داحش .. هُش .. حَاااااو ..!!
- نفسي أعرف الشباب البمشوا ينضموا لي تنظيم "داحش" ديل دايرين يصلوا لي شنووو ..؟
- الجنة ..؟
- طريق الجنة ما بالتكفير والارهاب والقتل ..!
- الله سبحانه وتعالي قال
" من يقتل مؤمنا متعمدا فجزاؤه جهنم خالدا فيها وغضب الله عليه ولعنه وأعد له عذابا عظيما"
والرسول صلي الله عليه وسلم قال
" من رايتموه يرتاد المساجد فأشهدوا له بالايمان"
كل اركان قتل المؤمن "عمدا" اكتملت عندما يأخذ "الداحشي" حزامه الناسف ويدخل المسجد ليفجره في نفسه ومن حوله ..!
- اها جنة شنو العشمان فيها بعد ده .. انت سقت المصلين الي الجنة لكن رميت بي نفسك في جهنم خالدا فيها ..!
- ده كلام الله سبحانه وتعالي عشان ما يجي واحد ناطي يشكك في الكلام ده ..!
- تعالوا تاني نشوف الشاب لما يكون ماشي لي داعش بعمل شنوووو ؟
- نحن بنعرف انو الزول لما يكون داير يعمل حاجة كويسة ومتأكد من انها صاااح بعملا بي كل وضوح وهو رافع راسو وفخور بيها ..!
- وبنعرف انو الزول كمان لما يجي يعمل حاجة غلط وما كويسة .. بعملا في الخفاء وبدسدس من الناس ويتضاير منهم .. زي لما يكون ماشي يزني او ماشي يمارس حاجة ماكويسة ..!
وممكن يكضب عشان يلقي الطريقة البيعمل بيها حاجتو دي او عشان يلفت انتباه الناس عن فعلتو ..!
- يلا الشباب الماشين ينضموا لي داعش ديل ليه بتضايروا وبتخفوا ويدسدسوا طالما هم مقتنعين بي انو البعملوا فيهو ده صااااح .. ليه بكضبوا عشان يصرفوا انتباه الناس عن فعلتهم ..؟
- الواحد فيهم يقول لي اهلو ماشي أقرأ مع صاحبي .. او صاحبي ابوه مات في الحتة الفلانية وانا ماشي ليهو .. عشان يدي نفسوا فرصة يوم او يومين لحدي ما يتخارج .. انت اصلا لو مقتنع بي صحة الفكرة لي ما تقيف قدام اهلك وراسك مرفوع وتقول ليهم انا ماشي انضم لي "داحش"
- انت حاجة بديتها بالكذب تتفتكر فيها خير ..؟
- انت كده خلعت عن نفسك توب الايمان .. تعرف ليه ؟
لان النبي صلي الله عليه وسلم عندما سألوه "أيكذب المؤمن..؟"
قال : لا ...!!
المؤمن لا يكون كذابا ..!
وانت بي كذبك علي اهلك تكون خلعت عن نفسك صفة الايمان ..!
تعرف انت بديت مشوارك "الداحشي" بي كذبة ليه ..؟
لانو بالكذب انت نزعت عنك صفة الايمان .. ولايمكن ان تنضم "لداحش" وانت مؤمن ..!
- عشان كده ايمانك ده بتخليهو قبلو .. ايمانك ما بمشي معاك للمحلات دي ..!
- مافي مؤمن بقتل مؤمن .. والمؤمن لا يقتل النفس التي حرم الله الا بالحق ..!
- احد الذين علمت انهم تسللوا اخيرا لينضموا لـ"داحش"سبق ان دار حوار بيني وبينه .. واذكر انه قال لي مرة :
"الرسول صلي الله عليه وسلم أسمه الضحوك القتَال"
- ياااااراجل ...!
- نحن قرينا في السيرة انه صلي الله عليه وسلم كان "ضحكه" تبسما ..!
- وانه كان صلي الله عليه وسلم اشد حياءا من البكر في خدرها
- الرسول صلي الله عليه وسلم لم يبعث قتالا
- انه الرحمة المهداة
- وانه صلي الله عليه وسلم ارسل "رحمة" للعالمين ..!
- هكذا وصفه الله سبحانه وتعالي بقوله :
" وما ارسلناك الا رحمة للعالمين"
- شفتوا ليكم رحمة بتقسو ..؟
- شفتوا ليكم رحمة بتقتل ..؟
- ناس "داحش" ديل بيعملوا لي الشباب شنو ؟ ماهي المغريات التي يقدمونها لهم لينضموا لهم .. الموضوع اكبر من اقناع بالمنطق او الحجة .. لان الواضح جدا ان "داحش" لا منطق لها ولا حجة ..!!
- انهم يسيطرون علي عقول الشباب بطريقة ما ..!
ماهي هذه الطريقة التي تجعل احدهم فاقد الارادة لدرجة ان يفجر نفسه ليقتل عددا ممن يشهدون بـ"لا إله الا الله محمد رسول الله" ؟
- هل هذه طريقة قويمة لنشر الدين او للدفاع عن الدين ..؟
- يبدو ان وراء الأكمة ماوراها من خفايا واسرار تحتاج للمزيد من الدراسة والتقصي ..!
- ان ما تقدمه "داحش" لمحاربة الاسلام والقضاء عليه يفوق ما يفعله اعداء الاسلام الحقيقون والمنافقون ومن علي شاكلتهم ..!!
و
تعريجة
عزيزي "الداحشي"
الاسلام ما بتجيهو عوجة .. العوجة بتجيك انت المرقت من الدين زي مَرْقَة القشة من العجين ..!!
و
اللهم أحفظ البلاد والعباد ..!!
|