصل   رد مع اقتباس
قديم 14-09-2021, 11:50 AM   #[7]
أريج محمد
:: كــاتب جديـــد ::
 
افتراضي

دكتور عايد سلامات حبابك ...
تقديري وخالص الود 🌹



أريج محمد غير متصل   رد مع اقتباس
قديم 15-09-2021, 02:48 PM   #[8]
النور يوسف محمد
:: كــاتب نشــط::
الصورة الرمزية النور يوسف محمد
 
افتراضي

من فترة طويلة لم أقرأ قصيدة بهذا الزخم المتشابك
بهذا الحشد المتنوع المشاغب ، بهذا الاكتفاء الداخلى المدهش
قصيدة هى العطاء بلا سقوف ، هى الشعر حين يبعثر المشاعر ويرتبها

وأنا الذى يصطبح بالشعر ويمسى


القصيدة الوثيقة
لنقاء المشاعر والحب فى نسخته البتول ،،،،

حيّاك وبيّاك



النور يوسف محمد غير متصل   رد مع اقتباس
قديم 15-09-2021, 03:05 PM   #[9]
أريج محمد
:: كــاتب جديـــد ::
 
افتراضي

النور يوسف محمد ... تحياتي
تقديري واعتزازي بكل كلمة
جميل التلقي وحلو التعبير ... شكرا



أريج محمد غير متصل   رد مع اقتباس
قديم 15-09-2021, 03:10 PM   #[10]
أريج محمد
:: كــاتب جديـــد ::
 
افتراضي

عكود تحياتي ...
يكفيني هذا التعليق الجميل وان الشعور
الذي اجتاحني في حينها وصلك ...
خالص الشكر والتقدير



أريج محمد غير متصل   رد مع اقتباس
قديم 15-09-2021, 11:48 PM   #[11]
بابكر مخير
:: كــاتب نشــط::
الصورة الرمزية بابكر مخير
 
افتراضي

أجمل ما في القصة؟؟
أنهو مكتوب "كاتب جديد" في البروفايل..
في الوكت الإنهو؟؟
الكلام المكتوب من شدة ما "قديم"..
أنهو حق من زمن الزمان
وكت الولفة والمحبة زهيدة تمن... مدفوعة لي البلد ودون مقابل يرتجى..
كلام حق ناس زمان القدام، في توب جديد والإسم ظاتهو من حق الجديد..
ودآ ياهو البشفع في قولة "كاتب جديد"..
الأقلام الفوقي دي (العاليين ولا يعلى عليهم).. ذوقها فوق ذوقي وكلمها فوق قولي..
دحن أنا ياني على قولهم بختم بالعشرة وليك صفقة بالإتنين الفيهن عشرة...
وبضيف أقول::
الأحساس الفي قولك وإتو الشباب،،
إحنا مقروضين ومحرقوين بس ما بنعرف جنس دآ الكلام عشان نفجر الفي دواخلنا..
فشكراً............ كدآ إتنفسنا وكتر خيرك




التوقيع:
بابكر مخير غير متصل   رد مع اقتباس
قديم 18-09-2021, 02:45 PM   #[12]
ود المامون
:: كــاتب نشــط::
الصورة الرمزية ود المامون
 
افتراضي

...يقول .. افلاطون ...

... ( .. لكي تصبح شاعرا .. يجب ان يملأ .. الحب قلبك ... )

.. حين تسمو الكلمة .. لترتقي الي مستوي الروح .. .. فتغذيها .. و تحييها ..وتعبر عن عالمها ..عند ذلك ... فقط يستقر الشعر في القلب...!!

.. و.. يبقي ...
الرجل .. الوطن .. هو العشق .. و .. حكايه العمر ...!!


.. و .. يقول ..
يحي ابن معاذ ..

( .. لو كان الي من الامر شي .. ما عذبت العشاق ..لان ذنوبهم اضطرار .... لا ذنوب اختيار ..) ..!!

.. كل الحب ..



التوقيع: ... ابرق ببسمتك التى لو اشرقت ..
.. ما اختار اهل الارض شمسا غيرها ...
.. وهى التى من اجلها قد اطفئت نار المجوس ..
.. وهى التى نحيا عليها فى زمان القحط .. والدم .. والهزائم ..

( عالم عباس )
ود المامون غير متصل   رد مع اقتباس
قديم 19-09-2021, 02:17 PM   #[13]
أزهري سيف الدين
:: كــاتب نشــط::
الصورة الرمزية أزهري سيف الدين
 
افتراضي

يا سلام
شكراً أريج!



أزهري سيف الدين غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 12:44 PM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2021, vBulletin Solutions, Inc.