يا أخي الكُبر دآ حاجة ثقيلة بشكل

[imported_عبد العظيم الطاهر]

المشاركة الأصلية كتبت بواسطة بابكر مخير

يا نعمي
والله شيب الراس
بالصبغة بينقدر عليهو
المشكلة في العضام البقت برآآآآآآآآآآآها تطقطق ذي حب الفشار
لا وفي حاجات تانية
ما مكانهو ذكرها

طيب .؟؟؟

يا بيكو ... قال :-

الكبر ضارب لي تلفون
قال بزور الرأس والسنون
قتلو بس ما تغشى العيون

[imported_قرقاش]

المشاركة الأصلية كتبت بواسطة عبد العظيم الطاهر

طيب .؟؟؟

يا بيكو ... قال :-

الكبر ضارب لي تلفون
قال بزور الرأس والسنون
قتلو بس ما تغشى العيون

وانا قلته ..
بعد الشيبه شابتنى وعودى صابه جفاف
طليت انته زى بدرا منور كامل الاوصاف .
ــــــــــــــــــــــــــــــــــــــــــــــــــ ــــ
كل زمن وليه طعمه..
وحلات البل استيشن معاهم ...
ريم حفيدتى ..
[IMG][/IMG]

[بابكر مخير]

المشاركة الأصلية كتبت بواسطة قرقاش

وانا قلته ..
بعد الشيبه شابتنى وعودى صابه جفاف
طليت انته زى بدرا منور كامل الاوصاف .

ريم حفيدتى ..
[IMG][/IMG]

أجمل لقطة وأحلى رسمة وما شااااااااااااااااااااااااء الله

دي أجمل حاجة في الكُبر الثقيل دآ......
الأحفاد
وأنا أقول جدي بابكر سمها الأحفاد ليييه
أتاريهو بي سببهو

[بابكر مخير]

المشاركة الأصلية كتبت بواسطة عبد العظيم الطاهر

طيب .؟؟؟

يا بيكو ... قال :-

الكبر ضارب لي تلفون
قال بزور الرأس والسنون
قتلو بس ما تغشى العيون

بعد النضارة قعر كباية "الشوب"
تقول ليهو ما يغشى العيون...
هن إتعفصن وإتبشتنن..
كانن كوبااااااار
ومتل الكُحل كاسيهن
بقن خرم إبرة
والجفون إلا بالمشابك شادهن
والدمعة ديك قبل تنزل الخد
تلقى التانية دافراها..
بختك إتا اللساتهو ما وصل العيون

[بابكر مخير]

المشاركة الأصلية كتبت بواسطة بابكر مخير

كباية "الشوب"

كباية الشوب
ناس حسي ما ناقشينها
وناسنا الزمان
ليهم معها وعنها ذكريات....
إحنا "الكُبار" طبعن القصد عمر!!!
كب يا علي فكبابي الشوب
آآآآآآآآآآآآآآآآآخ
بالله كان زمان محلات المرطبات؛ زكي في الخرطوم ومشرقي فأمدرمان وحتى يوسف الفكي وود الغآ..
الليمون بروح الموز والشعير "البرئ مش المخمر" البارد..
يقدمهو في كبابي الشوب المضلعة ونضيييييييييييييييييييفة ...
طبعا قعر الكباية دي كان مضرب مثل لأنه بالنظر خلاله يكبر الأشياء
آها نضارتي بقت 3 طبقات من "القعر" دآ......
"كوكي" والله جآت براها وبدون قصد
كآآآآآآآآآآآآك

[بابكر مخير]

والساعة واحدة ونص بعد ما الواحد يكون زار الحمام كمين مرة كدآ ويقطع .. يرقد في السرير ويبتدي الوسواس (الخناس) يا ربي جريت السيفون، تقوم وتلقى نفسك أصلن ما إحتجتا ليهو لأنك دخلت الحمام ولفيت وإتلفتا وتتذكر أنا جيت هنا لي شنهو؟؟
خلاص إذن نمشي نرقد،،
آآآآآآآآآخ يا ربي أنا قفلت باب الشقة والتعب والإرهاق نال منك كل الممكن تقول يا زول البلد آمان وما في زول بيخش، لكن الوسواس الخناس يزوزي بيك، تمشي تلقى أنك قفلت والمفتاح جووووووا الكالون،، ترجع للغرفة وإتا راجع،،،،
طيب لو حسي حصل ليا شئ البيدور يجي يتفقدك يلقى الباب مقفول والمفتاح جووووووووووووا الكالون..
نسحب المفتاح ونخلي لو زول من برآ دار يدخل يقدر يفتح، لكن هو المفتاح ما عنده نسخة..
يلا يا زول طنش خليهو اليبقآ يبقآ ما إتى أصلن بتكون كسحتا،
بس لكن الواحد يمكن لو حصل شئ يقوم تنكشف منه حتة كدآ ولا كدآ...
يا زول ما بتحلها إلا حبة باندول نايت..
أخدتا وحدة وكانت الساعة بقت تلاتة ونص، يعني الدوام جآ خلاص،،
البندول نايت عشان ينعسك دي نص ساعة وعشان تنوم كمان نص ساعة وانت حتنوم معناها ساعة ونص عشان الدوام الساعة سبعة ونص
لكن طيب أنا بلعت الحبة، دي معناها رجعة للحمام من تاني عشان علويا تفضي البطن وإلا الدوام بقآ في خبر كان،،
لكن كمان المدير مديني شغلة والساعة تمانية ونص إجتماع.....
يا زول دآ كلوووووووووووو بسبب الكُبر
ما هو الواحد ما كان الحمام ببقى شغله الشاغل ولا بينسى قصة المفتاح في الباب وكمان زيادة على كدآ..
ما تخلي الباب فاتح يمكن يجيك منه الريح وتستريح

[imported_عبد العظيم الطاهر]

المشاركة الأصلية كتبت بواسطة بابكر مخير

والساعة واحدة ونص بعد ما الواحد يكون زار الحمام كمين مرة كدآ ويقطع .. يرقد في السرير ويبتدي الوسواس (الخناس) يا ربي جريت السيفون، تقوم وتلقى نفسك أصلن ما إحتجتا ليهو لأنك دخلت الحمام ولفيت وإتلفتا وتتذكر أنا جيت هنا لي شنهو؟؟
cool:

[بابكر مخير]

المشاركة الأصلية كتبت بواسطة عبد العظيم الطاهر

عظمة
إن شاء الله سنيناتك ديمة ضاحكات..
مشكلة الحمام معاي مشكلة، ما عندي سكري حسب الفحوصات ولكن علاماتهو ذي عين الشمس نص النهارية،،، أوضح من الوضوح...
الرِجل "الوطاية ولا مؤاخذة" التقول تحتها جمر...
بعض مرات من ما القى فحم لي الشيشة بس أقول أقيف فوق الرأس، إتصور شكلها كيف والتقول بهلوان (كلمة من أيام زمان)...
عمنا خضر الحاوي عليه الرحمة ولده عمر كان رياضي متميز وبذكر أيامنا كان بيلعب حركات بهلوانية متعددة أثناء عرض والده..
خليناهو السُكر تكون بروستاتا؟؟؟
هو قالوهو فوق الأربعين المصيبة دي صرة في خيت، ضمان ولا عربية مرسيدس...
وكيل المرسيدس زمان كانوا ناس أبو العلآ...
ويييييييين حسي سبحان الله.....
دي برضهو ما في دكتورن كدي ختاها ليا واضحة...
يكون المكيف،، ما هو الجو البارد بيخلي الزول داير الحمام..
أمسك
شوف
مش ياها الهترشة وتوابع الكُبر....
آآآآآآآآآآآآآآآآآآآآخ منهو الثقيل دآ

[بابكر مخير]

بالله العظيم قدر ما الواحد كجن وإتغمى في ترماي براتسلافا كمان إرتاح وإنشرح في بصات لندن..
يا أخي في الترماي في براتسلاف، تجي داخل بي نطة كدآ بتاعت شباب وحيوية حتى يحكم عليك بحركاتك وما بي مظهرك لكن شفعهم الثقلى ديل طوالي يقيف ليك من أقرب كرسي ويقول ليك إتفضل أقعد...
بالله الواحد يحبط جنس إحباط ويندم علي النطة ديك، ما هو لو الواحد كان عارف أنه خدعة ما بتنجلي على أحد ما كان عرض نفسه لخطر الوقعة والكسير والرقاد في المستشف وإحتمالية الإلتهاب الرئوي والموية الفي الصدر والغرغرينة "وهلماجرآ"...
لكن بصات لندن وآآآآآآآآآآآآآآآ حلاتها تدخل ونفسك قايم ما هو بتكون جريت ليك تلاتة خطوات بالعدد وهي كافية مع العمر والكُبر الثقيل أنها تلحقك أمات طه..
تدخل وتلقآ ليك شافع بدون شنب ووشه مليان حبوب الشباب وصته يادوبك بدآ يتخن، الشافع يكون مادي رجلينه ولا مهبب إتا كبير ولا صغير ودآ الجمال..
هنانا
وإتا سايق العربية، يجي واحد يفوتك بطريقة مليناة عنفوان شباب، تنغاز وبحراق روح الكُبر تضرب ليهو بوري، يفتح الشباك ما يسبك لكن يحبطك "والله لو ما إتا شيبة"..
آآآآآآآآآآآآآآآآآآخ يلعن يومه الكُبر..
وناس تانية "ظريفة ومؤدبة" في طرف لسانهم "يا عمي الحاج""
يآ أخي هو أنا ما حجيت لسة...
بس النقول (غالب الله ويا ها حكمته)
وكل نفس إن شاء اللله ذائقة الكُبر..
وضوقوهو

[بابكر مخير]

زمان الواحد ذي عيون الصقر، حسي نضارتين ما هن واحدة للشوف عدستها تحاكي ظلام الليل الكاحل ما العيون ما بتتحمل أيتها نوع من الأشعات، سينية ولا حمراء أو تحت البنفسجية وإلا الدموع "تحاكي الشولة" والتانية كريستالية المظهر تستعمل في المساء وأسخف فترة في اليوم هي شوية قبل وبعد المغرب حيث الإضاءة ممومهججة بين ضوء وإنعادمه ودي بغلبها أني ما أمرق من البيت ما الواحد بيروح بين نضارة النهار السوداء وسواد الليل للكريستالية..
وين لمن الواحد بالعيون الكاحلة الما محتاجة لي جنس الجهجهة دي!!!
النضارة التانية "قعر كباية الشوب" الغنوا ليها (كب يا علي في كبابي الشوب) لمن الواحد يلبسها بالله التقول ينفقه (الفقهآ يعني رقبتك تقول تنشمط عامود بس) من تقلها وبعد دآ جابت ليها إخية، ما هي بتاعت قرآية والقرآية أنواع؟؟
قراية كتاب وحروفه بالبنط 12 وقراية جريدة عواميدها المختلفة شئ بنط 8 وبعدها 12 ويتخللها 15 وجوطة يعني وفي قراية شاشة التلفون "الذكي" الخلانا هُبل تفتح الواتسب، يجيك تنبيه الفايبر والإيمو والإستقرام التلقرام "وهلماجرآ"
والمونتر بتاع الكمبيوتر والإشعاعات المنبعثة منها..
دي الحاجة الوحيدة في حياة الذينا كدآ ما منها خوف..
ما هو الإشعاع بيأثر بعد سنوات،،
يلآ نشوفه بيلقى منهو بعد سنوات عشان يأثر فيهو أوعليهو

[بابكر مخير]

يمكن كل الأمهات والأباء بيكون عندهم خطط لبناتهم وأولادهم، العايزنهم يكونوا دكاترآ، مهندزين، محاميين، عساكر وحتى حرآمية أو يكونوا على نفس الحرف من سروجية أو نقاشيين أو خلاطين مونة..
آها يقوموا يدخلوك المدرسة وفيها تتعلم وبي طرق مختلفة، منها القاسية وحصة الإملاء والحساب والطرح والجمع والقسمة و"الضرب" والدين والحفظ والتسميع وسوط العنج المعطون في القطرآن والشعر والمعلقات....
مع الزهايمر حقت "الكُبر" كله يتمحي إلا حاجاتن مربوطة بذكريات قاسية،
تلقى نفسك متذكر إستهجاء كلمة بصورة كريستالية لأنك أخدتا فيها كم سوط كدآ ولا متذكر بيت من قصيدة كتبوك ليهو عشرين مرة..
أنا عقدتي كانت معلقة طرفة بن العبد ولخولة أطلال ببرقة ثهمد..
نشفت ريقي قدر ما نشفت محابر وأقلام الحبر الصينية..
بالله من زمنا دآك والصناعة الصينية "بيييييييييييييش"

[youtube]https://www.youtube.com/watch?v=0r7c46hft7o[/youtube]

[بابكر مخير]

تقول تصهين للثقيل دآ وتحاول تتشبب، تتعامل مع التكنلوجيا وناس الفيبر والواتسآب..
ما أشقائي وشقيقتي وهم أصغر مني،، يعني أكبرهم أصغر بي خمس سنين، عاملين ليهم قروب فقلت أتصغر وأتجمل شوية،،،
فتحتا وفتحت عينيا علي حوار بين أحمد وعلي:
نصه؛؛؛



علي:
اي الHaring ود عم فسيخ جبل الاولياء مع اختلاف طريقة الحفظ وتقبل المذاق ( حلو او عمق التمليح والfermentation ))
احمد:
نوع السمك نفسه ما تنسى السمك نفسه ماهو سمك القرموط.
سمك (الرنجة) سمك نقي ومبتسم وسعيد ومتغذي بأجود أنواع الأغذية..
علي:
يا هي الفسايخ زاتها خشم بيوت نوع الانشوقه قريبه من الفسيخ لكنها حاجه بين الساردين والطعم في الاخير هنالك عاملين اثنين ١الطريقه (processing ) ٢ الطعم والاستذواق والذوق وبس! ياسيدي
........





آها دي حالة دي، إن هم اللساتهم شباب بيسرحوا كدآ
أنا أكون حالتي كيكيف[/COLOR][/B]

[imported_عبد العظيم الطاهر]

: أسه عليك النبي يا بيكو ... الهترشه الفوق دي كووووولها ما براها تثبت إنك لسه ... ما خشيت ( الفورمة )

يا اخوي كتلوك ... ولا جوك جوك ... قبال كم سنة كدا لما مشيت السودان إجازة كانوا بقولوا لي يا عمو ... كويس ... لومك بي السنة الفاتت دي بقوا يقولوا لي يا جدو وانا ولادي لسه واحد فيهم عرس مافي مرة قمت صبغت شعري ولبست ليا بنطلون جينز ورحت المكتب ... نظرات الزملاء الحاقدين في المكتب كانت بتقول لي يا زول إنت جنيت أرجع غير هدومك دي وتعال

[بابكر مخير]

المشاركة الأصلية كتبت بواسطة عبد العظيم الطاهر

مرة قمت صبغت شعري ولبست ليا بنطلون جينز ورحت المكتب ... نظرات الزملاء الحاقدين في المكتب كانت بتقول لي يا زول إنت جنيت أرجع غير هدومك دي وتعال

عظمة الحبيب
بتذكر الوالد الله يرحمه (طبعا الإفتراضات كلها تصب في أنه توفي،،، ومن زمن)
مداخلة بتاعت على قولك الهترشة...
بتذكر قبل سنتين أو بالكتييييييير خالص، تلاتة،، إتصل بيا صديق مشترك من لندن وبيسأل، مشيت عزيت فلان.... أمه ماتت، ضحكت وقلت للمتصل يا حليلك، أكيد ما أمه يمكن تقصد شخص آخر... لمن أصر من جانبه سألت طرف تالت وأكد ليا أنه أم فلان ماتت والعزاء في النادي السوداني...
مشيت العزاء وفي الباب قابلني حفيد المشيت أعزيه ومعاه طفله العمره سبع سنوات....
نرجع للوالد؛
يوم وأنا لابس يعني متقيف بنطلون كوردروي بيجي من ليفيس وقميص مقلم بالأحمر واللبني وجزمة لونها كبدي وأنا مارق، قال ليا:
إتا يا أخوي ما سمعت بالهياب تحت الثياب،،
حسي زول ذيك في منصب البيشوفوك يقولوا شنهو، إنطمس ولا بتشبب..
نفسي إنكسرت ومن يومها وحاتك القميص برآ ولون وااااااااااااحد، لبني ولا أبيض...

[بابكر مخير]

وهو برضه ليهو منافع
جمب "المندولا" في قهوة يعني كآفيه بيقدموا فيها الشيشة وفيها صفوة من شبابنا السودانيين بيلعبوا وست من بعد المغرب لين 12 وأنا بحب القيم دآ وكمان بموووووووت في الشيشة تفاحتيين "النخلة" وهي كمان متوفرة..
يكونوا الشباب الحلويين ديل كمية وبالدور وكل واحد مستني دوره بي شغف،،،
آجي عليهم وكلهم يتململوا في كراسيهم حتى الماسكين ورق يبادروا؛
أمسكي ورقي يا (؟؟) دكتور،،،
شوف الرقي دآ
لا يا خال الطالعة موضة ولا يا عم أو حاج البتعمل ليا آرتيكاريآ...
وطبعا ما برد الكريم إلا اللئيم،،
لو قرب يقوم،
ما أنا المغفل البضيع الفرص للجآي من أوله وببلاغة تتعارض مع أوصولي الرباطابية والغرابية بشكره وأنا متطلع لي المساكين المنتظرين التوزيعة الجآي لأتحكر في كرسي أحدهم...
آآآآآآآآآآآآآآآه
وللكُبر الثقيل منافع