*** مصطلحات عامّية سودانية ***

[آيات]

المشاركة الأصلية كتبت بواسطة شبارقة

شكرا ً يا آيات

طيب ممكن تفسري لينا المثل (ما بريدك وما بحمل بلاك) كلمة كلمة ... ومتى يقال؟

(مابريدك) هنا لاأرغب فيك (مابحمل بلاك)لأستطيع دونك أو لا أستطيع الإستغناء عنك
تقال عند الإختلاف مع شخص أو رفض وجوده ..وعدم المقدره على الإستغناء عنه

[شبارقة]

سلام يا شباب

ما المقصود بـ الكداية

يقال للرجل البخيل : أبو كداية

قال الجعلي: ما بدّوكي الهسوس البنجحر بكدايتو.

وقالت الرباطابية تمدح: ما أخذ كوم اللحم سوّى الكداية.

المصدر: موقع عون الشريف قاسم

[ابوبكر حسن]

اقتباس:
المشاركة الأصلية كتبت بواسطة شبارقة

سلام يا شباب

ما المقصود بـ الكداية

يقال للرجل البخيل : أبو كداية

قال الجعلي: ما بدّوكي الهسوس البنجحر بكدايتو.

وقالت الرباطابية تمدح: ما أخذ كوم اللحم سوّى الكداية.

المصدر: موقع عون الشريف قاسم

سلام شبارقه
عندنا يقال لى نواه المنقه والدوم الكدوده
انا غايتو قلت دى قريبه ليها
قربتها بى المثل ما بدوكى الهسوس البتجحر بى كدايتو
يتجحر دى عرفتها يتدس يعنى
بس هسوس دى شنو ؟

لو غلط ما تغلطنى شديد سمح؟

[شبارقة]

المشاركة الأصلية كتبت بواسطة بكرى مبلول

بس هسوس دى شنو ؟

لو غلط ما تغلطنى شديد سمح؟

سلام يا بكري

الهسوس تعني الوضيع أو الهويـّن

[شبارقة]

مرات تكون عازم ليك ضيوف .. وتقوم الزوجة بإعداد ما طاب من الطعام .. أها من ضمن الطعام ده تقوم تختار ليها حاجة خاصة (دائما ً بتكون مـُسبـّكة ومكرّبة أو مطقطقة في شوية زيت زي الكبد والكلاوي وأطيب اللحم) حاجة تكفي الزوج فقط .. أها يقوم الزوج ينجحر ليهو في مكان ويأكل الحاجة الخاصة دي براهو ويقش خشمو ويشيل الأكل العادي لضيوفو ...ويمكن ما يأكل معاهم ذاتو أها الأكلة الخاصة دي بيسموها الكداية.

[فيصل سعد]

يرفع للسؤال عن حال و احوال صديقنا شبارقة
طال الغياب يا صاحب و عساكم بالف خير ..


اشرح معاني ما يلي :

الكوفار
النحّار
السافوتا
المرها
الحجير
الكبكابة
الرقراق
الُقر

و كونوا بالف خير ..

[عبدالله علي موسى]

سلام على الجميع،

نساهم!

النقرة: نوع من القش، ربما "العيش" في مرحلة ما " ربما يصيبه وباء" يصبح نقرة إذا أكلته البهائم مرضت و هلكت..

يقول ليك "نقرة ناس بتري الشقت العنسيت" نقرة سئية شهيرة ظهرت في بتري، قتلت حتى الحيوان القوي العنسيت، و يقول ليك الزول دة "نقرنا" "نقره" (ما تنقرنا ياخي نموت)

العنسيت: حيوان قوي جداً "القرنتية، فرس النهر"، جلدة يصنع منه سوط العنسيت لا أذاقكم الله له.

يقول ليك "الزول جلده زي جلد العنسيت" : كناية عن ثخن الجلد، قد تكون دغاله و قد يكون صبراً و شدة حسب السياق و مزاج المتحدث.

[أمين محمد سليمان]

المشاركة الأصلية كتبت بواسطة فيصل سعد

يرفع للسؤال عن حال و احوال صديقنا شبارقة
طال الغياب يا صاحب و عساكم بالف خير ..


اشرح معاني ما يلي :

الكوفار
النحّار
السافوتا
المرها
الحجير
الكبكابة
الرقراق
الُقر

و كونوا بالف خير ..

فيصل سعد يا حرف العين. وين إنت يا زول ؟!

الكوفار الجوع الشديد
النحّار الحيرقان الشديد
السافوتا ( ما تعمل لينا سافوتا في راسنا ده) لكن ما عارف معناها !
المرها المرة الما مشلخة
الحجير الزول الحجيري الما بظهر فيه العمر
الكبكابة الزول المهزوز و مضطرب و غالبا ما تقال للزول الخفيف قدام الجكس !

الرقراق الدمع المحبوس في العيون
الُقر ( الُقر الينفخك ) لكن ما عارف معناتو شنو !!

هديتي متبرع بيها للجيلي .

[عبدالله علي موسى]

القِر البرد الشديد، غالباً برد يصحب مطر. والناس يقولون "قًُر" والصحيح "قِر"

والحاردلو قال:

الشم خوخن برداً ليالي الحِره --- والبراق برق من مِنه جاب القِره

وبسلامتكم.

[شبارقة]

المشاركة الأصلية كتبت بواسطة فيصل سعد

يرفع للسؤال عن حال و احوال صديقنا شبارقة
طال الغياب يا صاحب و عساكم بالف خير ..

بارك الله فيك يا فيصل .. وشكرا ً ليك

[شبارقة]

المشاركة الأصلية كتبت بواسطة أمين محمد سليمان

الكوفار الجوع الشديد

السافوتا ( ما تعمل لينا سافوتا في راسنا ده) لكن ما عارف معناها !


الرقراق الدمع المحبوس في العيون

هلا يا دكتور وعساك طيب ومرحبا ً بكم في هذا البوست الشامخ

أسمح لي ببعض الإضافات والتعليقات

الكوفار : هو ليس الجوع الشديد فقط بل هو الرغبة الشديدة في نوع معين من الأكل (وتصاحبه إفرازات المعدة الحمضية) مثلا ً الواحد فينا يشتهي ليهو كسرة وما يلقاها أو يشتهي ليهو شطة خضراء مدقوقة بالليمون ومايلقاها .. أها لما يلقاها يقول ليك : والله أنا كنت مكوفر لي في كسرة وهكذا.

السافوتا : قد يكون مصدرها ليس عربيا ً

سمعت لي مربع دوبيت بيقول :
يا طير إن مشيت أغشى الزلال لا تفوتا
مهيرة أرض شايق و نوارة جميع بنوتا
اهلا اُسود ركزت وسوت للترك سافوتا
و هي سوت قلبي متل الكورة مرة تدردقا ومرة تشوتا

الرقراق : قد يكون هو الدمع المحبوس في العيون ... ولكن الشائع في كلامنا العامي أن الرقراق هو الضل المتقطع الذي ينتج عن ضؤ الشمس الذي تعترضه فواصل مثل قش أو شـِعـب الرواكيب المهلهلة أو الأشجار الغير ظليلة... أو الرقراق هو ضؤ الشمس المتقطع لنفس الأسباب المذكورة يقول ليك : أبقى ضل لا تبقى رقراق.


والله أعلم وشكرا ً لكم ،،،

[شبارقة]

المشاركة الأصلية كتبت بواسطة عبدالله علي موسى

والحاردلو قال:

الشم خوخن برداً ليالي الحِره --- والبراق برق من مِنه جاب القِره

هلا ومرحبا بالأخ عبد الله

الصحيح خوخت ويقال منسوبة للون الخوخ أي كناية عن الأصيل والغروب .. وبالرغم من أن فاكهة الخوخ نادرة في السودان لكن الحاردلو إستعار لونها في تشبيهه للون الأصيل وغروب الشمس.

الحرة : بفتح الراء وليس كسرها مقصود بها الحر .. أما الحـِرة فلا أعلم لها معنىً .. والله أعلم

[فيصل سعد]

السلام و التحايا للجميع
و نعرج قليلا الى مترادفات متوافقة و متضادة
و نتمنى الشرح و التعقيب:

الحراز و المطر
المن و السلوى
الحقيقة و الخيال
الرجرجة و الدهماء
الماء القراح
النجم و المساء
العشق و الهيام

و لقدام ..

[ابوبكر حسن]

المشاركة الأصلية كتبت بواسطة فيصل سعد

السلام و التحايا للجميع
و نعرج قليلا الى مترادفات متوافقة و متضادة
و نتمنى الشرح و التعقيب:

الحراز و المطر
متضاده ... شجر الحراز يخضر صيفا وينشف خريفا

المن و السلوى
حسب قوقل
إن المن هو طل ينزل من السماء على شجر، أو حجر، ويحلو وينعقد عسلاً، ‏ويجف جفاف الصمغ، وقيل: المن العسل، وقيل: شراب حلو، وقيل: هو مصدر يعم جميع ‏ما من الله به على عباده من غير تعب ولا زرع، وهذا المعنى الأخير أعم، ويدل له ما في ‏الصحيحين من أن الكمأة من المن الذي أنزل على موسى.‏
‏أما السلوى: فهو طائر يشبه السماني، أو هو السماني نفسه، وقيل: العسل.

بس علاقتهم بى بعض شنو اعتقد انو متوافقه
الحقيقة و الخيال
اها ديل متوفقات ومتضادات
متوافقات لانو الخيال ممكن يبقى حقيقه
لكن الحقيقه ما بتبقى خيال

ا
و لقدام ..

والبقية لها عوده بأذنه

[فيصل سعد]

يرفع أيضا للسؤال عن الأحباب الغائبين شبارقة، بكري،آيات،جيجي، أمين،كبوش، النور يوسف، مهند الرباطابي، جيزابيل، نبراس، سمراء، هيفاء،جانيت، سارة، تماضر، أشرف، جمال عبد الناصر، قيس،، هند، الزوول، أسمر،، كانديك، خالد الصائغ، و بقية العقد الفريد لهم جميعا التحايا و عساهم بالف خير و عافية،، و اظهروا..