القوة والضعف فى شخصيات الطيب صالح الروائية

[عايد عبد الحفيظ]

الضعف والقوة فى شخصيات الطيب صالح الروائية
حمد ود حليمة(1)
كيف إنتصر حمد ود حليمة الكحيان على مختار ود حسب الرسول؟
كيف تحول الضعف إلى قوة؟

يقول حمد ود حليمة : كان مختار كلما يلقاني يهزأ بى وينادينى بإسم أمى من شدة الإستحقار، يقول لى يا ود حليمة متين تبقى راجل تدخل الحلقة مع الرجال؟

جمع حمد ثوبه حول هيكله النحيل وقال :
حين كنا صبية ندرس القرآن في مسجد حاج سعد، كان مختار صبي عاجباه نفسه، مفتول العضلات مرهوب الجانب. نجتمع بعد الدرس تحت شجرة السيال الكبيرة الموجودة إلى يومنا هذا، ويقف مختار وسط الحلقة عاري الظهر يركز للمبارزة. كانت تلك الأيام أيام فروسية ومرجلة والولد الخواف لا يقدر يعيش وسط أولئك التماسيح، والمبارزة بإيش، سوط طول الذراع من عروق السنط. اللهم صل على نبينا؛ ما كان صبي يحتمل أكثر من سوط أو اثنين بالكتير من مختار ود حسب الرسول، أما هو فكان ظهرة زي ظهر عجل البحر قدر ما تضرب فيه بالسوط ولا أثر .
أنا ما كنت أحتمل الضرب أبداً، أقف بعيدا لا بي ولا علي وكفى الله المؤمنين شر القتال. طول النهار مختار راكز وسط الحلقة والأولاد يدخلوا واحد ورا واحد .
وكان مختار كلما يلقاني يهزأ بي يناديني باسم أمي من شدة الاستحقار، يقول لي يا ود حليمة متين تبقى راجل تدخل الحلقة مع الرجال؟
المغصة تحش قلبي زي السكين، وأزعل غاية الزعل، لكني أنا قليّل وكحيان. كيف العمل؟
يوم من الأيام حزمت أمري موت حياة ما علي شيء وأخير من قولة ود حليمة، أقول لك بني آدم مصيبة معلقة بالسببية إذا دست على طرفه ما يغلب حيله أبدا .
بعد الدرس جريت إلى بيتنا، كيس شطة يمكن رطل، شلته وانطلقت فوق الخلاء لحد ما البيوت ظهرت رهاب رهاب، شطة حمراء نار الله الموقدة أكلتها كلها وقلعت عريان ومسحت بيها جسمي كله، العياذ بالله من النار الولعت في بدني، نار الجحيم انطلقت وأنا أصيح بطول حسي واي واي والدنيا خلاء ولا حد سامع وأبرطع وأتمرمغ في التراب، والعرق نازل شل شل .
يا زول ألم أجل الله السامعين شي يمخول العقل، بعد داك لم يهمني أبدا، أدخل النار ما أحس بأي شي، جريت وقميصي في أيدي وعيوني شرار والرأس ورمان قدر الزير .
وصلت السيالة لقيت مختار ود حسب الرسول أل ما يخفى علي راكز عامل عنتر خلص على الجماعة كلهم، تش دخلت ووقفت قدامه وركزت، عاين لي باحتقار قال ود حليمة اليوم بقيت راجل؟
أنا ما أقاشط واحد ولد مره
الله أكبر رمقته بي عيون زي الشرر، قلت له أبقى راجل اضرب، اتبسم وضحك، وعاين جاي وجاي والجماعة يضحكوا صبركم بالله؛ ود مفتاح الخزنة وود رحمة الله ضحكهم عالي، قالوا ود حليمة راح في داهية؛ مسك السوط وختاه بين ايديه الاثنين، وفرقعه في الهوا وج وج، بعدين لف حوالي ونقرني بالسوط نقرات خفيفة هنا وهنا، عاوز يزعزعني، وأنا راسي فيه ستين ألف عفريت، وبعدين ركز وضرب رجله اليمين في الأرض ولولح السوط ونزله، وحياتك نزل علي بردا وسلاما بعد نار الشطة؛ جلدي خدران كأنه ميت، إذا جرحته بالسكين ما يحس، هبدني بالسوط الثاني والثالث وأنا راكز زي الحيطة، إذا كان الباب دا يحس أنا أحس، وقت وصل السوط السابع وقف، زح لي ورا وعاين لي باستغراب
حدرته بنظرة زي سم الله الهاري
بلع ريقه، صاحبي بدا يتزعزع، بعد ما في ضحك، الناس سكتوا بم، ضحك ود مفتاح الخزنة وود رحمة الله يبس في حلوقهم .
عليك أمان الله حسيت زي كان شيطان مارد في بطني بقى يتحرك ويكبر ويفرهد ويفرد جناحاته فوق العالم كله، حسيت كأني جبار شمهورش إذا كان سقف السما وقع أسنده بإيدي
الشطة أجارك الله وحرقة القلب، صرخت فيه يا زول بي صوت ما أعرف جاني من وين، قلت له يا وليد ميمونة، أحقره باسم أمه، أبقى راجل واضرب بالسوط، قسما النهارده يا أنت يا أنا يشيلوه من هنا للجبانة
الناس ساكتة صن
ضربني التامن والتاسع والعاشر، ضرب بي غل، ضرب القوي لما يعرف إنه ضعيف، ضرب الضعيف وقت يعرف إنه ضعيف؛ لما وصل تلاتين، جدك وبندر شاه الله يمسيهم بالخير وقفو، مسكو السوط من أيده، قالوا خلاص انت أخذت حقك، الضرب لي حمد
أنا أخو البنات؛ يا زول، حسيت كأني زي سر عسكر الترك، بقيت أنفخ وأقدل، قلت لهم خلوه يضرب، قسما بسورة كاف لام ميم، شوف عندك جنس قسم، ود ميمونة الليلة لازم يشيلوه جنازة. جدك وبندر شاه قالوا أبدا، تلاتين سوط كفاية. مسكت السوط لقيته مليان دم، الله أكبر. هزيته فوق الحاضرين ولفيت في الحلقة لفتين وأنا أقدل وأتبختر
ود مفتاح الخزنة وود رحمة الله منكمشين يعاينوا للأرض من الخوف، نقرت كل واحد بالسوط فوق راسه، بعدين طلقت الزغاريد..
أيوي أيوي أيويا
عاينت لي مختار ود حسب الرسول لقيته راكز متماسك لكن جبهته ندت بالعرق، بقيت أدور حواليه وأنقبشه بالسوط مرة مرة، وأصرخ وأبرطع بعيد وأجيه راجع، وأقيف قدامه وأنط في الهواء عملت ليه حرب أعصاب، لحد ما اتأكدت زولي خلاص حالته بقت حالة
ود مفتاح الخزنة وود رحمة الله بعد ضحكهم ما كان ضدي بقى معاي، الوحيدين أل بقوا يضحكوا وراي كل ما ضحكت؛ الله يخيبهم، دايما مع الغالب
رفعت السوط فوق ونزلته شر، عليك أمان الله كأنك شرطت لك قماش، مختار ما اتزعزع لكن عينه رمشت
نزلت السوط الثاني سمعته قنت، أنا أخوك يا السمحة
أديته الثالث زح ورا شوية
السوط الرابع اترتع
السوط الخامس وقع بب غمران
الناس ساكتة ولا حس، مبهورين؛ أنا التعبان الكحيان حمد ود حليمة أهزم مختار ود حسب الرسول، الفارس المغوار والبطل الهدار.
أقول لك شعرت كأني سيد الكون، مالك الليل والنهار. والحكاية كلنا أطفال أكبرنا عمره ما يحصل ثمانية سنين. بقيت أضرب من طرف، وأغير يمين وأغير شمال، أجوط بي جاي وبي جاي، أكتر ضرب ضربته ود رحمة الله وود مفتاح الخزنة؛ يا زول، ركبني جن، وقفت وسط الحلقة وختيت رجلي فوق مختار، وهو راقد جثة هامدة، زي كأني أسد واقف فوق الفريسة، بقيت أتكلم كلام خارم بارم ذكرني بيه جدك وبندر شاه بعدين، قالوا خلاص كفاية
جدك قال لي خلاص عرفنا إنك راجل
رد عليه بندر شاه قال إذا كان ود حليمه يفتكر إنه راجل، في أرجل منه، وما أحس إلا وضربة في بطني من بندر شاه، بعدها ما عرفت حصل شنو
وقت صحيت لقيت نفسي في بيت بندر شاه، على عنقريب وجنبي راقد مختار، والألم أجارك الله، أنا أصرخ واي، ومختار يصرخ واي

[ناصر يوسف]

يا سلااااام علي عودة قلمك من مدخل المحبة لشيخي الطيب صالح

حجز بنبر حتي أجد الوقت للقراءة بمتعة

شكرا يا صديقي و هكذا تعود الي سودانيات الروح من جديد

كن بعافية

[عايد عبد الحفيظ]

جبت السودان وأنت لا تحمل سوى جهاز موبايل
تفقدت المبدعين فى شتى المجالات وطمأنت
الناس عليهم ، وأوصلت رسالة للمبدعين
بأنهم ليسوا وحدهم، وأن حتى الحرب لم
تُنسى الناس عطاءهم وجهدهم وإثرائهم
لحياة الناس بالفن والجمال .
نلتقى من جديد فى سودانيات الواحة
الوريفة التى إحتمينا بظلها من هجير
الحياة وعنتها زمناً طويلاً .
كل الود ناصر المبدع والصديق وحبيب
الكل .

[عايد عبد الحفيظ]

القوة والضعف فى شخوص الطيب صالح الروائية
(2)
حسنة بت محمود

تغيرت حسنة وتحولت لإمرأة أخرى بعد زواجها من مصطفى سعيد .كان فى قتلها لود الريس ثم إنتحارها بعد ذلك مثالاً
للتأثير السلبى الذى يتركه الغرباء الحكماء الوافدون
على المجتمعات التى إحتضنتهم ، وبقدرما قدموا
لها من جهد وساهموا فى تطورها إلا انهم غرسوا
فيها جرثومة الدمار والخراب ، وحسنة واحدة من
الأمثلة العديدة .
هل هى بذرة غرسها مصطفى سعيد؟؟؟
أم نبتة صغيرة سقاها ورعاها
حتى صارت حسنة التى وصفها
الراوى؟؟؟؟

أجابت فورا بحزم . . الأمر الذى أدهشنى : بعد مصطفى سعيد لا أدخل على رجل .
ود الريس يريد زواجك وأبوك وأهلك لا يمانعون . . كلفنى أن أتوسط له عندك .
أحسست بصوتها فى الظلام كأنه نصل : إذا أحبرونى على الزواج فإننى سأقتله وأقتل نفسى .

ومثل كل الغرباء الوافدين يختفى مصطفى سعيد ولكنه يترك آثارا واضحة على إقتصاد القرية وعلى شخصية حسنة التى أصبحت بعد زواجها منه شخصا آخر غير تلك التى عرفتها القرية .

قلت لمحجوب وقد سرى عنى : هل تظن أن ود الريس وقع فى غرام حسنة بنت محمود؟
وصمت مدة يفكر ثم قال : ولكن الحقيقة أن بنت محمود قد تغيرت بعد زواجها من مصطفى سعيد . . كل النساء يتغيرن بعد الزواج . . لكنها هى خصوصا تغيرت تغيراً لا يوصف . . كأنها شخص آخر . . حتى نحن أندادها الذين كنا نلعب معها فى الحى ننظر إليها اليوم فنراها شيئا جديدا . . هل تعرف؟ كنساء المدن . .

وتركته وذهبت . . وإن كنت قد أيقنت من حقيقة ستأخذ كثيراً من راحة بالى فيما بعد . .
إننى بشكل أو بآخر أحب حسنة بنت محمود . . أرملة مصطفى سعيد . . أنا مثله ومثل ود الريس وملايين آخرين لست معصوما من جرثومة العدوى التى يتنزى بها جسم الكون .

وقال محجوب : ماذا نفعل؟؟
لماذا لم تفعل أنت؟؟
لماذا لم تتزوجها؟؟
فقط تفلح فى الكلام . . المرأة هى التى تجرأت وقالت . .
عشنا ورأينا النساء تخطب الرجال . .
قلت له ماذا قالت؟؟
قال : الذى كان قد كان . . ما فائدة الكلام؟؟ أحمد الله إنك لم تتزوجها . . الفعل الذى فعلته ليس فعل بنى آدم . . فعل شياطين . .
قلت وأنا أضغط على أسنانى ماذا قالت؟؟
نظر إلى دون عطف وقال : حين راح لها أبوها وشتمها جاءتنى فى البيت مع شروق الشمس . .
قالت تخلصها من ود الريس وزحمة الخطاب . . فقط تعقد عليها . . لا تريد منك شيئاً . .
ماذا أفعل أنا أو غيرى إذا كان العالم قد أصيب بالخبل؟؟ وأتضح أن جنون بنت محمود ليس مثله فى الأولين ولا الآخرين . .
قلت وأنا أبذل جهداً كبيراً حتى لا أبكى : حسنة لم تكن مجنونة . . كانت أعقل إمرأة فى البلد . . وأجمل إمرأة فى البلد . . حسنة لم تكن مجنونة . .

[ناصر يوسف]

المشاركة الأصلية كتبت بواسطة عايد عبد الحفيظ

جبت السودان وأنت لا تحمل سوى جهاز موبايل
تفقدت المبدعين فى شتى المجالات وطمأنت
الناس عليهم ، وأوصلت رسالة للمبدعين
بأنهم ليسوا وحدهم، وأن حتى الحرب لم
تُنسى الناس عطاءهم وجهدهم وإثرائهم
لحياة الناس بالفن والجمال .
نلتقى من جديد فى سودانيات الواحة
الوريفة التى إحتمينا بظلها من هجير
الحياة وعنتها زمناً طويلاً .
كل الود ناصر المبدع والصديق وحبيب
الكل .

تسلم حبيبنا الجميل

[عايد عبد الحفيظ]

القوة والضعف فى شخوص الطيب صالح الروائية
(3)
سعيد البوم

سعيد عشا البايتات
(1)
إنتبهت فجأة لصوت المؤذن "حى على الصلاة حى على الفلاح" . كان صوتاً أخرقاً ضعيفاً فاقد الرنين . سألت عنه فقال عبد الحفيظ : "سعيد" ، أيضاً لم أميزه ، فقال محجوب ساخراً : "سعيد عشا البايتات" ، وقال ود الرواسي : "ما تقولُ لُه سعيد البوم، شن عرفه بعشا البايتات"
قلت "سعيد البوم ، أصبح سعيد عشا البايتات" .

قلت لسعيد الذى كان قبلاً يلقب بسعيد البوم :
"قالوا سموك سعيد عشا البايتات"
ضحك ضحكته البريئة التى أذكرها من أيام طفولته فى ود حامد ، وقال بلهجته البدوية :
"الولية فطومة أجارك الله ، وقت العرقي يشلع فى راسها تطلع الكلام خارِم بارِم"
قلت له : "وكمان فطومة غنت فى عرسك؟"
فقال يا محيميد أخوى ، فى هادى الأيام الفلوس مو تجيب فطومة ، على الحرام تجيب الهواء من قرونه"

عرس الزين كان أعجوبة ، أما أن سعيد البوم يصبح صهراً للناظر بجلالة قدره ، فهذه هى المعجزة .
قلت له : " لكين الناظر كيف قبل؟"
قال سعيد على الفور "مجبور"
"مالى خدمتُه بإيدى . . . يجى ألف جنيه . . عاوز يغُشنى فيه"

كان سعيد يبيع الفحم وخشب الوقود ويعمل في
الحقول ويدخر ماله عند الناظر . فقال : تقولوا
سعيد البوم . سعيد الغشيم. عليك أمان الله ،
مالي أنا عارفه على داير المليم. الحكاية أنا
متحضر لها من زمان .

"إنت قايل الشغل اللي اشتغلته في بيت الناظر ...
يا سعيد إملا الأزيار .. يا سعيد جيب القش للبهايم ..
يا سعيد كسر الحطب .. دا كله ساکت؟" .

سمح .. وبعدين؟؟
ولا بعدين ولا قبلين. يمكن فوق سبعة سنين وأنا
اشتغل زي الحمار . كل ما أجمع خمسة قروش
أو عشرة أو عشرين جنيه، أمشي لي صاحبي
أبو البنات يقيده لي في دفتر، وامشي أديها
الناظر. , كل سنة يقول لي يا سعيد ما تجي
تاخد قروشك. أقول له خليها عندك ما بتروح.
سنة ورا سنة ، وقرش فوق قرش .

قاطعته من فرط دهشتى
"الله لا يكسبك يا شقي دا كله ونحن قايلنك غشيم؟" .
ضحك وقال يا زول. في زول غشيم؟ بني آدم الجن
ما يقدر عليه .

وبعدين يا مقطوع الطاري؟» .

بعدين شلت الدفتر ومشيت للناظر . أنا عارفه أحواله
معكسة بعد ما راح المعاش، والقروش، دخلت عليه .

خلاصة الحديث. امش تعال في باكر وبعد باكر. بعدين
قلتله اسمع جنابك. انت قروش ما عندك. دحين أنا
أديك فهم . تعرّس لي بنتك العمشة دي . ونبقى حبايب .
يا زول ... كان قاعد فوق كرسي زي قعدتك
دي والوقت عصير . نط هادي النطة من الكرسي .
أخوك اتحضر. قلت الحكاية فيها ضرب .. عارف انت
عجرفة جناب الناظر . قال لي: يا بني آدم انت عقلك فاقد؟
إنت تفتكر البلد ما فيها قانون ؟
انت سعيد الوسخان العفنان تتزوج بنتي أنا؟

الناظر بقي في ايدي زي العجين . أقول له يمين يقول يمين.
أقول له شمال يقول شمال .
عليك أمان الله ، العرس هز البلد من فريق الطلحة لا عرب الفور . عرس الزين بقى جنبه زي الطهوره ، أنا أخو البنات. عليك أمان الله .

یا محيميد أصحابك ديل حاقرين بالناس وما عندهم علم بالحقيقة . يقولوا سعيد البوم ، فطومه غنت وقالت عشا البايتات تمساح الجزائر . جُمْلَة الأيمان ، الأذان أنا عملته لوجه الله تعالى ، والشغل في اللجنة غير الجهجهه والتلائل ما وراه فايده . جملة الأيمان ، يوم الليلة، أنا لا سائل في لجنة ولا مشروع ولا حتى سائل في حكمدار المديرية .

قلت له : وعلى أي حال ما دمت بقيت صهر الناظر
الباقي كله هين .
فقال باحتقار : ناظر شنو؟ أنا فاضي في الناظر ولا حتى في العمدة .
أنا عندي القروش. علي الحرام في اليوم العلينا دا ان رِدت بت العمدة آخدها .

قلت له والقروش جات من وين؟ ولا لقيت لك خزنة مدفونة ؟ » .
فوقف وهو يضحك مسروراً وقال :
لازم امشي أحصل السوق، حكاية القروش احكيها وقت تاني .

وخرج وهو يرنم بصوته الضعيف الخالي من الرنين : سعيد الظريف جيد لي أمه

[عايد عبد الحفيظ]

القوة والضعف فى شخوص الطيب صالح الروائية
(4)
سعيد البوم

سعيد عشا البايتات
(2)

ضحك سعيد البوم وقال :
يا جماعة أنا عاوز استقيل من اللجنة. حكاية
أمين الصندوق دي غير وجع الراس ما منها فايده .
والعجيب أن محجوب أيضاً ضحك وقال لسعيد :
إنت وسيف الدين وأولاد بكري قايلين الحكاية لعب ،
أها دَحِينْ خُمُوا وصُروا .

وقال الطاهر :
يوم اجتماع الجمعية أنت يا عشا البايتات السجم
ما أتفاصحت مع المتفاصحين وقلتو محجوب
وشنو ؟
شلته شلة الحرامية نهبوا البلد . دحين أنتو كمان
ابقوا رجال وانهبوا .

وقال سعيد يا محجوب انت تتكلم ساكت .
جملة الأيمان الحكاية حارقاك في شراشف
قلبك .
وهسع اليوم العلينا دا لو نادوك للجنة اليجري
وراك ما يحصلك؟ يا اخوانا أنتو مالكم
طماعين كدى ؟ خلاص أخذتوا حقكم .
خلونا نحن كمان نشوف حظنا سنتين ثلاثة .
وقال أحمد قبل شوية ما قلت داير تستقيل؟
وقال الطاهر يا محيميد شفت الراجل المنافق
عشا السجم دا؟
عليك أمان الله ، كان مرات حق عشا وليداته
ما عنده. اسأله قول له منو الكان بيعبره نظره
غير محجوب وشلة الحرامية ؟
وقال عبد الحفيظ مشاكل طلاقه وزواجه
براها كان دايرالها لجنه .

قالوا سعيد عاوز يطلق بنت الناظر .
وقال سعيد :
بنت الناظر ما بطلقها. لكين العرس إن دارني ما بصده .
وقال عبد الحفيظ :
منو البترضاك يا رَمَادُ ؟ انت قايل نفسك صغير ؟» .
وقال محجوب يلقا له وحده من بنات الفن الطلعن ديل .
وحده بتتكلم انجليزي. الزمن دا زمن انجليزي .
وقال الطاهر واحدة من بنات المظاهرة الهتفن :
يحيا الشعب . الشعب منو غير ناس سعيد عشا
البايتات السجم؟
دهش محیمید دهشة عظيمة حين قال سعيد
عشا البايتات باقتناع :
جملة الإيمان البلد حاصل فيها خير .
البلد ماشية على خير .
إنتو ناس اما تبقوا حكام أو تقولوا البلد خِرْبَتْ .
أيوه، يحيا الشعب ، الشعب ياهم نحن بنات المظاهرة
حبابهن عشرة محتشمات ومؤدبات ومتعلمات بناتنا
وبنات وليداتنا .
وإن لقيت لي ويحدتن فيهن تعرّسني جملة الإيمان
باكر اعقد ...... عليها
وكانت دهشة محيميد أعظم أن أحداً لم يضحك
على قولة سعيد أو يحاجج فيها .

قال عبد الحفيظ الله حي .
تنهد الطاهر الرواسي ملء صدره وقال :
روح یا زمان وتعال يا زمان .
ضحك سعيد القانوني وقال :
أنا أقول لكم خطبة عشا البايتات في اجتماع الجمعية .
خطبه لازم يكتبوها في الكتب ويدرسوها في المدارس .
اسمعوا ، محيميد خل بالك كويس .

أحمد وعبد الحفيظ ما كانوا حاضرين. الخلق
محشورة تحت السياله .
الحر كاظم الأنفاس ونحن متحضرين للكتل .
بعدين صويحبنا ال ما يغبانا يقيف عاوز يخطب .
الليلة القبلها متعشي معانا هنا .
تحلف قال يصوت معانا وقت وقف أنا قلت لي
ود الرواسي ، معليش زي بعضه أهبل وعويل
لكين برضه معانا .
لا سلام عليكم ولابسم الله ولا الحمد لله .
قال : يا جماعة الخير . محجوب وناس الطاهر
وسعيد ناس اصحابي وأهلي .
محجوب حبابه عشره .
راجل ما يتفضل عليكم .
جملة الأيمان راجل يوزن ألف راجل شكال
صريمه ومخلص يتيمه.
لكين الحق لله الجماعة أكلوا البلد ، نقوا لحمها
ما خَلُّوا غير العظم ، الخراب . مِنْ الله ما خلقنا
والجماعة ديل يسرقوا وينهبوا .
حلال بارد عليهم. الشيء ال أكلوه ما في انسان
عاوز يرجعه منهم .
ناس عليك أمان الله تلقاهم في الحاره والبارده .
سرقوا ونهبوا البلد ، الله لا يكسبهم حسنه .
رجال فرسان وبطونهم ما تشبع .
دحين زي ما قال الزعيم الطريفي ولد بكري ،
الناس دي تتفضل تروح بيوتها بالتي هي أحسن .
والا إذا كان عندهم كلام الشعب واقف لهم بالمرصاد
يحيا الشعب . يعيش الشعب .
يعيش الطريفي . يسقط محجوب .
وخصوصاً يسقط جني إسماعيل مقطوع الطاري إن
شاء الله ما تتعدل عليه . صاحبي أخو اخوان
قروشه كلها مودرها في العرقي .
محجوب راجل حبابه عشره .
راجل ما يتفضل عليكم خدم البلد وسرق ونهب .
باع لي البرسيم الحوض بين خمسين قرش .
قلت له أشاركك في البقره قال شراكه مش عاوز .
يا جماعة صلوا على النبي ، الحلال بين والحرام بين.
فضوا الحكاية دي خلونا نروح لي بيوتنا .

كان اضحك الضاحكين عشا البايتات نفسه. قال
وهو يكاد يختنق من الضحك :

أديت كل إنسان حقه . عدل ولا مو عدل؟

[عايد عبد الحفيظ]

القوة والضعف فى شخوص الطيب صالح الروائية
(5)
سعيد البوم

سعيد عشا البايتات
(3)

كان صوت سعيد البوم كما سمعه محيميد في تلك الساعة ، وهو بين النائم واليقظان ، كأنه مغناطيس ، قد علق به غبار الأحلام الموؤودة ، فاتخذ أعماقاً وأبعاداً ليست له . لم يكن كما سمعه أول مرة، ذلك الصوت الأخرق الضعيف .

سعيد عشا البايتات
وفجأة في غمرة المرح تلك قال :
يا جماعة في سر عاوز أقوله ليكم. ما قلته لجنس إنسان .
حصل على انتباههم بعد مشقة .

فقال :
الشتاء الفات في أمشير الدنيا برد وهبوب بين العشا والفجر .
ما تقولوا حلم ، أبدا .
شوف عيان زي ما أنا شايفكم هالساعه .
وحياة خوتكم يا اخوان ، أنا صاحي والفانوس موقد ، متغطي بتلاتة بطاطين والريح بره تصرخ الله واني واني واني الشبابيك مقفوله والباب مقفول بسم الرحمن الرحيم . أعوذ بالله من الشيطان الرجيم .
وقف فوق راسي .
قال لي بنهره «قوم» .
شيخنا الحنين اللهم ارضى عنه .
وقت الخوف راح مني ، عاينت له زين.، يا هو ذاته ذاته لابس عبايته وشاله فوق كتفه وابريقه ال ما يغباني في إيده .
قال لي قوم ، قلت له على وين يا شيخنا؟
قال لي امش القلعه قلت له الخرابات؟
قال لي ما ها خرابات . امش القلعه تلقى قصر .
قلت له قصر منو ؟
قال لي قصر بندرشاه ، قلت له بندر شاه يبقى منو؟
قال لي واحد من سلاطين الدنيا الزائله زمان زمان كان موجود كان عنده أملاك وأطيان ما ليها أول ولا آخر أراضيه كانت الخيل تمرح فيها ما تصل حدها .
تمره وعيشه وقمحه كان يغلبوا في لمه .
كان عنده ولد واحد وحداشر عبد . امش القصر فوق القلعه تلقى باب مفتوح ادخله وامشي لحد ما تدخل دیوان تلقی بندر شاه وولده ينتظروك. عندهم أمانة على شانك .

لا تسلم عليهم. ، لا تتكلم معاهم. ، لا تتلفت يمين ولا شمال .
أدخل استلم الأمانه وامرق ، الحذر ثم الحذر تقول بم ولا بقم .
تدخل دار الهلاك وال يكوسك ما يلقاك. الأمانة مال مالك حلالك بندر شاه ظن نفسه يرث الأرض ومن عليها. الأرض أرضك وأرض الضعفاء
بعدك . قوم. قوم .

يا زول مشيت القلعه لقيت زي ما وصف لي شيخنا للحنين. قصر وين وين إني آمنت بالله منور تقول بابور بحر وحس غناء ورقيص وضحك . مشيت لا اتلفت شمال ولا يمين وزي كأن بنات يجرني لي جاي ولي جاي. الديوان لا شك كان مليان ،نسوان، ما اتلفت ولا عاينت لكين الريحة ضاربة محلب وصندل ما تغباني .

لقيتهم الإتنين جالسين جلسة قدرة الله كأنه ملك ومعاه وزير الراجل الكبير قال لي أهلاً وسهلاً ومرحباً . أهلاً بابننا عشا البايتات ، إجلس اشرب واطرب ما رديت عليه مديت إيدي وعقلي يحضر ويغيب . الولد الصغير نطق قال انطق بالكلام. رد علينا السلام .
عليك أمان الله ، قربت اتكلم لكين ستر رب العباد . سكت ساكت .

الراجل الكبير صفق بإيديه ، جات بنيه زي الحورية ....................
آخ آخ يا اخوان من وقدة النيران . شفت بي عيني سكة النجاة وسكة الهلاك . ولولا عناية الله كنت رحت في ستين داهية وما هماني .
اتعوذت في سري من الشيطان الرجيم وقلت يا منجي، ومديت إيدي صم بكم زي ما وصاني شيخنا الحنين .
وقف الولد الصغير وضرب رجله بي زعل ونهر البت مشت في حال سبيلها .، الراجل الكبير ضحك وقال له لا تغضب يا مریود .
دا وارث وطالب حق ، سلمه الأمانة وخليه ينصرف بلا شر .

الولد سلمني صرة أخدتها ومرقت زي ما دخلت لا سلام ولا كلام ولا بم ولا يفتم. وقت فت لقيت نفسي عند الجامع ، بردان وعرقان أبكي زي الناقة على الفصيل .

كان الفجر قرب يطلع ما فتحت الصرة ولا عاينت فيها ، حطيتها عند المحراب .
طلعت الميدنة وأنا أبكي ما أعرف على إيش ولأيش؟ من الحزن ولا من السرور ؟
فريت الأذان يا اخوان ، طلع الصوت ما هو صوتي .
صوت مليان بالأحزان .
ناديت فوق البيوت .
ناديت للسواقي والشجر .
ناديت للرمال والقبور والغياب والحضور .
ناديت للضالين والمهزومين والمكسورين ، للصاحين وللسكرانين .
ناديت للنصارى والمسلمين .
ناديت الله أكبر الله أكبر وأنا أبكي وأنوح .
ما أدري أبكي على ال لقيته ولاً على الراح مني .

آخ آخ يا جماعة على تلك الليلة . سمعت بأداني هبوب أمشير تردد أذاني ، زي كأني أنا سعيد الكحيان التعبان ، بندر شاه زماني ، أقول لأهل الدنيا والآخرة
حي على الهلاك، حي على النجاح . حي على الضلال ، حي على الفلاح . حسيت وأنا فوق ميدنة الجامع عند الفجر ، كأن الملايكة والشياطين ، قالوا بصوت واحد آمین آمین ، نزلت وجدت الجامع مليان بشر .

ناس ما دخلوا الجامع من قبل . زي كأن البلد كلها اجتمعت في المسجد عند الفجر . كنت عارف يا اخوان أنهم كلهم حضروا لأنهم سمعوا الصوت ناداهم المنادي بلساني .
كان في شي عجيب داك الفجر .

أقيمت الصلاة وأنا دموعي نازله شل شل الإمام قرأ سورة الضحى سمعت بكاء عبدالحفيظ وبعدين سيف الدين وبعدين محجوب ومحيميد، وأنا أبكي معاهم وأجرهم ورائي لحد ما كل المصلين بكوا الدمع السخين في داك الفجر ، لأيش وعلى أيش؟ آخ آخ .

وكان عند الشباك اليسار راجل غريب ليه علاقة بكل ما جرى ودار يختفي ويبين لحد ما الناس قالوا عليكم السلام .
اختفى ولا ،خبر ولا أثر ومحيميد المسكين يصرخ بطول الحس ، يقول
الشخص الكان هنا راح وين ؟

في البيت ضويت المصباح قبل ما يبين ضو الصباح .
فتحت الصره لقيت أشكال وألوان ، كأنها كنوز الملك سليمان .
جلت قدرة الله ، قلبتها في إيدي بدون أي بهجه ولا انشراح كأني اقلب في رماد .
رميتها في مكان في البيت ما أدري وين ، ونمت النهار بطوله نوم كأنه نوم الأموات .
صحيت من النوم وأنا أبكي الدموع الغزار، ما أعرف لأيش وعلى أيش .

كان في صوت سعيد وهو يقص تلك القصة شيء حرك شجون أولئك الرجال فأخلدوا إلى صمت غریق ممتد ، قطعه أخيراً صوت عبد الحفيظ وهو يقول :
الله حي .

وخيم الصمت من جديد، وتنهد محجوب وسعيد وأحمد. وفجأة ضحك ود الرواسي مقهقها وقال :
يا زول ، عليك أمان الله كلام أضغاث أحلام تضحك على دقوننا يا عشا البايتات بي كلام زي حجى الزمن السالف؟
يظهر طلوع الميدنة في الفجر لخبط مخك .
باكر تجي تقول لنا إنك نبي الله الخضر ولا المهدي المنتظر .
حينئذ ضحكوا جميعاً ما عدا محيميد ، وقال أحمد إسماعيل الملقب بأبو البنات :
دا کلام سكر . لازم عشا البايتات كان شالع .
قسم الواحد يشرب قزازة العرقي يبقى زي اسمه منو دا؟ شهبندر
ولا بندر شاه .
لم يعترض سعيد، ولم يزد على أن قال :
آخ ثم آخ ثم آخ» .

محيميد هو الوحيد الذي اعتقد بتأثير الضوء الغامر في تلك الليلة ، ان سعيد عشا البايتات قد رأى وسمع . وإذا كان حلماً، فإنه سيربو مثل طوفان حتى يغرق البلد كلها .

وقال عبد الحفيظ :
الفجر قرب يطلع . يالله يا عشا البايتات، قوم إذن .

طفا سعيد من صمته مسروراً منشرح الصدر، وقال لهم في تلك الحالة :
إيه رأيكم نقوم كلنا نحضر صلاة الفجر وأصله اليوم يوم جمعة . بعد الصلاة كلكم معزومين فطور عندي في ديوان جناب الناظر . عندي حمل عديل ندبحه ونتبسط عليه .

أول من قبل الدعوة أحمد الذي قال :
إذا كان صلاة بعدها خروف ما في مانع .
رفض الطاهر ود الرواسي، ورفض سعيد ورفض محيميد ولكن محجوب قال فجأة :
والله كلام عشا البايتات معقول . منها صلاة ومنها عزومة . يالله يا جماعه .

كان صوته مثل تلك الأيام، حين كان ريس المركب يأمر وهم ينفذون ، في تلك اللحظة التأم شملهم كما لم يحدث من زمان طويل .
لذلك قال الطاهر الرواسي، وهم
يتحركون في قبس الفجر، بين النور والظلام :
رحمة الله عليك يا ود الريس .
قاموا وساروا وراء سعيد عشا البايتات ، وهم ذاهبون إلى الصلاة ، كمن يسير إلى وليمة .

[حسين عبدالجليل]

أبدعت في مقارنة ثنائية القوة/و الضعف في بعض شخصيات روايات الطيب صالح، و حسب علمي فهذا جانب لم يتطرق له ناقد ادبي قبلك.
شكرا اخ عايد.

[عايد عبد الحفيظ]

القوة والضعف فى شخوص الطيب صالح
،(6)
الطريفي ولد بكرى
(1)
أحدوثة عن كون الأب ضحية لأبيه وإبنه

الحرب بين ما كان وما سيكون

وقال سعيد ملاحقاً تساؤله الذي كاد أن يضيع في الزحام :
الطريفي ولد بكري عاوز يعمل بندر شاه .

وعلى العشاء تناوب ود الرواسي وسعيد قص القصة على محيميد كان سعيد غاضباً حين بدأ وغاضباً حين انتهى .
وكان ود الرواسي يروي بلهجة من لم يعد يدهشه شيء .
قالا :
إن الحكاية بدأت بنزاع حول أرض ، فإن أم أولاد بكري هي أخت محجوب .
كان محجوب يظن أن الأرض أرضه ، ولكن أولاد بكري تصدوا له فجأة ، وهو شيخ قد طعن في السن ، وهم شباب في أوج رعونة الشباب .
ظلوا ينازعونه حولاً بأكمله يطلعون لمحكمة وينزلون من محكمة ، خسروا الأرض ولكنهم قوضوا سلطان محجوب .
بدأوا يقولون جهاراً ما كان الناس يقولونه سراً أو لا يقولونه البتة .
وكأنما البلد كانت مستعدة للتغيير زاد الهمس وارتفع اللغط .
وكان الطريفي ولد بكري يتصدى لمحجوب في المجالس ويقول على مسمع منه ، هذه العصابة ، محجوب وجماعته متى يتخلون عن زمام الأمور في ود حامد ؟
هؤلاء جماعة انتهوا ، كفاية أكلوا البلد أكثر من ثلاثين سنة .
كلام كثير من هذا النوع كان يغضب محجوب ، ولكن كل عمل يقوم به ضد أولاد بكري كان يقلل من هيبته .
ويسأل ود الرواسي في حسرة :
ماذا يفعل رجل كبير محترم إذا تحرش به غلام صعلوك ؟ إ
ذا ضربه يقول الناس ، هذا الرجل قليل القيمة ، يضرب الولد الصغير. وإذا تركه يقول
الناس هذا الرجل الباطل لا يقوى على ردع غلام صعلوك .

قال سعيد إن محجوب كان زعيماً في ود حامد، لمؤهلاته، ولأن البلد كانت قابلة به .
تلك الكلمة "القبول" كان لها وزن عظيم عند محجوب وجماعته ، يقولون فلان مقبول ، وفلان عنده قبول وذلك أعظم الثناء في رأيهم .
ثم أدركوا كأنما فجأة ، أن الكلمة لم يعد لها معنى ،
وأن ذلك الشيء الغامض الذي يجعل الابن ينصاع لأبيه والمرأة لزوجها ، والمحكوم للحاكم ، والصغير للكبير قد تلاشى .
كأنما أهل البلد قد استيقظوا بغتة من حلم قديم ،
أو كأنهم استسلموا لحلم جديد .
بدأ الناس ينظرون بعيون جديدة فيها عواطف شتى وليس من بينها عاطفة القبول .

قال ود الرواسي وسعيد إن كلام أولاد بكري بدأ يؤثر في قلوب الناس ، وتكون لهم حزب معارض أخذ يقوى ويشتد وقاموا بجمع التواقيع لعقد اجتماع عام للجمعية التعاونية وهو أمر لم يحدث منذ تكوين الجمعية .
كان هدفهم إقصاء محجوب وجماعته من لجنة الجمعية وكل اللجان التي سيطروا عليها منذ أكثر من ثلاثين سنة .
محجوب ، بعدما يربو على ربع قرن من السلطان المطلق، وجد نفسه وجهاً لوجه
أمام شعب ود حامد يقاضونه الحساب .

وانتهى الأمر بانعقاد الجمعية برئاسة باشمفتش التعاون الذي جاء خصيصاً من مروى لذلك اليوم المشهود .
قال ود الرواسى إن الطريفي ولد بكري كان أول المتكلمين .
قرأ عريضة طويلة ضمنها كل ما يمكن أن يخطر على البال من التهم . اتهم محجوب بالفساد والرشوة والسرقة والمحسوبية وعدم الكفاءة والإهمال وهلم جرا .
وتوالى الخطباء وكلهم في الجانب المعاكس ، كان من بينهم سيف الدين وسعيد البوم ... عشا البايتات القوي ...
فيما بعد عمل وليمة للجنة الجديدة .
طبعاً ما دام أصبح أمين صندوق .
هل تصدق يا محيميد أن أولاد محجوب صوتوا ضده ؟
وان البنات عملن مظاهرة في ود حامد وهتفن بسقوط محجوب وشلة الحرامية ؟

يأخذ سعيد خيط القصة من ود الرواسي محجوب قاعد يسمع الاتهامات كأنه تمثال من خشب .
أنا والطاهر فقط حاضرين من جماعتنا . عبد الحفيظ من يوم ما عرف طريق الجامع استقال من كل شيء ونفض يده . قال كله كلام فارغ .
أحمد كان سكران كالعادة وما حضر الاجتماع .
ود الريس زي ما تعرف مات بالمغصة ، أولاد بكري أمهم ، أخت محجوب ، جات ووقفت وسط الرجال وشتمت أولادها بأقذع الألفاظ . الكلمة الوحيدة النطقها محجوب من أول الاجتماع لما نهر اخته قال لها يا وليه روحي لبيتك .

حكاية غريبة حصلت ما عرفنا أولها من آخرها .
أولادنا أصبحوا ضدنا .
المدارس فتحناها بالعرق والتعب والجري هنا وهنا، طلعت أولاد بقوا يتفاصحوا علينا البلد أتاريها اتلخبطت تحت رجلينا ونحن نايمين نوم العوافي .
أنا وود الرواسي وقفنا وشتمنا الناس واحد واحد بالاسم ، ذكرناهم بجمايل محجوب عليهم ، أيام محجوب كان الوحيد الصاحي وبقية الناس همل. لكن الأمر انتهى صوتوا برفع اليد .
الأغلبية طلعت ضدنا .
تحت السيالة الكبيرة وسط البلد، نص النهار ، محجوب انهزم . محجوب النمر هزمته الضباع .
أطفال وصعاليك وبنات فارغات وحوش .
انتخبوا الطريفي ولد بكري رئيس ، وحسن ولد بكري نائب رئيس ، وحمزة ولد بكري سكرتير ، وسعيد عشا البايتات أمين صندوق ، وسيف الدين مراقب أعمال ، قالوا وظيفة جديدة لتحسين العمل فى المشروع ، البنات بتاع المظاهرة زغردن والطريفي هتف يحيا الشعب .
الشعب !
وين الشعب ؟
ناس عشا البايتات وود رحمة الله ومفتاح الخزنة وهلم جرا ؟
ياهم ديل الشعب ؟

ويختتم ود الرواسي القصة محجوب قام من الاجتماع منتهي .
ما تفوه بكلمة .
ما دافع عن نفسه .
قعد وقام ساكت .
من يومها وهو يمشي على وجه الأرض حيا كميت .
إنتهى عهد وبدأ عهد في ود حامد .
وإلى اليوم ما نعرف كيف دا كله حصل .

فکر محيميد وهو يجرجر الخطو نحو داره أواخر الليل .
إنه يعرف مغزى تلك القصة ، لأنه قد رآها تحدث من قبل في زمان بعيد سحيق ، ولعله كان طرفاً من أطرافها .
في تلك القصة أيضاً ، كانت الحرب ضاربة بين "ما كان وما سيكون" .
ود حامد التي حملها في خياله كل هذه الأعوام ، وعاد الآن يبحث عنها مثل جندي في جيش منهزم ، لم يعد لها وجود .
كانت ساقاه تحسان بوطأة السنين الخمسين أو الستين ، ولكن خياله كان خيال طفل دون العاشرة .
الليل البهيم وشجيرات السيال
الجائمات كنسوة في مأتم ، ولمع الأضواء الموهومة في تلك الحلكة ، وصوت الحياة الضعيف في كل ذلك العدم .

[ناصر يوسف]

جهزت اللابتوب عشان اقدر أقرأ بمزاج غالبا مساء اليوم اتفرغ لهذا البوست العميق

شكرا د. عايد

[Abdullahi Gaafar]

شكرا صديقنا عايد
زمن من روايات الطيب صالح الفكرة اعادت لي الشوق لقراءة الروايات مرة اخرى رغم انني قرأتها عشرات المرات... هي مقدرة الطيب صالح رحمه الله على رسم شخصوص وابطال رواياته باحترافية مبالغ فيها وكأنه هم
متعك الله بالصحة والعافية
تحيات وتقدير

[عايد عبد الحفيظ]

المشاركة الأصلية كتبت بواسطة حسين عبدالجليل

أبدعت في مقارنة ثنائية القوة/و الضعف في بعض شخصيات روايات الطيب صالح، و حسب علمي فهذا جانب لم يتطرق له ناقد ادبي قبلك.
شكرا اخ عايد.

تحياتى أستاذ حسين
من موقع القراءة ومحبتها نتجرأ من حين لحين
ونكتب عن ردود أفعالنا لما قرأناه .
كنا معتقلين فى سجن عطبرة فى 1990 ، إقترح
أحدهم أن يقدم مادة للنقاش ، ثقافية ، سياسية إلخ .
قدمت القوة والضعف فى شخوص الطيب صالح ،
النقاش الذى دار حولها كان جميلاً وممتعاً .
فى 2020 سعدت بدراسة للأستاذ منصور
الصويمى عن
شخصيات الطيب صالح السردية وفاعلية التغيير
وبعدها جاء بوست أستاذنا الشقلينى فى سودانيات
بعنوان حسنة بنت محمود فى مواجهة الراوى .
لم يكتمل عرض الشخصيات التى إنتقلت من
الضعف للقوة أو العكس ، فمحجوب مثلاً إنتقل
من القوة للضعف ، ولا أدرى هل إنتقل الزين من
الضعف للقوة أم ترافقا معاً فى حياة الزين.
إحترامى وتقديرى ومودتى

[عايد عبد الحفيظ]

المشاركة الأصلية كتبت بواسطة Abdullahi Gaafar

شكرا صديقنا عايد
زمن من روايات الطيب صالح الفكرة اعادت لي الشوق لقراءة الروايات مرة اخرى رغم انني قرأتها عشرات المرات... هي مقدرة الطيب صالح رحمه الله على رسم شخصوص وابطال رواياته باحترافية مبالغ فيها وكأنه هم
متعك الله بالصحة والعافية
تحيات وتقدير

تحية محبة أستاذنا ومبدعنا الجميل
دار نقاش فى قروب من قروبات رومانيا
عن سؤال قديم متجدد حول شخصية
مصطفى سعيد وهل تشبه الطيب صالح!!
تعددت الأراء فبعضهم قال إنه الراوى وآخر
قال الطاهر ود الرواس ود محمد عثمان الجعلى
يرى فى كتابه أن الطاهر هو أقرب الشخصيات
للطيب صالح ، وإستبعد الرأى الذى يقول بأن الزين
هو الأقرب .
عدت أبآن ذلك النقاش لرواية عرس الزين أبحث
عن الشبه بين الكاتب وبطل الرواية .
وكأننى أقرأها لأول مرة ، بهرتنى اللغة الجميلة
وظللت أعيد القراءة مرة بعد أخرى ، ونسيت
الهدف الذى أعادنى إليها .
إحترامى وتقديرى ومودتى

[عايد عبد الحفيظ]

المشاركة الأصلية كتبت بواسطة ناصر يوسف

جهزت اللابتوب عشان اقدر أقرأ بمزاج غالبا مساء اليوم اتفرغ لهذا البوست العميق

شكرا د. عايد

تحياتى الصديق والمبدع الجميل
تذكرت تلك الأيام وأنت تنتقل من
بوست لآخر تداعب وتمزح وتجبر
خواطر وتفشى المحبة .
مثلما فعلت ولا زلت تفعل الآن
هنا وهناك .
كل الود