وما الناسُ بالناس الذين عرفتهم !!! عبد الله الشقليني

إلى د. طلال فى حربه العادلة و قيادته الماثلة !!! معتصم الطاهر

الجن وعالــم اللامرئيـات/Parapsychology !!! خالــد الحـــاج

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!
آخر الأخبار العالمية

العودة   سودانيات .. تواصل ومحبة > منتـديات سودانيات > منتــــدي التوثيق

إضافة رد
 
أدوات الموضوع انواع عرض الموضوع
قديم 11-02-2011, 07:46 PM   #[1]
بدر الدين اسحاق احمد
:: كــاتب نشــط::
الصورة الرمزية بدر الدين اسحاق احمد
 
Thumbs up نص خطاب السيد / رئيس الجمهورية بمدينة جوبا / 4يناير 2011م.

بسم الله الرحمن الرحيم والحمد الله والصلاة والسلام علي رسول الله السلام عليكم ورحمة الله وبركاته.
الواحد أيضا سعيد بوجوده اليوم في جوبا وانأ اصريت انو أجي جوبا في هذا الوقت بالذات والعالم كله أنظاره متجه إلي السودان عشان ما ندي رسالة واضحة جدا انو نحن أهل السودان عملنا اتفاقية والناس كان تفتكر انو نحن ما حننفذ الاتفاقية والاتفاقية نفذناها ذي ما قلت نحن بدرجة عالية جدا والحمد الله وما تبقي شئ بسيط بالنسبة للشئ الذي تمه ونحن أيضا مقبلين علي الحدث الكبير هو الاستفتاء إنا اشكر أخوانا سلفا كير وحكومته انو ما اكتفوا نحن نخاطب الرسميين في الجهاز التنفيذي والتشريعي وأجهزة الدولة وإنما أتاحوا لي فرصة أن التقي بيكم ورغم نحن نعرف الأجهزة ديك بتمثل الشعب ولكن بتمثله منظمات ليها وزنها وليه دورها وليها مكانتها وليها تأثيرها علي الشارع والمواطن إنا حاحاول اكرر بعض كلامي القلته نحن مشكلتنا كسياسيين ونحن طبعا السياسة ما أصيلين فيها نحن ناس عسكريين كلنا بنقول الكلام مره واحدة وبعد داك .... يوصلوا الكلام لمر وسنهم وانتهي الموضوع ولكن أخوانا السياسيين ديل جابونا من جديد وأدبونا بأدب جديد .
أنا عاوز أقول نحن أول حاجة وانا ما بحب أقول إنا, إنا والأخ دكتور ريك مشار كنا سنتين بتقاتل بصورة مباشرة هو كان القائد في المنطقة بتاعت ولاية الوحدة وانأ قائد الجيش وعندنا ذكريات كثيرة ما قعدنا مع بعض عشان نعمله ولكن قاتلنا بعض عشان نعمله وهسع كنا قاعدين نتذكر في بعض المعارك التي خضناه ضد بعض ويوم جيتكم ويوم جيناكم ويوم عملنا كمين يوم هجمنا عليكم يوم هجمتوا علينا وبقت ذكريات وبنقوله ونحن نفوسنا طيبة مش نفس ألعدواه, إنا سلمت القيادة يوم الاثنين بتاعت المنطقة غرب النوير وأستلمت السلطة يوم الجمعة يعني معناه ما كانت في حاجة في النص من الميدان الي القصر الجمهوري وجاي في ذهني كل الماسي بتاعت الحرب وهسع أتذكرنا الماسي مع دكتور ريك مشار عام 88 في ناس كثيرين ما كانوا موجودين يعني أو شباب صغار كانوا في المدارس ولكن الكانوا معانا في الوقت داك في عام 88 كانت فيه مجاعة فيه وباء بتاع كلازار وطبعاً ما كان في وجود لحكومة هسع الناس البتمتعوا ديل المنطقة هذه كله ما فيه مسئول حكومي واحد لما حصلت المجاعة والمرض قام دكتور رياك مشار قام فك الجماعة لأنهم بقوا عبء عليه قام فكاهم والناس جوانا نحن في بانتيو عشان اوريك نحن كسودانيين ممكن نتشاكال ونتقاتل ولكن في لحظة ما بننسي انو نحن بشر ونحن أهل ونحن إخوان وممكن نتجاوز في لحظة فالناس ديل مجرد ما جوا إنا بقول الكلام والشاهد بتاعي موجود ما في حكومة ولكن هسع عندي تعينات بتاعت الجيش الأكل بتاع الجيش وأضطريت اقيم الأكل بتاع الجيش أدي المواطنين وأحركهم طوالي الي كادقلي الدنيا خريف كانت والواحد سعيد جدا لأنو إنا لمن جيت كادقلي بعد نهاية الخريف ولقيت معسكر ضخم جدا بتاع النوير هناك ديل كلهم الناس اطلعنوهم بتعيينات الجيش ولكن المشكلة خلق لي دكتور رياك بالحكاية دي إنا عساكري جاعوا في النهاية الأكل انتهي اشتريت أكل من السوق أدينت عيش وويكة وشرموط وخلافه ومشيت الخرطوم قلت ليهم ياجماعة إنا دي فاتورتي عاوز تدفعوه ليه قالوا ليه منو الاداك تصديق تشتري أكل منو قلت ليهم العساكر جعانين يا جماعة دي الحكومة كانت مسئولة في وقتها مش كان لينا الحق نحن نشيله ليه أنت تدي أكل لمواطنين يجوعوا جنبك هل يعقل انو إنا عندي أكل في المخازن نعم دي معونات جيش وفي ناس يموتوا بالجوع جنبي بالمرض أخليهم يموتوا لان بتاع الخرطوم القاعد هناك ما قاليه أدي الناس ديل أكل فنحن جينا مقتنعين انو لازم يكون في سلام وانو الحرب دي هي دمار وخراب .
وأن نحن الوحدة البنحارب من أجلها هي بتزيد الناس تباعد وتباغض وكراهية لأنها هي موت ودمار وقتل وتشرد وتهجير عشان كده جينا من أول يوم في خطابنا الأول كان الكلام عن السلام وضعنا السلام كهدف استراتيجي لينافي ثورة الإنقاذ لأننا نحن قلنا عاو زين ننفذ البلد طيب أنت البيحتاج للإنقاذ منو زول تعبان مش كده زول داير يموت أنت عاوز تنقذوا تنقذوا بي شنو ما لازم نحلها المشاكل دي نحن قلنا سببها الأساسي هي الحرب الدائرة في الجنوب سواء كان مشكلة اقتصادية أو أمنية أو سياسية أو اقتصادية أو اجتماعية سببها الحرب الدائرة في الجنوب فيبقي نحن نضع السلام كأسبقية أولي عشان بدون سلام لا يمكن حل مشاكل السودان وسعينا للسلام من أول يوم من بيانا الأول وقبل ما نشكل الحكومة قلنا نتصل بإخواننا ديل يمكن يجو ربنا يهديهم يجو نقعد مع بعض نشكل حكومتنا مع بعض نحن والـ spla الكلام ده كان في أول يوم في الثورة المهم التفاهم ما كان بالسهولة دي وكان محتاج لإجراءات والاتصال كان مشكلة عشان نتصل بالحركة وبقيادتها وبالراحل قرنق كانت مشكلة لأنو لا في تلفون لا في بيناتنا لا في اتصال بيناتنا لا في وسيط بيناتنا قلنا عاوزين نصلهم مباشر ما قدرنا أخيراً وسطنا أخوانا في اثيوبيا, المهم بعد جلسة واحدة اقتنعنا أنو نحن محتاجين لازم يكون عندنا برنامج بتاع سلام واضح والناس القعدو في الخرطوم الوقت داك نحن عملنا مؤتمر الحوار الوطني حول قضايا السلام بعد شهرين من قيام الثورة جمعنا فيه كل القوي السياسية وكل الآراء الناس المع الحركة والمؤيدين ليها والناس الضد الحكومة والمؤيدين ليها الناس أرباب الحرب والناس الضد الحرب الناس ألمعانا والناس الضدنا في ناس ما عندهم مشكلة الحرب في الجنوب دي حكاية بعيدة ما شغالين بيها مشكلتهم الكرسي القاعد في الخرطوم ديل كلهم نحن جمعناهم ناس كثيرين قالوا أنتو لسع رجليكم ما ثبتت والناس ديل عاو زين يشيبوكم تجمعوهم وتدوهم منبر عشان يتحدثوا ويهاجموكم بيه قلنا ما في مشكلة وفعلاً أول أيام كان الكلام زي ما قلته كلام فسل في البداية والكلام كان شين كل واحد قال أي كلام في صدره لكن بعد يوم يومين الناس نفست طلعت الهواء الساخن الناس بعد داك كلها حقيقة بقت تتكلم بكلام موضوعي بـل حتي الناس الرفضوا لمن طلبناهم في الأول يجو جو طالبوا أنو لازم ينضموا ونحن بدينا الدعوة بسبعين نفر انتهينا قريب مأتين واحد الشارك في المؤتمر وخرجوا بوثيقة أنا بقول ممتازة هي بقت الأساس لينا التحركنا به لغاية ما جبنا السلام أهم حته في الوثيقة كانت الوثيقة أوصت أنو والله المطلب الأساسي لأخوانا في الجنوب الوقت داك كان الفدرالية الحكومات السابقة كلها كانت رافضة فدرالية ونحن لمن كنا طلبة صغار طلعونا في مظاهرات بنهتف نو فيداريشن بتوين ون نيشن دوان داون كوننانزايشن (no federation betwwn one ation colonization down down) الفدرالية دي انفصال المهم نحن بعد داك استمرينا نبحث عن السلام مشينا تفاوضنا في أديس أبابا وتفاوضنا في نيروبي مشينا ابوجا الأولي وأبوجا الثانية ودي كلها بحث عن السلام ولقاءات ثنائية وثلاثية وفردية في أوروبا وفي مواقع أخ0ري في فرانكفورت في أي مواقع نحن مشينا نبحث عن السلام ما في زول جانا قال داير أتوسط إلا قلنا ليه أبشر تحرك علي بركة الله لغاية ما وصلنا المحطة بتاعت نيفاشا ودي كانت حوار صعب لكنها حوار جاد واضح أن الطرفين كانوا جادين عشان نصل الي سلام ومبادرة الإيقاد يا جماعة أول ما قدمت في 1993م, والحوار بدأ ابتداء في 1994م, لكن بدي بصورة مكثفة ومنظمة في 1997م وقعنا متين؟ 2005م, أنا أفتكر دي فتره طويلة جداً ما في مفاوضات إلا المفاوضات الفلسطينية الإسرائيلية أون أوف أون لكن نحن قاعدين قعده واحدة بنتفاوض حول وثيقة واحدة لغاية ما وقعنا السلام حتي في مرحلة لما شعرنا ان والله الوفود دي زي وصلت ديد لوك قلنا نرفع مستوي التفاوض نحن من جانبنا رسلنا النائب الأول ألهو كان علي عثمان والحركة جابت الراحل قرنق يرأس الوفد بتاعه وجلسوا أيضاً نحن زي ما كنا متخيلين بالكثير أسبوع النائب الأول حيجي راجع يكون خلاص انتهو لكن قعدنا وقعدنا وهما قعدوا وحوار طويل لغاية ما وصلوا للوثيقة بتاعت نيفاشا نحن لمن وقعناها وقعناها ونحن علي قناعة الناس الكان متخوفين افتكروا نحن والله دي مرحلة تكتيكية والله نحن جينا مضغوطين نحن ما جينا مضغوطين جينا عن قناعة حتي أخطر ما في الوثيقة دي هي تقرير مصير الي هي تعريض وحدة البلد الي التقسيم ما في أخطر من كده لكن نحن جينا تقرير المصير عن قناعة وأنا أقول نحن ما منافقين نحن لمن نقول كلام بنقصده ما زي القوي السياسية البتزاود هما في المعارضة عندهم حديث في الحكومة عندهم حديث مختلف أنا بقول كل القوي السياسية في السودان في لحظة من اللحظات أعلنت هي مع حقتقرير المصير لجنوب السودان القوي السياسية كانت معارضة لينا اجتمعوا في أسمره في مؤتمر القضايا المصيرية واهم قرار طلعوا بيهو هو أعطاء مواطني جنوب السودان حق تقرير المصير نحن في الحكومة وحلفائنا في حكومة الوحدة الوطنية برضوا في اتفاقية الخرطوم للسلام مع الدكتور رياك انو نحن ايضا التزمنا نعطي مواطني جنوب السودان حق تقرير المصير حق تقرير المصير هذا قرار كل القوة السياسية في الحكومة وفي المعارضة ناس كثيرة جدا قالوا نحن ممكن تنفذوا لكن في الفترة هذه لازم ناي في ناس بدل ما قلته لآخونا باقان يعتبروا نحن في المؤتمر الوطني عندنا حاجة داسنها نأتي آخر لحظة دنف الشغلانه كلها انا عاوز أقول ليكم نحن لما نقول كلام نلتزم بيه لأننا أهل عهود ومواثيق ذي ما قلتا لإخوانكم قبيل نحن في السودان بنقول الراجل بربطوه من لسانوا ما بربطو من كراعوا عشان كدا نحن مع السلام مع اتفاقية السلام الاتفاقية هذه نحن طبعا ناس وحدة دايرين الوحدة والليلة بنقول أنشاء النتيجة تكون وحدة لكن اذا كانت النتيجة هي انفصال في النهاية نحن ما علينا غير نحي ونأتي نحتفل معاكم في الميدان دا ذي ما قلته لإخوانكم ما نعمل صالون عزاء في الخرطوم لأنو نحن نحترم ونقدر القرار بتاع المواطن الجنوبي عاوزين الاستفتاء باقي لينا فيهو محتطين المحطة الأولي هي التصويت عايزنو تصويت حر وشفاف العالم كلوا عينو عليكم هنا كل العالم افتحوا كل الفضائيات ما في كلام عن السودان فعازين زي ما اديناهم رسالهم في الانتخابات كانوا متوقعين دماء وأشلاء وخذلناهم الحمد لله .في ناس اول ما شافوا الحكاية ما فيها شكل شالوا عدتهم وفاتوا هسي نحن عايزين نفس الشيء يتكرر زي ما خذلناهم المرة الفاتت انو نحن ما قتلنا بعض في الانتخابات عاوزين في الاستفتاء نديهم نفس الرسالة نحن شعب متحضر عاوزين أي مواطن في الجنوب في الشمال برا يكون عندو الحرية الكاملة في لنو يصل الصندوق بكامل حريته بدون ضغوط أو إغراء يصوت للشيء الدايرو هو عشان الناس يشاهدوا انو الاستفتاء كان شفاف ونزيهه وحر وانو النتيجة الحصلت دي النتيجة الفعلية وتعبر حقيقة عن رأي وقرار المواطن الجنوبي عشان نحن نقبلها ونحترمها والآخرين يقبلوها ويحترمونا نحن ذاتو .المحطة الثانية هي إعلان النتيجة في ناس اللحظات دي بركبم الشيطان قد يتجاوزوا دي المرحلة التي نحن عايزين الناس يضبط فيها النفس اذا النتيجة انفصال او وحدة نتقبلها الزول مع الانفصال يتقبل اذا كانت وحدة يتقبل ،لان دي الويل بتاعت المواطنين .نحن شغالين في الوحدة وفي الجنوب ولا في الشمال ولا أي موقع لو كانت النتيجة انفصال برضوا نقيف نحي ونحترم الويل بتاعت المواطن .ما دايرين مشاكل عاوزين ذي ما شالوا عدتهم فاتو ما لقوه حاجة يصورها عاوزين المرة دي برضوا ما يلقوا حاجة يصورها ايضا عشان يشيلو بيه نحن سمعتنا كسودانيين في الشمال حنظل سودانيين في الجنوب والشمال .الحديث عن البرتوكولات طبعا هي ستة بروتوكولات بروتوكول الثروة واظن دا ما فيه مشكلة ،بروتوكول السلطة ونحن يمكن الناس لامونا انو والله اديتو الجنوبين اكثر من حقهم اديتهم الجنوب حكموهو براهم وجو يشاركوا في حكم الشمال عبر الحكومة الاتحادية ب30%قلنا مافي مشكلة حتي لمل جينا ونعمل مشروعات بتاعت دعم الوحدة صندوق الوحدة وانحزنا المشروعات وأخر حاجة الصرفانها في واو واويل واجوك دي كلها عملناها بقناعة تامه لانو عاوزين الناس يجيبو الوحدة لكن حتي ما جابو الوحدة نحن ما خسرانيين فانتو اخواننا واهلنا ومن حقكم علينا انو نقيف معاكم وندعمكم .
البرتوكول بتاع الترتيبات الامنية اصلو في نهاياتو ما باقي فيه غير القوات المشتركة ومجلس دفاع مشترك ومعروف اذا كان حصلت انفصال النتيجة تكون شنو المجلس سيحل القوات ستفكك الجيش السوداني يمشي شمالا قوات spla حترجع أماكنها .البروتوكولات بتاعت المناطق الثلاثة ابيي نحن نقول ان حتي الآن في خلاف حول ابيي الاتفاق بتاعنا انو الاتفاقية هي المرجعية الأساسية حتى لو اختلف بند في الدستور والاتفاقية يبقي الأصل الذي يسود هو الاتفاقية يبقي البرتوكول يسود علي كل شيء فنحن لازال نتجاوز نحن يا جماعة حلينا مشاكلنا بالحوار مشكلة كبيرة بالحوار قسمنا البلد بالحوار ما بقلبنا نحل مشكلة بتاعة آبيي او أي منطقة ثانية نحن خلال الحوار عاوزين نتجاوز الي ان نحلها لانو زي ما قلنا ضحينا بوحدة البلد من اجل السلام يبقي السلام دا حكاية عزيزة وغالية ويجب الحفاظ عليها .الحديث عن المشورة الشعبية طبعا في جنوب كرد فان تأخرت وتأخرت ليه لأنه ما قامت الانتخابات التشريعية وانتخابات الوالي في جنوب كرد فان ما قامت ليه لأنه أخوانا في الحركة في جنوب كرد فان لما جاء الإحصاء والي يتم عليه توزيع الدوائر قاموا قاطعوا الحركة هنا قررت تقاطع قعدنا معاهم وتفاوضنا واتحاورنا وقبلو انو الإحصاء يستمر وزودناه مرتين لكن ما وصلوا الخبر لإخوانهم في جنوب كرد فان فديك ظلوا مقاطعين لغلية الفترة بتاعت الإحصاء لنتهت مش كدا يا دكتور أخوانا دانيال كودي عرف الحكاية دي متأخر جدا فبالتالي لما جا تقسيم الدوائر بقت تقسيم الدوائر حقيقة ما بعبر عن الوضع السكاني في جنوب كردفان فبالتالي الحركة قاطعت الانتخابات في المستوي ألولائي سواء علي مستوي الوالي او المجلس التشريعي المشورة الشعبية المسئول منها وبعملها هو المجلس التشريعي طالما ما ما في مجلس تشريعي معناته ما في مشورة شعبية ممكن تتم في جنوب كرد دا ألماخرها في ناس هسه بدوا ترتيباتهم واجراءتهم وبدوا ندواتهم وحواراتهم انا بقول أصلا ما فيها مشكلة لا في النيل الأزرق ولا في جنوب كرد فان الناس زي ما مهتمة بالسلام في السودان نحن برضو مهتمين في كل السودان وحنظل مهتمين حتي بعد قيام الدولة في الجنوب اذا حصل انفصال نحن والله بهمنا جدا انو الجنوب دا يكون مستقر وامن وما في مشاكل ما في حروب ما في قتال لان الناس كلها دفعت ثمن غالي جدا في الحروب السابقة ونحن ما حا نكون بعيدين وجدانيا من الجنوب اذا تم انفصال بقرار نحن يا جماعة الناس العشنا الجنوب دا حمناه حتة حتة ما زي أي ناس تانية فارتباطنا بالجنوب ما بنتهي بس لانو حصل انفصال نعم قد يكون انتهي رسمي والسياسي والغيره دا بحصل لكن نحن الجيل العشنا في وطن واحد حنظل الشعور بتاع انتماءك للوطن الواحد حيظل قائم مهما كانت النتيجة ما حنعمل والله انو حنلخبتها ،لكن حنحترم قرار الجنوب لكن حيظل الواحد في دواخله انو هو مرتبط بوطن واحد أنشاء الله فالإجراءات التي لم نتفق عليها وما حسمناها حتى الآن زي ترسيم الحدود نحن متفق علي الحدود 80%ما تبقي قلنا يرفعوا لينا توصية من اللجنة الفنية عشان ما ننظر في الخلافات عشان نحاول نحسمها أنشاء الله ونكون قبل نهاية الفترة الانتقالية في 9/7/2011م نكون نحن خلصنا ترسيم الحدود وأصبحت حدود واضحة بين البلدين الحدود دي عشان أرد علي اختنا بالنسبة للقبائل الحدودية حتكون في الورق يا جماعة حتى نحن حنمشي نعمل علامات حنختها لكن المواطن القاعد هناك والعاش هناك والذي تكون مرته من هنا ولا أسرته نصفها بهنا ونصفها بهنا يعني زول عنده أسرته في القيقر ولا في الرنك وهو قاعد في هسه في كوستي ولا هناي ا لناس في الحدود المنطقة الحدودية دي ترسيم الحدود لا يعني انو حنعمل حيطة يعني ما حنجيب حيطة وسلك شائك عشان نقفل الحدود دي فيبقي مراعاة انها تكون حدود سوها السوفيت بوردرز مهمة جدا عندنا حركة سكان عادية ناس بطلعوا وناس برجعوا وناس بخشوا في رعاة بتحركوا في المنطقة في مزارعين لكن بتكون في سلطات وصلاحيات بتراعي بتحفظ الأمن في المنطقة ومسئولة من المواطنين ديل في الحدود كل واحد في الجانب بتاعه لكن الحركة عبر الحدود ما ممكن نحن نمنعها ولا العلاقات الاجتماعية الموجودة الآن نحن نقدر نمنعها نحن بنقول العلاقات الموجودة حتكون موجودة بين الشطرين ما حتكون موجودة بين أي دولتين تانيات لانو نحن أكثر من 100 سنة نحن دولة واحدة وشعب واحد رغم كل شيء فالروابط الاقتصادية والسياسية والاجتماعية والأمنية الموجودة بيناتنا حتكون كبيرة جدا ويجب نحن نرعاها ما ممكن نقول والله نحن خلاص بقينا دولتين تاني مافي حاجة بيناتنا خل السفير يجي يقدم أوراق اعتماده هنا والسفير يقدم أوراق اعتماده هناك مواطن لازم يجي عابر الحدود لازم يجي يشيل تـأشيرة دي أشياء نحن عايزين نتفق عليها نحن قلنا مصالح مشتركة لازم نراعيها وأنا ضربت مثال بالاتحاد الأوروبي الأوروبيين ديل كلنا درسنا في تاريخ الحرب العالمية الأولي والحرب العالمية الثانية وأنا قبيل قلت لإخوانكم هي ما كانت حرب عالمية دي حرب بين الأوروبيين حرب بين دول المحور ألمانيا وحلفائها وحرب ما بين دول الحفاء فرنسا وبريطانيا وحلفاءهم لكن سموها عالمية لأنهم هم بقولوا هم أسياد العالم فنحن كلنا توابع ساكت اذا بريطانيا وألمانيا أتحاربوا معناته العالم كله أتحارب قتلوا فيها ملايين الليلة برضو رجعوا وعرفوا انو الحرب دي ما فيها فائدة وخسارة ودمار وقتل عشان كدا قاموا عملوا هسه الاتحاد الأوروبي كله دولة مستقلة وبعلمها وبتمثيلها وأي شيء لكن المصالح بتاعتهم المشتركة الممكن تكون فيها فائدة للأطراف كلها رابطوها مع بعض لأنو يا جماعة كل ما الناس يتجمعوا تجمعات كبيرة فيها قوة كان قوة اقتصادية كان قوة سياسية كان قوة عسكرية القوة دا بتوفر للمواطن الي عاش في الفضاء دا بتوفر اليه أمن وسلام وعيش كريم دا الهدف بتاعنا انو نحن نظل كطرفي السودان الأشياء تجمعنا يجب نأطر ليها نراعها لمصالحة المواطنين في الطرفين لمصالحة البلدين في الطرفين عايزين نقدم نموذج حقيقتنا لأفريقيا تلكم عند التوحيد الآن رغم نحن انفصالنا لكن نقدم ليهم النموذج كيف يمكن تكون علاقات والتبادل المنافع ما بين الدول الاتحاد الأفريقي القائم لكل هسع بتكلم عنها وبنشدوها لكن ما عارف بعملوها كيف نحن عايزين ندرسهم الحكاية دي عايزين نعمل ليهم بيان بالعمل.
في السودان هنا انو كيف يمكن يقوم اتحاد الأفريقي يحفظ لكل دولة كيانا القائم به لكل مصالحتنا المشتركة كيف نرعها وكيف نطوره ونقويها من اجل مصلحة البلد.
أي دولة أروبية الليلة مهما كانت صغيرة الميزانية بتاعتها بتسوي أضعاف ميزانية أفريقيا مجتمعة وجودوا نفسهم مضطرين يعملوا وحدة نقدية واتحاد اقتصادي فما بلنا نحن الدول ضعيفة ولسع محتاجين نحن لسع في مرحلة الحبو عايزين نمشي عايزين نجري وعايزين نطير نلحق الناس فما دا تبقي الا اذا تعاونا في الشيء البيتنا نحن نمشي بيهو لقديم ان شاء الله، بالنسبة المرآة في السودان يا جماعة نحن المرأة في السودان بتقدم كل مرآة مش في أفريقيا بس خارج أفريقيا وما حكاية نحن بنمتني بيها على المرأة و المرأة عندها دورها وعندها مكانتها وليها دورها كان في العمل السياسي والاجتماعي واللافي ترابط الاجتماعي واللا حتى الخدمة في المعاش في غيروا نحن المرأة ادينها مكانه كثير من دول الآن عايزة تعمل زينا نحن هسع لما أدينا المرآة 25% في البرلمان لقينا في دوب بتتكلم قالوا 30% لكن ما عارفين يعملوها كيف بقولوا خالص المرآ ة نديها 30% لكن تمشي تنافس في نهاية يكون عدد محدود جدا هسع الآن العدد الموجود مقدر جدا وليهن وزنهم ليهن حسابا ليهم مشاركتهن المرآة نحن بقول هي عماد المجتمع والشاعر قال:-
الأم مدرسة اذا اعددها أعدت شعباً طيب الأعراف.
الأم هي تعلم الأطفال يعني هسع الواحد ما يقول والله فاذر تنق، بقول مذر تنق (Mother Tongue)، لان الطفل بتعلم من امو ما بتعلم الكلام بس بتعلم منا القيم والمثل والأخلاق كل شيء بتعلم الواحد من امو طيب الأم بتعلم الطفل هو حا يكون القادة بتاع المستقبل هو الجيل بتاع المستقبل لأزم الناس يعتنو بيها يدها كل فرص في التعليم في الخدمات في الصحة في العلاج نحن الدولة الوحيدة البتدي المرأة العمليات القيصرية في مستشفيات الحكومية مجانا القادر وما قادر هسع في دولة حتى الدول الغنية ما تلقي المعاملة دي المرآة بنديها أجازة الوضع وساعات الرضاعة.
بنراعي برضو خصوصيها لكن برضو بنديها التمييز الايجابي لانو لو تركنها للمنافسة الحرة قد لا تكسب حقها كامل عشان كده أدينها التميز الايجابي نحن مع أخونا ما حا يقصروا مع النساء أن شاء الله الحفاظ على ممتلكات وأرواح في الطرفين نحن دا مسئولية أنا قولتها من أول يوم أنو ما في جنوبي قاعد في شمال زول حا يهبشوا في روحوا والله في ممتلكو والله يسيء اليهو والله يعمل فيه حاجة أخونا سلفا نفس التعهد دا نحن عايزين الأجهزة كلها تكون ملتزمة لانو سلفا ما حا يشيل عصاية يقف في الشارع لازم الأجهزة كلها الشرطة الأمن الخلافوا اللجان الشعبية والأمن الخلافه هم اللجان الشعبية اللجان الحزبية منظمات المجتمع المدني بتاعتكم دي لأزم هي ترعي وتمنع التجاوزات لانو التجاوز هنا قد يكون عنده رد فعل هناك والتجاوز هناك حيكون عنده رد فعل هنا الحفاظ على ممتلكات الناس في شماليين كتير عندهم بيوت وعندهم دكاكين وعندهم مزارع اسع دايرين مزارع البن يا ..... زي ما الجنوب هناك عندهم بيوت اسع نحن لاحظنا بعض الجنوبيين بدوا يبيعوا نا ما عارف ببيعوها ليه بيوتهم في الخرطوم وفي ناس أظنوا يتطلعوا اشاعة في ناس سماسرة دايرين يشتروا البيوت دي رخيصة يطلعوا اشاعات عشان يبيعوها ليهم بنص الثمن يا جماعة مافي زول يبيع بيته مافي زول حنقلع منه بيتوا ولو بيت رقاي عنده قصر في مدينة النيل ولا في المهندسين يعني ما اشتري ليه بيت في الحاج يوسف ولا بشيل بتاع رقاي لانو بيت كبير مافي زول حيهبش زول مافي زول حيسيء لزول تأكدوا الحكاية دي فنحن اظنوا علقت على كل حاجة نحن في النهاية برضوا باسمكم جميعاً نشكر كل الناس الوقفوا معانا من دول وأشخاص وساعدونا لحد ما وصلنا للسلام ونحن الآن في نهاياتها نحن نرحب بكل الناس الجو يشهدوا كمراقبين وكإعلاميين عشان نحن يشوفونا نحن عايزنهم يشوفونا على حقيقتنا انا مرة ثانية عايز يقولوا الناس ديل لازم يشوفونا على حقيقتنا النحن الشعب المتسامح الممكن نتقاتل لكن اللحظة النقعد تحت شجرة ونتفق بننسي كل شيء نحن الناس البنعرف نتجاوز وننسي الماضي وننسي مراراتو وكلنا عايزين نمشي لقدام انشاء الله ونحن عندنا تجارب كتيرة جدا اتحاربنا وانا سعيد بوجود أخونا الكبير جوزيف لاقو معانا هنا طبعاً ده واحد من رجال السلام وديل بتوعون اتفاقية اديس ابابا للسلام أهو كان القائد بتاع الحركة بتاعت أنانيا 1 لكن بعد السلام بقي قائد المنطقة العسكرية في الجنوب قائد القيادة بتاعت المنطقة الجنوبية كلها ومشي بقشي نائب رئيس يعني نقول نحن البنعرف نتجاوز وأنا بحكي للناس بعد اثنين وسبعين نحن مشينا دورة في باكستان معانا اثنين من الناس المستوعبين معنا منونا بور وبيتر سرلوا معانا ستة عشر جنسية في الدورات دي ما قدروا يصدقوا انو نحن ديل الناس الكانوا بحاربونا واتفقنا معاهم واسع نحن ساكنين مع بعض بناكل مع بعض بنطلع مع بعض نمشي مع بعض حتى منونا بور لما جاب زوجته في الوحدة كان بزوجته نحن كل يوم احد نمشي نتغدي عنده في البيت الناس دي كلها تقيف تتفرج هل الكلام ده صح انتو بتسووه ده طيب انتو ليه كنت تتشاكلوا والله نتشاكل في مشاكل لكن لمن اتفقنا خلاص تاني المشاكل انتهت فدا حيكون كده يا جماعة حنظل أخوان حنظل أهل علاقاتنا حنظل مربوطة انا ذي ما أتعهدت يا اخ سلفا نحن كحكومة اذا بقينا حكومة خرطوم هم بقوا حكومة جوبا نحن على أتم استعداد انو كل شيء مننا لدعم الحكومة الوليدة ولقيام الدولة الجديدة في جنوب السودان نحن مستعدين نقدم كل الدعم المادي والفني واللوجستي يا أخوانا عشان الدولة تقيف على حيله لأنو عايزين لينا جار قوى وشديد قوي جزاكم الله خير والسلام عليكم ورحمة الله .



التوقيع: [align=center]ان الانسان الذى ليس شاهداً على عصره ..شاهداً على صراع الحق والباطل ..لا يهمنا ان كان واقفاً فى المحراب يصلــى او جالساً فى الخمارة

الشهيد ..على شريعتى [/align]

[align=center]


ويبقــى المستمسكون بفطرتهــم هم الاكثــر ثباتــا على طريق الجنــة ...

هانــى فحــص ..
[/align]
بدر الدين اسحاق احمد غير متصل   رد مع اقتباس
قديم 06-03-2011, 06:38 AM   #[2]
محمد نعيم
:: كــاتب جديـــد ::
 
افتراضي

[youtube]http://www.youtube.com/watch?v=YwEVfD4O3Us&feature=related[/youtube]

[youtube]http://www.youtube.com/watch?v=C6S0rC4_9hA&feature=related[/youtube]

[youtube]http://www.youtube.com/watch?v=C6S0rC4_9hA&feature=related[/youtube]


[youtube]http://www.youtube.com/watch?v=KflMtejgqQM[/youtube]


[youtube]http://www.youtube.com/watch?v=4zG9GaM_gOQ[/youtube]

[youtube]http://www.youtube.com/watch?v=FdZPPBI-Y6o[/youtube]



محمد نعيم غير متصل   رد مع اقتباس
قديم 06-03-2011, 06:53 AM   #[3]
محمد نعيم
:: كــاتب جديـــد ::
 
افتراضي

[youtube]http://www.youtube.com/watch?v=C6S0rC4_9hA&feature=related[/youtube]



محمد نعيم غير متصل   رد مع اقتباس
قديم 11-03-2013, 06:12 PM   #[4]
abdu abubakr abdalla
:: كــاتب نشــط::
 
افتراضي ده عربي يا مرسي!.

بالغت يا اسحق....شوهت خطاب السيد الرئيس لا شولة ولا فاصلة ولا نقطة....كيف تقرا وتفهم ما قاله سيادته....!!



abdu abubakr abdalla غير متصل   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 07:52 PM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2017, vBulletin Solutions, Inc.