مــــلــــيـــار دينار سوداني ؟ ؟؟؟؟؟؟؟؟؟؟؟؟؟؟؟؟؟؟

[3mk-Tango]

اعلان قرأته اليوم في جريدة سودانية نص الاعلان كما يلي :

[align=center]للبيع

عمارة التامينات
وسط الخرطوم ــ شارع الجمهورية

(5) دكاكين
_____________
طوابق متعددة
ب 55 مكتب

السعر المطلوب

مليار دينار سوداني[/align]
.............

انتهي الاعلان ..

قال ليك زمان ومو زمنن بعيد عمكم تنقو دا كان مسافر لي مصر بالقطر عن طريق حلفا .. يشهد الله كنت شايل لي
800 جنية يعني 80 دينار بس ... ومكمل الباقي شوال تسالي ودي اسمها ( درزنة ) وكان الغرض من السفر
فسحة ايام الثانوي وتجارة .. يشهد الله في ال 800 جنية دي اتفسحت شهر وجيت راجع بي بضاعة عبارة عن
جكوك ( جمع جك ) بتاع خلاطة مولينكس .. والله غطت معاي السفرية وجابت لي فوق ال 500 جنية .

وقال ليك زمان زمنن مو بعيد برضك ... عمكم تنقو دا كان مصاريفو للمدرسة الابتدائي شلن ولمن اخد ليهو زعله زادوها
قرشين بقت سبعة قروش عمنا حسن الشايقي الله يرحمو كان بظبط سندوتش فول وفوقو موية جبنة بي 4 قروش ومع موية الجبنة بكون في شوية حترب بتاع جبنة ...

وقال ليك زمان زمنن مو بعيد برضك .. عمكم تنقو دا لقي ليهو ( طرادة )واقعة ( يعني 25 قرش للحناكيش )
والله 3 يوم لافين بيها من زول لي زول نسال منو الراحت منو ولمن تمت الاسبوع فكو الحظر عليها وبقت ملكي
ملك حر .. والله شهر فرحان وامكن لي اسة فرحان بيها ...

وقال ليك زمان زمنن مو بعيد برضك .. قامو جماعة مع قومة الحرامية واذاعو بيان رقم واحد وقالو كان ما جينا
كان الدولار وصل 24 جنية لي يوم الليلة الدولار اظنو بي 2400 جنية .. (وكان في سهو في الارقام بكون ما مني
العيب من علم الفلك الماقريتو ) ...

وقال ليك اسة وزمنن بعيد اظنك ... تكون في عمارة قيمتها ( مليار ) ...
ليه وفي شان شنو ؟
وهو شن قدرو المليار وكم صفرن فيهو ؟؟؟
والبشتريها منو وبجيبو من وين ؟؟؟
مش ياها العمار الفيها اجزخانة كمبال ولا واحدة تانية ؟
البخليها بي قدر دا شنو وبعملو بيها شنو ؟

داير لي واحدن حريف يحسبها لي بالدولار يشوفها قدر شنو ويشوفها بتجيب عقار قدر شنو في مدن
عالمية كبيرة زي نييورك ولندن وباريس وطوكيو ؟
.

عليك الله انا البوديني اقرأ جريدة سودانية شنو زاتي كان ما الغلط ؟؟؟

.

[wadosman]

[align=right]عمك تنقو...

انت نسيت امواس الحلاااقة نااسيت...و الكركدى
دا ما انا... بس ناااس زمااان حكوا لى كدا....

تخريمة:
ما تجى نتشاارك مع بعض عشاان نشترى
العماارة دى...!!!!!!!!!

تخريمة تاانى:
انت البوديك تقرأ الاعلاانات دى شنو...؟؟
دى ناسا معروفين...و القصة بيكون فيه طبخة
للناس المدقسين زينا كدا....!!!!!!!.

يلا..و ربنا يديك العااافية[/align]

[3mk-Tango]

ود عثمان ..

ما تجى نتشاارك مع بعض عشاان نشترى
العماارة دى...!!!!!!!!!

مش اول توريني هي كمها المليار دي ؟

عاوز تدقسني شكلك داخل علي طمع ..

[د.سيد عبدالقادر قنات]

يا ود وأوسمان وعمك تنقو

سلام عليكم

أنتو ليه ما سمعتو بجرايد تانية

يعني ما بتقرو المصريات ليه

وفي جريدة سودانية

أسمها حسن الخاتمة

وواحدة تانية أسمها

مشس عارف لكن بتاعة أعلاانات


وأقول ليكم

نحن جارنا قالو ضابط كبير

قبل شهور ختي الساس

بس بعد شوية شهور

تصدقوا بيتو وصل الطابق الرابع


بس أقول ليكم الطابق الرابع

ولسه التشطيب ماشي ، وديلوكس !!!!!!!!



وناس دكتور فلان

والمهندس فلان

وناس علان وفلتكان

لسه بالأيجار ما لاقين جحر


تجي يا عمك تنقو وودعثمان

تتكلمو في عمارة التامينات ؟؟

ليه أنتو عمي من ::

جامعة الرباط ؟؟

كبري جامعة السودان ؟؟


مستشفي أمبدة ؟؟

التوطين 1و2و3 ولسه الساقية مدورة

والكوليرا والأيدز والحصبة والملاريا

بس خلو الناس يسترزقوا

ما تحكوها شديد لمن تجيب الدم


وياعمك تنقو ::

هل تصدق أنو كشف أنتظار الأطباء للتعيين به ::


أكثر من 2000ألف طبيب


تجي تقولي عمارة يعقوبيان

بس أخير ليك تسد دي بي طينة


ودي بي عجينة

ونحن وراك لي لاهاي

ألله يديكم العافية

[أبو العز الجنوبي]

العزيز عمك تنقو
تحياتي لك
تصدق انو المغايص دي كل يوم بنقراها؟؟؟
والعجب بتاعة الكورة، حرم تقول السودان زي البرازيل....
بعدين الحسبة اظنها تطلع اربعة مليون دولار او زيادة....
اها بقي دي بتجيب شنو ؟؟؟ في بلاد بره شوف ليك واحد من بلاد بره...
تخريمة:
قلت لي تسالى وكده؟؟؟
والسكن وين؟؟ في العتبة؟ ولّ الهرم؟؟؟
وود عثمان ذكرك بامواس الناست، وكمان شاي الزهرة....

[Aboremaz]

لما الجنيه بقى ( سغيييير ) ختو كم جنيه فوق بعض وسموه (دينار )

[size=5]لما الدينار بقى برضه سغير شديد قدام اخوانه برضه رصو الدينارات فوق بعض وسموه جنيه

دي طريقة البصيرة ام حمد في حل المشاكل [/size]

.
.
مسرح العبث الزمان داك ليه مستمر عندنا يا عم تنقو ! ! !.
.

[أبو الحُسين]

المشاركة الأصلية كتبت بواسطة 3mk-Tango

ود عثمان ..

مش اول توريني هي كمها المليار دي ؟

عاوز تدقسني شكلك داخل علي طمع ..

الغالي تنقو...

إنت يادووووووبك تسمع بالعمارات البقت بي مليار؟؟؟!!!

حلييييييييييييلك يا يابة... إنت عارف أنا قبل ما أجي البلد دي... في عمارة في أركويت شكلها مربعات كدي... يقولو ليها عمارة المليار... أها الكلام دا شوفو متين؟؟؟

لوووووووووووووووووووووول!!!

قال سمعت في عمارة بي مليار قال!!!

لك من المودة والمحبة أحلاها وأعذبها...

أبو الحســــــــــــــين...

[3mk-Tango]

د. سيد .. تحياتي

والله عندي صديقي دكتور كان في اجازة للسودان .. سمعت منه حاجات تشيب الراس

هل تصدق أنو كشف أنتظار الأطباء للتعيين به ::
أكثر من 2000ألف طبيب

البسمع كدا يقول البلد ما فيها زول مريض والدكاترة قاعدين عطالة نسبة للصحة العاليه ..

عجبي مليار مرة ...

[3mk-Tango]

ابو العز .. حبابك ..

بعدين الحسبة اظنها تطلع اربعة مليون دولار او زيادة....
اها بقي دي بتجيب شنو ؟؟؟ في بلاد بره شوف ليك واحد من بلاد

4 مليون دولار دي فيها كم شلن ياربي ؟؟؟

والله يا ابو العز الواحد ما عارف يضحك ولا يبكي ولا تغلبو القراية ؟

قلت لي تسالى وكده؟؟؟
والسكن وين؟؟ في العتبة؟ ولّ الهرم؟؟؟
وود عثمان ذكرك بامواس الناست، وكمان شاي الزهرة....

تصدق بالله في شوال التسالي والقريشات دي كنت ساكن مصر الجديدة وفي روكسي كمان ؟
باقي الدرزنة كانت
بودرة الاونو بتاعة الحموضة ( UNO )
السفنجات .. الكافينول ... الكركدي .. الفضة ...

طلعتو دروز قدام مع ود عثمان ....

مليار تحية ..

[بنت النيل]

تنقو

( إنت لسه شوفت حاجة )

مع ناس الإنقاذ ( مش حا تقدر تغمض عينيك )


وازيدك حبه

صندوق إعمار دارفور الذى نصت عليه إتفاقية أبوجا حدد له مبلغ 300 ألف دولار يعنى نصيب الفرد بطلع أقل من 10 دولارات دى لى إعادة الإعمار واريتها تمرق

بينما تكلفة عمارة بتبنى لصاح وزارة الطاقة أكثر من 500 الف دولار شوفت الكلام دا كيف واريتا تقعد ما تلحق صويحباتها من عمارات وزراة الداخلية




لكن قلت لى إنت من زمن الشلن


ودى

بنت النيل

[3mk-Tango]

ابو ريماز عساك طيب .. ما شفناك مع ابراهيم موسي يوم الخميس ..

مسرح العبث الزمان داك ليه مستمر عندنا يا عم تنقو ! ! !.

علي ذكر المسرح مليار دي حتبني كم مسرح .. ومسرحنا القومي لسة لو جات
كتاحة او مطرة بتوقف العرض فيهو ؟

والله دا الحير البصيرة ام احمد مليار مرة ..

[3mk-Tango]

ابو الحسين سلام يا مرتاح ... او باعتبار ما سيكون ...

إنت يادووووووبك تسمع بالعمارات البقت بي مليار؟؟؟!!!

والله يا اب الحسين انا زمان قايل الارقام دي هظار ..
يعني واحد يقول ليك دشليون جنية ... وواحد يقول ليك خرتومية جنية
يعني كلها كنت فاكرها ارقام ما عندها علاقة بالواقع ...
اها مليار دي انا كنت فاكرها من القبيلة اعلاه طلعت من قبيلة تانية خالص
اسمع مش السماسرة بياخدو 5% من قيمة البيعة ؟
كان شاطر وريني السمسار حياخد كم في العملية دي ؟

اوع تقول لي 5% من مليار ...

[3mk-Tango]

بنت النيل سلام ...

صندوق إعمار دارفور الذى نصت عليه إتفاقية أبوجا حدد له مبلغ 300 ألف دولار يعنى نصيب الفرد بطلع أقل من 10 دولارات دى لى إعادة الإعمار واريتها تمرق

شوفو الارقام البتطمن صحيح يعني لمن بقت علي المساكين ديل عملوها ارقام سمحة وبتتقري

10 دولار تقول دايرين يعملو بارتي ..

مع ناس الإنقاذ ( مش حا تقدر تغمض عينيك )

والله ما إلنا الا هيفاء كان كدا ...

لكن قلت لى إنت من زمن الشلن

ركزي لي علي دي بس

وقال ليك زمان زمنن مو بعيد

[معتصم دفع الله]

والله يا عمك إنت قديم قدم "بضم القاف" ..
ياخي إنت من زمن حفروا الكسرة "مصطلح مجاز"
والتسالي البشيلوهو للقاهرة ..
ما تسألني عشان أنا زاتي ما عارف البحر حفروه كيف ..
تمشي السودان باقي رأسك دا يشيب من الحكاوي العجيبة ..
الناس دي من المغصة بقت حكاية خلاس ..
والنكتة في طرف اللسان ..
شوف عيني دي ..
واحد من الناس الكبار ديل عندو فلتين "مربوطات" بي جسر طائر ..
دا عشان عندو مرتين ..
شدة الحرامي أنا ما عارف الزول دا فكر في الحاجة دي كيف ؟
وما خفي أعظم يا صاحبي ..
تعرف بعض البيوت الفي الأماكن والطرق الرئيسية إشتروها بالغصب من أصحابها ..
ولا واحد قادر يفتح "خشمو" مافي وإلا مصيره يكون معروف لديكم ..
شركات كثيرة وهمية وناس غريبة داخلة ومارقه ..

تسلم يا صاحبي ..