اقتباس:
المشاركة الأصلية كتبت بواسطة حافظ حسين
تفاهة جديدة
يوم بمبي
السبت كما هو معلوم إجازة رسمية بأمر السلطات لكل من هب و دب ... لكن هذا السبت يجب أن أذهب الي العمل و مجبورة يا خادم المديرة على الصلاة .... مشيت الشغل و كيف و على كيفك انتهى نصف اليوم بكل شروره الممكنة .... ختفت رجلي في زيارة سريعة لتفقد الرعية بالديوم و ما جاورها لاني في حال نفسية ارثي علي نفسي منها ... مشاكل لي كم رب عمل, ابوي جاي من البلد عيان و مفروض امارضه هو و أمي, المهم قصص بايخة كلها.... وقفت بتاع الركشة و المسافة خمسة جنيه شهودي على ذلك كل من الاصمعي, و عبدالله و الوسيلة صح؟
سيد الركشة قال لي ب 15 جنيه؟
بحركة لا شعورية قلت ليه: ينعل د.....
نزل و شكله ما بتاع مضاربة بس ردحي ... تسب لي عقيدتي و واو عقيدتاه و الناس اتلمت.... شكله من عينة الناس الما عندهم اي عقيدة ديلاك لكن لقاه فرصة .... مرتين داير ادبل ليه لكن سرعان ما اتدراكت أن في الأمر ستة أشهر و الشهود حضور ... المهم نكرته حطب و قلت ليه افو انا كمان بسب العقيدة .... لكن رشوتي ليه ركبت معاه بالسعر الحدده والله نسي أمر عقيدته المسبوبة زي الترتيب ...
في الشارع راجع علي البيت خفيفاً الا من بؤسي .... الاقى آخر زول اتمنى الاقيه .... عينة البشر الرب خلقهم بوصف وظيفي محدد و هم كمريرات للمدراء .... الزول دا بخلعة كدا زي الإكتشف حاجة كويسة صاح:
حافظ حسين؟!!!
و قبل ما يسترسل اديته إبتسامة (يخلق من الشبه اربعين ديك)..... و قلت ليه انا ما حافظ انا أخوه الأكبر
يااااااا سلام والله شبه مبالغة
و انا لم أزل محتفظ بابتسامة الاربعين و رديت: فعلاً
هو: و وين حافظ بالله؟
أنا: والله حافظ دا مشي الدهب
في خلعة حصلت و انا استمتعت بيها شديد و رد : يا زول, ليه؟
والله كرهنا الدنيا كل يوم كاتب ليه شيك و خاشي السجن و نحن نلقط من وين لوين نفكه .... آخر حاجة دي مطارد من زول كاتب ليه شيك ب 250 مليون و الزول مطارده ... قلنا ليه نحن فترنا و ما عندنا ليك قروش تاني و أخواني كلهم قالوا ليه ما تجينا... في النهاية ضرب تلفون قال هو في الدهب
هو: ياااااااااااااااااااااا سلام يا خي.... عليك الله اديني تلفونه
عندي رقم قديم رايح اديته ليه لكن قلت ليه ح يكون مقفول بس حاول معاه .... سجل الرقم و اتصل و قال لي: فعلاً مقفول
و توادعنا على أجمل ما يكون الذين بينهم أخ مشترك
و أنا ما ناقص كمريرات
|
حافظ حسين
أول شئ أعزيك في رحيل الأخ حسين
والله أسأله له الرحمة والمغفرة
بالنسبة للتفاهه الأخيرة
بالفعل يا حافظ في بعض البشر كده تتمني ترحل تسيب ليهم الحي ،،، المدينة ،،، بل البلد ذاها تمرق تخليها ليهم ياخ
أها شنو ليك لو في زول شغال معاك في مكان عمل واحد
وبالرغم من إنو مكتبو بعيد من مكتبك وتخصص شغلو مع تخصص شغلك ما بتلمو
إلا تلقاه علي طوووووول جاري رجلو علي مكتبك وهاك يا نضمي وبصوت ،،، عااااااااااالي ياخ
نوعية الزول الما بسكت كلو كلو داك ياخ
يسألك سؤال وقبال ما إنت تفتح قدومك ،،، يرزعك بالإجابة ومعاها تلاتة أسئلة إضافية
ويكون ،، مُش كمريرا !!! ده مُرَكب مكنة مدير عام عدييييل كده ياخ
إنا لله بس
هسي قلت لي حافظ حسين مشي الدهب ؟؟؟