مرقت،،، مرقت،،،، عطبره شرقت،،،
*بي📝 الحنين،،،*
*د. علي الشيخ،، ،،*
*مرقت مرقت ،،، عطبره شرقت،،،،*
عطبره دي زي البت الحلوه ،،، عاجبه شباب الثورة،،،
عطبره دي زي الفتوه الحارس الثوره،،،
عطبره دي فيها مركز التوازن للثوره ،،، كلما تنخفض دقات قلبها و تنشف شرايين التواصل،،، بنجري نستنجد بي عطبره ،،، زي بنك الدم،،، فيها فصائل المقاومة و دمهم،، محفوظ ،،،،
عطبره دي زي الحبوبه ،،، وقت يسكونا بندسه فيها،،، وتأني نجي مارقين ،،،
عطبره دي زي موية النقاع ،،،، تحت الزير ،،، حلوه،،، و طاعمه ،،، ونضيفه ،،،،
عطبره دي بتدينا الايجابيه ،،، من ناسها و أهلها و شفعها،،،
عطبره دي سند،،، و صك،،، وملك عين لأي سوداني،،،
عطبره دي فيها أكسجين نقي،،، زي أهلها،،،،
عطبره دي حكايه و قصه مابتنتهي،،،
عطبره دي زي يوم العيد،،،
زي يوم السمايه،،،
عطبره ،،، الناس بتسخن فيها ساعة يقولوا حريه سلام و عداله ،،،،
عطبره حديدها نوعه براهو،،،
وسكتها ،،،، تاريخ،،، ونضال،،، و حقيقه ،،،
عطبره زي الالفه في الفصل،،، بصفق للشطار و بشجع الثوار،،،
عطبره ،،،، التسامح،،، الشجاعه،،، الثقه،،، المبادئ عطبره،،، حسن خليفه العطبراوي ،،،،، و محي الدين فارس،،،
عطبره بتجبرك تحبها عشان ناسها و أهلها،،،،
عطبره زي يوم النتائج زمان،،، العشره الأوائل،،،،
عطبره ،،،، رجوع مسافر،،،، ساب بلده مجبور،،، ورجع فرحان بالسلمية ،،،
عطبره ،،، حلاوة حربه،،، تديها لي شافع،،، يفرح و يجري شايل فرحه،،،
عطبره زي عزومة ،،، ترحب بالماشي و الجاي،،، وتحلف عليك،،،،
عطبره ،،، زي القلب،،،، ما بدق للخوف،،،، نبضاته محسوبه و موزونه،،،
عطبره دموع فرح،،، و مقالده ،،، و انتصار الشعب السوداني،،، ،،
*د. علي الشيخ*
*الحنين*
*أمدرمان*
*٣٠ سبتمبر ٢٠٢١*
بمناسبة قطار عطبرة الجاي الخرطوم اليوم،،،،
|