نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > مكتبات > مكتبة شوقي بدري

إضافة رد
 
أدوات الموضوع انواع عرض الموضوع
قديم 20-06-2010, 10:07 PM   #[1]
شوقي بدري
:: كــاتب نشــط::
الصورة الرمزية شوقي بدري
 
افتراضي محن سودانيه 50

محن سودانيه 50

بعد كتابة موضوع صور سودانية والذي تحدثت فيه عن الترابط و المحبة وسهولة التواصل بين السودانيين, التي لا توجد عند اي امة اخرى. يستغرب الآخرون بأننا نعرف بعضنا البعض , بغض النظر عن اختلاف التعليم او العمر.
اتاني ايميل من الابن وجدي الكردي رئيس تحرير جريدة حكايات. وتصادف في نفس اليوم ان شاهدت في قناة النيل الازرق, حلقة استضيف فيها وجدي الكردي واثنين من رؤساء التحرير, وتطرقوا لظاهرة الشجار والهجوم على الفنانين وبين الفنانين. ومشاكل الوسط الفني.
الابن وجدي يقول لي, انه كان على وشك ان يكتب مقالا عن ضياع المحبة بين السودانيين, و جاءه مقالي . وغير رأيه . ..
من المحن السودانية , ان السوداني يشتم بلده وحكومته ورؤساءه وسفارته. بس لو زول غير سوداني, لمح ليهو او انتقد اي حاجة في السودان قد يذبحه وهو مقتنع بأنه على حق.
بعد مؤتمر الائات الثلاثة في الخرطوم , كان هنالك مؤتمر المغرب, لرؤساء الدول و رؤساء الوزارات. . وبعد اليوم الاول والذي كان يوم الافتتاح , والملوك و الرؤساء, ,كان في اليوم الثانى يوم رؤساء الوزارات. واصر الازهري على المشاركة. وحدثت مشكلة بين الازهري و المحجوب. و لقد ذكر المحجوب في كتابه الديمقراطية في الميزان هذه الحادثة.
وطلب بعض الرؤساء من ناصر ان يتدخل. وقال ناصر بأنه عاش في السودان ويعرف ان السودانيين لا يسمحون لأي انسان بأن يتدخل بينهم. فبصحبة عبدالحكيم عامر امام سينما كلوزيوم شاهدوا مشاجرة بين اثنين من السودانيين. واخذ احدهم حجرا وكسر اسنان الآخر . وكضباط ومقاتلين وحكام ارادوا التدخل. فقال لهم المضروب انتو دخلكم شنو يا حلب.
كل الشعوب تعطيك احسن وجه في الاول. ثم يظهرون اسوأ و اسوأ و اسوأ . ولكن السودانيون وبعض الجنسيات الاخرى, يعطونك اسوأ وجه في الاول. ولكن من تشتبك معه في حادث سير او شيء ما, و يعرف انك ابن جيران خالته...او ان شقيقه زميل دراستك حتى يتغير السوداني 180 درجة. والآخرون قد يقولون (ايه يعني انت بتعرف اخوي).
انا لا اعرف اي امة اخرى تقف الوالدة وتدعو على ابنائها ب (يقص رقبتك او الاقيك قندراني يهرس كبدتك زي ما هرست كبدتي.....يقطع مصارينك...يجنننك زي ما جننتني يخليك تجري عريان في الشارع). اختي فاطمة بدري رحمة الله عليها كانت تدعو على ابنها المعز وتتفنن في الدعاء. و لاتطيق مفارقته. وعندما يقضي معنا ليلة واحدة , وهو في عمرنا. تبادره ب مالو وشك مختوف. الى ان قال لها اخي الشنقيطي رحمة الله عليه. آآي نحنا بيتنا ده ما فيهو حدي.
زوجتي السودانية في السويد هنا تتفنن في الدعاء على ابناءها. ولا تقبل حتى عندما ارفع انا صوتي معهم. و لا تتحمل اذا اصاب احدهم صداع خفيف. ده حالنا مع بلدنا نداعي فيها ليل و نهار . وليس عن كراهية بل عن حب صادق...
صديقي صلاح عبدالجليل من امبدة حكى ان اخته قد قاطعت جارتها, وصارت بينهم عداوة. لأن الجارة فتحت الباب ووجدتها واقفة في وسط الحوش, وترفع يديها بالدعاء فوقفت بجانبها و رفعت يديها قائلة (الله يتم مرادك ويحقق مناك ويسوي الطلبتي) والمقاطعة كانت بأن السيدة التي ترفع يديها كانت تدعو على ابناءها. وحتى بعد الاعتذار و التوضيح لم تقبل الام. وحسب فهما انها كأم لها الحق في ان تدعو على ابناءها. لأن الله, حسب فهما, لا يقبل دعوة الام. ولكن يقبل دعوة الآخرين حتى لو كانت النمرة غلط.
فهمنا عن الله غريب. و السودانيون يتعاملون مع الله وكأنه شخص يعرفونه..احدى الجارات كانت تحضر قبل الذهاب للحج وتودع امي. وكانت امي تطلب منها ان تدعو الله في الكعبة بأن يرزق شقيقي الشنقيطي بطفل..وترجع الجارة وتقول انها قد دعت لي بطفل..وفي النهاية غضبت امي ..قائلة شوقي ده كتلتيهو مليتيهو اولاد..انا بقول ليك شنقيطي..
بابكر بدري ذكرفي تاريخ حياته أنه قرأ سورة الاخلاص الف مرة في المقابر روح صديقه وجاره محمد احمد البرير. وعندما ذهب للمأتم وجد العم محمد احمد البرير و المتوفي كان احمد البرير ..فطلب منه العم محمد احمد البرير ان يحول الالف سورة الى احمد البرير...
هنالك قوانين وطريقة تعامل في السودان لا تتواجد في مكان أخر. مصلحة الطرق و الكباري كان عندهم عطاء في عام 1987 لتوريد مباني جاهزة للمصلحة .وكانت معي شركة ايطالية . وتعبنا وشقينا وبعد سفر و ترحال وهوتيلات رجعنا الى المكتب فرحين بعد ان سلمنا مظروف كبير عبارة عن عدة كيلوغرامات. وبعد فترة اتى شاب قصير القامة اسمه جحا . وكان يعرف شقيقي الشنقيطي. وعندما تكلم عن العطاء وقلت له (ايو يا اخي انحنا قبل شوية سلمنا ظرف كبير فيهو كل الرسومات وضمان بنكي اوروبي ودفعنا الرسوم.) فقال لي ...ما هو ده المخوفنا...
ووضح ان ابن عمه ويحمل اسم نفس العائلة وهو مسؤول في المصلحة . وانهم كانوا يريدون ان يعطوا العطاء لشركة كويتية كإكرامية لكي يفرح الكويتيون. لأن الكويتيين سيمولون الطرق و الكباري في السودان. وعرفت من شقيقي الشنقيطي ان السيد جحا المدير انسان لا يرقى اليه الشك. فوافقت على سحب مظروفنا. ولم يفهم الايطالي شيئا. و ارغى و ازبد. واستغرب عندما قلت له انني لم اقابل المدير و انني اثق بكلامه. وسنضحي بكل الجهد و المصاريف. لأن هذه هي طريقة المعاملة في السودان.
في سنة 1984 ذهبت الى تشيكو سلفاكيا وصحبني الاخ ارصد حمد الملك رحمة الله عليه. و الغرض كان التحصل على وكالة من شركة تشيكية متخصصة في معدات الطباعة و ماكينات الاوفسيت وقطاعات الورق والشرشارات و الخرامات. وبعد جهد اقنعتهم بالتخلي عن الزبون القديم في السودان, والتعامل معنا. خاصة و انا اعرف اللغى التشيكية. فوافقوا لأن الوكيل القديم لم يتصل بهم لعدة سنوات.
وعندما وضعوا الاوراق و الاتفاقية كنت على وشك ان اوقع. عندما لاحظت عنوان الوكيل ...العباسية شارع الاربعين صندوق بريد 6 دكان جعفر سليمان. و انا لم اكن اعرف ان هنالك صناديق بريد في دكان جعفر, الذي هو من طابقين. وهذه المنطقه فى العباسيه تعتبر محور حياتى ..فوضعت القلم و نفضت يدي عن الامر. وكنت لا ازال مهزوزا من العنوان. وكنت اتخيل الوكيل الذي لا اعرفه من اهل العباسية يقابل اهلي او اصدقائنا في العباسية ويقول ليهم شوقي قلع وكالتي..
ومن المؤكد ان كل انسان كان سيلومني و لن اجد اي عذر. وهذا لا يحدث الا في السودان
كنت ادخل مع صديقي فريد العراقي بعض الدكاكين, او معارض الاثاث . و يكون المالك عراقي. ويتقابل العراقيون مع بعضهم البعض, بكل برود وعدم اهتمام. والى الآن اجد انا صعوبة لافهم. كيف يتقابل الآخرون بدون اهتمام؟. فحتي في الدول التي تمتلئ بالسودانيين فما ان تدخل المحل ويكون فيه سوداني حتى تحس بذبذبات . وكأن هنالك ما يدغدغ قلبك. و الى الآن فلا يمكن ان تجد مغتربا لم يأت عن طريق مساعدة صديق او قريب. وهو بدوره يحس بإلتزام نحو اهله , بمعارفه وجيرانه و زملاء دراسته. وهو ملزم بأن يساعدهم في بداية اقامتهم. فأيمنا نذهب نجد اهلاً وسط السودانيين ويحيطوننا بكرمهم .
اللذين يتشدقون بالوطنيه وحب الوطن وان بلادهم هى احسن بلاد الارض وانهم خير من انجبت البشريه , من منهم يمكن ان يطرق باب مواطنيهم فى اى مكان فى العالم ويجد المساعده والاهتمام بدون سابق معرفه .؟.
بالرغم من ان السودانيين اول من اتى للخليج. فلم يكونوا الثروات الطائلة. لأنم لم ولن يكونوا مسكونين بهوس تكوين الثروة بأي طريقة. و التزاماتهم نحو اهلهم تجعلهم يفكرون فقط في السترة. و اهم مظاهر السترة ان توفي بإلتزاماتك نحو الآخرين. صديقي احمد عبداللطيف حمد بالرغم من انه كان متزوجا من اوروبية وهو اب الا ان فى مسكنه لا يقل عن ساكنين بصفة دائمة. خاصة من اهل مدني. و هذا غير ممكن عند الآخرين.
في يونيو 1966 تعرضت طائرة سودانير لعطل. وقضينا يومين في فندق اتلانتيك بالقرب من مطار اثينا ..واكثر الذين كانوا يشتكون من الحر المطعم بالرطوبة كانوا السودانيون من اصل يوناني. وكانوا يقولون (ده حر ايه يا اخي. ما يودونا بلدنا يخلونا نرتاح) وكانوا يحذروننا قائلين خدوا بالكم اليونانيين حرامية ما زينا نحنا السودانيين.
وكنت اخرج مع طالب الطب عزت وكنا نلاقي اليونانيين الذين كانوا في السودان من قبل وسكن اغلبهم بالقرب من المطار.. و يستوقفوننا فرحين برؤيتنا . وكانوا يحذرونا كذلك ويقولون انهم عندما يخلو اي منزل بالقرب منهم يسعون لتوفيره لليونانيين السودانيين. وكان هنالك فندق يحمل اسم السودان في اكبر ميدان في اثينا. و قديما كانت اشارات لمرور في الخرطوم مكتوبة بالعربية و الانجليزية و اليونانية..
الاخ محمد عبد الجليل ذكر لي انه عندما كان في السودان كان يسوق في شارع السيد علي في امدرمان متجها نحو النيل ومن الشارع الذي يأتي من فريق السيد المحجوب, وهذا شارع ترابي و لم يتوقف صاحب السيارة وكاد صديقي ان يصطدم به. ونزل الرجل وهو هائج. فقال صديقي صغير السن بأنه ترك السيارة بينه و بين السائق الآخر. و اراد ان يشرح له بأنه مخطئ . وكان الرد (دي حلتي انا و انا بسوق قبل ما يلدوك) وعندما قال صديقي محمد لكن يا خال انت جاي من التراب, وده شارع ظلط. تغير تصرف الرجل 180 درجة بسبب كلمة يا خال. وسأله انت ماشي وين؟. وعندما عرف بأنه يبحث عن بيت البكا سأله عن صلته بأهل البكا وعندما عرف انهم اهله. صحبه الرجل الى بيت البكا و صار يتحدث عنه بولدنا محمد لأنه يعرف اهل البكا. هكذا السودانيون. كلمة واحدة ترضيهم ونص كلمة ممكن يقتلوك.
اخي احمد عبداللطيف حمد من مدني كان ضابطا في دفاع ابوظبي. وهو شارب دخل في حادث حركة. هذا في السبعينات. كلمة واحدة من البوليس, شتم اي حاجة. لدرجة انو في المحكمة المحامي سأل البوليس الراجل ده قال شنو ..قال لهم شتمني وشتم ...وقال فيهو كلام كلام لا يمكن ان اقوله . بعد ايام كان القاضى يبحلق فى وجه احمد . وكان رد احمد عاوزنى اقوم اطلع د .... ابوك . فضحك القاضى قائلاً لماذا انتم السودانيين بهذه الحده .
بعد ذلك بفترة صار احمد ملكي و في منتصف الثمانينات عمل حادث مع دكتور مصري في الشارقة. كلمة من الدكتور المصري, و الدكتور اكل دق لا سمع بي لا شافو. بحثت عنه لأنه كان عندنا عمل مشترك و يحتاج مواصلة من احمد..وضاعت الشغلانة.. وبعد تعب اتصلت بالشيخ فيصل القاسمي, الذي كان وقتها رئيس الديوان الاميري. فقال لي ان احمد في السجن. العملو احمد مفروض يبعد. لكن ما حا نبعدو. بس حا ينجلد لأنه احد ابناء عمي جلد حتى يسري القانون على الجميع. وعرفت فيما بعد من شيخ فيصل . ان احمد اخد الجلد (يا ريال كانهم يضربون الارض, ما اتحرك) . المواطنون الذين جلدوا مع احمد كانوا يصرخون تبت وحرمت. ويجبروهم بالقوة على اكمال الجلد..

شقيقي الشنقيطي كان يقول عن احمد انه اسرع من يطلع جزلانو . ولمن يكون عندو فلوس يا ادفع هو او تقدر تدقو. في الحقيقة انا مدان لأحمد بأنه هو الذي فتح لي العمل التجاري الذي ادخل عمولات المليون دولار..في احدى المرات كانت له عندي حوالي 400 الف دولار. وهذا في اول الثمانينات. و انا تخوفا من الضرائب السويدية, كنت اودع الفلوس في حساب احد اقربائي.
و قريبى له ايادي بيضاء علي و على مئات البشر. و الرجل صرف عشرات الملايين من الدولارات و عالج وعلم وساعد واوقف رجالا على ارجلهم. وكمتبه في الخرطوم كان يمتلئ بالزوار. وكنا نسميه العيادة الخارجية. وكان بحق بئر ماء عذب للآخرين.. و الرجل مر بظروف, فقام بالتصرف في فلوس احمد وفلوسي. وعندما اخبرت احمد لم يلمني. حتى ولم يقل انا دخلي شنو ولا حتى انا عاوز حقي.
وبعد فترة قال لي و الله لو دخلت علينا فلوس, ندي اخونا فلان ويقصد الشخص الذي تصرف فى الفلوس. ولم يتطرق ابدا للفلوس. وفي النهاية الفلوس لم تبق لأحمد ولم تبق لي. فمن المحن السودانية اننا لن نتعلم ابدا كيف نمسك الفلوس, وكيف ننميها مثل الآخرين. وبعض السودانيين يقول عن افتناع كامل, الفلوس شنو, ما وسخ ايد ياخي..
احمد وكثير من السودانيين جمعتنا ظروف الدنيا و صاروا الينا اقرب من اشقاءنا. وعندما مات شقيقي الشنقيطي عليه رحمة الله. اتصل بي احمد معزيا. فقلت له يا اخ انا مفروض اعزيك أنو شنقيطي اخوك اكثر مني..
عندما بدأت العمل التجاري في بداية السبعينات كان هنالك من المعارف و الاعمام من كذب علينا. وقال انا يا ولدي فاضي وما مشغول بأي حاجة. ونحنا عايزنكم تنجحوا ..اتصل بينا لأي شيء .ولو عاوز معلومات او عطاءآت اسألنا.ولقد ساعدونا وقدموا لنا المشورة..وسعوا لأمورنا ولم يكن يطلبون اي شيء. وكانوا مشغولين ومجابدين.الا انهم ضحوا بوقتهم ولم يكن يتوقعون حتى كلمة شكر. ومن لم يستطع المساعدة كان يدعو لنا بالخير...
فس سنة 1988 فزنا بعقد وكانت الشركة الفائزة شركة بريطانية كبيرة. وكان من المفروض ان يدفعوا لنا مليون جنيه استرليني. وكان الاتفاق ما يسمى (اون سلايدنق سكيل). بمعنى انهم اذا طلبوا منهم اي تخفيض كعادة الدول العربية فسيعطون تخفيض من عمولتنا. و احمد كان من المفروض ان يقابل مندوب الشركة ويطمنه بأن العقد جاهز للتوقيع. و ان لا يعطي اي مليم تخفيض. ولكن احمد لم يظهر لأنه كان في قعدة استمرت 9 شهور. و هذه احدى المحن السودنية .
وحتى الخليجي صاحب شركة السيارات كان محتارا. وكان يقول انتو السودانيين عندكم سوالف . لأن الذي دفعه احمد كإيجار عربة واقفة, كان اقل قليلا من سعر عربتين... وكنت انا اتصل و لا حياة لمن تنادي. ووقتها احمد كان يسكن في فيلا من طابقين ونصف تواجه البحر في الشارقة وامامها مباشرة نادي السيدات. و الاصدقاء يأتون ويذهبون, خاصة الزوار من مدني . واحمد راكب راسو ما يرد وليس هنالك من يستطيع ان يواجهه.
واعطى الانجليزي الشفقان 10% تخفيض. و كان احمد يقول للضيوف ما تردوا علي التلفون انا عارفو ده شوقي. الى ان اتصل بي الاخ عصام ابوقرض ليقول لي بأن احمد مدور ليهو كم شهر . و انا قد تعرفت بعصام ابوقرض عن طريق احمدعبداللطيف. واذكر انني ذهبت لتعزيته في وفاة والده في عام 1987 في مدني.
وفي النهاية اعطتنا الشركة الانجليزية مائة الف جنيه استرليني عطية مزين..و كعادة السودانيين, احمد لا يهتم. فالضيوف اهم..المحنة انو نحنا السودانيين بنعتبر اي شيء رجالة واي ضيف مرحب بيهو ...وممكن تخلي شغلك عشان خاطرو..
بعد 7 سنوات من تلك الحادثة كنا في منزل الاخ عبدالمنعم مالك بشير في الشارقة . فقام احمد بلومي لأنني لم اسمع كلامه في موضوع معين..فقلت له يا احمد انت عشان ترسل الجماعة الى عجمان يجيبوا الويسكي , اجرت عربية لمدة يوم واحد وقفت قدام بيتك 9 شهور . فنظر الي محتارا. وقال لي وانت عرفت من وين؟. فقلت له لأنني الذي استلفت الفلوس لكي ادفع ال 45 الف درهم . فقال لي بالله ده انت الدفعتها..فقال له عبدالمنعم, يعني انت لمن طلعوك من السجن ما سألت الدفع القروش منو؟..
فقال احمد وطيب هو ليه ما كلمني؟. ما هو الغلطان. انا جوني يوم رأس السنة وقالو لي القروش اندفعت وممكن تمشي بيتكم و محمد طه الفيل كان منتظرني برا اداني شوية فلوس ومشيت قضيت راس السنة..اسأل ليه؟..
عندما سألني عبدالمنعم ليه ما كلمتو ..قلت له اكلمو ب شنو ..ده اخوي و القروش دي كلها هو السبب فيها..و انا قدر ما اعمل ليهو ما ممكن اجازيهو. وطبعا كالمحن السودانية لا يمكن ان تقول له هذا صديقي و انا احبه. لأن هذا خطأ حسب الفهم السوداني..
وانا كان همي الاول انو احمد ما يقضي راس السنة في السجن..وكان هذا في رأس السنة 90 -91 .
في الثمانينات كان احمد يسوق سيارة وفجأة قال لي ممكن نمشي عجمان نجيب لينا حاجة. فقلت له مافي مانع. و ان كنت انا لا اشرب .فعمل لفة غير مسموح بها ودخل بالغلط في شارع..و عندما وصلنا محل الشراء في عجمان اتى عربي متحمسا وهو يصرخ يا سوداني ايش بيك..فأنتفض احمد بشراسته المعهودة بالرغم من صغر حجمه. ولو لم امسكه لكان قد ضرب العربي..فتراجع العربي. وقال ان احمد كاد ان يصطدم بسيارتهم . وفجأة يجلس العربي على الارض ويضحك. احمد قال له ياخ انحنا لمن نكون جايين المحل ده لا بنسمع لا بنشوف. وذهب العربي لكي ينادي صديقه لكي يسمع ما قال احمد. وضحك الاثنان مقهقهين واشتروا ما يحتاجون وودعونا ضاحكين..
المثل السوداني يقول القهوة البورت القيفي. و القيفي سهل ضخم في البطانة. ومع بداية الرشاش الم بالشكرية بعض الضيوف وكانوا كالعادة يولمون لهم وقبل ان ينطلق الضيوف في الصباح يبدأ شرب القهوة وتستمر الونسة. وبعد اسابيع شربت الارض الماء ونمت الحشائش وكبرت وبار القيفي. و القيفي يماثل القبوب بالقرب من السوكي. وتلك مناطق الضباينة..و شيخ الضباينة هو ود زايد صاحب القدح المشهور. الذي كان يحتاج لأردبين لكي يمتلئ. وعندما غنمه الخليفة عبدالله التعايشي لم يجدوا جملا ليحمله فأضطروا الى قطعه..
احد السودانيين في براغ الذي كان يتسمع الاخبار وينقل الاكاذيب. فبالرغم من انه من مدني كذلك الا ان احمد قطع جزأ من اذنه وربما لكي يمنعه من التصنت!!..و لا يزال السوداني عائشا بأذنه المقطوعة..
كثير من السودانيين مثل احمد لا يتمسكون بالدنيا ولا يهمهم المال. واي كلمة في غير موقعها مهما كبر الآخر حجما او مركزا لا يهتم السودانيين امثال احمد....
لقد قال الاستاذ الحردلو

تقولي شنو... تقول لي منو

انحنا الليلة عندنا وبكرة ما بيهمنا

وعندنا الكبير الجمل...ولمن تزنق وكثيرا ما تزنق...نقول الحمدلله و انا الليلة احسن من امبارح..
احد شيوخ الخليج ربطتنى معه صداقه منذ صغره . وكونا شركه باسمه لم يدفع فيها مليماً . بل اعطيناه مليون درهم هديه . وكان له فندق قام الهنود بشبه الاستيلاء عليه . فتولى احمد امر الفندق وكرس كل جهده ووقته حتى صار الفندق شيئاً يذكر . وأتى بابنه عبد اللطيف الذى يتكلم ثلاث لغات اوربيه بطلاقه متناهيه , زائداً العربيه . وصار يدير الفندق . وعبد اللطيف كان الاول فى الشهاده اليوغسلافيه . وعندما عرضوه فى التلفزيون سألوه ما هو شعورك كيوغسلافى واول الشهاده . رده كان انا سودانى .
قبل سنوات اتصل بى الشيخ . وشكا بأن احمد قد شتمه . فقلت له ياخى احمد راجل عاوزنى اعمل ليهو شنو . وبعد ايام اتصل بى مدير الشركه السودانى . وقال لى ياخى الشيخ قال ما عندك حاجه فى الشركه . فواصلت الحديث فردد نفس الجمله لانه حسب اننى لم اسمع . فقلت له ياخى انا سمعته . فاتصل بعد فتره وقال لى الشيخ كان زعلان من احمد لكن لو انت حنستو ما فى مشكله . فقلت له انا شوقى ود امينه ما بحنس راجل . وكاتب العدل السودانى جانى فى المكتب وقال لى احسن تكتب عقد لان الدنيا ما معروفه . فرفضت وقلت له اننى اتعامل مع خواجات وكل انماط البشر . بتكفينى كلمه .
واللذين يقولون ان السودانيين كسالى هم مدفوعون بان السودانيين لم يكدسوا الثروات . ولكن نحن نتصرف بمفهومنا واخلاقنا السودانيه التى لن يفهمها الآخرون .
التحية ...
شوقي بدري
ع.س...



التوقيع: [frame="6 80"]

العيد الما حضرو بله اريتو ما كان طله
النسيم بجى الحله عشان خاطر ناس بله
انبشقن كوباكت الصبر
وتانى ما تلمو حتى مسله
قالوا الحزن خضوع ومذله
ليك يا غالى رضينا كان ننذله



[/frame]


http://sudanyat.org/maktabat/shwgi.htm

رابط مكتبة شوقي بدري في سودانيات
شوقي بدري غير متصل   رد مع اقتباس
قديم 20-06-2010, 10:21 PM   #[2]
خالد الحاج
:: كــاتب نشــط::
الصورة الرمزية خالد الحاج
 
افتراضي

اقتباس:
المشاركة الأصلية كتبت بواسطة شوقي بدري مشاهدة المشاركة
..احدى الجارات كانت تحضر قبل الذهاب للحج وتودع امي. وكانت امي تطلب منها ان تدعو الله في الكعبة بأن يرزق شقيقي الشنقيطي بطفل..وترجع الجارة وتقول انها قد دعت لي بطفل..وفي النهاية غضبت امي ..قائلة شوقي ده كتلتيهو مليتيهو اولاد..انا بقول ليك شنقيطي..
ع.س...

والله بس جارتكم غبيانة ساكت
هو إنت في دي داير ليك دعاء ؟
ربنا يديك الصحة يا زول وتخلف .. ويخليهم ليك ...

بعدين بالله شوف البراءة بتاعة الوالدة هنا ... يعني الله البستجيب للدعاء ده ما بيفرز المقصود منو ؟
أسه زي ديل يا شوقي يوم القيامة بحاسبوهم كيف ؟
والله ديل جنتهم مضموووونة ...



التوقيع: [align=center]هلاّ ابتكَرْتَ لنا كدأبِك عند بأْسِ اليأْسِ، معجزةً تطهّرُنا بها،
وبها تُخَلِّصُ أرضَنا من رجْسِها،
حتى تصالحَنا السماءُ، وتزدَهِي الأرضُ المواتْ ؟
علّمتنا يا أيها الوطنُ الصباحْ
فنّ النّهوضِ من الجراحْ.

(عالم عباس)
[/align]
خالد الحاج غير متصل   رد مع اقتباس
قديم 21-06-2010, 11:12 AM   #[3]
عثمان
:: كــاتب نشــط::
 
افتراضي

يااخ جميل وإنت بتكتب بمزااج
يا عم بتخلي البعوضة ترقص
نعم إنو حياتنا فيها كثير من المحن
لكن رائعة جدا إنو ما فيها أي حسابات
ياخي الحياة بكترابتا وعجاجة سمحة خلاص

سلامات يا عم شوقي



عثمان غير متصل   رد مع اقتباس
قديم 22-06-2010, 06:55 AM   #[4]
عبد العزيز بركة ساكن
:: كــاتب نشــط::
الصورة الرمزية عبد العزيز بركة ساكن
 
افتراضي

دي كتابة جميلة و حلوة وتعيد للزول ثقته بنفسه و بجماله كسوداني

والله مدهش



عبد العزيز بركة ساكن غير متصل   رد مع اقتباس
قديم 22-06-2010, 02:05 PM   #[5]
قوت القلوب
:: كــاتب نشــط::
الصورة الرمزية قوت القلوب
 
افتراضي

سعادة العم شوقي بدري سفير السودان بين بلاد الله الواسعة
وقلوب الخلق الوهيطة
انت مؤرخ عظيم
وشاهد شاف اجمل االناس واللحظات
ربنا يمد في ايامك
ونستقي من بين سطورك حكما ونورا
سجدت لله شكرا اني سودانية

ولو ماكنت سوداني واهل الحارة ما اهلي



قوت القلوب غير متصل   رد مع اقتباس
قديم 23-06-2010, 11:04 AM   #[6]
شوقي بدري
:: كــاتب نشــط::
الصورة الرمزية شوقي بدري
 
افتراضي

عزيزي خالد الحاج
بالرغم من المحن يظل أجمل ناس هم السودانيون . وليس هنالك من هو أنقي سريرة والطف معشرا منهم . المشكلة الوحيدة أنه هنالك من يريد أن يدخلني في زمرة العرب ويرفض أننا سودانيون سودانيون ، سودانيون.
لك التحية .



التوقيع: [frame="6 80"]

العيد الما حضرو بله اريتو ما كان طله
النسيم بجى الحله عشان خاطر ناس بله
انبشقن كوباكت الصبر
وتانى ما تلمو حتى مسله
قالوا الحزن خضوع ومذله
ليك يا غالى رضينا كان ننذله



[/frame]


http://sudanyat.org/maktabat/shwgi.htm

رابط مكتبة شوقي بدري في سودانيات
شوقي بدري غير متصل   رد مع اقتباس
قديم 23-06-2010, 11:06 AM   #[7]
شوقي بدري
:: كــاتب نشــط::
الصورة الرمزية شوقي بدري
 
افتراضي

ابني الحبيب عثمان
شكرا علي مداخلتك
أهلك السودانيين هم أروع ناس، وحتى محنهم وقوت راسم جميلة وحلوة ، إلا أنها تسبب الضياع ووجع الراس. والكاتب ميجيل سيرفنتي الذي كتب -دون كيشوت- لو عاشر السودانين لاحتار.



التوقيع: [frame="6 80"]

العيد الما حضرو بله اريتو ما كان طله
النسيم بجى الحله عشان خاطر ناس بله
انبشقن كوباكت الصبر
وتانى ما تلمو حتى مسله
قالوا الحزن خضوع ومذله
ليك يا غالى رضينا كان ننذله



[/frame]


http://sudanyat.org/maktabat/shwgi.htm

رابط مكتبة شوقي بدري في سودانيات
شوقي بدري غير متصل   رد مع اقتباس
قديم 23-06-2010, 11:08 AM   #[8]
شوقي بدري
:: كــاتب نشــط::
الصورة الرمزية شوقي بدري
 
افتراضي

اقتباس:
المشاركة الأصلية كتبت بواسطة عبد العزيز بركة ساكن مشاهدة المشاركة
دي كتابة جميلة و حلوة وتعيد للزول ثقته بنفسه و بجماله كسوداني

والله مدهش
النبت العزيز عبد العزيز بركة ساكن

المدهش انت ده . ما تتهم الناس ساكت . استمتع بكتاباتك وعمقها .
والله يا عبد العزيز أهلنا السودانيين عوارتهم ذاتها حلوة . بس قوة الراس مرات بتفوت حدها .
لك التحية



التوقيع: [frame="6 80"]

العيد الما حضرو بله اريتو ما كان طله
النسيم بجى الحله عشان خاطر ناس بله
انبشقن كوباكت الصبر
وتانى ما تلمو حتى مسله
قالوا الحزن خضوع ومذله
ليك يا غالى رضينا كان ننذله



[/frame]


http://sudanyat.org/maktabat/shwgi.htm

رابط مكتبة شوقي بدري في سودانيات
شوقي بدري غير متصل   رد مع اقتباس
قديم 23-06-2010, 11:10 AM   #[9]
شوقي بدري
:: كــاتب نشــط::
الصورة الرمزية شوقي بدري
 
افتراضي

اقتباس:
المشاركة الأصلية كتبت بواسطة قوت القلوب مشاهدة المشاركة
سعادة العم شوقي بدري سفير السودان بين بلاد الله الواسعة
وقلوب الخلق الوهيطة
انت مؤرخ عظيم
وشاهد شاف اجمل االناس واللحظات
ربنا يمد في ايامك
ونستقي من بين سطورك حكما ونورا
سجدت لله شكرا اني سودانية

ولو ماكنت سوداني واهل الحارة ما اهلي
الابنة قوت القلوب
لك التحية والمودة
شكرا علي مداخلتك .
إذ اتسع الوقت سأكتب لك عن أشياء سودانية تكاد أن تكون أساطير ولن يفهمها الآخرون .
دمت عزيزتي وتحياتي المذدوجة .



التوقيع: [frame="6 80"]

العيد الما حضرو بله اريتو ما كان طله
النسيم بجى الحله عشان خاطر ناس بله
انبشقن كوباكت الصبر
وتانى ما تلمو حتى مسله
قالوا الحزن خضوع ومذله
ليك يا غالى رضينا كان ننذله



[/frame]


http://sudanyat.org/maktabat/shwgi.htm

رابط مكتبة شوقي بدري في سودانيات
شوقي بدري غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 09:51 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.